زامبروتا : على إنجلترا أن تخرس .....!! - صفحة رقم 6 - نادي الهلال السعودي - شبكة الزعيم

أسيــ الزعيم ــر · #1 08/09/2008, 05:28 AM

الموضوع قلب 180 درجة الا 90

حبايبي بتكلم بإختصار طويل

اللحين دوري إنجليزي و دوري إيطالي و مدري وش .. قبل كم سنة كنت أدخل بهالنقاشات و إلى الآن .. لكن بوعي أكبر من السابق و لله الحمد .. بصراحة الدوري الإيطالي بالنسبة لي ممل إلا بعض المباريات .. لكن ما يعني هالشيء انه دوري فاشل .. لأني أشوف هالعالم يعشقون هالدوري فـ أكيد لاقين فيه شي ما لقيته

آخرها مباراة الانتر و سامبدوريا .. ما اخفيكم اني كنت متحمس جداً لمشاهدة الانتر مع مورينهو .. لكن بصراحة بدا الشوط الاول و بعدها بدقائق و اذا بي في غفوة عميقة

بـ عكس الانجليزي اللي لو حصل لي اشوف مباراة هال سيتي و ستوك سيتي تابعتهم و ما نمت حتى لو اني مواصل

إقتباس


	يكفي بطولات الميلان خارجيـاً .. وبطولات اليوفي محليـاً

فواز بالله حط الدحمي مع المدرعمين

اجل بطولات اليوفي المحلية دحوم

ورده

أما أحمد [ اليوفي و بس ] شف بقول لك على شغلة .. الأندية الإنجليزي في الأربع سنوات الأخيرة بدأت و بقوة في العودة خارجياً .. قرينا عن ليفربول و أستون فيلا و نوتنغهام فترة الثمانينات

و أنت أكيد عارف هالشي لكن للتذكير بس .. و شفنا من قبل مشاكل الكالتشيو فريقين على الأقل في نصف النهائي يكونون إنجليز .. 2005 كانوا ليفربول و تشيلسي .. 2006 ما كان فيه الا ارسنال .. 2007 تشيلسي و الليفر و المان .. 2008 نفس الفرق في السنة اللي قبلها

طيب مشاكل الكالتشيو أكيد أثرت على اليوفي فقط من وجهة نظري .. اما الميلان فـ على أرض الواقع ما أشوف انه تأثر لأنه تحصل على بطولة أوروبية بعد نهاية هالمشاكل .. و إن كان فيه خلل فـ هو من الميلان نفسه و ليس من تلك المشاكل

و الإنتر هو اللي ما تأثر أبداً .. بالعكس إستفاد كثيييير .. بإنضمام فييرا و إبراموفيتش لـ فريقه .. لكن لا يزال غريب في الابطال .. يعني الابطال ما فقدت الا اليوفي .. اما روما فـ يسمحون لي عشاقه ما تأثر و هذا هو و لا عمره وصل لمرتبة أعلى من كذا حسب معلوماتي الضعيفة

الأندية الإنجليزية صارت أقوى .. و لا زالت تزداد قوة إذا ما صدقت الأخبار التي تتكلم عن مانشستر سيتي و إستطاعوا الإماراتيين تزويده بالنجوم و رفعه إلى مصاف الاندية الكبرى في إنجلترا

ممكن فيه عوامل أهم من عامل فضيحة الدوري الإيطالي .. مثل الإستثمار المفتوح في إنجلترا و هذا أشوفه شيء يحسب لـ صالح الأندية الإنجليزي و هذي هي النقطة اللي تكلموا عنها الشباب و كأنها سلبية و بالنسبة لي أشوفها إيجابية

على ما أذكر ان ابراموفيتش يوم اشترى تشيلسي أدى القسم .. و لا ابي اشطح و اقول برلمان لكن المكان اللي ادى فيه القسم يشبه هالمكان .. هذي معلومة جت في بالي و قلت احطها

فـ اذا فيه مثلاً رجل أعمال بيشتري نادي ليفربول مثلاً .. و بإمكانه ضخ الأموال في الفريق و إعادته أفضل مما كان محلياً فـ وش المشكلة في انهم يبيعونه عليه .. ابي اعرف بالضبط وش المشكلة في أن يكون مالك النادي غير إنجليزي .. يا جماعة الخير ترى مهوب الهلال نقول ما يشتريه الا سعودي .. بالعكس حتى الهلال اللي هو فريقي و عشقي الأول لو يشتريه مستثمر أجنبي و أضمن انه بيساعد في تطوير النادي بشكل مختلف و كان القرار عندي ما راح اخالف هالشيء أبداً .. لكن بشرط أن يؤدي القسم زيه زي هالانجليز مع ابراموفيتش .. يعني يتعهد انه يرفع من مكانة الفريق الرفيعة بالاساس و ما ياخذه على انه استثمار فقط

