ღ سيموღ


هلا وغلا ، الله يمسيك بالنور..

إقتباس في أجواء العائلة الكريمة يقال ( ما يحتاج تتصلون على سليمان ) !! بسبب وحيد , وهو أني قليل ما أرد على أخوتي عندما يتصلون بي , وهو أني أضع الجوال على خاصية الصامت في اوقات الصلوات منعاً للأحراج في , ودائماً أنسى تغييره من صامت إلى عام أو شيء من ذلك

بالنسبة لي "العائلة قبل كل شيء" وبالرغم من حلاوة الجملة " ما يحتاج تتصلون على عبدالرحمن" وما سيترتب عليها من إطلاق سراحي من بعض المسؤوليات، إلا أني لو سمعتها راح أحس بتأنيب الضمير..

يصير كثير إني أنسى جوالي على الصامت بعد الصلوات ، لكن أتضايق بالحيل إذا شفت الوالد مثلاً متصل علي من ساعة وأنا ما دريت عنه..

عشان كذا أقول ما شاء الله عليك يا سليمان تأخذ الأمر ببساطه أكثر من صاحبك..

إقتباس صحيح (منّول) , ما توجد مثل هالخدمة المريحة لكن في الماضي البعض لا توجد لديهِ مساحات شاسعة حتى يُطمئِنوا على أحبتهم إلا ما قل

نعم ، لكن من ناحية أخرى فإنه ساهم في قطيعة الرحم أو على الأقل جعل الزيارات بين الأقارب واللي كانت تتكرر في الماضي تقل وبشكل كبير، وإذا حسيت بأنك مبطي ما شفت عمك ( 6 شهور !) فقط اضغط زر الاتصال : " وشلونك ياعم ، حبيت أسلم عليك، توصي شي ، في أمان الله" !!


العفو يا غالي وشكراً على مشاركتك وتواصلك


_____________________________



بو فهد عم جواهر

هلا وسهلا

إقتباس اتوقع انه عباره عن رهبه من صوت الرنين فقط

اختلف معك ياغالي، وأتصور أنه لا علاقة لصوت الرنين في ذلك وإنما هو قلق داخلي تسبب فيه واحد أو أكثر من الأشخاص الذين يرتبط معهم صاحب الرعشة بعلاقة تتسم بالحساسية..


الله يعافيك وشكراً لمرورك


_____________________________


...SoMe OnE...


يا هلا والله وغلا

إقتباس نجد ان الانسان الاجتماعي يحبذ المكالمات مع الاصدقاء ولا يجد في ذلك ضيق بل يجدها متعة اكثر من ان يكون الحديث في مقابلته في مكان ما

نعم ، ومثل ما تفضلت بل أن أحد الأصدقاء نكون جالسين مع بعض لمدة ليست بالقصيرة وبعد ما كل واحد يتيسر بطريقه يتصل علي ويجيب سالفة جديدة، ورغم إني أحب سواليفه جداً لكن أحياناً أستغرب وأقول ليش ما قالها وحنا جالسين؟!

إقتباس النوع الثاني من يبحثونها اقتصاديا فتجده يقيس حجم المكالمات وتكاليفها بمقدار فائدة من هذه المكالمات وهل عادت عليه بالنفع ام اصبحت كلاما فارغا كما يراها هوَ ..

في الغالب ، هؤلاء هم من يحسنون التعامل مع هذه التقنية، وأسلوبهم هذا ليس من شأنه أن يقلل التكاليف فقط بل إنه سيعكس مفهوم الضرورة التي يستخدم الجوال من أجلها، وهو الأمر الأهم..

إقتباس الثالث من تنصب عليه زمرة من المسؤليات كالعمل والبيت والاسره فتجده مبرمجا لـ وقته في كيفية الحديث مع هذا وذاك والانتقال بحالته النفسيه من والى المنزل والعمل

أتصور أنهم أكثر من يعاني، فالجوال أصبح هو الأداة التي تبرمج أوقاتهم ، حتى أن أحدهم لا يستطيع قبول دعوةٍ لوجبة غداء قبل أن يتأكد من أن جواله لن يرن بعد ساعة>> ترى مهوب أنا الحين

إقتباس النوع الرابع من استخدم الهاتف لان يكون منفذا للرومانسيه وهؤلاء هم اكثر من يتستخدم الجوال في حياتهم

هذولا عاد فئة المساكين ولا أزيد.

