مدري كذا من زمان ماكتبت ..
واشوف الاعضاء يكتبون وانا قاعد اقرا ..!!
قلت وش زودهم عني ..!!
الا يا ابو الشباب ارعص على موضوع جديد ..!!
وانا اللي ارعص والى الحين كتبت هذي

في راسي شي ودي اكتبه بس مدري وشو تصدقون ..!!
دقيقة شوي لحظة ابفكر وش كتب ..!!
اوووف لحضظة خلوني افكر وش اخربط عليكم قصة ..
طبعا البهارات راح تملي القصة اذا ماكان اصلا كل القصة بهارات ..!!
بهارات <<< شكلك جوعان <<< هـ هـ هـ يقالك تنكت انت وخشتك ..
امممممممممم الى الحين ماجاني شي في بالي اقوله ..!!
اييييييوووووه بس انا اابكتب وابربس وعساها تطلع زينة لو سمحتوا رجائاً اذا خلصت القصة ما ابي لاطماط ولا خيار متشكر اوي ..
مرة من المرات كنت قاعد وانا نايم <<< مدري وشلون تجي الزبدة ..
ماحسيت في نفسي الى هذاك اللي يطيح "بسم الله" وشو ذا مادريت الى اثره انا اللي طايح ..!!
مع الطيحة ماجاني نوم ولاقدرت اكمل ..
الا يا ابو الشباب وراه ماتنزل طبعا الساعة كانت الساعة ثمان وخمس واربعين دقيقة وفي روايه اخرى تسع الا ربع طبعا الصبح ..
طبعا نزلت ..
بسم وشو ذا ..!!
يمممممممممممممه ..
تدرون وش طلعت ..
طلعت نملة في اول الدرج ..
بس تدرون ليه خفت خفت ان فيه احد معها ودعستها يمكن يكون ولدها والا شي ..!!
لا لا بدأ يأنبني ضميري ..
لكن الحمد لله وانا اللي اقعد ثلاث دقايق واربع ثواني احتري النملة تمر من الدرج طاااااط وخري يا بنت الحلال ..!!
هذي الدرجة الاولى اما الثانية تدرون وش لقيت ؟؟
فكروا ,, حزروا وفزروا وباللهجة القصمنجية احجو ..!!
تدرون وش لقيت ..؟
اخلص علينا وش لقيت ..
مالقيت شي يامخفات <<< ياملحك بعد ..
لاعاد تنكت تكفى ..<<< طيب ..<< موب على كيفك (( سلكله ))
ياناس احس اني الى الان ماكتبت شي زين ..!!
وش اسوي ؟؟
شكلها من الطيحة اللي فوق ..!!
الا يا ابو الشباب تجيني ذيك الفكرة ..!!
مادامني قمت ومافيه دوام ولا شي ..
وش رايك اشغل التلفزيون وافطر ..<< والله يا انت تحطيم من جد ..
وافكر وافكر وافكر وتطري على بالي ذيك الفكرة المجنونة ..
ليش ما اشغل الموتر وادقها مشي للفيصلية خصوصا وانهم يدخلون الشباب الصبح ..
فكرت ادق على واحد من اخوياي يجي معي ..؟
لالا بالعكس فرصة افتك من وجيهم شوي ابطلع اليوم واتمشى لحالي وافلها وبعدين فيها حلال ان شاء الله ..
حبة حبة والبق في المواقف ..
ويوم جيت ابدخل قالي العسكري وين وين يالحبيب ..
قلتله ضف وجهك لا اكسر ضورسك الحين تمنعني وانا قايم من صباح الله خير -قاطعني- وقال صباح النور قلتله تتميلح انت وخشتك وبعدين قلتله صباح النور والا صباح المنتشري ..!
قالي انت اتحادي ؟؟
قلت بسم الله علي ..!!
