معلومة حصرية خطيرة عن المدرب+ نقاط عن الفريق وماذا يريد الفريدي!! - نادي الهلال السعودي - شبكة الزعيم

ابو فهد الهلالي · #1 17/03/2009, 11:43 PM

السلام عليكم

في البداية عذراً لاستخدام (+18) في العنوان لأني اضطريت استخدمها بعد ماقرأت بعض الردود والمقالات ، فمن وجهة نظري أن المنتدى تغير بشكل كبير في هالسنتين الأخيرتين بعد انتشار الدي إس إل ، فأصبح منتدى المدح والتطبيل والتصاميم والمقاطع الخرافية وفي المقابل منتدى السب والشتم ، وضاع النقد الهادف بينهم ، يعني باختصار أصبح منتدى لطرح الأفكار الرياضية المتطرفة فقط!!!!

قبل مدة تصاميم للفريدي ووصلوه للسماء ، لا وتعدى الثنيان وهالحين ضربوا فيه على سطح الأرض فأصبح لايفقه في كرة القدم ، كلا الحالتين مرفوضة فالتوازن في الطرح مطلوب والآراء المتطرفة لها آثاراها سواء في حالة المدح أو السب..

هذي مقدمة للعنوان

نرجع للموضوع :

بكل صراحة الفريق يعيش تكامل عناصري نادر أن يحدث وما ينقصه سوى حنكة مدرب يجيد توزيع المهام بين اللاعبين وقراءة المباريات وإلى وإدارة مخلصة وتكاتف لاعبين الخبرة مع النشء ليكون فريق متحد بشكل قوي ونضيف عليهم 10كيلو من الروح القتالية والإخلاص -- حشا صارت طبخة

(( بس ترى هالسطرين هي مانحتاجه فقط بعد توفيق الله عز وجل))

يعني ترى فريقنا من أحسن ما يكون -- لكن المشكلة تكمن فقط باللي قاله المعلق القطري اليوم واللي يقصد فيه أنه متى ماتحسن مستوى الفريق ووصل القمة لقي من يهدمه ويحوس كل شي فيه،، نعم إنه التخطيط المدروس لكي يتحقق التوازن بين الفرق السعودية لأنه لو بقي كوزمين لحقق الهلال كل البطولات وهذا يدل على ضعف المنافسة مع الفرق الأخرى في البطولات السعودية وخاصة الصفراء منها ...
طيب وش المطلوب :

- أولا بالنسبة للاعبين بشويش عليهم -- تراهم بشر لعبتوا بأعصابهم - لاقينها منكم والا من معسكرات أبو الخطط -- آخذ لمعسكره كل لاعبين الدوري السعودي

-- فقط ليشتت أذهان اللاعبين كأن المنتخب يعد لموسم يبدأ فيه التصفيات من جديد - مايدري أنه خلاص دخل وقت الحسم ويبي فقط مجموعة متجانسة من اللاعبين ... (بس بكيفه هو وخططه -- بيلقى ما خطط له)

أرجع لفريقنا :

- اليوم الدعيع لا تلومونه تراه فقط جلس يهوجس بعد هدفنا وجت الركنبة بسرعة وترى للمعلومية هذي من عيوب الدعيع من يوم كان شباب وتذكروا (هولندا94) وترى ما في أحد كامل -- واحمدوا ربكم على الدعيع -- شكل اللي يسبونه ما ممروا على السلومي الله يذكره بالخير وطلعاته الغريبه والبقوس حقاته ، أو حتى على حسن العتيبي ، يعني ترى الدعيع حارس لايقدر بثمن ولا يقارن بغيره ، وهدوا الوضع ..

- بالنسبة لياسر : أقول ترى ماقصر ولا تلومون له 4 سنوات لعب مباريات ما يعدون من كثرهم ودايم أساسي -- أكيد بينزل مستواه شوي ، وترى ما جته كور من الوسط ، مجرد كرة واحدة فقط . وياسر أعتقد لا يقارن بأي مهاجم حالياً لكنه في النهاية بشر يتأثر بما حوله .. فصبركم ياجماهير وبتشوفون خير بإذن الله

- بالنسبة لسيول : أعتقد أن فيه شي تغير اليوم ، اشتغلت محركاته ، أتمنى من الإدارة يراجعون وش السبب بشكل عاجل ، يمكن أكل له شيء (إندومي معين مثلاً) ماهو متوفر عندنا بالسعودية وصار يفتح عيونه ويلعب صح ، وأنا أقول أنه لعب زين اليوم مقارنة بلعبه هو سابقاً وفرق عنده اليوم الجانب البدني ولكنه عموماً ليس كطموحنا بلاعب أجنبي ، وأتمنى من الإدارة يفكرون يجيبون لنا لاعب إيراني أو أوزبكاستاني بدلاً منه في الفترة القادمة لأنهم وبصراحة عندهم أجسام ولياقة تعوضك عن المهارة.
وأرجع لسيول مرة أخرى وأكرر ماقاله أبو فيصل "بما أن اللاعب معنا حالياً فالمطلوب أن ندعمه ونقف معه" وأنا تأكدت من كلام أبو فيصل اليوم ، لأنه بصراحة ممكن أنه لعب بشكل جيد اليوم لعدم وجود صافرات استهجان من جماهير الفريق اللي يلعب له ، يعني تخيل نفسك مكانه وجمهور فريقك ما يريدك وصافرات استهجان ضدك أكثر من تشجيعهم ؟؟ !! بتلعب زين ، في حالة واحدة فقط "إن لم يكن لديك أحاسيس") يعني أوقفوا معه حتى يسهلها ربنا ويجي غيره - خلونا أقل شي نحلل دراهم أبو فيصل اللي دفعها فيه ..