تكلمت كثير و خذيت من وقتكم الكثير .. و يا احمد بالنسبة لسؤالك الاول ما فهمته زين .. و برجع اقراه لعلي افهمه .. تخبر هالوقت الواحد ما يجمع خاصةً انه ما تسحر

بس مدري وشلون طلعت كل هالبربرة

لكم ورده

skroo · #2 08/09/2008, 05:39 AM

^ ^ ^

يا اخي حلاتها تشوف دوري ممتع وفيه مشاعر وكل شي

الايطالي من ملاك الاندية ؟

عائلة انيللي لليوفي
موراتي للانتر
برلسكوني للميلان
سينيسني لروما
دي فااليا ( مدري وش اسمه ) للفيولا

تحس انك تناظر فلم THE GODFATHER حق الباتشينو

غير كذا الجماهير يتطاقون وفيه اكشن خارج المباراة واثناء المباراة
( كان فيه هنا فقرة وشلتها لاني جبت العيد فيها

)

بس الانجليز ماادري وشلون دوريهم :
نادي يملكه روسي
ونادي يملكه تالندي والحين سعودي
ونادي يملكه امريكي
ونادي يملكه مصري

والمطرسة لاتزال مستمرة في بيع النوادي الانجليزيه , صح هذا يقوي الاقتصاد في الدوري بس يخوي يروح الطعم
يعني ما نسمع تصريحات الا من المدربين او اللاعبين

على عكس الايطالي اللي التصريحات من العوائل المالكة والمدربين واللاعبين , لو فطس ابراهموفتش والا جيليت , بيسوون له جنازه وبيكون فيه مؤثرات وحزن والا لا ؟ ما اعتقد لان الارض مهيب ارضه

شوف ايطاليا يوم مات سنسيني جايين يعزون في بيتهم وتوتي يقول مثل ابوي

وهالكلام صار يوم مات جياني انيللي وانجيلو موراتي ... الخ

يعني الايطالي تستمتع بكل شي فيه اثناء المباراة او خارج المباراة

بعدين الكالشيو فيه تكتيك في الملعب بشكل خيالي
ودي اشوف فريق انجليزي يلعب بخطة غير 4-4-2

كلهم كذا

الكالشيو ما فيه خطة الا وهي فيه
من 3-6-1 الى 5-4-1

فورزا كالشيو
ميردا بريمر

ورجاء اللي بيرد علي يرد باسلوب حلو مثل هلالي& ارسنالي ( نايف ) ولا يجي احد يرد علي كني غلطان على ابوه والا امه

على فكرة نايف اسمي ناصر وتسلم على ردك يالغالي ورده

Tнe LeaDeя MiLaи · #3 08/09/2008, 07:09 AM

الاسهم كله لناصر ولعبدالله

اما مثالك ياناصر حق الهمبرجر مسكت

إقتباس


	على قولتك الله يخلي ويكيبيديا

إقتباس


	ما عندك معلومات عن ناديك .. و لعلمك انا كاكا عرفته من 2002 يعني قبل 6 سنوات و ما كان بالميلان

انا ماعندي معلومات عن ميلان ؟

اجل ميلان رسميا عنده 21 بطوله اوروبيه وعالميه

الله يستر ليجي الكالتشيوبولي وياخذ منها بطولتين

.

إقتباس


	يكفي بطولات الميلان خارجيـاً .. وبطولات اليوفي محليـاً

مدرعم 12

ماهو مني ترى كله من عبدالله

.

إقتباس


	ميلان أدب الاندية الانجليزية ؟

إقتباس


	شباب ارسنال القادمين من "الدوري الانجليزي " جحيم كرة القدم قدموا لعواجيز الميلان المخضرمين والذين يلعبون في جنة كرة القدم درساً في فنون الكورة ..! وفي رواية واحد من الشباب : مردغوهم مردغه مافيه رياضي مُنصف عاقل ومتزن ينكر جمالية الكرة الانجليزية وروعتها .. اما من فقد تلك الصفات فليتحدث بما يريد إلا عن الكرة ..! وعلى نطاق المنتخب .. مو شرط ان اللي يكتشف شي يتوفق فيه .. اكتشافهم للكرة بحد ذاته إنجاز .. بينما الطليان كانوا مشغولين باكل الاسباغتي ومنافسة نسائهم على عرض الازياء والموضة ..!