إقتباس ولكن لو قمنا جميعنا باغلاقه لمدة 48 ساعه وبعدها نضع ماكسبناه في عمود وماخسرناه في العمود الاخر ان كانت الايجابيات تطغى على السلب

اضمن لي أن نقوم جميعاً بإغلاقه لمدة ساعة واحده وأضمن لك أني واحد من بين الآلاف اللي سيصبخون الجهاز بالجدار..

مسألة إني أغلق الجوال وأنا أعلم أن هناك من سيطلبني لأمر يتوجب علي أدائه، اعتبرها باختصار " مهيب مرجله" >> كبر الموضوع


لكن مثل ما تفضلت هو أمر يعتمد على الشخصية ، وأظن أن بعضنا بحاجة إلى دورة في كيفية التعامل مع الجوال وتلقي الاتصالات ، وفيما لوعقدت هذه الدوره فسأكون جالس أنا وأصدقائي الثلاثة قدام ومركزين مع المحاضر ..

إقتباس والآخرين سيكون هناك تأقلم مع وضعك وسيكون بحثهم عنك بطرق اخرى غير الهاتف الجوال

أعجبتني فكرة أن الآخرين سيتأقلمون مع وضعي الجديد، ولكن فيما لو تجرأت على إغلاقه، فكم من الوقت أحتاجه لأضمن تأقلمهم؟ وهل سأحتمل كراتين التذمر التي سأواجهها عند وصولي للمواقع التي أرتادها بشكل يومي؟



عساك تسلم يا غالي ، بالغت في وصف ما أشخبطه، وآمل أن تكون نصف الحروف كما وصفتها بالفعل..

مداخلتك وافية جداً، شكراً لك ، وأعتذر لك وللجميع عن الإسهاب في التعليق


_____________________________


...][ هلالي الخبر ][...


هلا وسهلا

إقتباس والله انه قلق ,لاكن الشكوى لله في اوقات ودك يكون موجود

في وقت ودك يصير موجود ، وفي أوقات ودك تقول له اطلع من حياتي!


تسلم وشكراً لمرورك


_____________________________



آآي وِل كوم باك إن شاء الله

وتراي شاد حيلي بالردود رغم إن اللي كانت هنا ورحلت سببت لي ضغط نفسي

الفيروسه الزرقاء


يا هلا والله وسهلا

إقتباس طب ترجمت إلى رموز وحركتات طب شلون تترجم أبي افهم أبي أعرف أبي وأبي و لأ جاء الجد تعيجزت أفهم .

ما عندي أي خلفية عن هالموضوع، كل اللي أعرفه إننا كنا منوّل نجيب كاسين بلاستك وخيط طوله مترين ونقعد نهرج مع بعض وكل واحد يتسذب على الثاني " والله يا أنا أسمعك زين " وحنا قاعدين نزاعق!


لكن المفروض إننا نطّلع ونقرأ عن كيفية عمل هالأجهزة اللي نستخدمها من سنين ولا ندرك حقيقتها !

إقتباس اممم أتوقع ! إن الثابت ماله اضرار لأن اسلاكه فـ الارض ، اللي أسلاكه فـ الجو وكله موجات أكيد بيضر ع المخ كلها إشعاع يمكن يضر ع المخ والقلب

أسلاك بالأرض وأسلاك بالجو! ، عموماً أنا مثلك أتصور أن استخدام التلفون الثابت ماله أضرار صحية مباشرة ، والعلم عند الله ثم عند أهل الاختصاص..

ولو إن إفادتك كلها تسليك ، لكن بيض الله وجهك فأنت الوحيدة بين الأعضاء (حتى الآن) اللي حاولت الإجابة على السؤال..

إقتباس طب شنو أنت حاط نغمتك ، يمكن هي نفسها تعكر المزاج

بالعكس النغمه هاديه ووش زينه وإذا سمعتها بدون لا أشوف من هو المتصل أحس كني جالس مع سارة الليدي بوسط غيمه

إقتباس أنا عن نفسي لأ كنت مواصله مـ أحب أسمع شي

الناس تقول ( إذا كنت مشغول ، إذا كنت نايم ، إذا كنت أتغدى ، إذا كنت مسافر ... ومن هالقبيل) لكن إذا كنت مواصلة هذي مشكله ما جت على البال صراحة!

إقتباس إيه نرجع تقول أجل مزاج سيء ! والله شف اذا رن الجوال وانا فـ مزاج سيء ، ع طول حولته ع موجود اكسترا

صحيح هالخدمة يمكن تخفف من حدة القلق، الغريب إن بعض الناس بثر وملكع! يرسل لك رساله ومعها تقرير استلام وإذا درى إنك محوّل الجوال اتصل مرتين وثلاث!!..

