الروتين السعودي , ووقت الدوام ؟ - نادي الهلال السعودي - شبكة الزعيم

الفارس الحائر · #1 30/11/2007, 03:59 PM

السلام عليكم ورحمة الله وبركاته

كيف حالكم اعضاء وعضوات الزعيم

ان شاء الله بخير وسعاده

اشتقت لكم , وقلت ارجع لكم بموضوع خفيف لطيف ظريف عفيف <<للسجع بس

مع ان اخباركم تجي من اخوي عادل " الكلاسيكي " بس يوم يعطيني اخباركم
كان له نفس ويوم يقول ماصار جديد<ماله نفس يرد :

سالفة الموضوع/
امس كنا مجتمعين في احدى المناسبات ودار بيني وبين ثلاثه من الشباب
حديث (منهم اثنين متزوجين وواحد قريب زواجه وانا عزابي والكلاسيكي عزابي)
كنا نتكلم فيه عن النوم وعن الروتين اليومي للسعودي او للخليجي بشكل
عام , وتوصلنا ان برنامج السعودي سواء عزابي او متزوج سيئ للغايه مقارنه
بدول اخرى اوربيه وعربيه , حتى اوقات الدوام مسببه لنا صداع وقلق والوقت
صاير مو بيدينا , ولو نظرنا للغرب شفنا كيف اوقاتهم منظمه واوقات اطفالهم .

واتحدى واحد يقدر يقول اني اتحكم بيومي وبالاخص المتزوجين لان يومهم ينتهي مابين الدوام
والنوم وقضاء حاجة الابناء وهنا مايقدر يقرأ او يقوم بالرياضه بشكل
متواصل او حتي مايصير عنده وقت للنقاهه.

احد اقربائي تواجد الاسبوع الماضي في الاردن ويقول اعجبني روتينهم اليومي
وطريقة معيشتهم رغم بساطتها , يقول ان حتى ابنائهم اللي مايدرسون ينامون
في اوقات مبكره ويصحون بعد الفجر تلاقيهم يلعبون كوره في الساعه 6ص !!
وهذا النوم صحي جداً لهم .

وهذا اقتباس لاحدى الدراسات /

إقتباس


	توصل الباحثون إلى إثبات جديد يؤكد أن السهر يضعف ذكاء الأطفال واستيعابهم فيما يساعد النوم المبكر على زيادة مستوى ذكائهم وقدراتهم الذهنية والادراكية

الحـــــــــــــــــل ؟

طبعاً توصلنا لحل وبالاخص في ظل زحمة شوارع الرياض وهو ان يبداً الدوام
من بعد صلاة الفجر , وينتهي في الساعه 11ص هالشي يعطيك فرصه انك تنام
لك ساعتين بعد الظهر حتى يكون فيه متسع من الوقت تجلس مع ابناءك وتقضي
اشغالك بنفس الوقت . وتم الاتفاق على هذا الشي وكانت امنيه احد اعضاء الحوار
انها تطرح هالفكره في مجلس الشورى (طموح

يابندر ) وبإمكانه
لانه قبل فتره قابل احد اعضاء المجلس الشورى لكن ماجت في باله هالسالفه

معاناة احد افراد الحديث ؟
احد المحاوريين معنا كان يعاني من طريقة نوم ابنه الصغير فهو لا يصحى
الا في الـ 12 ظهراً وهالشي يخليه يسهر لحد آخر الليل وتنتهي الليله بلا رومانسيه

, واضاف قائلا

ينومني هالولد ولا ينوم

لذلك يجب بنا ان كنا نريد العيش بطريقه سليمه صحيه ان نعدل من روتيننا اليومي
وبالاخص اوقات الدوام , لأن الآن لما نطلع من الدوام مافيه وقت ننام الا مأذن
العصر , وبعد الصلاة كله ساعه مايكفي !!!

