هل نحن شعب....((مهايطي)) - صفحة رقم 2 - نادي الهلال السعودي - شبكة الزعيم

كلنا هلاليين · #1 16/04/2009, 08:42 PM

للاسف احنا شعب مو مهايطي احنا شعب متخلف في كل شي

في البس متخلف في التفكير في كل شي متخلف الناس تتطور

ويرتقي تفكيرها وحنا نرجع ورى والالة كثير

متعب بن زعيم الهلالي · #2 11/04/2009, 03:13 AM

أغلبية الشعب هيآط ،

مآنقول كلهمٍٍ

شغل مخك شوي · #3 12/04/2009, 05:46 PM

هل نحن شعب....((مهايطي))
ماتقدر تحكم على شعب بالملايين حسب فئة معينة
لكن تقدر تحكم على نفسك ، مثلا انا ماصار لي كم يوم بينكم وحصلت هاللقب من الصخرة !
غريب رغم اني مدحت الرجل و معجب بطريقته بالإصلاح ،ومالحق يعرف طريقة تفكيري ، صرت مثل قايم قاعد بموضوعه موقوف من يومين، صرت مسبوب من يومين!
لكن إذا أخذهـ الواحد بالعقل ، فأكيد بدر مني تصرف برد ما ، خله يظن بي هالظن،فنويت أراجع ردودي ان مالقيت بها شيء غلط، فأفهمها ان الرجال مايبيلي مناقشه لا مزح ولا غيره، فأحترم نفسي واتركه براحته وإكرام النفس هواها وهو صاحب المحل كم له بالدار وانا ضيف مالي الا كم يوم !
نفسي الشيء تقدر تطبقه على نفسك او صديقك او اخوك " اذا وصفه احد بالهياط " راجع تصرفاته اقواله افعاله وشف هو مهايطي وإلا لا، راجع حتى نفسك واختبرها
وترى سالفة مهياطي تحتمل عدة معاني
1- عند الشباب " ترى هالرجال ماعندك احد ، يعني بالعامي طقعة ونص "
2_ عند المثقفين يعني كذاااب
3-عند الحريم وخصوصا العجايز" مهايطية "خذ وخل
4- عند الصحافة والشعراء سبة تنتقص من نزاهة الرجال
5_وعند وعند وعند...................................

يعني بالمختصر المفيد معناها شين مايرفع الرأس

فلما نقول حنا شعب مهايطي وتجي الردود بالإيجاب
فــ أحنا عممنا هذا على كل سعودي << بما فيهم انت صاحب الرد بقوة ومعك حق و,و,و,و,..........
وبيننا بالمنتدى هنا عرب غيرنا
فنظرتهم لنا ومسمايتهم بتكون ..شعب طقعة ونص ! شعب كذاب! شعب خذ وخل !و,و,و,و,..........
بعدها المفترض ماترددون بكل منتدى آخر " ارفع رأسك انت سعودي " أو "فوق هام السحب "أو "ياسلامي عليكم يالسعودية " أو,أو,أو,أو,..........
لأنكم معترفين مسبقا اصحاب الردود أنكم تنطبق عليكم الأوصاف أعلاهـ

نجي للنقطتين اللي طرحهم صاحب الموضوع
على افتراض الخبر الأول صحيح
بصرف النظر عن المسميات والمنصب عبدالله عم عبدالرحمن ‘ وعبدالرحمن ولد اخوهـ
واحد سيَر على عمه بــ بيته مزرعته مخيمه ,وين ماكان , يااخي هذا ولد اخوهـ يعني من حمام الدار مايحتاج يأخذ معه واسطة ولد عمه فلان!
يااخي انت لم تسير على عمك تروح برجليك وبرأسك ماتأخذ معك الحمولة كلها ، وتسولف مع عمك صار معي كذا بالطريق وانا جاي ، وكذا بالدوام ، وكذا مع ولد عمي فلان و ولد عمنا الثاني علق بكذا وقال كذا ، " تعلمه بعلومك وين الإشاعة هنا " حبيت تستعين به و تأخذ برأيه شيء طيب " شَر علي ياعمي وش اسوي " ماحبيت انتهت السالفة سيرت على عمك سولفت معه عطيته علومك واخذت علومه.
كون الناس حاطتهم تحت المجهر "حتى القهوجي والحارس قاط أذنه " الشكوى لله من خلقهم الله " آل سعود" والناس مستأثمة فيهم مايحلى الحش و الغيبة والتلميح والتزويد إلا عليهم ، ذنبنا فيهم وحظهم بحسناتنا، الله المستعان
عندنا شايب الله يرحمه " يقول فهد مأخذ حسناتي حي ميت " وبعد فترة هو لحق فهد فالله يرحم الجميع برحمته .

