قبل لا أخش في الموضوع ودّي أقول لكم سالفة شايب(ن) بثر .. مبطي عندنا بالديرة !! المهم إن هالشايب (معاندي) .. وراكب(ن) راسه !! وكانت الدبابات منتشرة قبل المواتر !! وفوق إن شايبنا راسه يابس !! كان (أعور) وعينه الزينه بها عمى ألوان و الشوف شجر !! يعني من جميع النواحي دعواه محيوقة ورايح برجلها !! المهم إن هالسالفة كانت على بداية دخلة السيارات للمملكة !! وكان جالس هو وكم شايب حول آذان المغرب!! إلا يوم شافوا سيّارة جايـّة من بعيد !! وتعرفون الأوليّين فيهم (هياط) وطفاقة وخصوصا اللي يحسّ إنه قوي ومعه موتر !! فترّوعوا الشيبان قالوا ذا شككله يبي (يدعـّسنا) !! قالهم (عوير) اللي هو "بطل القصة" !! يخوكم ذي ميب " سيارة " !! ذولا (دبـّابين يتسابقن ) !! قالوا له الشيبان : من زين عيونك أنت ووجهك .. تبي تعلمنـّا بعد !! المهم إن (عوير) قام يبي يثبت لهم إن ذا الأنوار اللي يشوفونها ميب أنوار سيارة .. وإنها (أنوار دبــّابين ماغطين جنب بعض) !! وهو اللي يوقف قدام السيارة !! ويتوازن ويجلس في (النص) بزعمه يبي (يدخل بين الدبـّابين ) !! ولا أردى من شايبنا إلا اللي (يسوق الموتر) !! و شوي إلا يوم نشبت خشة عوير بـ(أديتر السيارة) !! بس ربك ستر .. ولا مات !! وإلا يقولون إنه من قوّ الصدمة .. متلاقيات سيقانه في الهواء !! كنه (مجرشي) يوم يصدمه تكر !! المهم يوم خف العج !! جو لمـّه الشيبان اللي معه !! وهو يوّن !! قالوا له (شفت إنها سيارة) !!
قال لهم عوير : أقول لكم (دبـابين ) وفيه (دباب ثالث في النص بس إنه مطفـّي النور) !!
فأمثال (عوير) - للأسف- منتشرين بيننا !! و حوّموا تسبودنا !! ويمكن يقتنع "عوير" وهم ما اقتنعوا !!
--------------------------
هلابكم ويالله إنكم تحيي هالوجيه السفرة .. وموضوعي هذا راح أقسمـّه لثلاث محاور !! <<-- الله يحلل ناصر الجوهر !! فالمحور الأول كاتبه وأنا (مبوبز) !! والمحور الثاني (وأنا متربع) !! والمحور الثالث وأنا (مادّ سيقاني) !!
- المحور الأول : ( عود من عرض حزمة ) !!
- دق عليّ خويّي النصراوي و هو واحدن لاعبن به الربو !! وأنواع الوكعات الصحيّة الله يعافيه ويشفيه .. وبالعج الأخير اللي جانا آخر أيام الصيف !! أكل خابور !! وباغيّن يطلعونه لسوريا تهريب الين يخف الغبار ويجيبونه !! قال: هاااا بووو عااابدالله !! قلت وشو ؟! قال : هلااا أبو عبدالله !! قلت هلابك !! وش في صوتك كذا غربلك الله من غرابيله !! ويوم دققت وأثر كن فيه صوت (مقلى) توّك مسوي فيه شكشوكة وكاب عليه مويه !! وأثر الرجال حراراته (H+) !!قال يا اخي وش هالمنذلة !! قلت أفا وش اللي صاير ؟!
قال يا أخي : حبكت يعني إلا (هاللاعب) !! قلت بسم الله عليك الرحمن الرحيم .. الحين روعتنـّي وغرفت قلبي أحسبن (رئتك) منسدة !! وأخرتها عشان "سالفة انتقال لاعب" !! يخوك والله ما تسوى عليك !! تبونه ؟!
قال أيه نبيه !! قلت خلاص (خوذوه) !! قال وش اللي خوذوه وأنتم مستقعدين !! قلت له يخوك تراي ما عمري طبيت النادي إلا ثلاث مرات !! ومن ناحيتي تراي ما نيب دافعن ولا ريال !! قال أدري بس وراء أعضاء شرفكم تسذا؟! قلت وش بهم ؟! قال ما يصدقوّن نتفاوض مع أحد إلا جو وتفاوضوا معه !! قلت بالله ؟! زي مين ؟! يوم فق ّ إثمه !! قال الأمثلة كثيرة وعطني فرصة أبحث وأرجع لك !! قلت شف يا جدي والله يا حنـا ما طقينا لكم خبر لا أنتم ولا لعيبتكم اللي تبي تجيبون !!
وبعدين بالعقل والمنطق !! إذا صار فيه لاعب (بارز) و(محلي) شي طبيعي يصير (عليه سباق) !! وكونك تاخذ كل شيء بالساهل .. فهذا دليل إنك تسير بالطريق الغلط !!
