أخـوي الـصـغـيـر تـزوج الـبـارحـة .. والـفـال لـي ( فيس حزين ) ...!! - صفحة رقم 7 - نادي الهلال السعودي - شبكة الزعيم

hilalemooot · #1 22/07/2008, 05:52 PM

.
.

دايم أجي متأخر

.. جيت ابرد ذاك اليوم لقيت القاضي مقفل الموضوع استحيت ارد عقبه و الموضوع مقفل

الف مبروك لـ أخوك وعقبال الذرية الصالحة ان شاء الله .. لا يغرك هاليومين شفه بعد سنة سنتين ثلاث اربع .. وبـ تقول الحمدلله إني ما تزوجت

<--- فال شين مو ؟

.. الله يوفقهم ان شاء الله

عقبالك إن شاء الله ولو اني ما أنصحك .. عيش حياتك وإطحن اللي براسك همن تزوج

.. الله يرزقنا وياك ببنت الحلال اللي تستاهلنا

حضور متأخر أعتذر .. حبينا نبارك بس

.
.

الـمـشـاغـب · #2 22/07/2008, 06:17 PM

الصفحة السادسة

( القناصة )

هلا وغلا بالقناصة الحساسة ورده
حلوة مشاعرك تجاه أخوكـ ,, الله يفرحكم بزواجه قريب

ذكرتيني بسؤال أختي الصغيرة عمرها أظن 4 أو 5 سنوات .. سألتني : أنت ليه ما تتزوج مثل أخوي ( فلان ) ؟

.. انحرجت وقلت لها : أنا أصلن متزوج

.. (عشان أفك نفسي من الاحراج)

سألتني مرة ثانية : طيب وين حرمتك ما أشوفها مثل ( فلانة) زوجة أخوي ؟

.. (يا ليل القلق..! ) ..
قلت لها : إذا تزوجتي أنتي (فلان) بأجيب حرمتي تشوفينها ..!

بعد هالرد القوي راحت عند أمي تصيح وتشتكي علي ..!

<< إلا من جد سؤال .. ليه البنات وهن صغار يصيحون اذا جاء طاري الزواج لهن ويقولن ما راح نتزوج .. وأول ما يجي
عريس الغفلة تصيح كل وحدة على طريقة حمود الفشقة : موافقة موافقة موافقة ..؟!

القناصة ورده أشكرك على نصيحتك .. لكن أنا أشوف غير كذا .. وإذا شفت عيال أخوي وأنا توي ما بعد تزوجت؟ عادي

ما راح يجيني إحساس مؤلم إن شاء الله ولا شي .. ولو حسيت بشي بأتوطى عياله في بطونهم ..!

أختي القناصة .. أنتي اللي طلعتي حساسة موب أنا ..

الله يعطيك العافية على هالمرور مرهف الحس ورده

الماسه الزرقاء

هلا وغلا الماسة الزرقاء ( الطيبة ) ورده ورده << وردتين غير كل الورود ورده
بالمناسبة , رحم الله فقيديكم وتغمدهما الله بواسع رحمته ..
عودة للرد ..
سالفة اللي عمره 29 مفجعة .. مو معقول تفكير الأم كذا..! أجل ترفض عشان ولدها العانس وتبي كل عيالها اللي بعده يعنسون؟

الله يهديها ويستر علينا وعليهم ..!
أدري أن رأيي سديد

.. أغلب قراراتي تأتي بإلهام من الله عزوجل ..

أما عاد أتخيل أصرف على زوجتي من فلوس أبوي؟ وش فيها؟ عادي أنت ومالك لأبيك .. والعكس صحيح ..!

وبعدين بصراحة المفروض الآباء يتحملون كل شي .. محد قال لهم ما ينامون ذيك الليلة ..!

<< متطمن أن أبوي مستحيل يدخل الزعيم والا كان أعلن تبرأه مني ..!

سالفة البنت اللي تزوجت بعد الثانوية عجيبة .. أجل مستعجلة على الزواج هالفحلة؟

الله يعينها ويسعدها في زواجها ..
والله يبارك فيك وعقبالك يا رب ورده
وأبشرك أخوي الحين مستانس بيرجع بعد أسبوعين .. كنت مقترح عليه يروحون ياخذون عمرة قبل الزواج وأعجبتهم الفكرة..

