اقرض حسام صديقة احمد مبلغاً من المال لظرف طارئ الم به وبعد فترة من ذلك اتى شخص جميل يدعى جميل إلى احمد ليطلب منه ماتيسر معه من نقود بشرط ان يردها له آز سون آز بوسيبل! بعدها بفترة ايضاً وبعد ان دارت بهم الايام ومرت وتعدت وطقت هرن وإذا بخالد صديق جميل يريد ان يشتري سيارة ومتوهق بالدفعة الاولى ولم يجد الصديق الجميل جميل الا ان يسلف خويه ورفيق دربه الوعر خالد مبلغ يكفيه ليسدد دفعة اولى يملئ بها فم عبداللطيف جميل اللي مايتملي فمه ولا يشبع الا بحالة وحدة فقط؟؟ انك تدخل على مكتبة وانت مضيع دورة المياة ولك اسبوعين ماسكك بطنك صحيح لاقالوا ابن آدم مايملى عينه الا التراب <<<< قالوا تراب موب مخلفات بشرية يامنحط

دفع خالد الدفعة المطلوبة وخرج من الوكالة ضاحكاً ومنشكحاً بهوندا اكورد مابي اقول لونها عشان محد يمشخها بمفتاح من الصدام للصدام جعل يده الكسر والله، وعلى فكرة ترا عبداللطيف جميل صار يبيع هوندا اكورد بكافة فئاتها !! اللي عاجبة ومصدق هالكلام كان بها وعلى العين والراس وان ما شاله سيت الاكورد ركبناه ونيت واللي موب عاجبة يروح يسأل منظمة التجارة الحرة اللي نكبت العالم وعفست الدنيا وخلت عاليها واطيها وواطيها عاليها واللي فوق صاروا تحت واللي تحت صاروا اتحت من التحت نفسه!

