ااااااه ثم ااااااه
من اللي شاف مباراة امس وماارتفع ضغطه؟؟
وش هالتعامل الزفت مع الهجمات؟؟
وحسين العلي امس وش يبي؟؟
والله اني خايف انه يطيح من عيني بعد ماكان افضل مهاجم بعد رحيل الدوليين
الصراحه على مستوى امس الهلال يستحق الخساره بعد...
اجل هالاتهاد قاعد يجارينا في اغلب اشواط المباراة..
لاو مسوي له كم هجمه خطيره؟؟...ولولا بس سوء التدقيق من لاعبينهم ولا كان جابوا اكثر من هدف
ادميلسون امس عشرة على عشرة ( عطفا على كبر سنه)...لانه مهاجم ممتاااز
بس انقهرت يوم ضيع ذيك الفرصه اللي قدام المرمى..يوم نقشها قبل مايوصلها الصادق
العقيلي الصراحه لايلام على احتساب ضربة الجزاء...لاني حتى انا قلت انها ضربة جزاء لما شفتها اول مره...لكن بعد الاعاده عرفت ان فيها نسبة كبيره من التمثيل
لكن اعتقد لو انه اي حكم ثاني كان بيحتسبها...
لكن يؤخذ على العقيلي عدم استخدام البطاقات الحمراء...رغم كثرة استخدام البطاقات الصفراء...
يالشريده هد اللعب شوي...ترا الحكام مايصدقون على الله يمسكون عليك خطأ علشان يطردونك....هدي ياعم هدي
المعلق امس في وادي والكره في وادي...تلقاه نايم طول المباراة واذا جت هجمه زعق ذيك الزعقه اللي تدخلك شهار
والصراحه كنت راح اضطر اني اتحمله طوال اكثر من 90 دقيقه لوما واحد من الشباب الله يجزاه خير ذكرني ان المباراة منقوله على اوربت
( من الحرص ماقمت اشيك على القنوات)
البلوي الله يبلاه في نفسه ناوي على نية جديده حسب تصريحه..
ولاتستغربون انه يروح من الهلال لاعب مهم للاتهاد...
ولاتصدقون هالكلام عن اخلاص اللاعبين والهبربرة اللي مالها سنع
وكلنا نتذكر الغشيان والعويران..وش كانوا في الهلال..وحب جماهير الهلال لهم
والان كل واحد في نادي منافس..( الفشل النصراوي والاتهاد)
فلاتستغربون هالشئ انه يتكرر مادام الخلافات مسيطره على النادي
والرئيس والله مايدري وش الطبخه
( من اول ماسمعته يقول في اول مباراة بين الهلال والنصر بعد مارأس النادي يوم قالوله ان عبدالرحمن بن سعود يقول الهلال عقيم...الرجال قال:- عبدالرحمن بن سعود على عينا وراسنا وهو استاذنا ونستفيد منه ومن تصريحاته...وانا غاسل يدي منه....والله ياليت سائلين بندر بن محمد..كان رد علي جحا رد مهوب صاحي..مااقول الا الله يخلف بس)
التعادل الصراحه اعتبره خساره...لان المباراة كان المفروض يكون المستوى فيها اكبر من كذا
خصوصا انها في الرياض..وعلى الصدارة...ومهمه...مااقول الا الله يستر من مباراة الجمعه الجايه لايلعبون فينا بزران النصر تميم وطقته...
اااااه ياهلااااال...تغيرت كثيييير عن اول....الله يرجع ذيك الايام ( ايام بندر بن محمد)