قالي اجل وش تشجع ..!؟!؟
عاد انا قلت ايوهـ هنا بأعرف بيدخلني والا لا ..؟
قلتله انت وش تشجع قالي انا ما اشجع ..<<< ابن اللذينا اختصرها على طول ماقال لا انت قل اول ومن ذا الخرابيط ..
عاد انا قلتله وبكل براءة انا هلالي ..
قال اهاا اقلب وجهك مافيه دخول
قلتله ليش ..؟
قال لانك هلالي ..!!
قلتله آآفى طحت من عيني تكذب علي تو تقول ما اشجع ولا شي والحين تقول كذا , بعدين
قلتله لالا امزح انا نصراوي اتحادي
قال لا ياشيخ تلعب علي وتكذب
قلت انا لا وش دعوهـ انا سويت زيك بالضبط تو قلت ما اشجع والحين تطردني لاني هلالي وانا نفس الشي اول شي قلت هلالي والحين هوّنت صرت نصراوي اتحادي ..
قلتله ماتحس انك طولتها معي وعطيتك وجه زيادة قالي ياخي وش اسوي حبيت اسولف معك قلتله جاي علشان اسولف معك انت وخشتك ..!!
ويوم جيت ابدخل قال ويييين يالحبيب انا توني ما اذنتلك تدخل قلتله اذنت والا اقمت ابدخل يعني ابدخل ان شاء الله قالي لا احنا ماندخل لا النصراويين ولا الاتحاديين ..
قلتله لحووووووول تو تقول ما ادخل الهلاليين والحين ماتدخل الاصفرين << وش رايكم في الاصفرين اختصار للاتحاد والنصر ..
قالي خلاص خلاص رحمتك يالله ادخل ..
وانا تطيح سعبولتي من الفرحة واخيرا ابدخل الفيصلية ..
لان في الليل يمنعون دخول الشباب لحالهم وفي الصبح منب فاضيلهم يانايم يا في الدوام ..
الا يا ابو الشباب اللي انا ادخل اناظر يمن ويسار وامشي قدام وانا ملتفت ومادريت الا ..
طططططخخخخخ صقعت في النخلة...@!!
اشوى ما احد شاف
اناظر فوق الا اللي انا القاها نخلة طرت من الفرحة ..
لاني كنت جوووووعان ..
الا وانا اللي ارقا واتسلق ادور يمكن فيه تمر رطب شي ينوكل ما دريت الا انها صناعية اناظر تحت الا خوينا الحارس قالي وش مطلعك قلتله ماطلعت
قال اوووف اقصد وش مرقيك فوق قلتله شفت عقرب تحت رجلي ومن الخوف نقزت للنخلة ..
ابو الشباب ضحكة استخفاف قالي انزل انزل وشافني انزل بكل حرافية قالي شكلك متعود على رقي النخل قلتله لا والله متعود على نزولهن بس ..<<< سبحان الله قمة البراءة ..
بغى يطلعني لكن ما درى الا شي يحكه مع رجله يوم ناظر تحت لقيته فوق النخلة قلتله وش فيك قال ماتشوف العقرب اللي تحت ..!!
سبحان الله طلع عقرب صدق ..<<< ماشاء الله عقرب في الفيصلية ..!! ليش لا ..!! الله يستر بس ..!!
ويوم شفت العقرب والعرق ينزل مني قلتله هاه صدقت الحين انت ووجهك ..!!!
وانا اللي امشي واخليه ..
لقيت درج ينزل تحت يوم شفت لقيت ملاهي ..!!
وشوي الا طاحت دمعتي حنين وشوق لايام الطفولة .!!
جتني فكرة جهنمية ..!!
التفت يمين التفت يسار اناظر فوق اناظر تحت مافيه احد يا سلااااام بس لقيت نملة تحت <<< اوووف ياذا النملة لزقة..<<< تدرون وش سويت ؟؟ ايه ايه نزلت ابلعب والحارس يناديني قال ياهوووووه ماتشوف انه مغلق قلتله اقول طس هناك بس ..!!
وانا اللي انزل بس قهر طلعت الكترونية ..
