بسم الله الرحمن الرحيم

وصايف...
الجادل اللي طولها كنّه الرمح
كل الرّغَد و الخيزران لجسدها
هي بَسمةٍ يشقى بها الجمر و الصّبح"
و تغار قطعان النّحل من شهدها
عن ملحها ياما البحر حدّث الملح
و ياما الحرير اشتاق لعناق يدها
شيهانةٍ لا بيّنَت وجهها السمح
تذبح يا أهل شقر الحرار و هددها
قلب الوله و قلادة التيه و المدح
يستاهله عنق الجفول و نهدها
ليت الجفا زلّة و أدوّر لها دمح
و ليت الغرام جروح و انسى عددها
و أنا قتيل البرد يا وادي الطلح
كان المزون أضناك صاخب رعدها

الموت حظ القلم والمجد للدفتر
حبر القلم غلطتي وايامي اوراقي
الخوف يجتاحني وجه الطريق أسمر
راح اكثر العمر ياخوفي على الباقي
ياجرح رافقتني للناس لاتظهر
وان عشت في نظرتي مامت باعماقي
ياصوت لاتلتحف صمتي ولاتصبر
قل ماتبي واترك الهقوه على الهاقي
والخطوه اللي عن آخر سكتي تقصر
ماهيب من طبع رجليني ولاساقي
مانيب من عاش لايربح ولا يخسر
ولاهو ضرري تكون أفعالي أخلاقي
ثراي ماينشد الغيمه متى تمطر
مادامها في سماي تحن لاغراقي
رح وين ماتشتهي رح قد ماتقدر
أنا اول الناس في قلبك وانا الباقي
يكفيني انك تعذبني وانا اتفجر
قصايدٍ تنتظرها كل عشاقي
وانا قصيدي يجي مختارني مهجر
وأنبت عشانه نخل وسنيني الساقي

صحيت جمره.. وذاب الشمع.. والسكر

وشلون ما أتذكرك وتمر في بالي

في بسمتك يضحك الرمان للمرمر

وبعد يغار الشهد من ريقها الحالي

ويحق لك ياصغير السن تتكبر

إلا على اللي يحبك يابعد حالي

ياكثر حبك بقلبي والغرام أكثر

وأتخيل وش كثر أحبك وأنت غربالي

ياخلطة المسك.. والريحان.. والعنبر

الريح تستأذنك يا الطيب الغالي

رح وين ما تشتهي رح قد ماتقدر

أنا أول الناس في قلبك وأنا التالي

والعاشق يعلم الصبّار يتصبر

ليت لي ذود يدك البيد واحداله لحاله
كان ماوالله علي خلاف في نجد العذيه
جفت اقلام الغرام وطول المحبوب باله
والله اني ماهقيت ان الغضي يقسي عليه
وش خطاي الا المحبه وش رجاي الا وصاله
وش يبي غير الموده والغلا والمقدريه
دللوه اللي ربوه صغير واسرف بي دلاله
ليت لي قلب يطيق الصبر وعيون خليه
والغضي لو لاعه التحنان وبقلبه عداله
ماغذت من دونه القيعان جردٍ جرهديه
وان تشره قايد الغزلان ماله بي جماله
لعنبو من خان خلانه وجنب عن خويه
عن جنوبه والوله والشرق يغنيني شماله
صد ياقلب الجفا لاصد وضاح الثنيه
ماانت ياالخفاق عبد له ولا انت اصغر عياله
انت خفاق الضلوع العوج والخيره خفيه

يقولون الشعر وصل القلم والصفحة الطرقي
وانا اقول الشعر قدح الخيال ونار صوانه
حبيبي والبحر سور التراب ودفتر الغرقي
لو اني ماكتبـتك لامني ملــحه ومرجـانه
حبيبي لاهمت حبر العروق الغيمه الزرقاء
علي رمل الورق دمي سحاب هل هتانه
حبيبي كل ماذعذع جفاك وناحت الورقي
يتل البــال قلبي واهدي السـجات جنحانه
حبيبي وانت مرقاب الشجون وهاجس المرقي
تري كل يمـوت الالوفي بعيون خـلانه
حبيبي والجروح اللي سببها ليلة الفرقا
ضميدها الوصال اليا ظما المحروم حرمانه
حبيبي لو يسمحك البحروتبيحك الغرقي
انا ماسامحك لو لامني ملحه ومرجانه

خـــآطرة جميــله جـداً .. تحمل الكثير من المعآني

يعطيك الف عآافيه اخــوي

ننتظر جديدك

تقبل خاالص ودي وتقديري ..ورده