يازين نقاشك

محد قال ان الدوري الانجليزي بايخ او انه فاشل ....!!

كل السالفه ان فيه مجموعة صحفيين حواقين بالتايمز

مدري وش فيهم ذاك اليوم وماسكينها سب في الكالتشيو ومدري ايش

بصراحه لهذا الحقد سبب ؟

اتوقع انه مورينهو ومع عودة اللاعبين الكبار الى الكالتشيو .

إقتباس


	مفخرة ايطاليا ..!

إقتباس


	أنجليزي الصُنع

وش فايدة انهم اخترعـو الكوره او شاركـوا بتأسيس نادي وهم مالحقوا بركبها

الا بعد سنين عجاف وجفاف عن الانجازات وبطولات ومن حتى طريقة تكتيك ....!! .

إقتباس


	لو موالإنجليز تبع الحرب العالمية جان ما كان في منتدى اسمه الزعيم ولا نادي اسمه ميلان و مدريد و انتر و ... إلخ

وماكان فيه عضو اسمه red--army

.

اما عن حوار عبدالله وناصر الذي انتهى على شطيرة الهمبرجر

فانا اقول ان الإستثمار ماهو عيب بل به فائده إقتصاديه كبيره

يعني بسببها عرفنا تشيلسي ويمكن نشجع مانشستر سيتي

.

بس يمكن الانفتاح على الاستثمار الخارجي له مضار على المدى البعيد الا وهو

تراكم الديون واحيانا المالك اذا ماعجبه النادي وماحس انه دخل مردود مالي جيد

من هالنادي باي وقت يسحب عليهم وطز ام النادي واهم شي عنده القريشات

وذكرتني بسالفة ملاك نادي ليفربول حاليا اللي الى الان سالفتهم لم تنتهي

ومشجعين النادي على قلوبهم من اي لحظه ويمكن ينباع توريس باي وقت

او ان النادي يرجع زي اول .....!! .

بالاخير يازين النقاش بعيد عن الماهترات الشخصيه والبعد عن التعصب الاعمى

وتزييف الحقائق وابعدوا عن الدرعمه

.

أسيــ الزعيم ــر · #4 08/09/2008, 05:53 AM

^
^^

نويصر شكلي تعلقت معك

حبيبي وش ابي انا بهالمشاعر .. اللي قاهرني هاللي زعلانين على موت سينسي و الا مدري منهو من ربعنا .. كافر .. طووووط

شف حبيبي بالنسبة لروابط الجماهير .. ما ادري عنها لكن ليفربول عندهم رابطة ما ادري وش اسمها المهم ان لها دخل في الكوب و لهم موقع خاص عالانترنت و اعتقد انك ما تدخله الا لازم تسجل بدراهم

اما شغلة الرؤوساء .. يا اخي اسالك بالله اذا انت في يدك القرار .. و جاك واحد مثل ابراموفيتش و الا الفهيم هاللي توه طالع .. و قال بيشتري النادي و تعهد بانه يدعمه بابرز الاسماء و يجيب مدرب يقودهم بشكل صحيح .. بترفض .. او خل بيدك القرار يا اخي انت جمهور و دريت عن هالسالفة وش تتمنى انه يجلس عشان تسمع تصريحاته او يبيعه و تشوف ناديك يرجع أقوى مما كان ؟

انا كـ متابع للدوري الإنجليزي اقول الا بيعوا و لا يصير و لا انجليزي فيه دام الفرق بتصير أقوى و هالشيء بيعود لي بالمتعة كـ مشاهد .. حتى كـ مشجع لأي نادي كان أبستفيد ان النادي اللي اشجعه بيكون أقوى

المسألة بالمشاهدة .. التصاريح و ما ادري ايش امور اعتبرها ثانوية .. احياناً هالتصاريح يكون لها مردود ايجابي في المباراة .. لكن ياما مباريات ما شفنا قبلها تصاريح و كانت من افضل المباريات

skroo · #5 08/09/2008, 05:57 AM

تكفى ياللي سوينا عزا في السعودية يوم فطسو

كلهم كلابه و #$^$%&%#&$@^#%!#@$

بس قصدي تحس انك تشوف شي كامل مكمل من مجاميعه <== لا تسألني وش معناها بس اشوف انها مناسبة للموضوع