قلت وش دعوه يعني البنقالي احسن مني ..!!
وانا اللي احورف في الاجهزة اليييييين ما اشتغلت قممممة الوناسة ..
طاحت سعابلي ودموعي من الفرحة والحنين وانا اللي ادخل هذي والعب هذي واقمز في هذي الين ما دريت الا اللي قاعد يصوت اوووف ام الورطة لا احد يشوفني قم بسرعه ..
وانا حالتي حالة محيوووس ومن زين الطبايع لابس ثوب وشماغ ..!!
وانا اللي احاول ارتب نفسي ..!!
وارقى فوق للسوق اثره الحارس قاعد ييصح يناديني قالي ياهوووه وانا ما ارد كذا عنااد ليه ماخلاني اكمل لعب الين ماقالها مرة ثانية وثالثة ورابعة قلتله تناديني قال فيه احد غيرك هنا عاد انا سفهته وجلست افكر قلت صح وين الناس ؟؟
وارد على نفسي واقول الناس فاضين زيك فكرت بعدين قلت طيب ليش فاتحينه البوابات اجل وليش الحارس خلاني ادخل ؟؟
الا وانا اصحى على صياح الحارس يقولي تكفى رد علي يرحم امك وابوك تكفى قلتله خير ان شاء الله وش تبي قال تكفى نزلني عاد انا قلتله وش لي ..؟
قالي وش تبي عاد انا جا في بالي قلت يعني وش بيسوي لي هو وجه ..؟؟
يوم جيت انزله هوّنت قلت طيب موب الحين اذا جيت ارجع قال لا يرحم اهلك (( قمة النذالة ))
وانا اللي اسفهه وامشي..
واقعد ادور ..
الله الللللللللله ونااسه عاد هم ماشغلوا اللمبات هوووء ومافيه الا انا بصراحة ونااااسه حسين ان الفيصلية الشاليه بتاعي وانا قاعد ادور فيها ...لاتفوتكم ..!!
وخلصت دوران من هالدور وانا اللي ارقى الدور الثاني ونفس الشعور بالضبط ..يالله فللللله ..
ومادريت الا وانا اسمع ازعاج تصدقون خقت قل يمكن جني بسم الله وين الناس مافيه احد اصلاً ..
والا انا اللي ارقى الدور اللي فوقه يالله تعرفون الافلام الامريكية اللي كنك انت غني وفي عمارتك وعازم ناس ..<<<< نفس الشعور ..<<< اقول تلايط بس لايكثر ..!!
ونااااسه وانا اللي اشوف هذا قاعد يتقهوى هذا قاعد ياكل مكدوز << ماكدونالدز وهذا كودو وهذا قاعد يمط في جبنة بيتزا هت << سويتهلم دعاية ..!!
وانا اقول في نفسي حياكم الله يالربع اعتبروا البيت بيتكم اطلبوا اللي تبون ..
والله يا ابو الشباب رحت اقعد على الكراسي ..!!
والشباب قاعدين كل واحد معه واحد والا اثنين الا انا لحالي شكلي يثير الشفقة ..
ويجيني راعي الطلعم حسبته رحمني يبي يجلس معي مادريت الا وهو يقول اي طلب ..؟؟
قلتله على حسابك ؟؟
وهو مايدري وش السالفة قال ايوهـ ..!!
قلتله خلاص ابغى كبتشينو <<< مايعرف الا هو ,, ودونات شوكلاته ..
قالي سفري والا محلي قلت لا درجة اولى ..!!
قالي ايش ؟؟
قلتله ياحمار شايفني قاعد ومستانس تقولي سفري والا محلي اكيد محلي ..!
الا على الطاري وش تقصد بسفري والا محلي ؟؟
سفر ماقد سافرت الا مرة وحدة للديرة مع اهلي بالسيارة ..
اما محلي هذاني منطس في الرياض قالي محلي يعني تاكل هنا وسفري يعني تاخذ الاكل وتطلع برا..!!