إقتباس المشكله لأ طولت وأنا أكلم فيه لأ شعورياً يجيك الصداع ، خصوصاً إذا كنت مكلمه ميسو يوه بـ الساعات نجلس !

الله يكفينا شره وبس، الحين استغرب منكم يالحريم!! أكثر من مره أجلس مع أهلي بالصالة وأشوف أختي تكلم أختي الثانيه بالجوال وكلهم عندهم خط ثابت!!، طيب ليش ما تستخدمون الثابت أقل ضرر وأقل تكلفة؟؟ و لا عمري لقيت منهم إجابة!

أقدّر وضع الحريم وأدري بأن أغلب وقتهم بالبيت ويتسلون بهالسواليف لأوقات طويلة ، لكن ليش الإصرار على الجوال؟

إقتباس اخوك يحب بلاي ستيشن ! يسنتر دائماً عند t.v / النت ! جاوب ع خل أتوصل لك لـ عامل مشترك بينهم

يحبه بالحيل، لدرجة إنه قبل كم يوم شايل تلفزيون الملحق وهو كبر قريح وحاطه بالسيارة ، ويوم سألته ليش؟ قال إنه مبرمج البلاي ستيشن عليه وما يشتغل على غيره وباخذه معي للاستراحة!!

شوفي لنا دهاءك الداج وش يطلع معه بعد ما عرفتي الإجابة.

إقتباس فيه موضوع ناويه إن شاء الله أنزل عنه اسمه التليباثي" التخاطر عن بعد " لكن مشكلته انك ماترسل كلام واجد وبعد فيه مشكله ماتضمن كلامك وصل وإلا لأ

بدينا بالهلوسه !!



مشاركة حافله كالعادة

شكراً لك ، والله يسلملك ويتقبل دعاءك وأشوف عيال عيالي بين أمي وأبوي.

أما هالترم لو ما جبتي طاريه كان حلفت إنه محذوف

بالتوفيق إن شاء الله.


_________________________



فرانكو باريسي


هلا وغلا ، الله يمسيك بالنور

إقتباس يا كثر اللي يفزون مع أي اتصال يجيهم ويا كرهي لهم إذا صارو يلعبون بلوت معنا من يسمع النغمة يجدع الورق وينط وبعدين الكل تجيه الر الرعشة والفزة بس حسب النغمة

أما سالفة البلوت عز الله إنك ما بالغت

لكن إن الرعشة حسب النغمة هذي من إبداعاتك، يمكن ليش لأ ، مع إني مثل ما قلت قبل ما أتصور إن النغمة لها أي علاقة..


شكراً يا غالي على مشاركتك وتواصلك


_________________________


ماجد مقبل


هلا وغلا ومرحباً وااجداات بالمشهور

إقتباس اول ما يسمع نغمة جواله يدق قلبه وتتسارع نبضاته ويزاد افرز هرمون الأدرينالين

فعلاً الأدرينالين يزداد مره حتى إني أذكر شفت واحد معه كيس مليان أدريالين وبغى ينكب يوم رن جواله!

يا وسع صدرك يا ماجد ما شاء الله عليك

إقتباس والجوال بصراحة وجع راس وحقيقة قبل سنتين صار جوالي نقمة الى درجة اني قررت اقفاله الى الابد طبعاً قفلته ثلاث شهور الصدق ارتحت بس برضوا ما قدرت استغني عنه

3 شهور مهيب قليله، وزين إنك عرفت تستخدمه بعد ما رجعت له، أنت وكل اللي استغنوا عن الجوال فترة يقولون إننا حسينا براحة ورغم هالراحة إلا أنكم عدتم لاستخدامه وهذا يؤكد إنه من الصعب جداً الاستغناء عنه وإن الأمر ما هو بالسهولة اللي تكلموا عنها بعض الأعضاء الكرام هنا..

إقتباس المشكلة صارت تجيني هدايا جوال لان العالم فهموا اني طفران وما معي جهاز

مشروع شحاذه مطور، ذكرتني بأخوي النصاب!

سبحان الله العظيم كل ما طلع جهاز نوكيا جديد يضيع جواله القديم!!

