12/03/2009, 02:55 PM
|
| زعيــم نشيــط | | تاريخ التسجيل: 14/08/2005
مشاركات: 625
| |
|
اعيدوا ابويعقوب وسامي ولو بنص رجل + جمهور الرياض ؟!!!
بسم الله الرحمن الرحيم
هارد لكم يا شباب على التعادل اللي بطعم الخساره 
من عام 2002 لم نحقق اي بطوله خارجيه
من بعد اعتزال الثنائي يوسف الثنيان وسامي الجابر لم نذق طعم البطولات الخارجيه
بالامس لاعبين يسحبون رجليهم في الملعب قسم بالله كأنهم مغصوبين وهم يلعبون وين الروح اللي كنا نشوفها ايام اول مع انه ماكان فيه محفزات مثل الحين بس كان فيه حب للشعار
واللي يسمع كلام لاعبينا قبل المباراه بس يقول ذولا مابينهم وبين كاس العالم شي
وبمجرد انها تبدا المباراه تحس ان كلامهم تبخر
مستوى سئ خصوصا الشوط الثاني
انتهاء المخزون اللياقي بإنتهاء الشوط الاول !!!
يلعبون كأنهم اول مره يلعبون مع بعض مناولات خااااااااطئه ...احتفاظ زائد بالكره ... لعب فردي !!!
لو نظرنا الى تشكيلة الهلال اللي حقق فيها كاس اسياء 2002 ونظرنا الى تشكيلتنا حاليا
عناصريا التشكيله الحاليه افضل ولكن ما السبب في عدم تقديم مستوى مشرف !!!
في استاد الملك فهد وتعادلنا بفضل الله
وش بنسوي في ايران وطشقد ؟؟؟!!!
اتمنى من الادراه معاقبة اللاعبين مثل ماتتم مكافأتهم على الفوز
الدعيع لعب امس وكأنه حارس مبتدئ مستواااه مهزوز جدا
هوساوي مصدر الثقه لكل الهلاليين
المرشدي من بعد كأس الخليج ومستواه كل شوي ينزل
الزوري قدم شوط اول جيد ولكن الشوط الثاني !!!!!!
نامي لم يختبر امس
خالد عزيز + رادوي = صفر عالشمال
التايب + ويلي الشوط الاول افضل لاعبين اما الشوط الثاني التايب انتهت لياقته وويلي تفرغ لاستعراض المهارات التي لا يجيدها !!!
اما الفريدي عليه مراجعة نفسه فهو في بداية الطريق
الشلهوب اتمنى من كل قلبي انه يرجع مثل اول وهذا ما اتوقعه
سول - ما ادري هل هم كانوا جادين في البحث عن الاجنبي الرابع يوم تعاقدوا معاه ام انه عن قولت ماتعاقدوا !!!!
ياسر وما ادراك ما ياسر  مستواه ناااازل جدا - كل ما صار شي داخل منطقة الجزاء طالب ببلنتي !!! استغرب وين قتالية ياسر عالكره !! وين مهارات ياسر وين وين وين
عني شخصيا لا احمل ياسر مسؤولية انخفاض مستواه بل احمل الاداره اللي تفرغت للبحث عن المحاور والاجنحه وتركت ياسر وحيدا يعاني في خط الهجوم !!!!
تقريبا اكثر من موسمين وياسر يلعب لحاله في خط الهجوم !!!
عجبي !!! فريق حاط كل اهتمامه على بطولة اسيا وماعنده الا مهاجم واحد !!!
قد يأتي احد ويقول تونا في بداية المشوار
نعم صحيح فنحن في بداية المشوار ولكن المستوى لا يأهلنا حتى للتأهل للدور الثاني
( لو هي بتمطر تبين من عصاريها )
ولكن نتمنى وندعوا الله بالتوفيق لهلالنا 
.
.
.
اتمنى من جميع اللاعبين الاقتداء بلاعبين الاتحاد في اللعب بروووح وحب للشعار
امس طلعت من الملعب ورحت المقهى اتابع مباراة الاتحاد وشفت الشوط الثاني وانا اتحسر على مستوى فريقنا !!
الاتحاد لعب الشوط الثاني باب واحد على فريق الاستقلال ( متصدر الدوري الايراني ) ومن هجمه واحد سجل الاستقلال هدف التقدم
لم يستسلم لاعبي الاتحاد بل زادوا من جهودهم وتحققت امانيهم بالفوز بـهدفين سجلت في اخر الدقائق !!!
الف مبرووووك لاشقائنا في نادي الاتحاد 
وكم تمنيت ان لدينا في الهلال لاعبين بروح محمد نور - وبوشا
--------------------
جمهور الرياض ما يستاهلون النادي اللي عندهم !!!
لو ينقلون الملعب جده والا الشرقيه والا القصيم احسن !!!!
كلام تعودنا عليه بعد كل مباراه للهلال وكأنهم هم وحدهم من يحبون الهلال !!
للاسف بعض الجماهير من صغار العقول يترك الكلام عن مستوى اللاعبين ويتجه للجماهير بعد كل مباراه
امس الجمهور جيد جدا ولكن بعض الناس مايعجبهم العجب ولا الصيام في رجب
تقريبا 40000 مشجع ولاهم عاجبينهم
من متى واحنا نسمع جمهور الرياض وجمهور الشرقيه والجنوبيه وجده ؟؟؟؟
نحن جمهور الهلال ولسنا جماهير الرياض
يعني الانديه الثانيه مايجيهم الهلال الا مره في السنه وفي ملعب ما يشيل مثل مدرج واحد من مدرجات استاد الملك فهد لا ويمنون علينا بحضورهم
ياخي انت بتحضر لتشجيع الهلال مو علشان تقول شوفونا ملينا الملعب !!!
وغير كذا كلنا شاهدنا مباراه الهلال والاتحاد الدور الاول في جده وانا رحت لجده لحضور المباراه وطلعت من قبل العصر وانا خايف ما الاقي مكان اجلس فيه
ولكن تفاجأت بأن مدرج الاتحاد امتلئ عن بكرة ابيه ومدرج الهلال ما زال فارغ ( واجهة الملعب ) وانتظروا الى قبل المباراه بساعه وشوي وفتحوا باقي مدرج الهلال لجماهير الاتحاد !!!
هل شفنا احد تكلم عن جمهور جده !!! هل احد انتقد جمهور جده علما بأن الهلال مايروح عندهم الا في السنه مرتين !!!
وبعدين للاسف شي اعتدننا اننا نشوفه اذا امتلى الملعب يخافون اللاعبين !!!!
مباراة الهلال - الكويت الكويتي 1/1
الهلال - الوحده الاماراتي 1/1
الهلال / ساباباتري 1/1
يعني انا اروح الملعب وصوتي يروح واخر شي اتفاجأ بمستوى متهاااالك
لا وتبوننا نحضر بعد !!!!
------------------
قفله :
آلا ليت الزمان يرجع ,,, ورا والا الليالي تعوود
هذه وجة نظري فأن اصبت فمن الله وان اخطأت فمن نفسي والشيطان !!
تحياتي لكم
بالتوفيق للزعيم في باقي البطوله
اخر تعديل كان بواسطة » AL_ZA3EEM في يوم » 12/03/2009 عند الساعة » 03:31 PM
السبب: تعديل العنوان
|
الوضع الشجري
