بسم الله الرحمن الرحيم

في الحقيقه انا ما ادري ليش قاعد انا اكتب الحين واضيع وقتي على فريق خلاني اعيش لمدة يومين بضغط نفسي كبير وباخرتهاينهزم هزيمه مذله من شبه فريق ايه نعم شبه فريق انا ما اعتقد اني شفت قدامي فريق اللعيبه النصراويين كانوا صغار بس كانوا والحق يقال ارجل منم بعض شيباننا مثل المسعري (الله يسامح اللي خلاه يلبس هالفنيله ) لاني اعتقد ان فنيلة الهندي اللي يجيب الكور تخب عليه ياناس المسعري هذا اذا لعب تحس ان الفريق اللي قدامك يلعب بثنعش لاعب لانه والحق يقال ما يقصر الهلال يقطع الكوره وهو ما يقصر يسلمه للفريق الثاني بكل محبه زطيبة خاطر واذا لعبها للاعب هلالي تلقاه يزنقه بالكوره تقل بينهم عداوه او ان اللاعب ذابحن ابو المسعري الخسيس لا واللي زاد الطين بله الطوله الخبيل تركي القحطاني ماغير يتبطح بالملعب تقل ما عمره شاف ملعب مزروع او انه جاي من بيتهم ما تعشى وياكل من هالبرسيم انا ما ادري وش فايدتهم بالهلال ماغير يرفعون الضغط
وما انسى الحكم اليوم ما قصر مع عيال جحا هم يكسرون ويظربون بالاكواع والكروت للهلال ياخي اذا كنت تخاف من جحا اعتذر عن المباراة والا ذليت يوم اشرلك باصيبعاته
والا مخرج المباراة ههههههههه حدث ولا حرج اللقطه اللي للنصر يعيده من فوق ومن تحت ويمين ويسار حتى انه جاب بطن اللاعب النصراوي بحدى اللقطات والهدف الهلالي الاول ما عاده الا بالتشفق ويوم طاحت قاعتنا تقل النصر هم اللي دافعين له موب وزارة الاعلام
ورئيس الدجه سعود بن تركي الله يسامحه مخلي الفريق يتمرمط بالرياض وهو ما غير قاعد برا وخذ يا صفقات خياليه انا ما ادري ليش يرشح نفسه للرئاسه وهو مهوب قاعد عند فريقه يا خي خل شغل الرجال للرجال


وبالاخير انا مااقول الا الله يصبرنا على هالاوضاع والله يستر من الاسيويه بس نبي نرجي خير ان شاء الله لان ابو عبد الله ونواف والدعيع راجعين لنا والا ان صارت على هالبزارين عز الله ما شفنا بطولات منا لاخر الدهر.

والسلام ختام.