في مطار الملك عبدالعزيز الدولي بمدينة جدة وأثناء سفر أحد الأصدقاء الذي روى لي بنفسة هذه القصة عندما كان متوجهاً من جده الى تبوك وبعد أن أنهى إجراءات السفر وتحميل الحقائب إتجه الى البوابة المخصصة للسفر وكان الركاب قد هموا بالدخول الى الطائرة وهو يحمل معه جهاز الكومبيوتر الخاص به وعندما وصل الى التفتيش الشخصي وإذا بأحد رجال الأمن (المباحث) يوقفه ودار بينهم هذا الحوار
رجل الأمن:عفواً لو سمحت
......: نعم
رجل الأمن: الجهاز ممنوع يطلع الطيارة
...... :
رجل الأمن: هذي التعليمات
......: بس أنا مارايح أشغله أنا حامله معي ومسافر فيه بس
رجل الأمن: ياخوي قلنا لك ممنوع
......: ياأبن الحلال وش ممنوع أنا كل مره أسافر ولا عمري صادفت أحد منعني من أخذه معي بالطيارة..... تأكد الله يرحم والديك الرحله على وشك الإقلاع
رجل الأمن: الظاهر إنك ماتسمع الكلام , يا تخلي الجهاز وتركب الطيارة والا توكل على الله أنت وياه
......: لاحول ولاقوة الا بالله وش ذا النشبه مالي الا أروح أكلم الضابط المسؤل
وراح للضابط
......:لو سمحت أخوي أنا صار لي كذا وكذا وكذا (قال له القصة كاملة)
الضابط: فعلاً ممنوع وعندنا أمر بالكلام هذا
......: طيب أنا الحين لازم أطلع على الطيارة وبنفس الوقت ما أقدر أترك الجهاز خصوصاً وإن الشخص اللي جايبني للمطار راح
الضابط:لك الخيار الا إنه يطلع معك,,, أو بإمكانك تتصل على أحد وتخليه ياخذ الجهاز ويرسله لك
......: طيب عندي حل ليش ما اشيل البطارية قدامك وأسلمها لأحد المضيفين بالطيارة وبكذا لايمكن الجهاز يشتغل مثله مثل الشنطه وإذا وصلت أستلمه
الضابط: قلنا لك ممنوع وورانا شغل لاتعطلنا
......:
ورجع خوينا المسكين وأتصل على واحد من الزملاء بعدما ترك الجهاز عند أحد المحلات في المطار وركب الطيارة وهو منقهر ومحبط , ويوم وصل قال لي القصة لأني وقتها كنت بتبوك وبرجع الرياض وأكيد بما إنا بدولة وحدة أكيد الأنظمة ماتختلف وكان معي جهازي... قلت مالي الا أحطه بين الملابس بالشنطة واحط لصقة (قابل للكسر) وأتوكل على الله
وبالفعل مرت الشنطة من جهاز التفتيش وأنا أحتريهم يقولون أفتح الشنطة ويطلعون الجهاز ويصير مصيري مصير زميلنا راعي جدة لكن الحمد لله مريت وشحنت الشنطة وركبت الطيارة على بالي ضاحك عليهم لكن المفاجأة واللي جابلي الظغط إنه بلا مبالغة أكثر من أربع أشخاص مسنترين بأجهزتهم بالطيارة شفتوا القهر.......حسبي الله عليهم

حبيت أنشر القصة هذي عشان نشوف القرارات اللي تصدر ولايمكن للمواطن العلم بها الابهذه الطرق وكأنه مافيه أجهزة إعلام تبلغ المواطن بالمستجدات والقرارات اللي تهمه ويكون هو جزء منها وعشان نشوف بعد القرارات اللي تمشي على أماكن وأماكن والله ما أحد جاب خبرها كأنك مسافر من البحرين للأمارات وبعدين اللي يشوفهم يقول خايفين نسوي الشي.... والله من ناظر وجيهنا حنا وأجهزتنا بيدري أنا ماعندنا ماعند جدتي والظاهر إنهم مكثرين شوفة أفلام لتوم كروز وروبرت دنيرو وخافوا الربع
لكن نرجع ونقول الله يخلف

الله من الدجة عند حقين التفتيش..

أجل قالوا له ممنوع.. أخخخخخخخخ بس.. المشكلة ودك تشتكي بس لمين..

ولا بغيت تتفاهم ... تتفاهم مع مين....من زود الثقافة وإلا الإسلوب عندهم..;)

مالك إلا تقول الشكوى لله..


الله يعيننا على الأنظمة..!!!!!


تحياتي لك يا قولنا الغالي

أخوك / البــــــارق

الله يرجهم

شكراً لك أخوي البارق على تواجدك
ايه هذولا أسلوبهم على كيف كيفك وإذا فيك خير قل لا
وأن كلمت واحد منهم تحسب أنه متخرج من هارفارد كلية الدجه قسم الله من زين الأسلوب لكن مالك الا تقول (ايه هين)

اخوك
قووول هلالي

اقول ماودك تركد يالسي !

اذا فيه اي مشكله ياشباب قولولي ؟

<==== وش عنده !!

بس الظاهر ان كل الركاب جنايات محضرين كلهم والرجال يبي يفزع لاحد من اخوياه ومالقوا الا يصرفون خويك بس برضه قعدلهم كخخخخخ

تحياتي للجنايات

أخوي عـ العاشقين ـذاب
أخوي سهل 888

تحياتي لكم
والله ياخوي سهل ان الوضع يقهر خصوصاً لناس متعوده تساقر بأستمرار ومعاهم اجهزتهم سواء للعمل أو لأي شي ثاني
والزبده ليش المنع؟

مشكور اخوي ..


تحياتي لك

العفو أخوي الغالي
saz...bat

ناس ما عندهم ما عند جدتي
العالم تتطور وحنا ننزل

داااااااجين كالعادة لا شيء جديد

الحمد لله والشكر

مشكور

لاحول ولاقوة الله بالله
كويس انك نبهتنا

لا وشوف لما تسالهم ليه ممنوع؟

بكل ثقه يرد عليك : ممنوع وبس .... (ناقة الله وسقياها) مافي روسهم

ياشباب احنا الغلطانين مفروض كل صبح وحنا رايحين العمل بس خمس دقايق من وقتنا نمر على اقرب مركز شرطه ونطلع على ماهو جديد من الممنوعات.... ربعنا فاضين بالليل يحلمون وباصبح يمنعون .... يالله السلامه

اقول رددوا :


ياليل ماطولك

ماشاء الله عليهم ......

هذا هم اللي فالحين فية .....

ممنوع وممنوع ........

وكل يوم طالع لك ممنوع جديد

ولا سألت ليش وش السبب ..؟؟؟

قال لك وهذا طول لسانة وعقدة وجهة : ممنوع وبس .. والتعليمات تقول ممنوع


ومنـــــــــــع في المـــــــــطــــــــــار ... !!!



وشكراً لك اخوي " قول هلالي " ..

والله من النفس الخايسه ...

اقول خلونا نرجع شوي وراء ...

هم منوعوا الجوال في الطايره ...

وهم اول ناس يشغلونه في الطايره ...

تحياتى لهم ...

الأخت 9 وردة الهلال 9 ...الأخوان GAME أزرق الف ,اسير الأحزان ,زعيم القرن ,عارف الهلالي

أشكركم لتواصلكم
والمنع مازال مستمراً

ماخلو شي
لكن انشالله نتطور بعد 180 سنة على الأقل