إقتباس بصراحة فكرة ان الجوال ينقلك الى جو آخر فكرة تستحق الدراسة وبصراحة توقفت عندها كثيراً !! و اتسأل هل هي تؤثر علينا ؟

والله يابعدي ، عن نفسي أتأثر بشكل كبير من هالموضوع ، وكثير من الأوقات أفقد تركيزي وانتقل لأجواء بعيدة عن العمل وأوقات أخطي بشغلي والسبب مكالمة واردة!..

إقتباس قسم يرفض ان تتصل به بشان العمل وهو في اجازة وقسم يريدك ان تخبره بكل صغيرة وكبيرة حتى لو كان في المريخ ! حقيقة أنا ارتاح للقسم الثاني ولكن بعد موضوعك أرى ان الامر يستحق الدراسة

يمكن القسم الثاني يريحك من ناحية تسهيل اتخاذ بعض القرارات المتعلقة بالعمل، لكن عموماً أعتبره أمر مزعج.


العفو ياغالي وشكراً لمشاركتك وتواصلك.


_________________________



][the best][


هلا وغلا بالأفضل

إقتباس لـ درجـة أنه .. عندمـآ يتلقى .. ( إتصآل ) ........ !! بعد منتصف .. ( الليل ) ....... !! [ يرسل .. رسآلـة ] .. مضمونهـآ .. ( أنـآ نآئـم .. أجرو عدم الإزعآج ) ...... !!

الله يكون بعونه، لكن مثل صاحبك ، وما دام هذا وضعه، المفترض إذا جاء ينام أو سهر لمنتصف الليل يحط جواله على الصامت ، وإذا كانت ظروفه المحيطه تتطلب منه يكون جهازه مسموع طوال الوقت فالأفضل يخصص الأرقام اللي يعرف أهميتها بمجموعة مثل ما قالوا الشباب..

إقتباس هي موجودة لدى .. ( فئآت ) .. من النآس ......... !! نسئل .. الله .. لهم الشفآء ..... !!

نعم، مشكلة الرعشة يمكن تكون موجودة لدى فئة من الناس مثل ما تفضلت، لكن قضية القلق والارتباط الذهني أتصور أنها موجودة عند الكثيرين منا ..

بالفعل من وصل به الأمر حد الارتعاش فهو يستحق الدعاء له بالشفاء..


الله يعافيك وشكراً لمشاركتك وتواصلك


_________________________



رااجع بإذن الله واتعذر إن كان فيه أخطاء طباعة تراي طااااير


اليوم الصبح المنتدى متعطل!

الظاهر الفال الشين بدأ يشتغل

تذكرت من قلب وربي ضحكت من سالفة خالتك هذي أمي تدق ع العالم كلهم لين توصل للي تبي جعل عيني ماتبكيها

صدى الأمس


هلا وغلا بالعمده

إقتباس عجزنا عنه وحنا نحاول نفهمه انه مهوب شرط يبي يجيك خبر شين وابو الشباب مهوب راضي يفهم !!

الله يعينه، وأتصور إنه شخص مسؤولياته كثيرة ، والمشكلة إن اللي مثل صاحبك هم اللي تلقاهم ما يقدرون يطفون الجوال أبد! ، لكن المفروض الواحد يتفاءل بالخير مع كل اتصال وارد وياخذ الأمور ببساطة أكثر..

إقتباس وفيه بعضهم يفز لان وزارة الداخلية متصله عليه (( احد قال بعض المتزوجين )) !!

شوري عليك لا تضحك يابعدي، ترى درب الزواج ما عنا وعنه ولو أبطينا ، والطنزه مد(ن) باليد >> النون على طريقتك.

إقتباس الجوال بكل صراحة هم ..! ولو انه مريحك من اشياء واجد ولكن برضوه هم .!

هم ، وبالذات المكالمات الصوتية، لكن وش رايك بالرسايل تراه بالنسبة لي تخلق شيء من التوازن

إقتباس ايام الجامعة كانت احلى ايام عندي 5 سنوات من دون جوال اللهم لك الحمد والشكر ..!

إيه على وقتكم ما بعد طلعت الجوالات وزمان أول كله مليح يا عم

إقتباس وبعدين الجوال مايجي منه الا الاستنزال والاستنزاف والا يا الهاوي !!