بعد مرور مدري كم لاني ماكنت حاسب حساب هالموضوع وماضبطت التقويم والتواريخ

بعد مرور هالكمية من الوقت والمشار لها بطريقة مالها سنع فوق طلب حسام المبلغ اللي سلفه لاحمد وقال له احمد انه مايقدر يسدد لانه صرف جزء والباقي سلفه لجميل، انطلدزوا اثنينهم لجميل يبون دراهم احمد عشان يعطيها حسام ولما طلبوا منه السداد قالهم جميل ماكنشي ينعز ياحبة عيني انت وياه !! صراحةً شفت خالد خوينا ذاك اليوم مهموم ومتوهق بموتر يبي يشتريه وماعنده دفعة اولى وسلفته اللي معي وبيردها ان شاء الله على البونص اللي ياخذونه سابك آخر السنة .. ركبوا الشباب كلهم بموتر حسام بعد ماعرفوا ان البونص توزع على الموظفين وخلاص ماله عذر خويلد بعدم السداد (حسيت إني جوال) وحسام موتره غولف يعني من النوع اللي يااااله بعد الموت يشيل اثنين وزين منها انها سمحت لجميل الدب بالمشي جمبها لين وصلوا بيت خالد، وقاله حسام يله ياخويلد رجع لجميل فلوسه عشان يعطيها لاحمد اللي بدوره بيسددها لي !! انت رجع له الفلوس وانا برجع له شحومه اللي ذابت على الطريق بوجبه من كنتاكي! قالهم خالد شكلكم تسمعون بالدورة الاقتصادية انتوا؟ وبعدين انا ماعندي شي ياعيال والموتر اللي شريته دعمت عليه ومالقيت ولا راعي تشليح يشتريه وانجبرت اني ابيعه على سكراب حديد، وفلوس البونص هذي اللي غاثيني عليهاا مابقى منها شي لاني شريت فيها ددسن مستخدمة! هنا نقز جميل وقام يصارخ ويناهق يالنذل ياحقير ياعديم المروءة والشهامة وياقليل الخاتمة والبداية والفهرس المفروض اني خذيت منك موقف من ذيك الايام لما كنت تسرق ذهب امك وسرندلات الغاز من بيتكم عشان نركب فيها دبابات بالعزيزية بس ذيك الاياام كنت محسن الظن فيك وقلت اكيد الرجال يضحي ويسرق ويشوه سمعته من اجلنا وعشان خااطر عيونا، قاله خالد ياجميل هد من روعك انا ماحرقت الفلوس ولا لعبت فيها قمار!! شريت فيها موتر واعتبره استثمار يااخي لين تضبط الامور وابيعه وارد لك دراهمك وبعدين المفروض انك تنبسط لما تدري انها ددسن ياحوض الونيت المصفح اللي من وسعه مافيه رفارف على الاقل عشان افكك من مشوار الرجعة كعابي جمب غولف حسام اللي شفت اخوه الصغير ذاك اليوم طالع من بابهم ولابس برجل نعال كبيرة لابوه وبالرجل الثانية الغولف حقت حسام ومن صغر الغولف زبيرية ابوه اكبر منها والله من جد ماتفرقها عن جواتي بزر ضايعه منها فردة وراعيها الخبل قاعد يمشي ومبسوط بالفردة الثانية، اللي قاهرني انك غبي وثورً معمعم دام المشي فيك فيك ليه تركض جمبها وتمصع عضلاتك وتتعب شحيماتك وكل ذا بس عشان تكون جمبهم بالسيارة؟ على بالك راكب وياهم يعني؟ ولا تبي تسمع المسجل وتغير اشرطة على كيفك؟ اذكر الله والدنيا لسى فيها وقت وعلى قولة سعيد صالح (لسااااااا السنة أأوداامنا طوووويلااااا) وهد عمرك وامش على هونك وتسحب وراهم لين يوصلون وتوصلهم حتى لو اليوم الثاني مهيب مشكلة، ان تصل بكرة وانت بشحومك ولحومك وملحقاتك احسن من ان تصل بنفس اليوم وبلحالك بدون المرفقات اللي معك الكلام هذا اثار غضب حسام ولاحظوا اني مااقلت اثار حفيظته لانه موب سعودي واكيد واضح من اسمه وموتره الشي ذا! وقرر انه ينهي هالنقاش البيزنطي اللي له بداية وماله نهاية وماينلام المسيكين تولجهم خالد واستلمهم بسوالف مالها شغل بالفلوس والسيولة المفقودة ونشب بحلق جميل الدب وكنه اللي يقول قابلهم بالصياح تسلم


الحين وش اللي صاير؟؟ فلوس حسام مع احمد واحمد معطيها جميل وجميل مسوي فيها شقردي وهز الخصر ودق الصدر ايضاً لخالد وخويلد مابحياته احد سوا له معروف وطلع منها سليم وبوجه ابيض !!

هنا الشباب تأكدوا وايقنوا انهم دخلوا في ازمة الرهن العقاري واقتحموا معمعة الركود العالمي وشح السيولة وقلة الخاتمة ولعانة خالد !! كيف لا وسيولتهم بين فلان وفلنتان وصايرين مثل بنوك امريكا اللي كل بنك فيها مسلف بنك ثاني الين ما ابتلشوا بآخر واحد وتسلف ورهن بيته وحط رجلة

الشباب قرروا يسافرون لحضور اجتماع الدول الثمانية الكبرى للتباحث والتشاور وتبادل الخبرات والتجارب في التصدي لهذه الازمة خصوصاً وانها بدت تطول الافراد ناهيك عن الدول والكيانات السياسية ومن هذا المنطلق حرصت لجنة الثمانية على حضور العيال للاجتماع ايماناً منها بأن الاصلاح وتسليك الوضع يكون من تحت! (الطبقة العاملة اقصد) وإذا كان عندك بنية تحتية قوية لابد من وجود بنية فوقية جيدة <<< هذا اللي ماودك يشرح .. وقالوها السابقين الصبي ان طاب طيبة من خواله وان تردى فادر انهم ماضبطوا تحت وقالوا ايضاً خير وسيلة للدفاع الهجوم والخ الخ الخ من الحكم والامثال التي تدل على اهمية الاصلاح وبداية العمل في هذا الاصلاح من الجذور والاساس