بعدين اصلا تراني مدرعم ولا ادري وش النقاش عنه

هل الكالشيو افضل بشكل عام والا اخر 3 مواسم والا المنتخب والا وشلون ؟

وش السالفة تكفون واحد يرتب لنا الموضوع من جديد

<== حس انه حاقها خخخخخـ

أسيــ الزعيم ــر · #6 08/09/2008, 06:04 AM

^
^^

السالفة و انا اخوك ان هالانجليز طلعوا تقرير مدري تصريح و تلكموا عن الدوري الايطالي و رد عليهم زامبروتا و دخل المنتخب في السالفة و هو ماله دخل لكن ذبة على الانجليز و يستاهلون

الشباب هنا قلبوها مقارنة بين الدوري الايطالي و الانجليزي .. و المسألة ما تستاهل لأنها في النهاية [ أذواق ] .. و هالكلمة للي يقارنون .. هل اللي يتابعون الدوري [ الانجليزي أو الإيطالي ] مهبل و ما يفهمون ؟ .. يا اخوان المسألة اذواق و انا يعجبني الانجليزي اكثر بكثير من الايطالي مثل ما يعجب ناصر مثلاً الايطالي اكثر بكثيير من الانجليزي

المهم يا ناصر المسألة راحت على عدد بطولات و مدري ايش و النادي الفلاني اصله انجليزي و الطليان طلعوا اساطير ومن هالكلام .. يعني السالفة تلخبطت و دخلت فيها امور كثيرة

لكن اللي متأكد منه ان النقاش شكله حلو

اما العزاء مهوب قصدي بس اشوف بعض الردود الله لا يوريك و هالكلام مهوب عندنا هنا لكن كلمتي عنهم كانت استعجاب فقط لا غير من اشخاص مهوب عندنا بالمنتدى

skroo · #7 08/09/2008, 06:09 AM

^ ^ ^

ازيدك من الشعر بيت يا عبدالله ؟

مدرب ارسنال الانجليزي فرنسي
مدرب مانشستر الانجليزي اسكتلندي
مدرب ليفربول الانجليزي اسباني
مدرب تشيلسي الانجليزي برازيلي
مدرب توتنهام الانجليزي اسباني

مدرب ميلان الايطالي ايطالي
مدرب انتر ميلان الايطالي برتغالي
مدرب فيورنتينا الايطالي ايطالي
مدرب جوفنتوس الايطالي ايطالي
مدرب روما الايطالي ايطالي

كل مدربين الكالشيو ايطاليين الا انتر ميلان

يخوك مهو دوري انجليزي , طلع دوري الامم المتحده

بعدين لي ملاحظه

عقب ما خلصنا منهم بالكالشيو وعصرناهم عصر , وديناهم لدوري الامم المتحده

طبعا تراباتوني يدرب ايرلندا بس زيد اخو عبيد ورده

بيسبول · #8 08/09/2008, 06:15 AM

الكالشيو هو جنة كرة القدم

أسيــ الزعيم ــر · #9 08/09/2008, 06:20 AM

^
^^

و اعتقد انه مرة على اسكتلندا بس منيب متاكد

لا و حسبها بعد من عشرين سنة راحت يا ناصر و اكثر يمكن لبعض الاندية .. لا و ازيدك من الشعر بيتاً أخر

اعتبر ان اول من ساهم في رفع مكانة تشيلسي هم فيالي و زولا .. و ايطاليين بعد

لا و السنة قبل الماضية او اللي قبلها كان اهم اللاعبين اللي وصلوا ميدلسبرة الى نهائي كأس الاتحاد الاوروبي هو لاعب ايطالي اعتقد اسمه ماكاروني [ اصلع ]

و انا وش ابي بهالامور يا اخوي

نلف نلف و نرجع على نفس النقطة .. مدرب مانشستر هاللي له فوق العشرين سنة جاب للفريق 30 بطولة تقريباً و جاب للفريق بطولتين تشامبيونز و على وشك يجيب رقم ليفربول في اكثر فريق تحصل على الدوري

خلاص يعني مهوب انجليزي صار كخة

والا صار سلبية على الدوري .. الا فايد فريقه بفائدة ما كانوا يحلمون فيها .. يا شباب انتم تتكلمون عن امور تفيد الدوري .. ابي اعرف وشهي السلبية بس عجزت

skroo · #10 08/09/2008, 06:23 AM

^ ^ ^

والله يا عبدالله اشوف العالم تحوق بهالموضوع فقلت خلني احوق مثلهم

ومنها حج وقضاء حاجة يمكن بعض اللي اقوله يرجح كفة الكالشيو بس بطريقة حواقية

شوف يا سيدي كيف تحس ان الدوري ماله طعم , مثال :

