ياشاعرنا كانت الليله (مذهله) .. وكنت انت عنوان (القصيده) .. - نادي الهلال السعودي - شبكة الزعيم

هلالي وعزتي راس مالي · #1 20/10/2008, 01:40 PM

السلام عليكم ورحمة الله وبركاته ..

جماهير الزعيم (كل عام وأنتم بمليون خير) وكل عام (وزعيمنا) من أفضل إلى أفضل..

كل عام والصداره بدمنا .. كل عام والبطوله همنا .. كل عام وحنا نفتخر لاشفنا كل الفرق تناظرنا بعجب وتقول هذا الهلال هذا هوه (عمنا) ..

صحيح حنا الوصيف .. لكن لأن زعيمنا فريق ماله وصيف .. الصداره راح تجينا (لحدنا ) رافعه الرايه ... مستسلمه .. متلعثمـــــــه .. تقول مالي غير (الهلال) وماللهلال إلا (أنــــــا)

يووووووووه يالمنتديات صارلي شهوووووور مو بس ماكتبت الا ماطبيتها خير شر .. << وعشان كذا أكيد الاسم الطويل هذا (هلالي وعزتي راس مالي) اللي كأنه دفتر تعبير من كبره غريب بل غريب جدا عن الشبكه ..

أنا لا أخفيكم أبدا بأنني قد قررت فعلا أنني أبتعد عن كل مايتعلق بكرة القدم وعدم المشاركه أو الكتابه ولكن أتمتع فقط بالنظر إلى الكتاب المبدعين والمميزين في شبكة الزعيم .. لكن باختصار ياجماعه يوم شفت القناص يفتح مشروع كبري من الطراز العالمي على مخرج (الخوجلي) ثمن شفت الفريدي فتح طريق (هاي وي) من جنب حارة (مدخلي) قلت ياناس ياعالم عن الأزرق والله ماكو (فكه) .. ويوم شفت الفرص وشلون تضيع وحده ورى الثانيه ماقدرت اصبر وجتني في يدي (حكه) .. وقلت ياولد لايردك الا كيبوردك ادخل وانثر حروفك وخلها بكل شوق تتكلم (أحبك يازعيم النوادي . أحبك في الحضر والبوادي .. أحبك وغني ياطير .. أحبك واشدي ياشادي) ..

أكيد البعض منكم الحين يقول زين حنا وش دخلنا .. ليش تسدح قصة حياتك وقاعد تطفشنا .. أقوله طيب ياسيدي صبرك احلم شويه و تحملنا .. الحكايه ومافيها إني بكل ماتعنيه الكلمه (أعشق كل ماهو هلالي) ... فلاتبخل علي ياخوي أقول للهلال وجماهيره (( أحبك ولاأقدر اني أخليك .. أحبك وعروق القلب تحكيبك .. وإن غبت عنك ماني بناسيك .. مهما يطول الوقت لازم أجيلك

..)) << يااااااااااااه ما أجمل الغزل (الحلال) إذا كان في أجمل وأرقى (هلال)

..

يوم الديربي عفوا يوم مباراة الهلال والنصر لأن كلمة ديربي خلاص صارت قديمه وصرت أول مااسمعها مباشرة تجي قدامي صورة ماجد عبدالله ومحيسن الجمعان وفهد الهريفي ويوسف الثنيان وسامي الجابر وخالد التيماوي ويوسف جازع وفيصل أبو اثنين .. واقول اي نعم هذاك هوه زمان (الديربي) .. أما الحين فهذا زمان (الزعيم) وبس .. وهذا مو كلامي ولكن هذا كلام التاريخ .. كلام الملاعب .. واستاد الملك فهد كان آخر شاهد ..

صباح يوم المباراه كلمني أحد الأصدقاء من الساعه ثمان ونص الصبح

بس يبي يسولف عن المباراه وقلت له كلمتين ياحبيبي (الليله النصر راح يشوف هلال غير ) وراح تكون مباراة الليله باختصار هي (الانتفاضه) الزرقاء وعبر البوابه الصفراء للأمجاد والبطولات ..

وعاد مايحتاج أقولكم وش حصل في المباراه .. لأنكم مو بس شفتوها .. الا حفرتوها بقلوبكم .. نقشتوها في عقولكم .. وشفتوا شلون صار استاد الملك فهد مثل لوحه فنيه من لوحات عمالقة الفن والابداع مش لوحات (بيكاسو) ولا غيره هذي لوحة (هلالكو) وماغير واللي ماسك الرسمه (زعيم الهلاليين) عبدالرحمن بن مساعد وكانت ريشته والوانه هم (القناص) ياسر واخوانه ..

ياااااااااااااااااااااه يا(شاعر الهلال) .. هذيك الليله كانت فعلا (مذهله) فأنت مو حولت لنا الدره للوحه فنيه وبس .. إلا زينت الرسمه ونثرتها لنا بأحلى قصيده وعنونتها باسم (أنت الهلال) .. ياااااااااه .. يا إنك كنت أنت القصيده وكان جمهورك حروف .. كنت أنت الشاعر وكان أسود الهلال في الملعب هم من رتب الأوزان وضبط القوافي.. وأشعل البهجه في المدرجات الزرقاء مثل ماأشعلوا النار في الجهة الصفراء ..

وش خليت ياشاعرنا وش تبيني أقول.. جمعت بين رسم البطوله وشعر الاحتراف جمعت مابين ريشة الكلمه وأبيات شعر بلونين (أزرق) يداوي جروح المحبين و(أبيض) يرسم الأمل على أوراق مستقبل الأحلام ..