إلا وأنت صااادز



الله يسلمك يا غالي وترى 101 karf فازت بجائزة ذبـّت الأسبوع وأهنئك عليها



______________________________


الهنوووف


هلا وسهلا حيا الله توليو المنتدى >> محترف الهلال البرازيلي كان أحسن واحد يضغط على حامل الكره


الله يسلمك ويبارك بعمرك إن كان كل ما سافرت بجيب هدايا فعز الله لو أشتري محل هدايا بسوق الحلّه أوفر لي

إقتباس احس اني فال شين اذا رديت بدري ماترد علينا ولما تخلص ردود هالمووضووع روح لمووضووع البيض ترى مارديت

لا إن شاء الله فالك خير

واعتذر منك ومن كل الأعضاء اللي شاركوا وما سمحت ظروفي أرد عليهم بوقتها، انشغلت فتره ويوم رجعت ما حبيت أرفع الموضوع من جديد ، وإلا فأنا بالعادة أحرص على الردود..

بس غطيتي على ابومقبل بالتحجير

إقتباس مثلا انــا فيني طبع مستحيل مستحيل اكلم بالجوال واحد جنبي بصرف النظر عن من المتصل ولو الكلام مايستاهل اني اطلع بس غصب علي

برضه فيه ناس كثير مثلك، بس غالباً الواحد ما يسوي كذا إلا إذا بغى يركز بالمكالمة، حتى على أيام الثابت كان بعض الناس يخلون سلك التليفون بطول 4 أمتار عشان اللي يبي يكلم يقدر يبعد..

إقتباس ومشكله الجوال تحول من لوسيله ترفيه بعد ماكان وسيله لسد الحاجات فقط

صحيح، ومثل ما قال أحد الأعضاء صار الجوال ما هو للمكالمات فقط، ويمكن هالشي يزيد من تعلقنا فيه، كثير منا إذا جلس بلحاله أول شي يسويه يحبرش بالجوال

إقتباس حنا الحين وصلت العقده لتلفون البيت الثابت زمان اذا رن انواع السباق عليه الحين تغير الحال صرنا انا واختي كل وحده تقول للثانيه ردي لدرجه اننا نتهاوش على من يررد

هالتعليق الخفيف جاز لي بالحيل، منوّل نص المشاكل اللي تصير بين الأخوان بسبة من يرد على التلفون ومن يركب قدام بالسيارة

أما ليش جاز لي فلأني من فترة كنت أسولف مع أخوي ورن التلفون وكلنا بعيدين عنه وقلت له رد عليه، قال خله اللي يبينا ضروري يدق على الجوال! ( وهي نفس جملتك) ، وبعدها اكتشفت إن هالنظرية مهيب بس عنده!

نبالغ جداً في استخدام الجوال رغم وجود البديل الأنسب في بعض الأوقات، حتى أصبح سبباً في الكسل وسوء التصرف وعدم الجدية في التعامل الظروف..

إقتباس وانا الاتصااالاات الصباحيه تسبب لي خوووف خصوصا لما اكون بالجامعه ولاني موسوسه شوي فغالبااا ارتاع لما يكون يكون اتصال من عضووه خصوصا اني مو متعوده على هالتوقيت على طول يجي ببالي ان عضو مات (وجه يبيكي )

بالبداية تصورت إن رهبتك من الاتصالات الصباحية سببه كونك بعيدة عن البيت وأهلك هم اللي يشغلون بالك، وقست هالشي على نفسي..

لكن ما خطر ببالي إنه عشان المنتدى! ، ومن الحب ما قتل

إقتباس فالافضل ان الناس تفهم ان جوالك على الصامت وهو بالحقيقه مو صامت

قصدك يكون العذر من عندهم، يا ليت الناس تتفهم ظروف الآخرين وتبعد عن الاستعجال بالنقد والتذمر ( ما يرد علي! ، شايفن نفسه ، ما يستاهل ، والله ما عمري أدق عليه ، زعلان ، قاطع ... من هالهرج اللي ماله سنع)

إقتباس او رد على الجوال وشوف وش يبي المتصل واذا سواليف اعتذر باسلوب منمق وقوول معليه مشـغول شوي مع الاهل بغيت شي طال عمرك

هو أسلوب متبع وفعال جداً وعلى الغالب ما يزعل منه أحد..



الله يعافيك ويسلمك وشكراً على مشاركتك وتواصلك، وعسى الله يوفقك.


______________________________


bda7e_for-ever


هلا وسهلا ..