لكن غيروا الخطة وأجلوا العمرة بعد شهر العسل .. الله يسعدهم ورده

الماسة الزرقاء ورده من كل قلبي أتمنى تفصلين من المجلس الاستشاري عشان تتفرغين للمجلس العام ونستمتع بكتاباتك وأسلوبك الأخاذ ..

<< حتى هالفيس اشتقناله

بدون مجاملة أسلوبك روعة في الكتابة ليه حارمتنا منه؟ ..!!
تقبلي تحياتي ورده

ريومه الزرقاء

مرحبا ومسهلا بالريم الزرقاء ورده
مع احترامي الشديد لك ولخالك الثلاثيني إلا أني ما أظن كلام الناس بيتركه لحاله دام هذا عمره واثنين من اخوانه تزوجوا قبله ..!

تحياتك وتقبلناها بكل رحابة صدر .. وانتي يالله تقبلي تحياتي لا أشوتك

ورده

القاضي (3)

أجل على قولة أبوريمان انس الزواج يا سلطان ..

المشكلة مو في قضية التخرج .. المشكلة هو في سنة تأسيس نادي الوداد ..!

إذا كانت سنة تأسيسه حديثة فهنا مشكلة وراح يتأخر زواجي كثير ..

لكن إذا كانت سنة التأسيس قديمة فمعنى هذا أني راح أحتفل بزواجي وبيوبيله البرونزي بيوم واحد إن شاء الله ..!

abu_riman ...3

فعلاً يغفر له نادي الوداد بما أنه أحد المؤسسين لهذا النادي الرائع ..!

بياخذ أخت حرمة أخوه الصغيرة << لو ما شرحتها كان طولت وأنا أفحّط عشان أفككها ..!

انت تشوف الوضع عادي والكثير بعد يشوفون كذا .. لكن الغالبية أظنها تعارض وما تشوفه عادي .. وكل ما كان عمر
الأخ الأكبر كبيراً كل ما زاد كلام الناس ..!

تصدق يا أبوريمان أن الموضوع هذا شكله بيكون فال خير علي؟ ليز ومتابعة والقاضي عرضوا عدة عروض .. وجاري
التفكير فيها بجدية .. باقي أنت .. بس لو تدبر لي زواج مسيار حق الصيفية هذي بتكون أطلق شنب عرفته في حياتي ..!

هلاليه كووول22

هلا وغلا هلاليه كعبووول22 ورده << تستاهلين .. لأن اسمي الــ مشاغب مو مشاغب حاف ..!

الله يبارك فيك وعقبال كعبوول إن شاء الله

ورده
مدري وش سالفة هالموضوع الردود تطير والموضوع يعلق والكهرباء تطفى .. عين ما صلت على النبي ..!

الله يعطيك ألف عافية على رجوعك أكثر من خمس مرات للرد .. أقدّر لك ذلك كثيراً ورده
لا هنتي ولا خلا ولا عدم ورده

كَلْ اَلْـ حَ ـيَاةْ

مرحبم بك كل الحياة يا هلا ورده
من بدايتها العانس؟ يا ساتر انطقي بـ خير يالشينة ..!

الله يبارك فيك والبقية في حياتك ورده
تحمست يوم قلتي كبرت في عيني .. لكن خربتيها يالعبدة يوم قلتي بك رجا واللهي ..

حسيت من كلامك أنك كنتي غاسلة يدك مني .. بس ما علينا , الشجرة المثمرة ترمى بالحجارة ..!

وعلى طاري الشجرة .. يقول دايم السيف : " يموت الشجر واقف وظل الشجر ما مات "

<< إذا مالها دخل دبري لها تصريفة.. لو ما هي بزينة ما كان قلتها

يالمجرمة عاد فلاش وكلوروكس؟؟

الحمد لله منتي بفلبينية والا كان جيتينا بفيزة خدامة وأعدمتي نصف الشعب بفلاشك يا أم الفلاشات..!