لو تاكل برجر وتجيك خبزتين وبينها لحمه , تاكلها اكيد بس مالها طعم
لكن لو تجيك برجر فيها الخبز واللحم والتشيز

والخس والطماط والكتشب , بتاكلها اكيد بس الطعم خيالي

وهذا هو اللي حاصل مع الكالشيو ومع البريمر

<== لا يكثر

أسيــ الزعيم ــر · #11 08/09/2008, 06:26 AM

^
^^

ههههههههههههههه ايه والله لا يكثر

عاد صايم و لا تسحرت وتجيب لي هالمثال .. منيب فاهمه بس بتخيل شكل البرجر

يا زين حواقك .. بس لا تحوق واجد

ناصر ملاحظ استلمنا الموضوع و سوينا زحمة .. خلاص انا برقد .. يا اخي هاللي تحت بيشاركون و حنا ماخذين مكان و مسببين زحمة على حواق

skroo · #12 08/09/2008, 06:28 AM

بتروح تنام

والله قهر

كنت ادور فرصة اتزحلق فيها على يوزرك مثل بعض الاعضاء الله يهديهم لكن ما قدرت

لان البعض تاخذه حساسية باي موضوع ويحسها اهانة له !! وهي ما تسوى كورة

شكرا لك واعذرونا يا اخوان ورده

محب لفريقه · #13 08/09/2008, 06:53 AM

صبحكم الله بالخير يا شباب
هذي معلومات ناقلها عن الدوري الايطالي
يعني لحد يقول منبرش ولا انبرش لا درعم ولا درعم مجرد معلومات

1. هل تعلم ان ايطاليا الدولة الاوروبية الاولى التي نالت لقب كأس العالم عام 1934 .

2.هل تعلم ان ايطاليا اول منتخب بالعالم ينال كأسي عالم متتاليين عامي 1934 و 1938 .

3.هل تعلم ان اليوفي هو النادي الوحيد في العالم الذي نال جميع الألقاب الاوروبية والعالمية.

4.هل تعلم ان اليوفي اول نادي في العالم يكرم من الاتحاد الدولي على حصوله على جميع البطولات والالقاب.

5.هل تعلم ان دينوزوف هو الحارس الوحيد في العالم الذي نال كأس العالم وهو بالأربعين من عمره.

6.هل تعلم ان دينوزوف هو الحارس الاكثر حفاظا على نظافة شباكه لمدة 1143 دقيقة على المستوى الدولي من عام 1972 الى عام 1974 .

7.هل تعلم ان باولو مالديني ثاني اكثر لاعب بالعالم مشاركة في عدد مباريات كأس العالم 23 مباراة.

8.هل تعلم ان باولو مالديني اكثر لاعب في الوقت الحالي حصولا على بطولة دوري الابطال برصيد 5 بطولات.

9.هل تعلم ان منتخب ايطاليا اول منتخب اوروبي ينال جميع الالقاب من كأس العالم وامم اوروبا والألعاب الاولمبية
حيث نال جميع القابه واكتملت في عام 1968 في حين ان البرازيل لم تنل لقب الاولمبياد بعد.

10.هل تعلم ان اكثر لاعب تسجيلا في تاريخ الكالتشيو هو الايطالي سيلفيو بيولا لاعب لاتسيو وفيرتشيلي واليوفي.

11.هل تعلم ان ايطاليا اول دولة تمكن فيها ناديين من نفس الدولة تحقيق لقب دوري الابطال ..الميلان عام 1963 والأنتر عامي
1964و1965.....بل من نفس المدينة.

12.هل تعلم ان الحارس الايطالي والتر زينكا اكثر حارس في العالم حفاظا على نظافة شباكه في بطولات كأس العالم بمعدل 517 دقيقة.

13.هل تعلم ان بوفون اختير كأفضل حارس من عام 1987 الى يومنا الحالي.

14.هل تعلم ان كنافارو هو اول مدافع حقيقي ينال لقب افضل لاعب بالعالم وجائزة الكرة الذهبية.

15.هل تعلم ان المنتخب الايطالي هو المنتخب الوحيد في تاريخ كؤوس العالم الذي نال لقب كأس العالم عام 2006وجميع لاعبيه في الكالتشيو.

