رونالدو قال لقناة برتغالية انه يتفق مع بلاتر في هذا الموضوع ، ويقول مابعد اتفق مع الريال ..

وقال انه يتفق مع بلاتر ميه بالميه وانه يعتقد ان اللاعبين لازم يتحررون ..

بلاتر اللي صرح بأنه يبغى اللاعبين يتحررون من العقود اللي تخليهم تسنهم عبيد عند ذا الانديه ..

" انا متفائل ، الامور يمكن تسير على ما يرام ، وممكن نحل القضية ، كل شي تمااام ، أنا الحين اركز على الراحة بهالصيفية ، برجع بعد 10 او 12 اسبوع ، التمارين بالكورة ، يمكن بعد شهرين ، أناء متفائل وهادي على مستقبلي ، بلاتر ؟ انا اتفق معه ميه بالميه ، ماعندي اي تعليق على هالكلام ، لكن الزبده ان كلامه سليم ، سويت صفقة مع الريال ؟ لا هذا الكلام موب صحيح واللي قالكم فقاش ، أتمنى مستقبلي يحسم اقرب وقت ممكن ومادري مع مين ببدا الموسم القادم ، مدرب البرتغال الجديد ؟ والله انه كويس وبيفيد البرتغال كثير "

المصدر



...

رأيي ان هاللاعب قليل حيا ..!!

ولوني من عشاق المان اذبه في الصمان اسبوعين في هالقوايل يتعلم المرجله ويرجع ..!!

قليل حيا + قليل خاتمة .. لعنبو بليسك مربينك ذا النادي !!

على العموم لا عزاء للحاقدين << مدري وش دخلها بس لها دخل


وخلوه يروح ريال مدريد جعله يصير مثل بيكام ..

ومن جرف الى دحديره يا رب


كلش الا الخيانة ..


واعذروني على الاطالة والترجمة الخايسه بس والله دااااااااايخ ومنب فاضي عربي فصيح ..

خخخخخخخخخخخ احسن ترجمه شفتها بحياتي ,,

رونالدو تصرفاته تقول طفل ما يناظر مصلحته ,,

وشكرا ,,

الف شكر اخ فورزا يوفي على الترجمه الكويسه مره
ثانيا انا ابي افهم الحين الريال وش لاقين في هالادمي ازعجونا فيه يااما ناس ادفعوا وخلوكم قد الكلام والا خلوه في فريقه
كل يوم والثاني ناطين لنا بكريستيانو وكريستيانو ومن شاف كريستيانو قال هذا بطل العالم وهداف العالم واحسن لاعب في العالم ولا شي من هالالقاب حصل عليه
صدق الاعلام يصنع النجوم والوسامه لها دور مثله مثل بيكهام
زبده الكلام ان انتقل للريال مبروك عليهم ويبشرون بدخل الصور والتيشيرتات وان بقى في مانشستر مهوب فضل من رونالدو بالعكس المنه عليه لانهم من اخرجه للعالم هو وقذلته
انا عارف واحد بينط وبيقول وش عرفك باللاعبين وبيقول احتراف انا عارف الشي هذا لكن الموضوع زاد عن حده من العام اللي راح والمفاوضات مستمره وشكلها دعايه لكالديرون رئيس الريال ورونالدو ملك الفلاشات
سوري ع الاطاله

ريال مدريد قليلين حيا اللاعب مدد عقده مع المان
صدق انهم نشبه
واللاعب ماهو بعيد عن الريال بقلة الحيا الحين يوم
انك ماتبي المان ليش تمدد العقد ولا هي لعب عيال

ههههههههههههههههههه

يا جماعه الخير وش فيكم

كيفه الولد يبي ريال مدريد

تعرفون وشي ريال مدريد يعني العب الفنتكه والجماعي

تراه ماراح لنصر عشان تسبونه

خخخخخخخخخخخخخخخخخخخخخخخخخخخخخخ

مشكور اخوي

الله يعطيك العافية ..

