السلام عليكم







بينما انا افرفر بهالمنتديات نقزلي اعلان عن تمساح مسطل يدور من يتبناه

قلت والله فكرة......
اتبناه لان باين عليه مسطل وبايعها وبساعدنا في القضاء على التماسيح<<في هذي أشك

المهم عزيزاتي السحالي
اترككم واخليكم مع اعلان هالتمساح المسطل
يقول خوينا :

^
^

بسم الله نبدأ في موضوعي والمعذره مسبقاً :
شباب والله يخلي لي هذي الوجيه تكفون طالبكم ارمي عليكم السير اللي فوق راسي اللي ضحك علي ابوي في ليلة العيد وجابه لي يقول كشخ يا وليدي بالعقال عشانك جبت مقبول ((لو لون السير أسود يمكن تنبلع لكن لونه أخضر فسفوري !! طيب أخضر فسفووري مو مشكله بس ماعندي شماغ يقول أبوي خلك حونشي وحط السير فوق الطاقيه وسروال السنه على الكتف !)) تكفون يا وجيه الخير ناخيكم أتوسّل إليكم تباً لكم أبغى أي واحد يعرف لي من قريب له والا بعيد من أي طرف شخص يبغى يتبناني الشروط إنه يكون في بيتهم بلكونه .. ينااس أبغى في حياتي اعرف وشهي البلكونه ووين يحطونها في السرير والا في الدريشة والا يحطونها في دولاب الملابس ؟ طيب مو لازم بلكونه وشهي الغرفه ؟ (( أقول خلاص البلكونه وانبلعت .. لكن الغرفه ما تعرف وشهي كثر لي منها هذيك اللي تجي في باسكن روبنز المغرفه بـ خمسة ريال مسوي لي فيها اهبل الله ياخذ وجهك فشلتنا قدام الأعضاء ! ))
خذوا هذي سيرة مبسّطه ارسلوها لـ اللي بيتبنّاني (( واثق )) بحطّها لكم في ظرف :
نعتبر تعدّينا الليمت المحدّد لعدد أفراد عائلتنا لدرجة إن أخواني اذا حطوا في راسهم يلعبون كوره يستاجرون صحراء النفوذ من الملك عبدالله ويفرقون خمس فرق ويلعبون على كاس جبن منتهية صلاحيته وحكم الساحه واحد من اخواني لا ومرتشي واللي يرشيه ابوي .. وطبعا ً أول مرة أشوف ست مدرّبين لياقه وكلهم يمشون على كراسي معاقين وأربع حكام خط لأن مالهم مكان في المدرّجات على طاري المدرّجات أخواني يرتزون في الصحراء قبل المباراه باسبوع عشان يلحقون على الكراسي الخشب اللي سرقها أخوي من المدرسه وجابها للصحراء مشي .. والي ما يلحق المباراه يجلس برا مع اللي يبيع التذاكر (( وأكيد أنه أخوي )) !
هذا الكم الهائل من أفراد العائله يعيش تحت سقف فلّين في سطح واحد عزيز على ابوي لأنه جابه في الحياه (( طيب قل أبوه وفكنا ! )) مع إن جدّي مات وأبوي ما عنده أخوان (( أنا عرفت ليش الحين أخواني كثيرين .. أثاري جدي حالف على ابوي إنه يجيب أولاد كثير يرفعون اسم العائله ... طيب يبه ليش عذبت امي مسكينه حطيت حيلك فيها وش ذنبها يوم أبوك موصّيك تجيب عيال .. طيب قال جيب عيال ما قال جيب عوايل !! )) والبيت تحت فاضي وكبير إلا أبوي يقول أبغى أخليكم تعيشون حياتنا أيام أول !! ومسوّي لنا درج طوارئ من جنب البييت عشان ما يخلينا ننزل البيت ولا فيه ثلاث درجات مكسوره ويخلي ثلاث من اخواني ينزلون قبله ويسجدون مكانها عشان يطلع فوق ظهورهم<<يكسروون الخاطر
انا اسمي (( عتيق )) وكنت انقهر من اسمي (( يحق لك تنقهر والله لو إنه اسمي لبيع فشار عند الحرم اصرف <--------- إلى الحين مو مصدّق الصدمه اللي هو فيها ومو مصدق إن اسمه عتيق تكفون يا شباب خففوا من همّه لا يدري إن اسمه عتييق )).. بس يوم كنت اسمع ابوي ينادي أخواني الثانين ويقول يا رحمة الله ويا جمل (( زين ما جاتنا بنت والا كان سماها ناقه )) ويا صبحي (( يبه ليش كذا سويت في الولد ؟؟ الله يسامحك !! )) المهم يوم اسمع ابوي يقول هذي الأسامي احمد ربّي وأقول الحمد لله إن إسمي عتيق ولا لو إني مولود قبل الأخ اللي قدامي بإسبوع كان خذت إسمه (( قتيبة ))
أبوي ما أبي أقول اسمه لأنه مشفّر ولو فكّت التشفيره معي أخاف إني أقوله واتكلبش لذلك لن نصفح بـ إسمه درءاً للمفاسد .. أمي إسمها كوثر وأمها ( جدتي ) اسمها كاتيا لأنها قالت لجدّي يوم جابت امّي والله العظيم ما تخلّي إسمها أحلى من اسمي أجل تبي بكرة يوم تكبر تزيغ عينك وتتغزل فيها ! (( ينعن شكلك هذي بنته طيب ))