قال بس اللي نشوفه تخريب !! وأنتم عندكم (ياسر والعنبر والصويلح) !! يعني السالفة صايرة (تكديس في تكديس) ؟!
قلت يعني الحين إنت بتقنعني أنت وآذانك أنك غيور على الهلال !! لو الموضوع بيدكم (طمستوه عن وجه الأرض) !! و أبيك تجاوب على نفسك ما أبي جواب منكم لأن أردى منكم اللي يسمعكم !! ( الكلثم !! الهليّل !! الفرج !! الموري !! المفرج الصغير !! الحربي !! البرقان !! الخراشي !! وغيره الكثير !! ) ما قطع رزقهم الهلال .. وخلاّهم يدوّرون الأصلح لهم !! يا أبو تكديس !! ولنفرض إن (ياسر راح بمهمة وطنية وواحد من الاثنين - وياكثر إصاباتهم- صار مصاب ) من تبينــّا نلعب هجوم ؟! أنت وإلا (حسين هادي) ؟!
قال بس ذا كله يناقض (ميثاق الشرف)؟! قلت وشلون ؟! قال الحين وش فرقت سالفتكم عن سالفة (الأرجنتيني حق الأهلي والاتحاد؟) وليه يدق رئيسكم على عنقري الأهلي ؟! وليه وليه ؟! وأصلا أنا من شفتكم ( رايحين لموبايلي وأنا غاسلن يدي ) !!
قلت : هههههههههههههههههههه قلت وراك حقت أم السوالف !! أولا شف أنت و جبهتك هاللي كنها شلخة جرو !! أنتم (عجزين تعمرون ناديكم ) تبي تجون تتفلسفون على غيركم !! و(ميثاق هالشرف) اللي أخذتوه علثة !! أنتم (أبعد ما يكون عنه) !! والشواهد اليومية كثيرة !! ووينكم عن (ميثاق المروءة) !! والرجال طالعن يقول : يا عالم ما أبيكم !! فكونـّي من شرّكم !! وأنتم ناشبين له !! تحسبونه ( بطولة ) !! تراه (لاعب) !!
وإذا قصدك (موبايلي) جايبها كشاهد إن الهلال (ما يوفي الوعد ) !! ههههههههههه يا أخي طيب عندي سؤال : أنتم وش كثر المخ اللي بروسكم ؟! كثرنا وإلا يجي زايد وينبااع بقواطي !! نعنبوكم إذا صرنا متعمقيّن في قراءتنا لبنود العقد !! و صرنا أشجع من أننا نسكت عن حقوقنا !! ونشوف (الغرر) واقع على نادينا وتبينا نسكت !! شفنا وين وأنتم وين !! لأنكم (عاطفيين وتبعيين) !!
خلنا من (ميثاق المروءة ) اللي دستوه برجليكم !!
وينكم عن (ميثاق الوفاء) بينكم وبين لعيبتكم !! وأقلـها تردّون لهم "الدين" في الوقت اللي هم محتاجينكم فيه " لحظة إصابتهم " !! وعطني اسم واحد عالجتوه !! ووينكم عنهم "لحظة توديعهم للملاعب" !!
ووينكم عن ( ميثاق الأخوة) ما أبيه بينكم وبين غيركم لأن ذي بعيدتن عن شواربكم !! أبيها بينكم وبين بعض !! متناحرين !! وطقاق وملعنة خيّر !! وصايرين أحزاب ومناطح بوسط ناديكم !!
دستوا على (كرامة مواثيق كثيرة ) !! و لا راح أصير (طفيلي) مثلكم وأقول لكم : ترا اللي فيكم عقوبة (نقض العهد) !! بأترفع عن هالسوالف !! لأن الحال اللي أنتم فيها ( أسوأ من إني أذكركم في الماضي) وبحجرة أوهين كيندي اللي تحت الدرج .. ووشلون أنتهيتوا مشواره !! ووشلون مصيتوّا دراهم أعضاء شرفكم وقضبتوهم الباب !! - ولا هم بواحد والا اثنين والا ثلاثة - وسالفة عقودكم وتلاعباتكم بـ(استقدامكم للعيبة بمسميات عمالة وافدة !! ياللي ما تخافون الله ) !! صدقني كل هذي ما أبغى لها جواب !! لأني ما أبي أروح لبعيد !! (واقعكم صورة مصغرّة لبربسة الماضي) !!
بس يا أبو عبدالله .. ترا الماضي راح وحنا عيال اليوم ؟! ترا والله إنا محتاجين (اللاعب) أكثر منكم !!
شف وأنا أخوك .. أنا مليت وأنا مبوبز .. أبتربع وأعلمك .. !!
-------------------
المحور الثاني : (التحليل النفسي للتباكي الأصفر) !!