رونالدو جاء للنادي " طفل استعراضي " ومع فيرغي في كم موسم اصبح
الافضل في العالم بشهادة المحايدين

اتمنى فيرغي يتركه يشوف مستقبله .. منها تجي للنادي ملايين تفيده بصفقات
بربا وغيره .. ومنها وهالشيء هو الاهم يعرف وش يسوى رونالدو اذا طلع
من المان .. أو بمعنى اصح بدون " فيرغي "

بلاتر .. ابواب كانت مقفله تحمَّل نتائج فتحها .. لأن فيه اكثر من لاعب على
شاكلة هالـ @#$%

فورزا يوفي .. اطلق ترجمة ياشيخ لا تخلينا نقول جعلك قبل دايخ
عشان نشوف هالاسلوب بالترجمه

والله انه رونالدو جابها صح وانا اهقى انه يبي يعين خار مع بشكة مدريد

وبلاتر والله انه شنب وقسم بالله يعجبك يوم زبدها في وجه فيرغسون

صح ان رونالدو مهايطي وقادح بس ولو الرجال بكيفه ماهو بورعك يا فيرغسون يوم تمسكه

وترجمتك يا فورزا يوفي ترجمة سنعه بعيده عن التكلف والتصنع وانا اجيزك وفالك البيرق

الولد يبي الريال

ومن حقه

اكثر بطولات وشهره وشعبية

واللاعبين لهم احترام في هذا افريق

000

عكس النادي المروح

المان

اللي مدربه يضرب اللاعبين بالجزمة

888888888888888888
النادي المروح اللي تقول عنه بطل اوروبا وبطل اقوى دوري بالعالم والمدرب اللي يضرب اللاعبين بالنعال جاب بطولتين دوري ابطال وثلاثية لا انت ولا غيرك يقدر يجيبها ..

عموما اتمنى انك تبتعد عن هالالفاظ لاني من ايام اليورو وانا اشوفك المنتخب اللي ما يعجبك خلاص مو زين والمنتخب اللي تشجعه اقوى منتخب بالعالم ؟؟؟!!

الله يعينك ان شاء الله صاير زي النصراوية

الوافي001

^^للي فوق اللي فوق ردي ..
هذا اللي اقصدهـ بالضبط .. يالمدريدي المرهف ..
ناس الله يهديهم يشبونها ولا تلقاهم .. وينجرفون وراهم
العالم والنتيجة ايقافات

**

ما يحتاج نجيب لك سبوره هنا .. ونشرح لك من هو المان .. خاصة
انه شارحها بنفسه الموسم الماضي

..

خخخ .. تسلم على اطلق ترجمة قد شفتها ..
قسم ما رديت الا عشان ترجمتك
رونالدو مدريدي .. بس شينة منه أنه يطلع من المان
بعد ما طلعوه فيرجسون و كيروش بـ هالمستوى ,,
على الأقل ما يسحب على فيرجسون في سويسرا و السوالف
اللي صارت ,, عمومًا امر طبيعي من البرتغاليين السحبات
قبله فيجو و بعده كيروش و بالطريق كريستيانو و يمكن ناني بعدهم

..

إقتباس عكس النادي المروح المان اللي مدربه يضرب اللاعبين بالجزمة

اووف قوية !!

بتروح ايقاف من ابو حمااده !!


هدوا يا شباب تراه يمزح .. !!


مشكورين على المرور .. لوني داري ان الترجمة ذي بتعجبكم كان ترجمت اخبار من زمااااان ..

تصريح رونالدو غريب بشكل كبير ! .. كان ممكن ياسيد رونالدو تلتزم الصمت حيال هالموضوع وتترك التصاريح لغيرك كونك المعني فيها ! حتى لو كنت تبي الريال لكن فريقك رافض خروجك ماتطلع بأول تصريح بعد تصريح بلاتر وتأيده ! .. لانه على كثر الي راح ينتقدون بلاتر .. راح ينتقدونك برضو ..