#1  
قديم 04/01/2009, 06:53 PM
الصورة الرمزية الخاصة بـ • м é é s н o •
زعيــم مميــز
تاريخ التسجيل: 23/05/2008
المكان: كــتــآلونــي
مشاركات: 1,548
" حكاية مطفّر " (( امش عدل يحتار عدوك فيك )) .. !!

يقولكم المثل المصري اللي سمعته بالراديو قبل كم سنه ((امش عدل يحتار عدوك فيك)) كان هالمثل ان طرى على بالي يجيني شعور مثل انك تناظر واحد يلعب سله قدامك وانت ما عندك اصابع ! كان هالشعور يتردد على مخي وقت ما اسمع هالمثل وتجيني نوبة حزن لاني بدون اصابع ! حتى احيانا أسأل اخوياي اللي بالدوام عن هالمثل واقول شلون العدو يحتار فيني والله لو اني لعبة الحروف المتقاطعه ! اغلبهم يطنشني و يحطمني لان دايم وانا أسأل بذمه وضمير يطلع وجهي كنه علامة قناة اقرأ ! ويستغلون الحمير هالفرصه ويذبون !!!

عام 1999 ! يوم الخميس الموافق شهر شوال في وقت الظهيره الساعه 2 !

طلعت من الدوام وانا عطشان لو تجيب لي بني آدم وتقول لي تراه مويه قمت شربته ! حتى وصلت لدرجه اني يوم طلعت برا الشارع شفت برادة مسجد منطوله تحت شجره ! رحت لها على ان داخلها مويه قربت منها وفتحت البزبوز لقيتها فاضيه ومن كثر ماهي مغبره شفتها تقوطر خضآآآر مدري وش هو لكن موب بعيد عن الطحالب !!!! جاتني بعدها حاله هستيريه لدرجه اني قمت احكك جلدي على ازفلت الشارع وان انتفخ قمت وفقعته ومصمصت الصديد ينقال لي اتميلح لراعي البقاله يتبرع لي بغرشة مويه لكن ماحولك أحد !

(( بعضكم يوم قرى كلمة دوام . قال بنفسه شكل هالادمي يشتغل بوزارة المعارف ولا مدير مدرسه ! لكن للأسف اللي يشوف وجهي يعرف مستقبلي وكم عمري وكم معي من دراهم ووين ساكن بعد ! انا يا طويلين العمر انسان مثابر انولدت بالغلط وعشت غلط وتربيت غلط والدليل ان يوم عمري 4 شهور شافني امام المسجد مرمي في حديقة الحاره ويوم سأل اللي حولي وش جيبني بالحديقه بلحالي ! قالو له ما ندري ! وطلع بالاخير اني كنت اقدر امشي وانا عمري شهرين وكنت جاي الحديقه بقصد اني اشم هوا !! كنت مبهدل ابوي وامي كل خميس اروح وهم ما غير يدورون عني الين ما يجي امام المسجد البثر ويجيبني لهم !! لكن مشكلتي اني كنت مهمل بدراستي ومهنا اهتماااااام وكلت تبن الحين .. ومثل مانتم شايفين شغلتي حارس بوابة بنك الاهلي ))

يوم شفت راعي البقاله صافطني والعالم حولي تناظرني وتقول الحمدلله والشكر ! ما جاء ببالي الا اني ألعن الفقر اللي خلاني اناظر غرشة مويه ولااقدر اشتريها !! مشيت لحارة " العدامه " وبما ان هالحاره معروفه ان المويه تخر من بيوتها قلت مالي الا اروح هناك واشوف لي بيت يخر واشرب منه ! ويوم وصلت هناااااك لمحت لي بيت من بعيد ! حتى من زود كمية الماي اللي تطلع منه حسبته هو اللي يسقي الحدايق ! يوم وصلت عنده الا الاقي المويه موب صافيه وفيها صفار على خضار موب طبيعي لكن اللي بحالتي ياكل كبر راسه ولا يدقق ! فدنّقت راسي مثل أي عطشان وشربت منه وحسيت بعدها بشيء موب طبيعي فيني وقمت اشم ريحة يالله لك العفو ! لدرجه احس اني صرت دورة مياه منّي وفيني !!!!! حتى يوم رجعت للشقه الغير مفروشه للأسف .. ليه اقص عليكم واقول مفروشه كلها كنبتين حق جارنا متسلفهم وسليب باااق لونه ازرق انام عليه بالليل !! يوم رجعت للشقه رقدت على الارض كالعاده و صحيت بعز الليل ! تقريبا الساعه 3 الفجر ! قمت وبطني قاعد يغني وينشد اناشيد دينيه وبعض المرات احس انه قاعد يقذف ! لدرجه ان تسبدي احسها قاعده تقول " استغفر الله " !!!!!!!! قمت من مكاني وانا فيني من القمطه ما فيني ونقزت لأقرب مستوصف ويوم وصلت عند البوابه عيّو يدخلوني ونادو الشرطه حسبالهم اني حرامي !! وللأسف كنت بقمة براءتي لكن مظهري الخارجي أبا ان يكون لصالحي ويوم فهمت السكرتي اني جاي علشان يكشف علي الطبيب تفهّم الوضع ودخلني بالياااااله واصلا ما بغى بعد لكن الدنيا تساهيل وتوفيق من الله ودخلت ولله الحمد !!