مشكووورة أوي يا كل الحياة على مرورك التحيف وردك الظريف ورده
تقبل فائق احترامي ورده

عاشق المستحيل

أهلين وسهلين عاشق المستحيل ورده
كل ملامح الشر والنذالة واضحة في ردك .. أجل تتزوج قبل أخوك يالفاهر؟

هذي مشكلة اللي عقله في ( **** ) يحسب الزواج لعب ونوم بس

.. وين التقدير لأخوك الكبير؟

عاد موقف أخوك موقف صعب ولا يحسد عليه .. أجل قدموه على أنه العريس؟ ـههههههـ

صدقت وأنا أخوك في نقطة البعد عن الخرفنة .. صدق تحس أن آخر همك البنات بعد ما تتزوج ..
بس بيني وبينك أعرف كثير متزوجين وللحين خرفان الله لا يبلانا .. بس تدري وش السبب في نظري؟
السبب اللي أنا استنتجته من دراستي لأغلب الحالات

.. أن هالمتزوجين الخرفان تزوجوا مو عن حب أو رغبة في الزوجة ..

تزوجوا لمجرد الزواج فقط , أكون واضح أكثر : " تزوجوا بس عشان سرير النوم " .. عشان كذا علاقاتهم الزوجية باردة ..

طبعاً ما أعمم على كل من تزوج بهالطريقة .. ولا أعمم على كل المتزوجين الخرفان لأن يمكن فيه أسباب ثانية ..!
لكن أنا أقول أن هذا السبب اللي أنا لاحظته على بعض الخرفان المتزوجين ..!
من ناحية المرح .. خلها تجي بس والله لأمرّحها وأدلعها وأسوي لها كل اللي تبي .. بس وش جابها سعيدة الحظ؟

وراك علي تنقط من هالنصايح تزوج تزوج تزوج واستر نفسك من الفتن؟؟!! أحد قال لك أنه شايفني أناقز على أحواش خلق الله؟

بالنسبة للبلياردو .. لازم برنامج الفلاش والجافا في جهازك .. وأتوقع في حالتك أن برنامج الجافا موب موجود .. حمله من أحد مواقع الدردشة ..!

شكراً لك لمرورك النذل .. تقبل تحياتي ورده

القلــوب الساهيـــهـ

هلا وغلا القلوب الساهية ولكم ورده
وش كنبه؟ أشوفك يالحبيب سادح أم الميانة ومفصخها بعد ..

يالغلا بلا نصب أنت لا تعرفني ولا أعرفك << وسوس قعد يسأل كل أخوياه

يالنصاب ما قد سولفت لأحد بالجامعة عن زواج أخوي ولا اشتكيت أبداً .. لأني يالدب
ما دريت أصلاً بالزواج إلا بعد ما رجعت البيت ..!

يعني لا تنصب إلا وأنت قد النصب ..!

وبعدين بأقول لك شي .. أنا نادراً جداً أسولف مع أحد من أخوياي عن مواضيعي أو ردودي أو أي حاجة تتعلق بالمنتدى ..

حتى بايقافاتي محد درى عنها إلا بعد ما راحت الايقافات

.. ودي أرسلك على القيصر رهيب عشان يعطيك دورة في فن الكذب ..!

يالله يالقلوب الساهية طس ما أحبك يا وع ورده
على فكرة .. والله ما عندي شك في أنك ما تعرفني .. لأنك لو تعرفني كان جبت شي صحيح على الأقل عشان تشككني ..!

فـ العب غيرها

تحياتي لك يا أكبر نصاب بالعالم ورده

"أجمل الذكريات"

هلا وغلا صديقي القديم اللي ذب علي من زمان وتهاوشنا عليها ورده

الله يبارك فيك يالغلا وعقبال سمير صبري تراه للحين ما تزوج ويستاهل مننا دعوة ..

أعجبتني جدّن جملة " نبل أخلاقه " .. أرتاح جداً لما أحد يمدحني بمثل هالمصطلحات أحس أني كفو ..

<< مو كأن عندي شك؟

مثل هالسالفة مرت علي اليوم .. فيه واحد مزعج خويي بالمكالمات .. كلمته اليوم وتطنزت عليه قدام خويي وأنا فاك السبيكر .. المهم صوته ما عجبني .. قلت له : " من صوتك أحس انك حامل يالأخو" .. قال : " لا والله منب حامل " والله ما أكذب عليكم يقولها من جده ويحلف بعد بغيت أفطس من الضحك أنا وخويي ..