عاد انا قلت ابطلب سفري وابقعد هنا .."عناد بس"
قلتله سفري ..قالي اوكي ..
واللي حولي يضحكون علي وش فيه ابو الشباب شكله ماقد راح لمطعم ..!!
انا سمعته قلتله الا والله قد رحت ..
بس ماقد قالولي سفري والا محلي ..
فجأة بسم الله الرحمن الرحيم ..
الله يكرمكم (( زبالة )) تتلكم .. !!
وشلون يمه ..!!
قلت يمكن دخلها سكني بسم الله ..!!
ثواني الا وهو جايني عطاني القهوه والدونات وانا ام الرزة والوناسه ..!!
من قدي ..!!
وناااسه الجو حلو مررررة خصوصاً انهم مافتحو اللمبات ..!!
وبعدين سمعنا الله اكبر الله اكبر اذن لصلاة الظهر وماشاء الله عليهم شبابنا مستانسين وماعليهم خلاف ومالهم من الشيطان طاري وسواليف وضحك ووناسه ويوم اذن مشينا كلنا للمصلى وانا امشي جا لمي الهندي قالي فلوس فلوس قلتله وش فلوسه هماك قلتلي انه على حسابك وهو معلق فلوس فلوس الظاهر انه اول ما ولد ماقال ماما والا بابا كان يقول فلوس فلوس وانا متوهق مامعي ولا ريال وفجأة جو العسكر اول ماشفت العسكر تذكرت خوينا ذاك على النخلة وانا اللي اطير لمة قالي الهندي وين روح قلتله ون منت <<<اخس ياللي يعرف انقليزي هو حسبني انحشت ..
وراح يعلم الحارس قلت للحارس شوي وراجع وبعدين اكيد ماراح اقدر اطلع لان خويكم عن الباب شوي بس وراجع دقيقة عاد الحارس صدقني وقلتله كلها شغلة عشرة ريال لاتخاف تراني اخاف ربي ماراح اسرقها قال للهندي واحد دقيقة وانزل طيران لخويي ومسكين طقتني العبرة يوم شفته قلتله معليش نسيتك قالي وينك ياخي حرام عليك حرااااااام قلتله والله معليش بس ابنزلك الحين بس على شرط اباخذ منك عشرة ريال ابعطك اياها راعي الطعم اللي فوق صاجني وابرجعها لك بعدين قالي طيب طيب لو تبي ميه بس نزلني تكفى ..
وانزله وقعد يتشكرني بزعل يقول ليش مانزلتني من اول وانا طاقتني العبرة قلتله مايخالف الحياة تجارب تعيش وتاخذ غيرها كل يوم تعال الوقت كالسيف اذا لم اقطعه قطعك مد رجلك على قد لحافك << مدري وش دخلها لكن ودي اقولها موضوعي وانا حر ..!!
المهم اخذت العشرة ريال وارقى طيران <<طيران والا عود << عود والا معمول <<< معمول والابسكوت !!
ياخي اللغة العربية ناظروا الكلمة لها الف معنى والمشكلة ان كل معنى بعيد عن الثاني مليون درجة..!!
عود تجي مثلا عود يعني دخون وعود يعني الالة الموسيقية وعود يعني عود اسنان مثلا ..!!
ولا كل شي يجر الثاني يعني مثلا عود والا عصا عصا والا عمود الخ ....
عود والا بيانو بيانو والا قيتار الخ........
عود والا معمول معمول والا دهون عود الخ .....
ويالله امسك لك خط في لغة الضاد <<< اخس يالمثقف ..!!
المهم رقيت لمه وعطيته العشرة ..
وطبعاً رحنا صلينا وبعد الصلاة العسكر قالوا يالله ياشباب انتهى وقتكم الحين عوائل ..
رضخنا للامر الواقع ويوم صلينا طلعنا واروح للسيارة بعد 4 ساعات خالدة في ذاكرتي ومن اجمل ما عشته في حياتي ..