طبعاً هالكلام ينقال وربعنا الدلوخ فاكين حلوقهم وفاهين ومالهم ولا حركة وكنهم موب موجودين بالقاعة وآآخر شي سووه انهم لعبوا بهدفونات الترجمة الفورية وكان كل واحد فيهم يقول كلام ويسأل اللي جمبه هاه تسمعني؟ وبعدها كلوا تبن وتنحوا وماسمعوا الا آخر كلمة (الجذور والاساس) وقالوا بس رحنا فيها ياولد الجماعة ناوين يقطونها بروسنا ويخلون السبب الرئيسي لطفرة العالم حنا!! الطقيق ياولد الطقيق وخلونا نحل مشكلتنا بمكان ثاني ..


طلعوا من مقر الاجتماع وسط غضب وامتعاض من كافة رؤساء الدول الثمانية لهذا التصرف الارعن والهمجي مادروا ان ربعنا منحاشين ويبون السلامة والدعوة مهيب حول الاتكيت وآداب الزيارات العامة .. وصلوا مقهى رايق على الشارع وجلسوا فيه، واحد منهم كان يقرء جريدة فايننشال تايم وكل اللي بالمقهى يطالعونه وهو ماسك الجريدة ويضحكون ويقطون نغزات ويذبون عليه بالانجلش وهو مستانس في بداية الوضع على اساس انهم يتميلحون عليه وبعدها لما شاف الدعوه طولت وناس طلعت وناس ثانية دخلت وبرضوا ضحك وطنازة ! شك بالوضع وحسب انه ماسك الجريدة بالمقلوب لكنه تأكد فيما بعد وبشهادة الشهود العدول اللي وياه بانه كان ماسك الجريدة عدل ومتمكن منها ومافيه امل يطيح منها شي واقصد الصور طبعاً لانه مايعرف يقرا ومغير يطالع صور وبعد الطلايب وحب الخشوم يسمّع لك الحروف من الف الى مليون! <<< والله ماااردى منه الا انت وبالعكس مبدع بمسكتها ومايسويها الا رجال اعمال وولستريت اللي متعودين يقرون جرايد بالهوا الطلق يختال ضاحكاً ومايطفشهم الهوا لانه يختال ضاحكاً الله يوسع صدرة ومستحيل الضحك يقلب طفش! صحيح والله فيه ناس مستحيل تقرا جريدة بالهوا !! تلقاه شيل وحط ومعافر مع الجريدة وكنه بينصب خيمة ام خمسين عمود تشوفه يقرا الصفحة الاولى وبلفحة هوا تلقاه مرفوس للصفحة الاخيرة ويطلع له الهليل يضحك عليه، ورجاءً لا تلخطبون وتحسبون الهليل يرسم بفايننشال تايم ولا يدعوت احرنوت، تراه يرسم بالواشنطن بوست هالايام بعد ماانطرد من جريدة الرياض بسبب ذبة كاريكاتيرية على مدير التحرير الديناصور السديري، يقولون انه كان راسم رسمة مكتب واللي جالس على كرسي صورة لابو الهول لابس شماغ وبشت السديري على راسة بطحى وقام يحسس عليها ومن كثر ماحسس عليها طفش منها وبدء يحسس بالقلم على قرار فصل الهليل وتجريدة من قلمه ..

