السلام عليكم ورحمة الله وبركاته

من فتره طويله لم أكتب في المنتدى .. والسبب ما تمر به رياضتنا من أمور غريبه وفساد فاحت رائحته في كل مكان

ولكن كلما تذكرت قصه ذكرها لي أحد أصدقائي .. يزول غضبي .. و أتذكر بأن الله سبحانه يمهل ولا يهمل

لن أطيل عليكم أحبتي و إليكم القصه :

في احدى الصحاري .. وفي ليلة ظلماء .. التقى شخصان تائهان ببعضمها و شاء القدر أن يواصلان مع بعضهما رحلة

البحث عن النجاه والهرب من الموت .. الشخصان هما أبو نيه و أبو نيتين

العطش بدأ ينال من الرجلين .. حتى جاء الفرج .. فوجدا بئرا .. (( بأكمل بالعاميه تعبت ))

المهم لما لقوا البئر .. قال أبو نيتين بينه وبين نفسه (( اذا نزلت أنا ورفعت له الماء راح يمشي ويخليني تحت ))

عشان كذا قال لأبو نيه انت أنزل وانا راح انتظرك .. المهم قال أبو نيه .. اوكيه راح انزل .. نزل المسكين بالحبل ولما

ارتوى من الماء واعطى خويه فوق .. قاله باطلع .. قام ابو نيتين ورمى عليه الحبل ومشى وخلاه في البئر ..

المهم الرجال جلس في مكانه ينتظر الموت .. حتى جاء منتصف الليل .. و فجأه الا وفيه صوت اثنين فوق يتكلمون ..

الله أعلم انهم ملكين .. أو شي ثاني ما ادري .. المهم قاموا يسولفون وكل واحد يعطي الثاني أخبار الديار اللي جاء منها .. الاول قال ما فيه خبر مهم غير ان الملك في الديره الفلانيه عرض على اللي يعالج بنته من مرضها انه يزوجه البنت ويعطي اللي يبي من المال .. وشرط ان اللي يجي بدواء ولا ينفع انه يقتله .. وما في أحد عرف العلاج الى الان مع انه موجود في النبته الفلانيه .. انتهى الاول
قام الثاني يتكلم عن الديره اللي جاء منها .. وقال الناس بدأو يهاجرون منها لأن الماء صار قليل ولا في أرضها بركه مع ان فيها الجبل الفلاني وهو مليان ذهب يغنيهم للأبد ..
الان مشوا .. وجلس ابو نيه يفكر في اللي قالوا حتى الصباح .. وجاء الفرج في الصباح و مروا ناس من عند البئر و انقذوه ..
في هذي اللحظه .. راح الرجال واخذ النبته و راح للملك وعالج بنته .. وتزوجها .. وقاله الملك اطلب اللي تبي من المال .. قاله .. ما ابي من مالك شي .. بس احتاج من بعض من عمالك يساعدوني انا باسكن في الديرة الفلانيه (( مكان الذهب )) .. حاول الملك يثنيه عن قراره وقال هذي الارض هجروها أهلها وما فيها شي .. قال أبو نيه أنا قررت وما راح أرجع في قراري .. المهم راح الرجال هناك وسكن وطلع الذهب وصار من أثرياء البلد .. وصار فيه كرم ويساعد فقراء ..
نرجع لابو نيتين .. مر من عند قصر أبو نيه وسأل الناس وش هالزحمه .. قالوا له هذا الملك طيب ويساعد الناس المحتاجين .. المهم طمع الرجال ودخل عند الملك .. (( طبعا أبو نيتين تغير شكله وبانت النعمه عليه عشان كذا أبو نيتين ما عرفه ))
المهم قام أبو نيه و أكرم أبو نيتين زياده عن الناس .. استغرب أبو نيتين .. وسأل الملك .. ليش أكرمتني زياده .. قاله انت ما عرفتني بس أنا عرفتك أنا فلان الفلاني اللي تركتني قبل سنين في البئر .. وانت سبب بعد الله في هذا الخير اللي انا فيه .. المهم شرح له القصه كامله وقال الملكين يتقابلون في السنه مره وحده في نفس المكان والزمان ..
دعس أبو نيتين للبئر ونزل في البئر وانتظرهم .. المهم لما تقابلوا قال واحد منهم فيه واحد عالج بنت الملك ولقى العلاج .. وقال الثاني والذهب اللي في هذاك المكان اكتشفوه .. استغربوا .. و قالوا اكيد في احد سمع كلامنا .. قالوا ما فيه تفسير الا انه كان موجود في هالبئر .. قاموا ودفنوا البئر على أبو نيتين ..
انتهت القصه

طبعا القصه ليست حقيقيه وانما للعظه والعبره ..

حبيت أذكرها لكم .. لكي تعرفوا أن رئيس نادينا حفظه الله يسير بنيه واحده صافيه نقيه طيبه وانه سينتصر باذن الله على اصحاب النيتين من (( الأصفرين )) .. كل ما يحتاجه منا هو الوقفه الصادقه

الله يوفق الزعيم

اسف على الاطاله