16.هل تعلم ان باولو روسي هو اللاعب الوحيد في العالم الذي تمكن من تسجيل ثلاثة اهداف في مرمى البرازيل في تاريخ كؤوس العالم.

17.هل تعلم ان نادي اليوفي هو اكثر نادي في العالم بالتساوي مع الميلان في احراز لقب جائزة الكرة الذهبية 8 مرات .

18.هل تعلم ان اكثر نادي في العالم تواجد فيه لاعبين في تاريخ نهائيات كأس العالم من نفس النادي كان نادي اليوفي ب8 لاعبين في نهائي عام 2006 .......مع استثنائنا
للمدرب ليبي ومساعده فيرارا ولاعب اليوفي السابق هنري.

19.هل تعلم ان الدوري الايطالي اختير 10 مرات كأفضل دوري في العالم في آخر 15 سنة.

20.هل تعلم ان نادي الميلان الايطالي اختير كأفضل نادي في آخر 20 سنة في تاريخ المسابقات الاوروبية.

21.هل تعلم ان رئيس نادي الميلان ورئيس الوزراء الايطالي السابق سيلفيو بيرلسكوني أكثر رئيس نادي نيلا للألقاب....
المحلية والقارية والأوروبية.

22.هل تعلم ان دينوزوف اختير في تشكيلة افضل 11 لاعب في تاريخ كؤوس العالم بعد وفاة ليف ياشين.

23.هل تعلم ان جينتانو شيريا اختير كأفضل ظهير ايسر في تاريخ بطولات كأس العالم .....وفي تشكيلة افضل 11 لاعب
في تاريخ كؤوس العالم.

24.هل تعلم ان الدفاع الايطالي افضل دفاع في تاريخ كؤوس العالم.

25.هل تعلم ان منتخب ايطاليا الوحيد الذي خسر في ثلاث نهائيات متتالية بضربات الجزاء الترجيحية(1990-1994-1998)

26.هل تعلم ان من عام 1982 الى الكأس الاخيرة لم يحمل اي قائد فريق كأس العالم الا وكان لاعبا في الكالتشيو.

27.هل تعلم ان المنتخب الايطالي لم يخسر من المنتخب الالماني في اي مباراة رسمية حتى يومنا هذا.

28.هل تعلم ان المنتخب الايطالي اكثر منتخب سجل لاعبيه أهداف وكان ذلك بكأس العالم الاخيرة برصيد 10 لاعبين رقم قياسي و12 هدف .

29.هل تعلم ان الأندية الايطالية اكثر الأندية نيلا للبطولات الاوروبية برصيد 27 بطولة.

30.هل تعلم ان الأندية الايطالية اكثر الأندية نيلا للبطولات و الكؤوس برصيد 45 بطولة ولقب وكأس عالمية واوروبية.

31.هل تعلم ان ايطاليا اكثر منتخب اوروبي نال لقب كأس العالم برصيد 4 كؤوس العالم.....متفوقا على المانيا.

32.هل تعلم ان اللاعب الفرنسي ميشيل بلاتيني من اصل ايطالي.

33.هل تعلم ان اليساندرو نيستا وفابيو كنافارو اختيرا كأفضل ثنائي دفاعي بالعالم.......في استفتاء جماهيري .

34.هل تعرف ان المدرسة الايطالية هي ثاني مدرسة في العالم بعد البرازيلية واول مدرسة اوروبية.....من ناحية الأكتشاف.

35 .هل تعلم ان الدولة الوحيدة لعب بها ناديان في كأس السوبر الاوروبي اي بطل الابطال وكأس الكؤوس سابقا كانا من ايطاليا وكذلك اول
لقاء اوروبي من نفس الدولة كان ايطاليا خالصا بين سامبدوريا وميلان الايطالي عام 1990 .

36.هل تعلم ان ايطاليا هي الدولة الوحيدة التي نالت 4 كؤوس عالم في اربع عواصم اوروبية (باريس -روما-مدريد-برلين).

37.هل تعلم ان المنتخب الايطالي لم يغيب سوى نهائيين في كأس العالم وهذا يعتبر رقم قياسي في تاريخ كأس العالم....بعد البرازيل.

38.هل تعلم ان اللاعب الايطالي فرانكو زولا اختير لأكثر من مرة كأفضل لاعب في الدوري الانجليزي.

39.هل تعلم ان هدافي كأسي عالم 1982 و1990 روسي وسكيلاتشي.........لم يعرفا على المستوى الاعلامي الا بعد ان توجا هدافي
لكأسي العالم المذكورين واختفيا بعدهما...........