الزبدة انهم طنشوا موضوع الضحك لما عرفوا ان اليوم الاحد ويوم اجازة والناس تضحك على المهايطي اللي مقطعته اعماله واسهمه وقاعد يقرا العدد حق امس بيوم العطلة !؟

قاموا يقلبون بصفحات الجريدة وقروا اعلان عن مكتب الصبر مفتاح الفرج للاستشارات المالية وفزعة المنكوبين من هالازمة التي المت بالكل واولهم واحد من العيال جاني البيت يصرخ ويقول اااااه ياحلالاه يامن يسلمني رقبة بوش وجه الفار قلت ليه شفيك لايكون زارف جوالك بوش الابن! قال الكلب سبب لنا هالازمة المالية وبسببها زحلقوني شركة حديد بالمقابلة وماوظفوني قلت شلون يوضفونك بشركة حديد وانت على النقيض تماماً من الحديد لانك لوح وفاقد الشي لايعطيه وبعدين اللي يسمع حماسك وشطتك ذي يقول وخروا عنه هذا اللي بيحل ازمة الحديد وبيكمل الحديد الناقص حق قصر رئيس مجلس ادارة سابك لو يدري بوش إنك تدورة وتحلف فيه كان قالك عذر البليد بملف علاقي مقدم فيه بارامكو عام 90 والحين معطيه سابك تبي تقدم عليها وحنا بالالفية العاشرة!! استح على وجهك بلا بوجهك وبوجه هالشباب حقين الرهن العقاري اللي نساهم صاحب الموضوع وجحد امهم هههههه غير ملفك ولا ترا بحطك براس اوباما وبقوله هالملف ذا لا يقل خطراً عن الملف النووي الايراني ولا بد من تدميرة! ولا مبسوط عليه وماتبي تغيره لانه من عام تسعين ونسبتك بالثاانوي تسعين وتبي تسوي طقم يعني
مفتاح 14 كان من كبار المضاربين في البورصات العالمية وله صولات وجولات في الاسواق العالمية وكان يلعب في موشرات داوجونز ونيكاي و وولستريت باصبعة واحياناً برمشة عين ولما طلب منه جماز السحيمي على اايامه ان يحرك السوق السعودي لم يستطع ابو اربعطعش ان يحركة ولا بشاكوش هههههههههه وهذه هي المرة الوحيدة التي يمنى فيها بالفشل ابو اربعطعش


دخلوا على مفتاح المكتب وتدارس معهم المووضوع دراسة مبدئية وعطاهم مهلة يمرونه بعد مايدرس الوضع باستفاضة وشمولية اكثر .. مر الاسبوع (ياكثر ماتمر ايامك) وجوك الشباب مدرعمين على المكتب وكلن يأمل بأن يحصل لو شي بسيط من دراهمة ابد ماتقول الا ضحايا هابتكو بالكويت لما فشخهم المصري بتاع الخضار وشال عليه مصر .. دخلوا على مفتاح وهو جالس على الكرسي ولابس نظارة القراءة اللي تنحط على طرف الخشم وبيده مكبر يستخدمونه علماء الكائنات المجهرية عشان يشوفون البكتيريا والجراثيم وابو اربعطعش ماخذه لان الهلل والقروش والكوينز صغيرة ومايشوفها


علمهم مفتاح ماهية مشكلتهم وشخص لهم الخلل وعرفوا العلة وين تكمن !! فلوسهم موجودة بس حركتها الدائرية توقفت !! وين توقفت عاد الله اعلم وشرح لهم بشكل مبسط الازمة اللي حاصلة بالبنوك العالمية وقالهم بالله عليكم انتوا على بالكم الحين ان هالفلوس والودائع اللي كانت ماليه البنوك والمحافظ اختفت وطارت !! لاااا هي موجودة لكنها مشت بشارع آآخره حرف (تي) ويايمين او يسار لو لفت يمين كان رجعت الفلوس واستمرت الدورة المالية ولكن الرياح تجري والسفن تنبح وخذت اللفة اليسار ومسكت خط زحمة وضاعت فيه ..