أخواني البقية لن يسعفني الوقت في ذكر اساميهم أخاف يعلّق الإندكس من كثر أساميهم ..
مع العلم إنه سبعة وعشرين واحد من اخواني عندهم منغولي كلهم يشبهون لبعض ماعدى واحد عنده منغولي بس عبد !!
نرجع للمسكن (( أي مسكن واللي يرحم لي والدييييييييك ! )) هو جاي السقف فلّين وحاط زي التيزار من الأبلكاش أطراف الفلّين وبدل ما نكلف على انفسنا في الكهرب .. مسوّين فتحة في الفلّين من بداية طلوع الشمس عشان تنوّر علينا والفتحه تتمدّد للغروب يعني السقف عندنا مفتوح نصّين من كثر الفتحات اللي فيه ويوم أسأل أبوي ليش الخط هذا الفاصل اللي في السقف ؟ يقول هذا العازل الحراري وفي الليل عشان مافي نور .. ولا عندنا كهرب يثبّتون برطم واحد من اخواني في الفتحة حقة الشمس إلى الصباح اليوم الثاني لأن برطمه منوّر خلقه أبيييييض من قلة الأكل والشرب وحاط لنا أبوي فرش مخطط أبيض وأخضر دققت فيه شكيت إني أعرفه بس بعد ما قال لي الهندي اللي في البقاله اللي جنبنا شفت المظلـّه اللي تجي فوق الباب ما أدري من أخذها علي !! وصرت استحي أشتري من عنده ورحت لخمس بقالات ثانية ونفس الطريقة طيب يبه من كبر البيت يوم انك تسرق كل هذي المظلات انا أقدر أحلف بالله إن نصّ المظلّة تغطي البيت وتطلع من الدرايش بعد ؟ طلع انه مسوّيها شراشف في وسط المقلط فارش لي من الأطراف ومن النص فيه فراغ قلنا يبه نبي نغطي الفراغ قال لا تغطونه ان شاء الله بعد سنتين بنحط نافورة ..
أبوي عنده سيّارة تيرسل أخذها من موديلها من زود الفرحه بأن عنده فلوس راح اشتراها من مصنعها من اليابان وأخذها قبل ما يصبغونها بوية يعني جاي لونها نيكل قلنا يبه ليش ما خليتهم يصبغونها وجبتها بعدين معك انتظرت ترى ما تاخذ فترة طويله قال لا يالفطين تبيهم ياخذونها علي .. هذي من الطراز النادر (( جعل طرزان ياكلك )) شحنها من اليابان عن طريق البسّامي وركب في التيرسل في المرتبه الورّانيّة يبي يموّه يعني على سوّاق التريلة يقول خليني اشوف هو بيجي يشغل المكيّف ؟ (( مع إنه مافيها مكيّف .. باقي ما خلصوا السياره حتى المكينه نسيها في اليابان )) وربّك ستر انه ما مات يوم وصلت الشاحنه الرياض سمعوا صوت واحد ورا يقول مويه مويه (( الأخ من اليابان إلى السعوديه ساكت عشان يصيد السواق )) يوم وصل عندنا البيت قال جيبوا العدّه يبي يفكّ صواميل شنطة التيرسل عشان تكون كشف يقول أحسن كذا عشان ما يجوز نعذب الخرفان ونكتمها في الشنطه خلوها تشم الهوا (( الحيوانات عنده أهمّ مننا )) يحشرنا كل أبونا في المرتبه الورّانيه ومافيها مكيف لا و ماخذ شطرطون رصاصي هذاك اللي جا أيام الأزمه في العراق يوم كان فيه كيماوي ويحطه على درايش التيرسل من برا ويقفلها زين يقول عشان ما يدخل غبار في السياره ويكتمنا (( وانا عارف إنه ما سوّا كذا إلا عشان ما يصرف كهرب وهو ينزل ويرفع القزاز )) واذا جا يركبنا كلنا يربط الأبواب من برا بحبل جاي من الصدام الأمامي إلى الصدام الخلفي عشان ما ينفك الباب ونطيح (( مسوّي حب فينا والله مو حب فينا عشانه شاف في جيب أخوي عشره ريال والا كان جلس يفحّط عشان نطيح )) لا ومن شين الطبايع يوم يصير طويل شوي الحبل يسوّي فيه من الطرف كرفتــّـه مسوي يعنني مزبرقها لا ومركّب فيها نسافات شيول والينزين اللي فيها من اليابان مليان رصاص مو زي بزيننا حتى عشان انه من زمان ما عبّى بنزين الغطا حقه صدّى وطلع فيه حلى وعيّا ينفتح واليوم اللي بعده جينا نطالع إلا في نعامه حاطه عش وبيضها على تانكي البنزين كله هذا عشان انه ما حركها إلا مرة وحده يوم جابها من اليابان يبي يمشينا فيها تعدّينا اثنين كيلو قال أبوي يوووه نسينا صندل أخوك الصغير خلاص بكرة نطلع ومرّت سبع سنوات ما جا بكرة ..