شغل مخك شوي · #4 12/04/2009, 05:48 PM

الخبر الثاني دام السالفة كلها هياط بهياط << وعشان مايروح الصخرة النار بذنبي " القدح والذم في الرجال "
<< خذ العلم من مشغل مخه ، لاخالي ضابط ولااعرف مدير شرطة الخرج

زوجتي اهلها من الخرج ومأخذين استراحة اسبوع من السبت للربوع عشان الجو يروحون لمدارسهم ودوامتهم ويرجعون لها والتعب على هالسيارات
دقت علي ظهر الثلوث وقالت البنت تعبانة تعال لازم توقيعك عشان تنوم << قلت خله ابرك خلي الطمحة تنفعك وش فيها اذا انفصلت قطاع خاص و ألاقي غيرهـ ،بعدين هم اللي فصلوني وهم الخسرانين"
وصلت الخرج على العشاء وسيدهـ لمستشفى الملك خالد وقعت على التنويم وقعدت معها امها وحلف علي الخال بالعشاء " يعني ترطيب جو " فــ اتجهت معه للعفجاء ومن جيت الوضع ماهو طبيعي هالكوابرس راحية جاية وكلها مطاوعة ، لاهي سيارات هيئة ولا شرطة ، كوابرس عادية جدا وفيها مطاوعة ونظرهم ذات اليمين واليسار.
تعشينا وعينا من الله خير وطق بيلوت و وناسة انا وابو الشباب شوي وإلا يوم زانت العلوم الأستراحة اللي جنبنا طق ورقص وأغاني وسعة صدر مع هالزغاريد اللي تجر الأذن جر ولا موالات سلامة العبدالله ، آخ بس لو عزموني انا و النسيب ان يشوفون العجب العجاب " بس مالهم بالطيب نصيب"
جت الساعة واحدة أستأذنت أبسري لأهلي وراي طريق " مالك امل تطلع هالكوابرس مسكرهـ الممرات لا تروح ولا تجي ماهم جنب الأستراحة لا العغجاء فيه ممرات رملية طرق غير مزفلتة بين الأستراحة تروح السيارات وتجي من بينها كلها مسكرتها هالكوابرس واللي يلعب كورة ، واللي فارش على الأرض شاهي و بيلوت و إلا قهوة و سوالف ، من ناحية الوضع للي مثلي ومثل هالشباب خابر بلاوي يشكك ، واللي على فاله وضع طبيعي مطاوعة و مستأنسين بس الله يهديهم مسوين زحمة و مسكرين الممرات إلا ممر واحد يدخلك سيده من نهاية العفجاء لبدايتها طريق مزفلت وعن يمينه و يساره فراغات رمليه وحدهـ منها تؤدي لأستراحتنا واستراحة الربع والطق والرقص ، طبعا الأخوان ماخلوني أمر ولا منعوني بالقوة بالعكس جو معي بأسلوب حالفين إلا تقهوى " والله وراي طريق ، بس شوي امر الله يخليك " وبعد المحالف والأسئلة استقرينا على القهوة بحجة اصحصح للطريق ، وبعد ماعلمتهم انهم فصلوني نتيجة العصبية الزايدة " بعد اجنبي وينفخ علي " ونخيتهم يدورن لي لو وظيفة مخبر، و اسحب لهم نص أخوياي ، الحاجة لأم ميار والشوق ترغمني على بيعهم واحد قالهم يخنبقون !
صرت الساعة الحين اربع مرت ثلاث ساعات تؤنست معهم وناسة ، استغرب لما كنت اعتقد المطاوعة ثقلين دم صح واحد منهم كان غثيث بس الباقيين شكلهم كانوا زاحفين اول و التزموا او يبوون يتوظفون واطلقوا اللحى ، الله اعلم بس كأنهم ربعي اللي يشربون تفاح وعنب .
على ما جيت اروح اشتغلت التليفونات جا ’جا ,جا , " من هو هذا اللي جا اكيد فيه كبسة مثل ماتوقعت الوضع ماهو بخلي "
سألت اكثر واحد فيهم زاحف وش السالفة قال شخصية مشهورة بتجي للأستراحة هاذيك و بنكبس عليهم " الحمد لله ياربي يا حبيبي اللي ماراحت وقطيت وجه وإلا المرة طلبت الطلاق ماهو بس طمحت عشان فصلة " قررت اقعد فاضي ماوراي شيء "إلا كان اذبح مديري الأجنبي سابقا " شوي وإلا الموضوع يزداد تعقيد جت هسترة شبابنا والجوالات من قالهم ؟ المطاوعة يردونهم وهم "بنصور ياسر" ، هنا ولعت لمبة بمخي وعلى خويي" طقيت الميانة وصار خويي " ماقلت ياسر ، " ماحد قال لنا ياسر قالوا لنا شخصية مشهورة بس اصلا مااحد طرا لنا انه لاعب لنا عشر ساعات ننتظر مثلك توي ادري انه ياسر " صارت الكبسة ويقولون سيارة الهيئة اخذته ما شفتها لأني من غبائي مشيت لو قاعد بالأستراحة كان شفت منهو، ادق على نسيبي نااااااايم انا مخليه من ثلاث ساعات امداهـ ينام !