إقتباس وبعدين يآخي آلجوآل هذآ آنسآن آوقآت تحس آنه آطلق شي بآلدنيآ وآوقآت ودك تلفخه بآقرب جدآر بس يآخي آلبلآ لآ صآر فيه نشبه يدق عليك بهذي آلحآله ودك تلفخه بآقرب جدآر

تعرف جهاز الكتيل القديم، مره واحد من الشباب لفخه بالجدار قدامي ولا تأثر ولا حتى انفك غطى البطارية، يعني إنسان قوي البنية وناشب لك ناشب لك، عشان كذا اشتره ما دام تلفيخك وااجد لأنك تبي ترجع تحتاجه!



الله يعافيك وشكراً لمرورك

كبــ أنثى ــرياء


هلا وسهلا


معليش توي انتبه لردك، الشوف شجر

إقتباس وحتى أني أستغنيت عنه من كم شهر بس أهلي ماستغنو عنه معاي

صعب جداً إننا نستغني عنه بعد ما صار وجوده في الخدمة يعني وجود صاحبه على الخريطة!

أحد الأقارب مطلّع لولده جوال وهو عمره 8 سنوات! ويقول ما أقدر انتبه له إلا كذا !

إقتباس بالمحصله ... الجوال وسله له حاجه وله وقت ماتخيل نفسي طول الوقت شايلته وماشيه لأنه مثل ماتفضلت يا اخوي يسبب قلق

وعلى الطرف الآخر فيه من لا يتخيل أنه يمشي خطوة والجوال ما هو معه، والفرق بين الطرفين واحد قلق غالباً والثاني ذهنه صافي..

إقتباس ومع أحترامي للجميع ما أحس أنه من الأدب أكون بمناقشه مهمه مع شخص ويرن جواله ويرد عليه مع أنو غالبا المكالمات ممكن تتأجل

صحيح واتفق معك، بل حتى في الأماكن اللي تتطلب الهدوء وعدم الإزعاج (مثل المستشفيات) المفترض إن الواحد إذا دخلها يخفض من صوت النغمة وإذا اضطر إنه يرد فيتكلم بصوت هادئ، وحلو إن الإنسان يتحلى بمثل هالآداب..

إقتباس لا تتعب وأنا أختك لانه مافيه حل لهالقلق فينا فينا

صرت أقول ما دام الأمر لم يصل بالكثيرين حد الرعشة، فما زلنا بخير (الحمد لله) ومازال بإمكاننا مقاومة هالقلق!



العفو أختي وشكراً لمشاركتك، والله يحفظ لك أميمتك.

الهنوووف

كانت

هنا

ورحلت

الهنوووف


هلا بك نوبتن أخرى

إقتباس مو انت تقول اني احب ابعد.... عن صلب المواضيع

منوّل من زمااان مهوب الحين

إقتباس انا تفكيري انك تطفش من الهدايا كودك تقلل السفريات للذمه مادري انت تسافر كثير او لا بس احساسي وانا من اعداء السفر لمن هم في مرحله العزوبيه

منصحه الله يجزاك خير

بس ترى أنا ما أسافر بالسنة إلا مرتين، والعشر الباقيات مُسفَّر ولست مسافر!

مسكين هالعزوبي حتى السفر صار مهوب له!!

إقتباس صرت اقول الي ماعنده وقت يرد لاينزل مووضوع وانا خليفه ماجد بالادب والتحجير (ماجدنا مو ماجدهم )

يا جماعة لا تأخذون الأمر بحساسية!

شخصياً ما أنزل موضوع إلا إذا حسيت إني أمر بفتره راكده شوي وما عندي شي يشغلني، لكن أحياناً تصدف ينزل الموضوع اليوم ومن بكرا تتغير الظروف وأنشغل بالحيل ، مثل ما صار معي آخر مره، لكن لو رجعتي لمواضيعي راح تلقين أني في أغلبها كنت حاضر بالردود..


ومادامك قررتي تتبعين أسلوب ماجد فإن شاء الله أمورك زينه وما عليك خوف

إقتباس مو مثل مافهمت المقصد ان لما يجي طاري الهاوي خلاص معروف ان جواله صامت وهو في الحقيقه مو صامت

اللي فهمته الحين إني أطلع إشاعة بين اللي حولي بأن جوالي دايم على الصامت، بس إذا صرت جالس معهم ورن جوالي وقالوا لي : أيها التسذوب ! ، وش أسوي وقتها أو أقول ناسيه على العام

إقتباس واحد يلام بحـبهم لو قلبي حجرر 4 سنين ماتبي احبهم

لأ و أبد ، ما قلت لا تحيبنهم ، لكن حتى أنا لي أكثر من 6 سنوات ومع كذا ما عمري حطيت المنتدى وأعضاءه بنفس درجة أهمية البيت وأعضاءه ، وأعتقد أنه هذا هو الشيء الطبيعي " العائلة أولاً "..