أوووووووه ياقناص وش سويت كم قلب من الفرحه هزيت . كم عين ياياسر هذيك الليله بكيت .. قالوا زاد وزنك .. وقالوا ثقلت الخطوه .. فرديت عليهم وقلت .. الخطا ماهي ثقيله بس هذي خطوة واثق وهل عمركم سمعتم بالمثل اللي يقول (واثق الخطوة يمشي ملكا

) فكنت ياياسر ملك وأول مشاريعك لجمهورك هالموسم هو مشروع (كبري) على مخرج (خوجلي) وفكيت زحمة كبيره كانت على شارع (النصر) ... وعقبال ماتفتح كباري ثانيه ياياسر وتخلي الدوري السعودي يتحول إلى (شوارع وكباري) وإنجازات مهندسها قناص اسمه (ياسر القحطاني) خريج جامعه إسمها (نادي الهلال السعودي) .. وياهي جامعه سمعتها يعرفها عدوها قبل حبيبها ويكفيها بس خريجينها من المهندسين العمالقه أمثال (أبو يعقوب وسامي والنعيمه والتمياط إخوان وآل الدعيع اللي تخصصوا في في هندسة السدود المنيعه) ..

تكفون ياللي رايحين الرياض بلغوا مني (الفريدي) تحيه .. وقولوه لو تستمر على هالعطاء وهالحماس ياشيخ يفداك الرقم (15) .. ياشيخ تستاهل قلوب الهلال .. بس انت اعزف انغامك على اوتار الملاعب وحنا نردد قلوبنا يافريدي حلالك ..

وياللي يوصل سلامي لاوصلت العريجا دور على كبير المهندسين (ابو عبدالعزيز) واللي مايعرف مين ابو عبدالعزيز أقوله هو الكابتن محمد الدعيع تخصص هندسه معماريه إنجازاته (بناء سد عالي على المرمى الهلالي) عليه ختمك يابو عبدالعزيز .. وقلوله والله والله ودي اشوفك عشان بس (احب خشمك) ياولد حايل ..

بصراحه ودي اتكلم عن لعيبة الهلال كلهم واحد واحد لكن ماتكفيني السطور وراح اطفش اللي مايعرف الطفش

عشان كذا راح اختصر ولا أكثر حتسي قبل لايجي واحد ويقولي أقول (لايكثر)

..

لكن قبل اختم خلوني اشطح عن الهلال ككيان واجي لغيره من الاخوان ..

(نجيب) بصراحه عقله لبيب ..

كلكم تعرفون سالفتنا كهلاليين مع نجيب وقناة أبو ظبي ولكن اللي ابي أقولكم اياه لاتزعلون ياعشاق الزعيم لأن حركات ابو ظبي تدل على أن هلالكم هو أفضل الفرق بلا منافس .. ولازم نعترف أن نجيب ذكي جدا بحركة الاتجاه المعاكس ضد الهلال .. واللي يبيه فعلا وصلله .. وهو أنه يعتبر جديد على الدوري السعودي وكثير من السعوديين ماكانوا يعرفونه من قبل وأولهم أنا

ولكن بعد الاكشن اللي صار .. حتى جمهور ضمك وهجر صاروا يعرفونه .. لأنه عرف من يختار .. اختار الزعيم اللي خلته أشهر من نار على علم ..

وراح أقولكم معلومه يمكن مااحد قالها لكم قبل كذا بس بليز لاتزعلون علي

:: أظن والعلم عند الله (سقى الله أيامك يامحمد البكر

) المهم أظن أن نجيب دارس ومخطط للموضوع بكل حرفنه وقال في نفسه اليوم ازعل الهلال عشان بكره يصبح صديقي وياحظ من زعيم الملايين صديقه واكون مثل الإي آر تي اللي أعلنوا الهلال السنه اللي راحت مقاطعتها وهذولا هم الحين مسوين قناه تحت شبكتها ..

لا والقناه الهلاليه صارت بفلوس ياعمي والمستفيد صالح كامل وكيف الحال ياجمهور الهلال

..

والحين خلونا جميعا نبارك لجماهير النصر بالمشاريع الضخمه التاليه ..

جميع الأنديه عرضت على النصر مبالغ خياليه طائله عشان يعطونهم أماكن عند المرمى النصراوي يفتحون فيه كباري من الطراز الراقي على شاكلة كبري ياسر .. ولكن لسان حالهم يقول فاز بها عكاشه أقصد المهندس ياسر ..

تتذكرون هالمنظر ::

واليوم كلنا قرأنا في الجرايد أن التهريب للألعاب الناريه والمرفق (صورتها) كانت عن طريق (حفائض الأطفال) الله يكرمكم ويكرم الملائكه

وبناء عليه::

قررت شركة بامبرز فتح أكبر فرع لها في المملكه العربيه السعوديه جنب نادي النصر السعودي .. ويسلم من نفع واستنفع .. ومايمدح السوق الا من ربح فيه .. واللي تغلبه العب به << ماخلى مثل الا وقاله ..

وفي الأخير .. أتمنى أن زعيمنا يستمر في الانجازات والابداعات ..

(كفشه) ..

بعد ماطرد عبدالرحمن بن مساعد الشخص اللي قاعد يترزز وراه في الصوره في موقف عجبني جدا جدا جدا السؤال اللي مباشرة راودني .. ياترى وش علوم الفريان بعدها ؟؟

وسلامة روسكم كلكم نفرا نفرا ..