<<<توني مابعد خلصت القصة قاعد على قلوبكم ..!!
رجعت للبيت دخلت الاهل علامات تعجب واستفهام ..!!
غريبة وش مطلعك ووش مقومك بدري وانت ماعدنك شي..!!
تعال تغد قلت لا ابد مفطر ..!!
قالولي تعال تعش اجل قلت تعش والاطعش<<<< فهمتوا ؟؟ اذا ايه الحمدلله واذا لا احسن عمركم مافهمتو ..!!
الا الاهل يستفسرون على طلعتي الغريبة العجيبة الرهيبة المدهشة المريبة المثيرة..!!
قلتلهم بعدين اقولكم ..!!
قلتلهم ما ودكم تروحون للفيصلية اليوم ؟؟
لا لا لا شكل حرارتك مرتفعة اليوم انت صاحي ..؟؟
مو معقولة انت تقول تبون اوديكم للسوق مش ممكن مش ممكن مش ممكن خلينا نحكي خلينا نعبر خلينا نريح ونرتاح <<< قلبوا عصام الشوالي ..!!
قلت ايه وش الغريب قالو لاابد مافيه شي غريب ..!!
الا عاد استغلوا الفرصة يالله اكيد ودنا ..!
وتجي الساعة كانت ثمان وخمس واربعين دقيقة وفي روايه اخرى تسع الا ربع طبعا الليل هالمرة ..
الا وانا اوديهم قلت لحظة لاتدخلون ابلبق واجي ادخل معكم ..!!
اهلي خلاااااااااص قمة الانصدام وشلون انت بتدخل معنا ..!!!!!
قلت ايه انا وش فيها حرام والا عيب ..؟!!
عاد وانا اللي ادخل معهم ..!
وفجئة اصقع بالنخلة ..!!
بس اشوى مارقيت عارف انها صناعية ..!!
رحنا ندور فيها ونحوس ومحل محل ..!!
الين مارقينا فوق في المطعم ويجينا خوينا ذاك ابو عشرة ريال ..!!
شافني انهبل وانحاش ..!!
قلتله هييييي ابعطيك مقدم ذا المرة وماصدق ..!!
واوريه الخمس ميه وتطيح سعابيله ..!!
وطلبنا وتعشينا ويوم جينا بنطلع قلنا خلونا ناخذ جولة تحت ويوم نزلت كانت في مشكلة عويصة ..!!
البزران يصيحون نبي نلعب نبي نلعب وهم مسكرين الالعاب رحت استفسر قلتلهم ليش ؟؟
قالولي ماندري اليوم يوم دخلنا لقينا كل شي شغال ..!!
يمكن نسوا يطفونها من امس ..!!
وانا اللي تجيني ام الركب ..!!
قلت ايوهـ ..؟
وقالي ايه مايصلح 24 ساعة تشتغل الالعاب .!
قلت اهاا ..
وانا اللي اقول لاهلي يالله نمشي قالوا يالله ..!!
ويوم جيت ابطلع شفت خويي الحارس الا وانا اسلم عليه قلتله وش جابك ؟؟
مو دوامك الصباح قال الا بس جيت عندي شغلة ابخلصها على السريع وراجع..!!
والا انا اعطيه العشرة حقته ..!!
وعيّا ياخذها قالي وش دعوى قلتله والله ان تاخذها وفوقها هدية بعد ..!!
واخذها ..!!
ويوم جيت ابطلع قلتله تراني العب عليك انا هلالي منب لانصراوي ولا اتحادي قعد يضحك قال وانا هلالي متعصب بعد ..!
وسلمت عليه ومشينا انا واهلي وركبنا السيارة ورحنا للبيت ..!!
بعد يوم من احلى الايام ..!!
اللي ماينسي صراحة ..!!
ويوم جيت ابنام وفجاأة وانا منسدح طررااخ وشو ذا ..!!
هذا انا طحت من السرير ..؟؟!!