40.هل تعلم ان روسي كان مسجونا قبل كأس العالم 1982........وسكيلاتشي كان مصلح اطارات (بنشري).......ههههه

41.هل تعلم ان افضل مدربين في تاريخ العالم هم الايطاليون

42.هل تعلم ان نادي الميلان اول نادي اوروبي يحصل على لقب كأس العالم للأندية.

43.هل تعلم ان الميلان اكثر نادي في العالم حصولا على الالقاب القارية برصيد 18 بطولة .

منقول طبعاً

ملاحظه: بعض المعلومات ماني متأكد منها لكن اللي يلاحظ شي غلط يقول الله لا يهينه

حظيظ · #14 08/09/2008, 06:38 AM

^^^^^^^^

الاسهم لناصر

هههههههههههههههههههههههههههههههههههه

فعلن الكتشب مهم بالكبسه المقليه !!

كل هالخناق عشان زمبروتا وتصريحه !!!

يمديهم تراضو وانتم لهالحين تقبسووون ...

الا شفتو بالجزيره الوثائقيه البرنامج الي كله علماء واشياااء مررره حلوه(( وش عنده القصبي)) تقعدو لإمريكا بسالفة البنتاقون وطلعت ماهي طياره الي ضاربتهم ...

---

لكن زبدة الموضوع قالها اسير .. لكل واحد ذووقه وطريقته باللعب ..

وانا طبعا افضل التكتيك الايطالي مع اني اشوف ان بينيتز هو افضل مدرب حاليا مع ليبي ..

حتى الدوري الانجليزي حاليا بدا ياخذ اسلوب اللعب الايطالي ومن المهاجم تشوفهم يدافعون وكل العالم بدت تمشي على هالطريقه

وحتى انتشار الطليان خارج ايطاليا بالفتره الاخيره اكثر من اول وهذا يدل على ان التكتيك الايطالي بشكل عام مطلووب ،، صح انه ما ييب المتعه من ناحيه المهاره الفرديه للاعب

لكنه يجيب المتعه من ناحية مهارة الفريق ككل وكيف تهجم وكيف تدافع .. كابيللو مع مدريد ما كان ممتع كريكارد .. لكنه جا وضبط كل شي خربان وراح !!

صبح صبح يا عم الحق

قـنـ مـدريـ10ـدي ـاص · #15 08/09/2008, 06:42 AM

إقتباس


	ونادي يملكه تالندي والحين سعودي

إماراتي قصدك ياناصر " على فكرة هي مجموعة كاملة لكن الواجهة سليمان الفهيم "

ثانياً .. أندية مثل روما " تاريخ عراقة " .. أتحدّى إذا فيه مشجّع روماوي كان رافض بيع النادي للمستثمر الأمريكي اللي بغى يشتري النادي ورفضت بنت سينسي .
على فكرة .. ليه الأندية الإيطالية نادراً تشوف نادي له ملعب خاص فيه مثل البريميير والليقا !؟
سؤال ثاني .. كـ مثال روبينهو وش خلاه يروح للسيتيزن .. ووش خلاّ روما مثلاً يروح لـ بابتيستا !؟
المسألة مسألة مادة .. مسألة وجود ملاك يدفعون .. بـ التالي قوّة دوري !!
بـ التالي وجود أقوى بـ التشامب .. وبنفس الوقت يزيد قوّة المنتخب !!
مو شرط إن انجلترا كـ منتخب فاشل " الفترة الماضية " إنه بسبب الدوري .. لا ..
السبب المدربيّن الأغبياء اللي يمسكون تدريبهم + عقليّة اللعيبة اللي مدري وش تبي + صحافة هجميّة .
لاعب مثل جيرارد .. مطلّع كتاب عن سيرته .. كم له سنة يلعب عشان يطلّع له كتاب !؟
لامبس !؟ .. تيري .. !؟ .. كاراجير !؟ .. على وش !؟
كلّه توافه وخرابيط وكلام عرابجة !!
أجل جيرارد يقول بكتابه .. وحنّا بـ الطيارة رايحين لألمانيا بـ كأس العالم أشوف
واحد عمره 16 سنة واقول بنفسي وش يبي هـ الحدث معنا

.. اخرتها يطلع والكوت !؟
وإلا كارا .. يقول اخوياي دقوا علي وانا بالمستشفى وقالوا لي إن فيه لاعب انت تكرهه وهو سبب إصابتك .. قدّامنا بالسوق تبي نلعن جدفه !؟