المهم ماعلينا من الازمة العالمية وخلونا فيكم انتم ياصغار المتضررين (كني اشوف الواصل وهو يسحّب بمناحي ومدحت) انتوا ياشباب مالكم الا انكم تعيدون تدوير الفلوس اللي بينكم وترجعون حركتها لو بالقوة والظاهر انكم شفتوا الفلم اللي توقفت فيه نواة الكرة الارضية عن الحركة مما ادى الى بروز ظواهر فلكية غريبة وعجيبة اجبرت المسؤلين في ناسا على وضع قنبلة نووية في باطن الارض وزرعها بالنواه عشان تنفجر وترجع تتحرك النواة مرة ثانية !

وانتوا يبي لكم نفس الشي .. قال خالد وانت صاحي يابوو تبي تفجرنا بصاروخ نووي؟ قلت ايه بصاروخ نووي وماراح يتفجر الا نواة راسك ولا نسيت الفلم اللي قلت لك عنه يابو خلود؟ خش ومش على اخوياك طارت عيونهم في البداية وبعد ماولعت واحد وخذيت نفس عميق ونفخته بوجيههم وقعت العيون بعد طيرانها على الارض وسوت هبوط اضطراري عجعجت الزقارة وصار لون الجو بالمكتب ازرق، وراحت زقارة وجت بعدها زقارة الين ماشفت خالد قاعد يحك راس جميل ويقول تصدقون ياعيال احس براسي قمل جميل وسوس وكنه بدا يحس بالقمل براسه وقام يحك راس احمد واحمد يحك راس حسام وحسام توهق ومالقى اللي يحك راسه بالاخير عاد اكتشفوا انهم مصاميخ وكل واحد قاعد يحك راس الثاني على باله راسه .. لما توهق حسام ومالقى راس جمبه يحكه، هنا وصلت لهم الفكرة والآآلية التي تمت فيها ضيعة الفلوس بسبب حلقة مفقودة واقتنعوا فيها بعد ماوصلوا لطريق مسدود ومالقى حسام راس يحكه وهذا بالضبط اللي حصل مع دراهمهم، انها وصلت لطريق مسدود ماقدرت تحكه << هذا لاقالك موضوع سلق بيض


الشباب اعجبوا بهالجو والزقاير اللي خلتهم يفهمون السالفة بأقل من ساعة وهم كانوا بمؤتمر ورؤساء دول ومحافظ استثمارية ماطلعوا منهم بحق ولا باطل بالعكس الا طلعوا بسواد الوجه والفضيحة بعد ماخربوا واحد من الهدفونات

قالهم مفتاح هاه يارزقت شرايكم بالتشخيص السريع وفهم المسألة من ابسط واقصر الطرق ؟ هذا وهي زقارة وسويتوا كذا وعلى الاقل عرفتوا مصير فلوسكم اجل لو تشتغلون فيها وتبيعون وتشترون وش بيصير ههههههههه

طمر خالد وخويلد هذا هو المقرود فيهم لانه هو اساس النكبة من الاساس!! وقال تكفى يابو اربعطعش شوف لنا شي نتجر فيه ونبدء من جديد ونعوض خسايرنا، قلت له اسمع انا مجهز لكم خطة، مسألة انكم كلكم تطيحون بالحشيش ماتصلح ولابد من التغيير ، يعني واحد يبيع حشيش والثاني حبوب والثالث شراب والرابع روش وهلوسة وتصيرون تشترون وتبيعون على بعض بشكل دائري مثل بدايتكم لما كل واحد فيكم سلف الثاني!! وبكذا الكل راح يعوض خسايرة ويرجع فلوسه بنفس الطريقة اللي ضاعت فيها احمد يبيع حشيش على خالد وخالد يبيع حبوب على حسام وجميل يبيع الروش على الكل لان جميع الاصناف تطلب روش وهو مثل الحلى مع القهوة مايضبط واحد فيهم بدون الثاني راس المال خلوه يدور ويفتر بينكم والربح يكون لي واحمدوا ربكم اني متنازل عن راس المال وانتوا جاييني حافين منتفين وحتى شناطكم فاضية ومافيه شي ومعبينها قراطيس يقالك اغراض .. اتفقنا ياشباب ؟؟ اييييييييه اتفقنا!!