[color=blue]>>>>>>>>>
يتبع

















انتبهوووووووووووووووووووا تابع للموضوووووع
--------------------------------------------------------------------------------
انتبهوووووووووووووووووووا تابع للموضوووووع ..........
>>>>>>
ذاك اليوم كنا مجتمعين كلنا وجاك أخوي الصغير من برا يصيح وقعد في وسط الصاله (( يلعن أبو الكذب أي وسط الصاله يرحم لي والديك وكل واحد جالس في حضن الثاني كننا جالسين في مرقص من صغر البيت )) المهم إنه جا من برا ورجله اليمين رافعها على صدره وينقز برجله اليسار وجلس قلت انا أكيد إنها شوكه والا قزازة رحت ابي أشوف وش فيه يوم قرّبت منه جلس يلحس بطن رجله (( أثاريه دعس على زبالة جيراننا فيها تطلي ( كاسترد ) ويبي يذوقه ما عمره ذاقه في حياته ))

أخو ثاني ذاك اليوم كان يلعب هو وواحد ثاني من عيال الحاره (( أخوي طبعا ً )) إكس أو المهم انه فاز الأول جا الثاني وعطاه بقس يقول انت غشاش المهم إن الولد بغى يغمى عليه من قوّة البوقس وطلع الدم .. جيت انا وشلت أخوي وعلى المستشفى جري ورحت على الطواري في واحد مصري دكتور قلت له شوف الدم يا دكتور قال مش مشكله هاته عشان نكويه (( أخوي اللي خشمه يقطر دم مزكم )) جا المصري بيدخل شي زي اللي ينظف الإذن في خشمه قال ارفع راسك لفوق ورفع راسه اخوي وتوّ المصري بيدخل اللي معه في خشم أخوي ويعطس أخوي في وجه المصري يعني وجه المصري صار كله دم وما شابه من انواع الزكاااام بصراحه انا رحمت المصري هذا وعصّب ابو صرّة وقال لي مرة ثنية لما بينزف ما تقيبهووش فاهم ! قيب (( التلغراف )) بتاعه فقط (( حلوة فقط )) قلت يا دكتور اول شي الولد صغير وبعدين مزكم وانت تدخل في خشمه يعني أكيد بيعطس المهم المصري هدا وضعه وقال قيبوه معايه عاوز أشوف فصيلة دمّه إيييييه والله وجبته للغرفه حقة التحاليل (( أخوي أشول يعني يكتب باليسار )) قال المصري ما تعملّيش زي البتاعه اللي في مكتبي والا حزعل خالص قال اخوي طيب طيب قال اديني يدك اليمين قال اخوي لا لا خذ اليسار قال اسمع لمّا أأوولّك اديني اليمين يالله قال أخوي خذ اليسار نصيحه ! قال مش عاوزها هات اليمين قال طيب خذ ومدّ له اصبعه الوسطاني اييه يا أليل الأدب ياللي ما بتختشيش وقام يهذر المصري قلت لأخوي خلاص عطه يدك وخله يشتغل خلصنا !! المهم اعطاه الإبهام والمصري حاقد وغزّه من قلبه ويجيك أخوي بيدّه اليسار ويصننننننه بكف والله يالمصري تعلق في الشمّاعه من قوّة الكف وقام أخوي وقال الله يلعنه مستشفى وطلع زعلان اخوي وهو يردد بصوت عالي يقول أنا ما قلت لك خذ اليسار خذ اليسار بس انت ما تفهم (( حس بالذنب اخوي من الكف اللي جا للمصري )) والله إني أحس الكف إلى الحين في إذني وانا اكتب الله يعينك يالمصري ..