ويتجمعون علي اهلي وش فيك مدري وشو قلت وشو اول مرة تشوفون واحد يطيح من السرير ..!!
والحمدلله ذا المرة قدرت انام ..!
عاد الربع كانوا ماخذين مخيم ..!
عاد اتفقت انا وخويي نمشي لهم بعد صلاة الفجر ..!
وفعلاً اتفقنا ومشينا ووصلنا لهم في المخيم والحمدلله لقيناهم قايمين ..!
اللي في الدباب واللي قاعد يطعس واللي قاعدين يطلعون واحد مغرز والجو كان رهيييييييييب ..
وابد استانسنا الحمدلله الين ما اذن المغرب ..
وهذا خويي اللي طلعت معه قلتله يالله خلنا نمشي قال يالله ..!

وفجأة يوم دخلنا الرياض وتجيني ذيك الفكرة المجنونة ..!!
واقاعد اناظر خويي وهو خاف قال وش فيك خير قللته هع هع ..!!
وش رايك نروح للفيصلية ..!!
هو علامات التعجب والاستفهام مليانه راسه ..!!! قالي طيب واذا رحنا ؟؟ بعدين قال اصلاً مايدخلون شباب الحين ..!!
قلتله ماعليك انا ادبرها هو قالي باستهتار هههههه يالله يعني اني بيدخولنك انت وخشتك ..!
ويوم وصلنا رحت لبقت ويوم جيت ابدخل لقيت خويي قلت له جيت في وقتك بعدين قلتله انت تداوم في الليل والنهار قالي لا اتبادل انا وخويي اسبوع له في النهار واسبوع لي ..!!
قلتله اهاا ..
ويوم جيت ابدخل قالي وين قلت لا ابد ابدخل قالي لا ..
قالي شف صحيح انك صديقي لكن ولو هذي امانه وانا اخذ راتب علشانها اسمحلي..
بصراحة كبر بعيني وقلتله اصلا لو خليتني ادخل بتطيح من عيني ..!
وفجأة جو شباب وهو انشغل معهم بيمنعهم واحنا استغليناها ودخلنا بدون مايدري .!
من زين الطبايع لابسين ترنقات وفرحانيين قاعدين نمشي وكلن قاعد يناظر فينا ..!!
وانا مستغرب قلت انا ادري اني انيق لكن موب لهالدرجة ..!!
عاد من الفشيلة قلنا خلنا نقعد. الماشي والواقف والقاعد يناظر فينا عاد انا ام الفشيلة ..!!
وتجينا ذيك الفكرة قلنا مدامهم يحسبونا داجين وقاعدين يناظرون فينا وش رايك نطلع جوالتنا مدامها جديدة وتونا شارينها وكشخة ..!!
قالي هو والله فكرة ..!
ويوم طلعناها صاروا الناس يشكون فينا ..!
يحسبونا سارقين الجوالات (( نبي نكحلها عميناها ))
ويجينا ذاك العسكري ..انت وياه دخلوا جوالاتكم ..!!
بغيت الخه بالجوال على ضروسه بس خويي مسكني وقاله ليه طيب قالنا بدون ليه ..!!
وقلناله سمعأ وطاعه ودخلناه .!!
خويي يقولي هي يا ابو الشباب الناس قاعدين يطالعون فينا خلنا نطلع ام الفشيلة ..!
انا يوم جيت ابرضخ للامر الواقع تذكرت الملاهي ..!!
قلتله بس لقيتها ..!
قالي لحوووووووول وش لقيت بعد !!
قلت امش معي والجزمة اللي يكرمكم نمشي وتطلع حصا وتراب ..!
من زين الطبايع كنادر كورة مشهبه ..!
ونزلنا تحت للملاهي ..!!
قلتله وش رايك نلعب قالي استح على وجهك هذا كبرك وتلعب ..!
قلتله لعبه لعبتين قالي طيب بس على شرط ..