- هالهرم اللي فوق يسمونه ( هرم ماسلو) - على اسم العالم - وينقسم لخمسة أجزاء .. يمثل كل جزء من أجزاء هالهرم ( نوع الاحتياج وأهميته ) إلى أن نصل من مسألة
1- حاجتنا الفسيولوجية (اللي هي الحاجات الأساسية .. مثل الغذاء والشرب .... الخ) ثمين إذا توفرّ هالاحتياج نرتقي للطبقة الأعلى منها :
2- (وهي الحاجة للأمان سواءا وظيفي !! سواءا بيت أسكن به !! إلى آخر القائمة ) !!
3- بعدها الحاجة للانتماء الاجتماعي !! سواءا (وطن) !! سواءا (قبيلة) سواءا (عائلة) نادي أي مجتمع المهم أنني أشعر بالانتماء !!
4- وإذا أنا أسير بالطريق الصحيح فلا بد أن أشعر بحاجتي (للتقدير والاحترام) !! وهذي مرحلة متقدمة !! قبل المرحلة الأعلى !!
5- إلى أن أصل لأعلى الهرم وهي ( تحقيق الذات ) !! وهي أرقى الطبقات !!وهنا تتفاوت (الطموحات) !! فبعض الناس يرضيه (عريف في الحرس) !! وبعضهم (يرضيه مدرس ليلي ) وبعضهم ما يرضيه إلا (وزير) !!
وبما أن العالم ( أنشتاين) مؤسس (نظرية النسبة والتناسب) !! يقول إن كل الأمور نسبية !! فاللي ينطبق على الفرد ينطبق على المجتمع !!
- فمشكلتهم : إنهم يمشون بالطريق الغلط لـ قمة ماسلو !! والأدهى والأمّر .. إنهم يبي يقفزون على هذا (التسلسل المنطقي) !! فكيف تقفز لطبقة (الاحترام) وتطالبني بتقديرك !! وأنت إلى الان ما تجاوزت (المراحل السابقة) !! فهذي هي ( عقدتهم ومشكلتهم الأزلية ) !!
فما بالك إنهم الآن يحاولون ينطوّن لـ (تحقيق الذات) وهم في قاع (الهرم) !! صعبة ما تجي !!
فاللي قاعدين تشوفونه من ( سب و شتم ) و (استجداء ) و (ضعف بمظهر القوة ) :
ماهو إلا (التفسير النفسي للخلل الحاصل حينما يفشل الشخص في تحقيق أولوياته .. واحتياجاته .. تباعا حسب أهميتها !! فإنه يشعر ( بالتوتر والقلق ) !! ومع تكرار المحاولات وما يصاحبها من فشل !! يصاب الشخص (بالإحباط) !! فيختل توزانه !! فيلجأ لـ ( حيل دفاعية ) !! حتى ولو (كانت مؤقتة) !! والمشكة أن هذه الحيل لا تهدف لحل المشكلة النفسية !! لأأأأأ !! بل تهدف (فقط) لتخليصه من (الشعور بالنقص ) !! (والخجل) الناتج من محاولاته الفاشلة !!
والمشكلة أن علماء النفس يقرّون أن هذا التصرف ( لا شعوري ) !! و ضرره الأكبر أنه يقود الأشخاص إلى ( عالم اللا وااااااااقع ) !! فخلوهم بعالهم يسبحون !! انتبهوا ( تتأثرون بخربطتهم ) لأن المشكلة إن ( حيلهم الدفاعية ) وملاسناتهم وعبطهم !! تأثر فيها بعض الهلاليين للأسف !! وقاموا (يسايرون هبالهم) !!
----------------
المحور الثالث والأخير :
وبما أننا شخصنـــّا واقعهم ( اللاواقعي ) !! و فهمناهم زين !! فخلونا نخاطبهم بلغة هم أكثر ناس راح يستوعبون ألفاظاها !!
ونقول لهم بالفم (الفاضي) :
حنا نصابيـّن لأننا (نطالب بحقوقنا) !!
نصابيـّن لأننا (ما نرضى بالظلم) !!
نصابيـّن لأننا (ندافع عن كيانـنا) !!
نصابيـّن لأننا ( واقعيين ) !!
نصابيـّن لأننا ( متكاتفين ) !!
نصابيـّن لأننا (واعين) !!
نصابيـّن لأننا ( نطبق ونمشي وفقا للقانون بعيدا عن المحسوبيات) !!
نصابيـّن لأننا (مرتاحي الضمير) !!
نصابيـّن لأننا (منطقيين) !!
نصابيـّن لأننا (نحبّ هالبيت الأزرق وملتفيّن حوله) !!
نصابيـّن لأن ( كلا ً يقوم بدوره بدون إزدواجية) !!
نصابيـّن لأن ( جمهورنا واعي ) !!
نصابيـّن لأن ( إعلامنا مخلص والأمانة المهنية فوق الاعتبارات "الفردية") !!
نصابيـّن لأن ( نادينا يتوارثه رجال أوفياء) !!
نصابيـّن لأنكم (فشلتوا في تحقيق ذواتكم ) !!
ما يستفاد من الموضوع :
لا يهمونكم هم ومزاعقهم وخرابيطهم !!
ترانا نصـّــــااااابين !! (وقفة للتأمل في البربسة الصفراء) !! 
الوضع الشجري