رحت عند الطبيب ودخلت عنده ويوم شافني بحركه سريعه نزل راسه تحت وقعد على ذي الحاله حدود الخمس دقايق وكل نص دقيقه يطل علي بعدها ينزل راسه مره ثانيه !!! ! استغربت ورحت عنده شفته فاتح المصحف على صورة الفاتحه ويمكن قراها حول ال 30 مره !! عرفت وقتها وش السالفه شكله يحسبني من الجن ويبي يصرّفني بالقرااان !! كلمته وقلت له يا طبيب شف لي حل مع بطني ترا احس انه صايرن وصخ وهذرته زايده هاليومين !! قال لي وش انت مهبب وقلت له السالفه من اولها لأخرها وقلت له اني شربت من ذاك المااي وصار اللي صار ! بعد شوي كشف علي وقال لي افصخ فنيلتك قلت له ابشررررر وفصختها الا نلاقي ذبانتين في وضع مخل للأدب وكشيناهم من بطني !! << الله من الوصاخه !! كشف على بطني الدكتور وقال يبيلك غسيل معده ! قلت بكل براءه .. يعني يا دكتور اخذ بزبوز الحمام وادخله بفمي وارش ؟ قال لي لا ياغبي هذي حركات كبار نسويها لك خلك عالهادي وراجعنا بعد ساعه !! جيته بعد ساعه وسوو لي العمليه بعد ما خدروني وانا في غفله من أمري ويحلفون لي السيسترات ان الدكتور وهو قاعد يسوي العمليه صاد سلحفاه صغيره !!!!!! لذي الدرجه كنت وصخ والفقر لاعب فيني لعب !!!! بعد ما سوو لي العمليه والحمد لله حسيت ان بطني اللي صاير كنه دورة مياه انسحب فيه السيفون وصار نظيف .. حتى اني حسيت بنشوه السعاده وكني مخلوق من جديد بعد العمليه !! << يعني تراي ما قد مرضت الا ذي المره !! .. يوم قمت من سرير العمليه ناظرت الدكتور وكني به يلمح لي ادز له دراهمي بسرعه .. ويوم حسيت انه ناصيني بذا الاحساس قلت بنفسي مالك الا تشكي له حالتك انك مسكين والفقر لاعب فيك لعب راس حربه ما رضى يعتزل ! ويوم بديت اشكي له ما كملت سالفتي الا اشوفه ماسك الجوال ويكلم الشرطه ويجون ويشيلوني مع ادويتي!! وما قد كلت عدس الا عندهم لعنة الله عليهم وتم سجني على عدد قيمة المبلغ ! وكان 5000 ريال .. انسجنت 5 سنين !!!!

عام 2004 يوم الخميس الموافق شهر شوال في وقت الظهيره الساعه 2 !