- بالنسبة للفريدي : أعتقد لو فكرنا شوي ووضعنا في بالنا أنه لاعب شاب لم يبدأ مع الفريق الأول إلى نهاية الموسم الماضي لقلنا كثر الله خيره ، وصراحة مبدع وعنده مهارات لكنه مرهق واستلم له سيل جارف من النقد من جماهير المنتخب وكملنا عليه مع الفريق ، ياناس الفريدي لاعب متمكن واللي يعرف الكورة يعرف الامكانات اللي يتمتع بها الفريدي بس يحتاج وقفة ويحتاج دعم مو أصوات في الجماهير ضده ، ترى الفريدي الناشيء غطى مكان التايب يوم غاب وحتى وهو يلعب التايب معه يقدم مستوى ممتاز -- وطبيعي النزول الطفيف في مستواه... وإذا فيه عيب بسيط عنده غير العصبية فهو البطء ولكن الجماهير هداهم الله مستعجلين عليه وماعطوه فرصة يفكر (صار وضعه كنه سيارة بتسرع وتسقط على سيارة ثانية لكن الجماهير من سرعة نقدهم وقوته صدموه ولخبطوا عليه الطريق... "طبعا الله يحفظه من التصادم") خلو الرجال يركز وأنا أوعدتكم وش بيسوي عن قريب.

- بالنسبة لبقية اللاعبين الأساسيين : أقول لهم ما قصرتوا لكن شدوا حيلكم شوي وركزوا ترى ما بقى الا خطوتين ونخلص ، وهذي هي حصاد الموسم ، وياليت تشوفون هوساوي ورادوي وعزيز كقدوة في الروح القتالية وتكونون مثلهم وأفضل..

- بالنسبة للحزب الجماهيري الآخر اللي يطالب بالشلهوب والكلثم وتغيير بعض عناصر الفريق ، ودي أقول لهم ترى الشلهوب هو من وضع نفسه في الاحتياط وهو من سيرجع نفسه أساسي ، في الموسم الماضي أعطي فرصة أكبر مما يستحق لكنه لم يثبت نفسه ومن ثم تحول احتياط ، ولكنه سيعود تدريجيا وأقول لكم تذكروا أن الثنيان جلس آخر 5 سنوات مرات كثيرة احتياط لكن يشكل ورقة رابحة ولم ينقص من قيمته بقائه احتياط أبداً.. يعني دعوا الشلهوب وغيره من الاحتياطيين يعود متى ما أثبت أنه قادر على ذلك ... وترى فيه شي أساسي بكرة القدم يسمى " بالجاهزية البدنية واللياقية ولياقة المباريات"

- أما المدرب فالمعلومة الحصرية هي أنني أتمنى من الإداريين أن يبلغونه بقصة كوزمين حتى لا يصرح من هنا وهناك ويكون تحت المراقبة وقولوا له خلك دائما مركب حزام على بنطلونك وقميصك واربطهم بسلسلة إن حصل ، واعرف أنك ستحل محل مدرب ستكثر مقارنتك معه ، وبعد مدة سيكون كوزمين بطلاً عند من اتهموه بأوصاف غير لائقة من الصحافة الصفراء ، تدرون ليش : عشان يأثرون على المدرب الحالي والفريق والذي هو هدفهم ويوهمون الجميع أن الزعيم لا يمكن أن يعود كما كان فهم دائماً يهدفون إلى إفساد حال الزعيم بأي طريقة ممكنة ( طبعا اللي بيسأل كيف صارت هذي معلومة حصرية أقول له لأنها محصورة في رياضة يتحلى قادتها وجزء كبير من إعلامها بالأخلاق ال؟؟ وبعمل كل شيء ضد الأزرق ، وانظروا حولكم : هل شاهدتم فريقاً تقف ضده كل جماهير وقادة الفرق الأخرى وأيضا قادة إتحاد الكرة برمته ومع ذلك ينجح وسينجح بإذن الله وسيظل زعيمــاً رغم أنوفهم بإذن الله..

[/COLOR]

وإلى جماهيرنا أقول : ترى اللاعب بدون دعم جماهيري ولا شيء ، فرفقا بلاعبينا وتذكروا نامي الموسم الماضي وشاهدوه الآن بعد أن دعمه الجمهور ، اختلف عطاؤه كثيراً وننتظر منه المزيد.. ونتمنى من الجميع الوقوف مع الفريق فلم يتبقى إلا كم خطوة وبعدها بإمكانكم تقييم اللاعبين وقول ما تشاؤون أما حالياً فأتمنى منكم الوقوف والتشجيع والدعم في كل المباريات المتبقية ...

وبالتوفيق للزعيم