واحد من اخوياي اسمه قتيبه كان يعاني من المنغولي وكنت ذاك اليوم رايح لمجمّع الراشد عشان اشتري بيض وجا معي قتيبه المهم انه الولد هذا عطشان إلى أبعد الحدود وكل شوي غاثني ابي مويه ابي مويه قلت استهد بالله اذا رجعنا البيت اشتري لك مويه خل الفلوس الحين تكفينا نشتري بيض ويوم وصلنا الراشد و رحت اشتري البيض وجيتك رايح للبيت واعطيت امي البيض (( ثلاث حبات )) وراحت تسويها لنا يوم جيت اطالع فيها من بعدين بكييت بقوّة بالله عمركم شفتم أحد يحرّك البيض بمطرقه آآآآآآآآآآآهـ ما عندنا ملعقه نحرّك فيها البيض خلص البيض وجابت امي السفر (( الجرايد )) من كل ما لذّ وطاب من أنواع البيض المروح (( يوم رحت الراشد كان عندي بس خمس هللات قلت له تكفى يا طويل العمر وهو فلبيني بس يعلم الله أول مرة اشوف فلبيني عيونه وسيعه ! أبي بيض تكفى وشوي إلا الفلبيني يهتز ويقشعر من كلمة تكفى ويعطيني ثلاث بيضات عند ارجوله فاسدة مفقوعة من راسها قال لي مش حالك فيها )) المهم فرشت امي الجرايد وجلس أبوي وجلسنا كلنا ننتظر وجبتنا ويوم جات امي كبّت البيض على الجريدة (( ما عندنا صحن )) قبل ما توصل على الجريدة كانت يد أبوي تحت سحب البيض واعطانا ظهره وجلس ياكل البيض بيده لأن مافيه خبز لدرجة إن واحد من اخواني جلس يلحس بقايا الزيت اللي طاحت على الجريدة ..
>>>>>>>>>>>>>>>>>>> تابع













انتبهوووووووووووووووووووا تابع للموضوووووع
--------------------------------------------------------------------------------
أخوي الكبير رحمة الله الباكستاني كان المشاغب في البيت وكان أبوي دايم يهدده وهو انسان قذر شكله قبيح شعره طويل ودقنه طويل مو من الطواعه بس ما عندنا فلوس نشتري موس واصابع رجله متزاعله من بعض لدرجة إن واحد من اصابع رجله في كعبه وفي رجله الثانيه طالع له اصبع في الساق كأنه ثآلول واسنانه طوال واذا قمنا نذب عليه نقول روح يابو ضروس يقول انا زي الذيب (( والله انك كنغر وتخب بعد )) المهم ذاك اليوم أبوي عصّب عليه لأنه لبس جزمته وطلعت وسيعه على ابوي لأن اصبع رحمة الله اللي جاي في الكعب وسّعها من ورا قام ابوي وقال والله لأحلق شعر راسك راح أبوي واخذ العشره اللي شافها في جيب أخوي قبل سبع سنوات اللي شافها بعدين ربط بالحبل السياره عشان ما يطيح أخوي اللي معه عشره وراح اشتراه له مكينة حلاقه وجا عند رحمة الله قال ابوي بحلقك يعني بحلّقك جلس يبكي اخوي واحنا نترقب نبي نشوف وش بيصير أخوي رحمة الله من يوم ولد ما نعرف إلا ضروسه ماعمرنا شفنا ملامح وجهه من الشعر شغل ابوي المكينة وبس حطها في شعر راسه وتنشب وخربت المكينة قال له ابوي انا ناوي لك على نية مابفكك إلا إذا حلقت شعرك والله وياخذه عند الباب ويفتح الباب 30 درجة مئوية ويحط راس رحمة الله عنده ويسكر على شعره الباب ويقول لنا اسحبوه من ارجوله .. والله ونسحب .. لكن وش نسحب ! والله ما قدرنا شوي طاح سقف البيت واحنا نسحب وشوي إلا الجدران تطيح على بعض كأنها ورق بلوت باقي بس الباب ناشب في شعر أخوي آخر شي أبوي أخذه تحت اباطه وبيودّيه يحلقه قال لنا ابوي رمّموا البيت لين أجي الله يعينك يا رحمة الله أبوي ودّاه محل دجاج وشغل مكينة الدجاج وفرم شعر راسه ويوم جانا رحمة الله ما عنده شعر أصلع بس واحنا نطالع شكل راسه من فوق نشوف بداية الفك العلوي حق اسنانه لدرجة إن واحد من انيابه طالع من فوق الإذن والله لو حلق ابوي دقنه لتطلع ضروسه كلها من عند السكسوكه ..
وهذا هو تقرير حياتي .. لا اعتراض على قضاء الله والحمد لله على كل حال وتكفون دوروا لي على واحد يتبناني مو لازم غرفه على الأقل عنده شبشب
--------------------------------------------------------------------------------



هاه شرايكم ينفع نتبناه؟؟

















































بنت والله بنت عقدتوني

الله يعطيك العافية