يعجبني اللي ينفي التهمة عن نفسه بهالقوة .. بصراحة بعد ما حلف لنا صدقناه

صدقت في نقطة الحرية في حياة العازب .. لكن لو تركز في غير الحرية ما راح تحصل شي ..
ما تقدر تروح الملاهي ولا الأسواق ولا الأماكن اللي تفتح النفس .. وهذا كوم وأنك تنام وأنت مرتاح البال كوم ثاني ..!

إلا على طاري دخول الأسواق والملاهي وغيرها .. أنا ودي بس أعرف وش سالفة بعض البنات؟؟

لما تدخل سوق لحالك محد يلتفت فيك ولا كأنك موجود أصلاً .. ولما تدخل ومعك أهلك تلقى بعض البنات تتميلح قدامك
وتحاول تفتنك ..!!

مدري وش السالفة؟ عندك السبب يا أجمل الذكريات؟!!

من ناحية موضوعك يا بعدي .. فأنصحك أول شي قبل تنزله ترد على المواضيع الموجودة

عشان الدنيا أخذ وعطا ..

أما من ناحية التعزيز فما يحتاج يالغلا .. أسلوبك يعجبني من زمان وأنا أقول كذا حتى انك تذكرني بـ عبيط ورده

وارفع راسك أنت عزوبي ..!

تقبل تحياتي ورده

القاضي ..4

أبوعبدالله أنا مدري وشلون ارتفع الموضوع .. تفاجأت به قبل يومين..!
كان ودي أرد على الردود لكن حسيت ان الموضوع نسوه الأعضاء فقلت أجل بريّح بالي رغم أن ضميري موب مرتاح ..
لكن دام الموضوع ارتفع .. اضطريت أني أحفظ الصفحات عشان كل ما فضيت كتبت كم رد وأحفظها بملف وورد ..
والحمد لله أخيراً وعلى مدى 3 أيام استطعت انهاء الردود ورده
شكراً لك لفتح الموضوع مجدداً .. وأتمنى ألا يغلق الموضوع .. لا لشي وإنما حتى لا تكثر مواضيعي المقفلة في سجلي النظيف ناصع البياض ..!

صدقني عادي قفل الموضوع مو مهم عندي .. لكن بغيت اللي ما قرأ ردي عليه يلحق عليه بعد ما يرجع ..!
خل الموضوع وهو بيروح من نفسه للصفحات الخلفية ..واذا شفت لقفل الموضوع مصلحة للمجلس .. فداك الموضوع ورده

شكرن لكل من رد .. شكرن مواصل .. شكرن الهنوف .. شكرن القاضي على اراحة ضميري وجعلكم لي أترك الكسل في الرد على الموضوع

سبحانك اللهم وبحمدك .. لا إله إلا أنت .. أستغفرك وأتوب إليك ..!

الـمـشـاغـب · #3 22/07/2008, 06:23 PM

hilalemooot

هلا وغلا هلالي موووت .. أخلاقك وحسن تعاملك تستاهل الرد لحالك رغم تأخرك ورده

يا بعدهم معذور .. متأخر أو مبكر دايم تسعدنا بتواجدك ورده

بس عاد الله يهديك وراك متفاول عليهم؟

.. عاد بأنتظر سنة سنتين أشوف كلامك إذا صح أو لا بعدين بأعلن قراري التاريخي بالزواج
إن شاء الله

الله يبارك في أيامك وعقبالك إن شاء الله بعد الطحن

ورده

نصيحتك على العين والراس .. وجاري تطبيقها .. بس ما قلت لي أي نوع من أنواع الطحن؟ مشروع أو غير مشروع؟

كل الشكر لك على التواجد الجميل .. تقبل تحياتي يالجوفي

الفهد · #4 22/07/2008, 07:06 PM

هلا سلطان ..

سلطان يعني انت كتبت هالموضوع انقالك بتثبت انك مافيك شي

سلطان ياخوي خلاص اعترف بالامر الواقع وترا اذا ناقصك شي الشباب مايقصرون والمستشفيات واجده والامل كبييييير ياسلطان لاتيأس تكفى

آآآآه .. يالغبنهـ ..

آآخر شي توقعتهـ يصير ..

الكلام اللي فوق مجرد فرفشة

والله يا ابو السلاطين اشوفه شي عادي جدا جدا جدا .. كل واحد ونصيبه وكل واحد وبراحته

وكل واحد حسب الظروف اللي يشوف انه مهيء للزواج ولالا .