مشت جمهرة هالهسترة و المطاوعة وانا ورائهم وصلنا شرطة الخرج " عند الدفاع المدني وقريب من المصانع الحربية " يوهمكم بصدق سالفته" شوي وتزيد الجمهرة ومابقى احد من الشباب مادق على كل ربعه واخوانه وكل واحد معه كاميرا وهاتك يا تصوير " بس وش تصورون واحد عليه شيء ابيض مابين شورت و البرمودا وفانيله يقولون كحلي وربي اشوفها بنفسجي ومغطين وجهه ورقبته ورأسه كله بشماغ " من جاء وهو مغطى لا شافنا احد رمى عليه شماغ ولا احد فزع وغطاهـ على قولوهم ، من نزل وهو مغطى وكل الشباب ياسر بس محد قال لنا من الشرطة او المطاوعة ياسر، اللي يقول لك ودهـ مركز الهيئة واعتدوا عليهم ثمن جابوهـ هنا الساعة ست " واشغل مخي آخر مرة ناظرت الساعة كانت اربع لما قالوا جا, جا’والحين ست " بس مايمديهم كلها ساعتين بين جيته ومسكته امداهم يكبسون ويداهمون ويضفون و يودونه للمركز ويعتدون عليه ويجيبونه لمركز الشرطة !
طيب من حركوا المطاوعة حركت معهم للشرطة سيده انا وهل المهستريين طردي وراهم وراهم عليهم عليهم ..
قالوا يبون يودونه للمستشفى يحللونه شغلت مخي هي كل مستشفيين العسكري ويحلمون يعطونهم وجه ياسر ماهو عسكري ولا المطاوعة عساهم بس يعالجون مرضاهم فأكيد الملك خالد " ياحبيبتي يا بنيتي مرتفعة حرارتها من التطعيم وياغلاة ام ميار هالطموح الزعول " عندي عذر من برا الخرج وبتطمئن على هلي قبل امشي " عندكم مانع يالسلطات الخرجاوية تمنعون رجال من حلاله وين تجي بشرع الله" شوي ويطلعون لك نفس الشخص المغطى " ابوك يالذل او المسرحية الله العالم " وهالشباب طردي وراهم وادخل بحجتي السابقة وأسلم على البنت الحمدلله متطمئن من سريت البارح من الأستراحة الساعة وحدة ان حرارتها نزلت " واسلم على الأم الزعول ماعطتنا وجه تقول جب وظيفة أول وقروش ثمن تعال سلم واستلم ،
قالوا طموح ، قلت وشلون تطمح نوت تولع زوجها بالعذابي
ان اشهد انه شوكة القلب تجرج لكن عمامه"اخوانها" يقطعون الرقابي
وسيده على المختبر والكل ياسر ياسر ،طيب شفتوه لا بس كل الناس تقول ياسر ، طيب امداه يسكر ويفعل الأفاعيل وهم جا’جا الظاهر هالرجال اين كان ما صار معه وقلت ينزل حتى صرواله ، ثمن نفس المسرحية من المستشفى والرجال المغطى لمركز الشرطة ، و"أهل الخرج كلهم هاك الساعة يروون الرواية كاملة كلا من مدى حجم مخيخه وادهروا بالنت والرجال ذو الرأس المغطى صار أشهر من مشهد أعدام صدام ، مر الظهر و الناس متجمهرة و تصوير حتى فان البنات اللي بالسهرة صوروهـ"والله الفضاوة وش نبي بالسيارة وفان بعد! من قل الفانات بالخرج نعرف أي واحد هو "وتصوير لوحة سيارة واتصل على خدمة الرقم وتحرى عن المالك الحالي والسابق وعدد المخالفات المرورية ومدري وش بعد؟ " المحقق كونان " والفان الأسود اللي مصورينه حكاية ً ثانية و عضو شرف بارز جا يطالعه والرئيس يقول مالي شغل فيه إلا اذا ثبتت براءته وانهم مورطينه، وزحف ألوان وأشكال،، راح العصر وانا على دربهم سردادي مردادي تغديت بمطعم الممتاز البخاري ورجعت لهم ثاني مره وهم على حالهم متجمهرين حتى الهنود معهم تجمهروا "ولو تسأل واحد منهم كيف شكل ياسر ماعرف " ماعليش ياسر مشهور عندنا بس ابو هنود وش عرفه فيه ؟ لكن شافوا العربان متجمهرة تجمهروا مع الخيل ياسمراء.
تركتهم راحت للمقهى اللي برا قريب من حديقة الحيوانات نسيت اسمه" شيشت وعدلت هالرأس ونامت عينت من الله خير لين آذان العصر، صليت بجامع الملك عبدالعزيز ، رحت للزيارة تطمئنت على بنيتي ولعبتها ، والزعول مازالت زعول ولقيت وظيفة ولا لا ؟
طلعت قريب الآذان مريتهم وإلا هم يتحركون غريبة وش عندكم !
افرجوا عن ياسر ، شفتوه لا ركبوه وهو مغطى هاك الباص ، الباص يحرك و المهسترين طردي وراهـ و تصوير ، جلست بعدل مزاجي بدكتور مزاج وقهوة تركية ودونات شوكولاته " ياحب الزعول لها " آذان رحت المسجد وصليت وبعد الصلاة مريت المركز طلع نفس الرجل المغطى سيارة ومعه رجال عاديين لاامراء ولا سامي الجابر ولا خالد عزيزولا خرطي ، وراح وين ؟ ماعاد همني اكتشفت اني حمااااااار فاااااااضي من الساعة اربع الفجر لين الساعة سبع المغرب مالي شغل إلا أدربي دمجتي مع هل المرجج ، البنت تعبانة وامها زعلانة ، ومفصول من وظيفتي ، و مشغلني نفسي بهالرجال ذو الرأس المغطى من يكون؟ !