وفي نفس الوقت أحب هالمكان وأكن لأعضائه كل المودة والتقدير وبعضهم بات من الأصدقاء المحببين للنفس


على العموم وهذي كلمة حق أقولها من خلال متابعتي، أنتِ من الأعضاء اللي إذا شفت ردودهم بالمنتدى أشعر بأن هناك من يجسد معنى الأخوة بيننا ، وجميل منك هذا التميز.


عسى الله يوفقك وييسر أمرك ويجعل فالك دايم خير



_____________________________


darseen


هلا وسهلا

إقتباس انـا اتووقع ان كل الي قااعــد تقوله والمشاكل الناتجه عن الجوال راجــعه على حياه الشخص نفســه

بالضبط ، كلامك سليم، لكن انعكاسات طبيعة ظروفنا على شخصيتنا باتت أكثر وضوحاً وملازمةً لنا في مجمل الأوقات ، والسبب إن الجوال جعلنا على اتصال مستمر بكل تلك الظروف، ومع هذا فهناك أناس يحسنون التعامل معه بحيث تبدو له المكالمة الواردة مجرد اتصال صوتي بشخص ما ولا تعني اتصالاً ذهنياً بظرف ما..

إقتباس الجوال مايشكل لي اي قــلق ابدا ابـدا ابــدا

الحمد لله، وإن شاء الله تبقى على نفس الحال إذا توظفت وتزوجت وزادت مسؤولياتك، معك جوال لكن من غير قلق!



شكراً لمشاركتك والله يعينك على أبو نمش

الكــلاسيكي


يا هلا والله وغلا

إقتباس وما جعل الجوال في متناول ايدينا .. هو سهولة الاتصال .. وسرعة الاتصال .. وتعدد الاستخدامات فيه ..

بلا شك هي ميزات ساهمت في سرعة انتشاره والاعتماد عليه، وكما قلت في البداية إذا ما نظرنا إليه من ناحية أنه تقنية فعالة للغرض التي استحدثت من أجله، فهو كذلك..

إقتباس بمعنى لو خرجت بدونه اشعر وكان شي كبير ينقصني ..

أتصور أن هذا هو حال أغلب المستخدمين له، حتى وإن كان بعضهم ما يستخدمه كثير إلا أنه يحرص على عدم مفارقته..

إقتباس وعن اضراره اصبتت الدراسات ذلك بسبب الاشعه لانها تعتبر مسرطنه .. لذلك ينصح الاطباء باستخدام السماعه العاديه الخارجيه .. مو سماعة الوليد بن بدر ..

الله يكفينا شره ، وفعلاً سماعة البلوتوث ذي ما قد شفت أحد استعملها إلا وتسبب له مشاكل ويحلتها ويستغني عنها بسرعه، إلا الوليد بن بدر الظاهر أنه مهوب يكلم بس حاطها عشان إذا سمع من هنا ما يطلع من هناك

إقتباس كل اللي اقوله ان الشي الوحيد اللي اعتبر ان الجوال اضر به هي صلة الرحم ..

بس ! يعني ما تتفق معي بمسألة الاتصال الذهني المقلق اللي يسببه الجوال؟

لو أنا داري إنك ما راح تتفق معي كان ما لقيت نظاراتك ذاك اليوم >> ذلك بهالسالفه



العفو ياغالي والشكر لك على مشاركتك وتواصلك مع الجميع

الهنوووف


هلا وسهلا نوبتن 3

إقتباس ماحب احط تساؤلات بذهن المتلقي

عساك تصيرين دكتوره بالجامعة إن شاء الله

إقتباس ياخوي انت ابلشتني ترى الا بتحجر لي يعني مفروض تفهم دايركت انك لمن تدخل معاهم تحوله صامت لتفادي الاحراج

طيب خلاص فمهت، وعساك ما تصيرين دكتوره بالجامعة ما دام الدعوى فيها " أبلشتوني"

إقتباس ووعلى فكره الاعضاء مثل الاصدقاء مثلا فيه من الاشخاص من يفضل اصدقاءه على عائلته

صحيح وأنا أخوك، بس اللي أنا قلته أمر مختلف وتكلمت عن الأهمية وليس القرب والتفضيل:

"ما عمري حطيت المنتدى وأعضاءه بنفس درجة أهمية البيت وأعضاءه"

مثلاً، الاتصال اللي يجي من صاحبي أحبه، لكن اتصال الوالد يهمني أكثر

إقتباس فطبيعي يكون الاصدقاء اهم من افراد عائله

أهم ! ، لا أظن أنه أمر طبيعي، لكن عموماً هي وجهة نظر

كثير من الكلام اللي ذكرتيه يستحق الوقوف عنده ، وبإذن الله يكون لنا لقاء وصفحة مستقلة حول هذا الموضوع.