طلعت من السجن وانا على عهدي القديم ووصاختي وفقري ورحت لشقتي الغير مفروشه للأسف ! ويوم دخلتها الا اشوفها مفرووووشه وصايره غير غير !! دخلت داخل الا اشوف فيها عايله واطلع بسرعه بعد ما سمعت صراخهم اللي خلى الجار اللي جنبنا يطلع بالبوكسر حقه ويقول " وش صاير ؟ " لعن الله راسك يالشايب طالع لي ببوكسر وتقول وش صاير .. هذا بدال ما انا اللي أسألك ؟ والله ما بقى الا تمسك فوطه و تلبسني وتقول لي " تستر تستر " هههه !! قلت له ابد ما صار شيء لكن انت ادخل غرفتك والبس الله يصلحك احرجتنا قدام الاوادم ! ناظرني باحتقار ودخل !! المهم طلعت انا الغبي واثر البوكسر موضه عندهم بذا الوقت !! بعد شوي طلع لي راعي الشقه وقال لي .. خير يالاخو عسى ماشر ؟ .. علشان اكون صريح معكم ترى وهو قاعد يكلمني كان يرتجف يحسبني واحد فضائي !!!! قلت له سالفتي من اولها لاخرها ومشكلتي اخور بسرعه وافضح كل شيء قدام أي واحد ما اعرفه !!! ويوم سمع سالفتي دخلني شقته وقال لي اعتبرنا عايلتك وحنا مقدرين ضروفك وبنسكنك معنا !! استغربت انا من الموقف وان فيه ناس بذا الاخلاق والطيب وقلت له بكل شفاحه .. طيب موافق ..خخخ ! وقبل ما اسكن عندهم مسكني الابو على جنب وقال .. ترى البيت فيه حرمتي وبنتي .. ومقدر اخليك تقعد عندنا الا ان تزوجت بنتي!!! ولا زلت مشفوووح وقلت .. طيب موافق .. وتزوجنا وعشنا حياه بنت كلب خاليه من المشاكل !!

عام 2008 يوم الخميس الموافق شهر شوال في وقت الظهيره الساعه 2 !

جاء لزوجتي الطلق ووديتها المستشفى طياري ومن زود التبن ماكنت اعرف اسوق فخذت لي تكسي حتى التكسي قاعد يسألني بالطريق يقول .. ليه ما طلبتو الاسعاف .. قلت له والله الاسعاف يكلفنا واجد وانت خير وبركه خخخ .. ووصلنا للمستشفى ودخلنا هناك وتمت العمليه بنجااااح وطلع المولود الجديد ودفعنا حسباب العمليه من جيب ابوها المسكين اللي بعدها اعلن افلاسه للأبد !! وكان الولد ولله الحمد لا طالع لا علي ولا على ابوها الغبي ! كان طالع عليها وعلى امها . يعني مزيون وماخذ على عيون مهند وخدود طاهر الحساوي وشوي من بشرة بشير شنان !! يعني ولدي وجهه كان خليط من الثقافات .. وعلى قولة المريخي " تلاقح ثقافات خخخ " .. واول ما جاء ولدي العزيز نزل علي الوحي وعرفت وش القصد من المثل " امش عدل يحتار عدوك فيك " وعرفت ان حالتي كان ينطبق عليها هالمثل . وان الفقر كان هو العدو ولاني ما كنت ماشي عدل بوم اني صغير صار لي اللي صار !! بعدها ربيت ولدي على هالمثل وخليته يهتم بدراسته ومستقبله وبعد 25 سنه صار ولدي يشتغل في احد الشركات الكبيره ودخل بالاسهم وربح وتوفق من ربي وانقذنا من هالفقر وسكنّا في بيت يركض فيه الخيل !! وعالاقل عشنا ما تبقى من عمرنا في خير

..

ما يستفاد

1- المفروض الابو يخلي ولده ما يقع بالاخطاء اللي وقع فيها في حياته . بعدها ماله الا ينتظر التوفيق من الله !! والقصه اللي فوق خير اثبات

2- حاول دايم تفضفض للواحد يمكن تصيب معك ويصير لك مثل اللي صار لي مع الرجال بالقصه !
..

والعذر والسموحه عن كل شيء ما عجبكم بالموضوع !

سلام
اضافة رد مع اقتباس
   


إضافة رد

أدوات الموضوع
طريقة عرض الموضوع

قوانين المشاركة
غير مصرّح لك بنشر موضوع جديد
غير مصرّح لك بنشر ردود
غير مصرّح لك برفع مرفقات
غير مصرّح لك بتعديل مشاركاتك

وسوم vB : مسموح
[IMG] كود الـ مسموح
كود الـ HTML غير مسموح
Trackbacks are مسموح
Pingbacks are مسموح
Refbacks are مسموح



الوقت المعتمد في المنتدى بتوقيت جرينتش +3.
الوقت الان » 06:03 PM.

جميع الآراء و المشاركات المنشورة تمثل وجهة نظر كاتبها فقط , و لا تمثل بأي حال من الأحوال وجهة نظر النادي و مسؤوليه ولا إدارة الموقع و مسؤوليه.


Powered by: vBulletin Version 3.8.7
Copyright ©2000 - 2024, Jelsoft Enterprises Ltd

Google Plus   Facebook  twitter  youtube