ما يستفاد من كل هالهياط أعلاهـ

1- كيف تغير المعاني يرجع الحق لنصابه و الثوابت مستحابه عند هذولا وهذولي
بصرف النظر كتبنا عشان ننصف ياسر ونبرئه او عشان تخطيه ونثبت عليه النتيجة واحدة "استبحنا عرضه" وهو من الثوابت بالدين كل المسلم على المسلم حرام دمه وماله وعرضه ، ياسر مظلوم الله ينصرهـ ماهو حنا ، ياسر ظالم الله يعاقبه ماهو حنا ، القضية محسومة والحكم فيها لله الذي لا تخفأهـ خافية .

2- " شفت الطويلة هاذيك اللي ترقص " مجننة كل رجال العالم مو بس ياسر فيه رجًال يحكم طويلتها بالعقل والدين والمنطق وهم قلة جدا اليوم ، وفيه رجال تحكمهم الطويلة وتومي بهم الهبايب ولا حدن درى عنهم لأنهم ماهم مشهورين ولا تحت المجهر ، أغلب اللي كتب عن ياسر من اهل النت لو قرأيت لواحد منهم تقلى طويلتها ماخلت جحر ما دوعست فيه "على ذمته و ذمة مغامراته المروية "، والحين جاي يقول قدوة وماأدري وش عنده؟ يااخي قوم نفسك قبل تقوم غيرك " واترك الخلق للخالق عبيده وهو اولى بهم "

3- ترى مالي علاقة بــ ياسر لا من قريب ولا من بعيد ولا حتى من معجبينه وان همكم تعرفون انا مع مين ؟ أقولكم مع ذيبان هاك السامي الجابر لعثرات الكرام من اخوياهـ ،، السامي عشقنا ورثناهـ من الطفولة ، بأسولف لكم عن شايبي وسامي بعدين ، الله يرحمك يا ابوي ، ويسمح دروب سامي ..