إقتباس كنت اقول اتمنى عندي اخ كبير والحين صار عندي اخوان

جميل منك حسن الظن بإخوانك وأخواتك هنا، وعسى الله يوفقك ويحفظك من كل شر


العفو أختي وبالعكس مشاركتك هذي تحديداً فتحت عيني على كثير من الأمور اللي كنت أغفل عنها.

شكراً لك وتراي ما قلت أفهم من كلامك


_____________________________


فرصه ضايعه


الله يحييك هلا وسهلا

وعذرك معك، ويكفيك المسابقة وأحداثها المشوقة.

إقتباس مشكلتي أي أحد يتصل فيني أرد عليه على طول ولو مارديت في نفس اللحظه وشفت الاتصال ادق على طول

إقتباس يقهرني اللي اتصل عليه ولا يرد وما يفكر يدق عقب مايشوف الاتصال

تنقهرين لأنك وقتها كنتِ تنتظرين الناس يتعاملون معك بنفس طريقتك، أنتِ تردين عليهم على طول لكن هم يتأخرون!

بس المفروض إننا ما ننسى اختلاف الظروف والبيئة ونجد الأعذار لمن نحب التواصل معه

إقتباس مشكلتنا في بيتنا لو دقوا على أي واحد من أهلي ولا رد على طول يدقون علي يدرون أني برد

ترى هذي بقدر ما هي مزعجه لك، بقدر ما تجعل شخصيتك محببه عند الآخرين، لكن الله يلوم اللي يلومك يوم مليتي من كثر الاتصالات

إقتباس الحين لا دق جوالي وأنا مشغوله بشي وصار واحد من أهلي هو اللي داق مايفكرون يردون أخواتي عليه ..خير

لأنهم يدرون أن الاتصال ما دامه من الأهل ففي الغالب يبي يصير فيه "طلب تنفيذ خدمة" ، لذلك الكل يتحاشى الرد وتحمل المسؤولية!

إقتباس قالت ابسولف معك الين تعرفيني

هالجملة طاحين فيها الخلق!! أبسولف معك وحاول تعرفني!

أوقات يكون الواحد فاضي ويتقبل هالشي، لكن أحياناً تضطر تقول " معليش أنا مشغول هالحين"..

إقتباس بس للحين مستغربة من وين جابت رقمي

لا تستغربين فيه نوع من الناس شغلتهم يتداولون الأرقام!

ودائماً نقول إنه من الأدب والذوق أننا نستأذن صاحب الرقم قبل لا نعطيه لأي شخص يطلبه منا..

إقتباس تقول الله يالدنيا كم لك من سنه محد طلبك عليه

بعذره ، مره صار معي مثل هالموقف ، وما أدري ليش بتلت أضحك يوم قال أخوي واحد يبيك بالتلفون حسيت إني بسادس ب

خلاص تكبّرنا على الثابت!

إقتباس وصارت وحده ماتوقعت أبد تدق علي

أكيد وحده ما تتوقعينها، لأنها لو كانت من ضمن المتوقعات كان دقت على الجوال

إقتباس ضحكت على سالفة التطنيش بالتلفون الثابت صرنا مب بلحالنا نسوي كذا وكلن زينا

الناس غالباً تتشابه تصرفاتهم، لكن دايم ما يتشابهون إلا بالشين

إقتباس مدري أنا في صلب الموضوع ولا شطحت شطحات عظيمة

ما شاء الله عليك، قرأتِ الموضوع والردود وعلقتي عليها



الله يسلمك ويحفظك وشكراً على مشاركتك

_____________________________


هلالي متوهق


هلا وسهلا

إقتباس بصراحة موضوع يستحق القراءة .... ولا يهمك لو يطول 2 كيلو بصراحة استمتعنا بـهالطرح المميز@ ووجهت نظري يرد ويخليها على الله . .

الله يسلمك ويحفظك، أجل أبشر المره الجايه بصفحتين >> ما ودك تمدحه

أما وجهة نظرك فهي الحل التلقائي غالباً..


شكراً على مشاركتك