قلتله وشو قالي نلعب لعبه زينه موب حقة بزراين ومير اصفقه على وجهه قلتله هذا شرط انت ووجهك يعني بعقلك بنلعب لعبة بزارين ..!!
لعبنا كمن لعبة وفيه لعبه لعبناها امتيلنا مويه فيها ..!!
ويوم لعبنا وخلصنا مع التعب قلنا خن نرتاح ومير نقعد على هالسراميك وكلن يناظرنا ..!!
وللمرة الثانية اطلع للفيصلية مامعي فلوس بس اشوى لقيت معي ريال تذكرت الريال هذا لاقيه في البر ..!
اما خويي هو مايزود علي ولا شبر ..!>>>> مدري وش دخلها لكن لا تدققون
نفسي بالضبطمامعه الا ريال..!!
جوعانين وعطشانين ..!
قلتله الا وش رياك ناخذلنا تصبيرة ؟؟
هو قال هاه..؟ وشلون طيب مامعنا الاريالين ؟!؟
هو قال لا انتبه تفكر بهالتفكير يكفي فشيلة قلتله موب على كيفك ..!!
تدرون وش سوينا ..؟
بريال شرينا(( بطاطس فشار شيبس)) سموها اللي تبون والريال الثاني شرينا فيه مويه ..
ويالله جغمة مني وجغمه منه ..!!
والفشار مفروش كنه رز وقاعدين ناكل فيه بالخمسة ..!!
ام الفشيلة كلن يناظرنا ..!!
ترنقات مليانه مويه + كنادر كورة كلها تراب + متقاطين في فشار ومويه ..!!
اقول يا ابو الشباب ما ودك نطلع الساعة حدعش طبعا في الليل ..!!
خويي يالله نطلع نطلع ..!!
ابد ويوم وصلنا عن الباب منهبل خويي الحارس قال وشلون دخلت قلتله موب شغلك ..!!
ومير نشوف ذاك الهمر جاي وحنا كملناها قلنا خاربة خاربة ونقعد نصور فيه كننا اول مرة نشوف همر ..!!
ويوم جا رمضان شفنا مسلسل اخواني اخواتي اللي معروض على القناة السعودية الاولى ..!!
هنا تأكدنا وتذكرنا انفسنا وقلنا اكيد هذولي حنا <<< حنا والا ديرم ..!!
وقلنا اكيد شافونا وسرقوا الفكرة ..
لكن القهر انهم ماشاورونا والا كتبوا الحقوق محفوظة ..!!
عاد قبل لاننام وش رايك اكسر راسك بالسوني وهو كالعادة تخسي وتعقب وفي الاخير اصكه سبعة وعشرة ..!!
مدري احس اني نوتي متعشي بس اني جوعان قال يادلخ هذيك تصبيره ..!!
قلت اييييييه صح ..!!
على طول هو قالي لا لا لا لا يرحم والدينك لاتفكر خلنا نتعشى في البيت كافي فضايح ..!!
قلت يا انت جبان ياخي وش فيك فلها وربك يحلها عش حياتك يا ابن الحلال ..
خلها علشان بكره اذا كبرنا نتذكر هالايام ..!!

هو يالله قدام بعدين قبل لانمشي قال وين بتروح اي مطعم ؟؟
كله المطاعم الكشخة عوايل..!
بعدين اصلا اذا شافوا خشتي وخشتك بيطردونا ..!!
قلتله خلاص خلاص بلا قلق خلنا نطلب وبس ..
اما اننا نتعشا في مطعم ..!!
هذي خلها في الجزء الثاني <<< طبعاً اذا كان فيه جزء ثاني ..!!

ولحظة نسيت ابشركم ..
شريت سرير جديد ..!!
==============

واعذرونا على الاطالة ويارب انها تكون خفيفة وحلوهـ عليكم ..
تقبلوا تحيتي ..!!
واعذرونا صارت البهارات اكثر من الطبخة ..!!
باختصار القصة من وحي الخيال ..