4- الله لا يفضحني ولايحطني على لسانكم ولا تحت اقلامكم ولا احرفكم الكيبوردية ولا عدسات تصويركم ، اللهم احفظني انا واهلي وذريتي تحت الأرض وفوق الأرض و يوم العرض واكفنا شرار خلقك واشغل عبيدك بأنفسهم عنا ..
الحين يامال الغنيمة محدن منكم صور وزير فاسد وإلا موظف مرتشي مايدور لك معاملتك ويمشيها إلا بالمقسوم ، ولا صور مستشفيات زبالة ماهي صحية،كم موقف ظلم صار لك بحياتك ماصورته ونشرته وطالبت بحقك ! قاعدين من فجر الله لين المغرب مسنترين لا اكل لا شرب لا صلاة تحرون مسلم تصورونه و تفضحونه وانتم تسوون مثله .. آخ ياحيف على الزكرتيه والزواحف أول ... تنمرس كبدك من الضحك من دون ما يطب بعرض احد ..

5- ترى سالفتي كلها خرطي بخرطي لاطموح و لاتطعيم ولا استراحة لا تصدقون منها ولا كلمة ، ولا تصدقون من غيري ولا كلمة ، شغلوا هالمخيخ شوي ثم قولوا اللهم ارني الحق حقا وارزقني اتباعه وارني الباطل باطلا واجنبني اتباعه ، ثم انظروا بفراسة المؤمن " اتقوا فراسة المؤمن فأنه ينظر بنور قلبه" .. ، وخلكم من تتبع عورات الناس لا يجي اليوم يتتبعونك ويفضحونك بقعر بيتك والدنيا سجال

5- ردي اليوم اطول رد بتاريخ الزعيم " بادخل موسوعة قينيس الزعيم "على وزن ارتي الزعيم !

ومضات في آفاق التميز · #5 16/04/2009, 04:38 PM

انلحس مخي من اللي فوق<<مافهمت اوله ولا تاليه

لي زياده على كلامكم بخصوص المهايط والاشاعات خصوصا

انا اقول ان الشعب مهايطية الامن رحم ربي , انا معي البنات بالجامعه مالهم بالكورة ولا يدلون دربها <<لايمكن يكفرون اللي تكلم بالكورة ويرون انه يجب ابعادها حتى لاتفسد العقول السليمه ,
المهم يوم جت سالفة الخرج والاستراحة الا ماشاء الله كلهم يهمهم الشان الرياضي ويحبون يوعون الناس فيه , وكلوا لحم الرجال كله وصاروا عارفين من اللي طلعه ومن اللي كفله مع انو لو احلف اناك لو تسال الوحده منهو سلطان اللي طلعه ماتعرف شكله ولا منهو رئيس الهلال اللي كفله ماتعرف اسمه...
بس اللي يعرفونه اكيد تراه فلان سوى وتراه فعل ..
الله يحفظ الجميع ويستر على المسلمين ويفضح الظالمين جعل عيونهم ماتنام

ودي وتقديري

ومضات

Bico8 · #6 16/04/2009, 05:01 PM

حنّآ شعب هذرته وآجدة .. خخخخخخخخ

M A D R I D · #7 16/04/2009, 05:41 PM

الهياط ميزة للشعب السعودي

اللي ماعنده يهايط .. واللي عنده يهايط

حتى مشجعين النصر يهايطون .. عادي خلوهم ينبسطون

اما سالفة ياسر لاهي هياط ولاشي

الواقع واقع

خلوا العواطف على جنب

بيني وبينكم :

رجال جالس مع إداري من إداريين الهلال .. يقول :

هالحركات مهيب غريبة على ياسر

<< بس تراه مهوب يقرب لي أبدا

تحيتي للجميع