.
وإلا يقول إننا بمعسكر كأس العالم .. كنّا ندخّل حريم علينا بـ معسكر المنتخب !!
ويجينا أريكسون يقول .. مايصلح هـ الشغل

خلوكّم رجال .. وعلى قدّ تطلعات جماهيركم !؟
ياهو ضعيف شخصيّة هـ المدرب ودلخ !! < هذا كلام كارا

وإلا يقول .. إن ولائي لـ الليفر أكبر من ولائي للمنتخب .. وتهمني نتيجة الليفر أكثر من المنتخب !!
لكن بنفس الوقت ألعب بجدّ للمنتخب !؟ < يرقّعها الحين

.
عسى ماشرّ ؟! .. سواليف !؟ .. عقليّة مدري وش تبي !!
كابيللو .. وجوده بيفرق مع المنتخب .. وأراهن إنهم بيسوون شي بـ 2010 م .
وهذا اللي ناقصهم من زمان

اليوفي وبس ..
خذها من زاوية ثانية .. قبل 4 مواسم كم منافس على البريميير !؟
كانوا 3 .. الحين كم !؟ .. 4 أندية .. والموسم الجاي 5 " السيتيزن " .. والدور جاي على توتنهام واستون فيلاّ والبقيّة بـ الطريق .
وأزيدك من الشعر بيت .. الليفر جايه عرض من شيخ إماراتي بـ 500 مليون باوند
+ تسديد ديون النادي + تكملة " أو بناء " الملعب الجديد " مدري يابناء ياتكملة اللي هم بادين فيه

" .

التشامب .. ماننكر إن الكالتشيو بولي أثّر على أندية إيطاليا .. بس الوحيد اللي تأثر بـ شكل كبير هو اليوفي !؟
مو عذر إن اليوفي ينزل سيريا B إن الميلان ينافس على المركز الرابع بالدوري ويلعب بـ كأس الإتحاد .
ولاهو عذر إن روما تاكل دايم من المان وبنتيجة كوارثيّة " 7/1 " ..
ولاهو عذر إن بطل الكالتشيو اخر شيء يوصله بالتشامب دور الـ8 من 4 سنوات !! .
وبرضو ماهو عذر إن الميلان يلعب بـ كأس الإتحاد الأوروبي بعد سنتين من انتهاء المشكلة .. بينما المتضرر الرئيسي " اليوفي " يلعب بالتشامب !!
وبـ نفس الوقت .. والكالتشيو يتأثر .. البريميير بعد زاد قوّة وحدّة وتنافس !!
نتفّق إنه كـ منتخبات .. الإيطالي .. أفضل من جميع النواحي " ويرجع هـ الشيء لـ المدربيّن الكبار وطريقة اللعب وعقلية اللعيبة " .
يمكن البريمير مايعجب البعض .. أو العكس الكالتشيو مايعجب البعض .. وهـ الشي مسألة ذوق واختيار شخصي مالأحد اعتراض عليه !!
لكن كـ دوري البريميير أفضل .. والليقا والكالتشيو لو تبي توصل لـ مستواها يبي لها سنوات " فيما لو وقّف البريميير على مستواه الحالي "
بنفس الوقت ما أحد ينكر إن الكالتشيو هـ الموسم بيكون أقوى من العام واللي قبله .
لكن البريميير قوّته زادت بعد عن العام واللي قبله !!
خلاصة الموضوع .. وجود ملاك أجانب أعطى البريميير قوّة خياليّة خلّته ينافس نفسه وبعيد عن أي دوري بـ العالم !!
أستون فيلاّ من نادي إستراحة لـ الفرق .. لنادي من أمتع أندية البريميير !!
والسبب الأمريكان " على فكرة يُعتبر أفضل نادي استفاد من ملاكّه هو استون فيلاّ وهو صاحب أفضل تجربة بيع لمستثمرين بـ البريميير " .

إقتباس


	ماردونا - زيدان - شيفا - كاكا - نيستا - ريكارد - فان باستن - رود خوليت روي كوستا

ترا فيه فرق إنك ماعرفت هـ اللاعب إلا من الكالتشيو .. وإن الكالتشيو طلّع هـ النجوم !!
مسألة إن ماردونا يجي يلعب بالكالتشيو ويبدّع .. مو معناتها الفضل لـ الكالتشيو بظهور موهبته .. والكلام ينطبق على غيره !!
استثنيت أبناء إيطاليا من كلامي لأن كلامك ينطبق عليهم !

لاهنتوا على وقتكم ورده