سافرنا السعودية عشان نقلة انتظرها بتجي من اليمن عن طريق زاحف وهو واقف لانه مضبط جماعته وربعه هناك ومتزهلين بالتهريب بيض الله وجيهم .. استقبلنا الشحنة وخزنتها بالاستراحة وواعدت الدلوخ يجون بكرة وياخذون بضاعتهم اللي بتدور بينهم وفعلاً ماامدى الشمس تطلع الا وهم محضرين عندي بالاستراحة وكل واحد معه ددسن مدري منوين جابها ومريوسين على البوابة يبون يحملون ذابحهم الحماس الله يكون بعونهم المهم ويفتحون بيبان الحوض وهاتك ياشقل وشيل بالبضاعة اللي يشوفهم مايقول الا حساوية مستاجرهم راعي نخل يحملون له التمر ويودونه السوق! صراحة من نشاطهم وطيرانهم بالعجة خفت يتحمسون وتاخذهم العزة بالاثم ويوقفون الدداسن بسوق الخضرة ويبسطون هناك

بلّشوا الشباب بالبيع وكلن قام يمشي سوق الثاني .. هذا يشتري شقفة ويبي يستلج معها ويروح ياخذ الحبوب من واحد ثاني وهذا ملجلج ويبي فكوك ويشتري من جميل كم حبة روش ومشت السالفة معاهم ولا اروع لدرجة ان الارباح كان تجيني اكثر من توقعاتي ودراستي لجدوى الدلوخ الاقتصادية ..

بعد فترة من البذخة وكثرة الفلوس شددت الحكومة على التهريب بعد ماكفشوا زاحف وهو مهرب قات باحشاءة الداخلية وصار شح بالموارد عندهم وبدوا يطفرون الشباب وصاروا يشترون من بعض بالدين ! يعني رجعنا على الطير ياللي صار حسام يشتري من جميل روش ويقايضه بزقارة واحمد يبيع البطل عليهم اما بتعميرة او حبة ابيض او روش وصار التعامل بينهم مبني على شغلات مالها قيمة ورقية في البنك الدولي بس قيمتها عند مكافحة المخدرات تسوى خمس الى عشر سنين


وفي يوم من الايام وبينما خالد طالع من شقتهم مترنح ويسوق سيارته وكنه راكب لنج في بحر تتلاطم امواجه ومعبي الراس زقارة وروش وقفته دورية بعد ماشكت بطريقة سواقته .. فتشوه ولقى الزقارة بجيبه والجيب الثاني فيه حبتين روش صطروه ولعنوا ابو الطيب فيه واعترف قبل لا يركب الدورية اجل لو يروح للادارة وش بيقول ووش بيعترف عليه شقلوه للادارة وقالوا تعال تكمل اقواالك هناك .. من وين جبت هاللي معك قالهم من جميل بياع الروش واذا تبون عنوانه انا مستعد .. عطاهم العنوان وراحوا لجميل وداهموه ببيته ولقوا عنده كمية من حبوب الهلوسة اللي كانت تجارته عليها ولقوا بعضاً من اللجج وبطول الشراب اللي يقايضونه فيها الشلة وخذوه للادارة وعلقوه مع رموشة الطويلة << طراها الاسم جميل .. عاد ياهو عذاب وطلعة روح دب ومعلقينك من رموشك
وهاتك ياتمحيط وخازوق يدخل والثاني يطلع اليييييييين مااعترف لهم جميل بان الشراب اللي معه ماخذه من احمد .. قطوه بالتوقيف لين مايشوفون لاحمد طريقة يجيبونه فيها وفعلاً سووا الكمين بعد يوم وتم القبض على احمد واللي صار على الشباب قبله صار عليه واعترف على حسام وقالهم انه راعي اللجج وانه الراس المدبر للشغل كله بما انه هو اول من سلفهم في بداية الموضوع << مايسوى عليه هالسلف .. مسكوا حسام بنقطة تفتيش عند بيتهم وحطوه بالدورية معزز مكرم وبدون ضرب ولا تعليق حسام شك بالوضع وقال غريبة المكافحة مسويه معاي كذا وتعاملني باللين !! صاح صوت باذنه وقاله : يادلخ تراهم شافوكم ذيك الليلة لما انصمختوا اول مرة وصار كل واحد فيكم يحك راس الثاني الييين ماوصلوا عندك ومالقيت اللي تحك راسه لانك آخرهم ودامك مالقيت راس تحكه ذاك اليوم اجل انسى انك تعترف على احد وتتعاون مع المكافحة وتجيبه لهم وتطلع منها مثل اخوياك!! ولهذا السبب محد ضربك لانهم يدرون ماوراك فايدة! رد على الصوت اللي يسمعه وقال الا فيييييييه !! بعترف على صاحب المكتب وانه هو السبب بدخولنا عالم الترويج والتصريف بعترف عليه لو على الاقل القى لي راس احكة ...