أسئلة الواجب :

س1 ) هل زواج الأخ الصغير قبل الكبير عيب وتشكيك في فحولة الأخ الكبير؟

لا ابدا ماهو عيب والزواج قسمة ونصيب مثل مايقولون

ولا فيها اي تشكيك

س2 ) هل تتزوج أخت سبقتها أختها الصغرى بالزواج؟ .. والسؤال موجه أيضاً للبنات بعد تغيير الضمير المؤنث ..!!

والله ياسلطان كلام الناس مايرحم

.. بيقعدون يفترضون افتراضات ممكن البنت ماتلقى احد يتزوجها الا بعد الشقاء

لك تحياتي سلطوووون عالموضوع الروعه ورده

الـمـشـاغـب · #5 22/07/2008, 09:32 PM

الفهد

هلا وغلا الفهد حبيب ألبي

وينك يالقطوووع؟؟
والله أنك لحست مخي بحركتك .. شفت صورة تفاريس وبعدها كلمة الفرفشة ونزلت تحت ما دققت .. قلت كل أبو ذا توقيع؟؟ أبوك يالواسطة

ولا استوعبت إلا متأخر

على العموم .. يا لبى قلبك لا تحرمني شوفتك يالشين

تقبل تحياتي ورده

i am here

ـخخخخخخخخخخخخخخخخخـ

الله يسامح اللي ذب علي هالذبة الأليمة

واثق الخطوة يمشي فحلاً

هلالي$ميلاني

ترى منتدى الجمهور بعد ثاني إشارة لف يمين وبتّل سيده لين يجيك حرف T لف معه يمين.. وتالي يمين ,, يالتااااااااكسي

بتحصله على يدك اليسار عليه لوحة كبيرة كبر جبهة أبولما

رح هناك ورد مثل هالردود واضحك على كيفك هناك ورده

مَاهِينُورْ · #6 23/07/2008, 11:26 AM

ها الله هالله هالله هالله .. يا حبايب ذكروا الله

هالله هالله هالله هالله ..على معرسنا ما شاء الله

>> زفة بعد ما انتهى العرس ..
..
أهلاً بالسلطان ورده ..
ألف ألف مبروووك زواج أخوك ,, الله يوفقهم ويستر عليهم ويبارك لهم يارب ..
عقبالك إن شاء الله ..
أخوك الصغير يتزوج قبلك !! تحمل ما يجيك من كلام الناس الله يعينك ..
>> تخوفك ..
..
موضوع جميل وأسئلة الواجب مهمة بس مافيني حيل أجاوب >> يالعجازة سؤال واحد !!
طيب طيب برد>>
س2 ) هل تتزوج أخت سبقتها أختها الصغرى بالزواج؟ .. والسؤال موجه أيضاً للبنات بعد تغيير الضمير المؤنث ..!!
لااا >> ياملحهم ..
أمزح .. أكيد إذا كان يستاهل واهلي رضو عنه بوافق >> مالها راي ..
..
المشاغبورده
أعتذر عن الرد بعد أن أكملت الردود ..
وبسرعة رد علي قبل لا يقفل الموضوع عمي القاضي ورده ..
أو لاترد عشان يكون ختامه مسك ..

لحظة ..الغريب بأنك لم تكتب عنواناً لموضوعك يوم أن تزوج أخي الأصغر كسابقه من المواضيع يوم أن كنا صغارا ويوم ن أصبحت منحرفاً ....إلخ ..
بالمناسبة : كنتُ متابعة للمواضيع السابقة ولم أجد فرصة للمشاركة بها .. شكراً لك ورده..
..

في أمان الله

برايفت
كنت قد رحبت بي" في أحد المواضيع "بعد عودتي ولم أستطع أن أشكرك .. فـ شكراً لك ..
ولو أني الى الآن مستحية من رسالتي الأخيرة اللي ما أدري وش كان مضمونها ..
أرسلتها ومسحتها بسرعة .. ( عذراً لإزعاجكم ) ..

القاضي · #7 23/07/2008, 03:16 PM

سأغلق الموضوع حتى يكون رد أختنا الكريمة نور شمس مسك ختام هذا الموضوع المفرح جداً لبعض الناس ، و كذلك حتى لا نشغل حبيبنا المشاغب عن موضوعٍ جديدٍ آخر.

أخوكم .. الكلاسيكي