منهو صاحب هالمكتب ؟ هذا واحد قابلناه بمقهى قدام البنك الدولي وعنده مكتب استشارات مالية اسمة الصبر مفتاح الفرج وهذا عنوانه وهذا البزنس كارد حقه .. طالع في الكرت الضابط وكنه مشبه على االاسم ومهوب غريب عليه اسم المكتب واسم صاحبه !! بالصدفة التلفزيون كان على قناة العربية والمتحدث اللي قاعد يهايط ويحلل باسباب الازمة واساليب التصدي لها مكتوب تحت اسمه مفتاح14 وقبل لا يختم اللقاء مع صباا مذيعة العربية قالها اسمحي لي ياصبا الوقت ضيق وانا مرتبط برحلة الى نيويورك لحضور مؤتمر بالبنك الفدرالي الامريكي لانهم طالبين مشورتي والاستفادة من خبراتي في هذا المجال ولنا لقاء قريب ان شاء الله والمعذرة على اللقاء القصير واوعدك المرة الثانية بسروال طويل قصدي لقاء طويل لتعم الفائدة الجميع

الضابط انصدم وقال ياعمي هذا وين وانتوا وين يالسمرمد ؟!! هذا خبير اقتصادي دايم يطلع بالبرامج الاقتصادية وله حضور قوي بالمؤتمرات الدولية وتبون تقنعوني انه هو اللي مطيحكم في هالبلاوي الزرقاا والهباب الامحق!

قاله حسام معليه اللي بالقدر يطلعه الملاس وإن غداً لناظره قريب وهذا وجهي ان ماجاك مدير البنك الدولي للسعودية ومسكتوه بنقطة تفتيش وبشنطة موترة كوكتيل ممنوعاات! يابوي هذا يسمع بداوها بالتي كانت هي الدااء ومن قالنا سالفة النووي وتفجير نواة الارض عشان تتحرك وانا عارف ومتأكد انه العباني ونمس ويستغل الكوارث لمصلحته الشخصية والظاهر انه راضع مع سعيد صالح واكيد هو اللي حرضة على سرقة فلوس المحراث اللي كانت مع عادل امام برجب فوق صفيح ساخن





مايستفاد :

اتحدى ابن امه يطلع فايدة وحده من الموضوع

رجل الديك تجيب الديك وهذي حقيقة مثبتة من اول الموضوع الى نهايته .. هذا سلف هذا وهذاك سلف هذاك وتوهقوا .. وهذا انكفش واعترف على ذا وذااك اعترف على هذاك وانا قاعد ورا الكيبورد اهمز اصابعي

المحللين الاقتصاديين مايدرسون السوق عدل الا بعد مايطفونها بالاستديو





بالنهاية اعذروني على الاطالة والمصالة والرفالة بالتنسيق لاني اليوم فاضي وماكو شغل ولقيت نفسي قدام الكيبورد وجت معي هالخمبقة