الحل هو تغير الـنظام العام بشكل كامل , والتأقلم معه حبه حبه

الأسئله :

*مارأيك بروتين المواطن السعودي ؟

* هل تؤيد ان يكون الدوام بعد الفجر ؟

* هل تسطيع انجاز مهامك في يومك ؟

* هل يحق لماجد مقبل ان يتزوج << وش دخلها

على الطاري احب ابارك لماجد مقبل عقد القران << عقباله

ولنا لقاء مع موضوع جديد ,,
عادل ثبت لاهنت واسمع كلام اخوك الكبير

اخوكم الفارس الحائر

mla78_chicken · #2 30/11/2007, 04:08 PM

مشكووووووووووووووووووور

عادل ثبت يستاهل .....اخوك الكبير ولا ترى بيجلدك في البيت هذا اول شي

واما عن النوم المبكر تصدق عاد مره جيت ابي اسوي مؤدب وانا الي انا بكير علشان اصحى بكير

واقوم من صباح الله واسوي لي كوب من القهوه الامريكانيه مع الدونااااااااااااات بس من دون سكر علشان الرجيم

الموهم واشرب واكل واخلص واحط القناه السعوديه الاولى ما اعجبتني واشوي وانا اقلب واحط LBC

وكا ما اليك الا هيفا موجود بس ما اتوقع انه مباشر واقعد اتبطح بالصاله زي المهبول وسوي زيها

ويوم زهقت قفلت التلفزيون TV لمتعددي الثقافات واشوف الساعه الا توها 6 ونص يمين يسار يا ولد
وش السالفه وش ذا الملل
وكل خلق الله نايمين
قررت ارجع واحط راسي وانا لاننا في مجتمع ما يحب يقوم بدري

مع ان في الصباح بركه

شـــذى · #3 30/11/2007, 04:16 PM

وعليكــم السلام ورحمة الله وبركاته ..

إقتباس


	مع ان اخباركم تجي من اخوي عادل " الكلاسيكي "

الكلاسيكي أخـــــــــــــــــــوك

؟؟

****

بصراحة رتم الحياة هو من يجبرنا على الروتين والملل

حيث لا جديد وعلى قول جدتي ( اللي نصبح فيه هو اللي نمسي فيه )

نصحى ( هذا في حال إنا نمنا من الأساس ) نصلي نتجهز للخروج ..

ومحاضرة ورى محاضرة حتى الوقت المستقطع فيها ممل ومكرر

بعدها يجي وقت العودة نتغدى ونومة خفيفة ..

وبعدها يامذاكرة يامقابل التلفزيون أو النت .......الخ لا جدييييييييييييد ..

إقتباس


	*مارأيك بروتين المواطن السعودي ؟

ممـــــــــــــــــــل للغاية ولو فيه كلمة أجزل وأبلغ من كذا كانت استخدمتها ..

إقتباس


	* هل تؤيد ان يكون الدوام بعد الفجر ؟

لا والله أرفض وبشدة خصوصاً في فصل الشتاء ..

إقتباس


	* هل تسطيع انجاز مهامك في يومك ؟

نادراً إلا إن كانت إلزامية فأنجزها وفي وقت قياسي ...!!

الفارس الحائر ..

الله يعطيك الف عافية ..

دمت بكل الخير .

mla78_chicken · #4 30/11/2007, 04:24 PM

إقتباس


	موضوع جميــل .. << مواصل لا تنشب لي وتسلط عليّ الأنظار

في اختراع اسمه خاص

عالم الهلال · #5 30/11/2007, 04:39 PM

أيامنا روتين متكرر والسبب اننا لا نستمتع بالعمل او في الدراسة
لوكنا نستمتع لكان كل يوم ماهو جديد ومختلف فتُـفتقد هذه المتعة
مما يدخلنا في دوامة الروتين
بالاضافة الى الهوايات كثير منا لا يمارس اي من هواياته فلا يتجدد يومه

إقتباس


	*مارأيك بروتين المواطن السعودي ؟

بصراحة بعضهم لا يحب ان يغير روتينه يفضّل ان تسير اموره طبيعية ومكررة
ويخاف من التغيير .

إقتباس


	* هل تؤيد ان يكون الدوام بعد الفجر ؟

تختلف من شخص لآخر يعني اصلي الفجر وما اقدر ارجع انام وانتظر موعد الدوام
أؤيده في هالحالة.
مثل دوام رمضان الساعة 10 اعتبره فاشل

إقتباس


	* هل تسطيع انجاز مهامك في يومك ؟

على حسب المزاج وبشكل عام نعم استطيع..
حتى لو كان بملل دائما اضغط على نفسي حتى انجزها.

موضوع جميل
يعطيك العافية
دمت بطاعة الله
أختــك

اليزابيث هيرلي · #6 30/11/2007, 04:40 PM

هلا بك الفارس ..

عوداً حميداً

جبتها ع الجرح وأنا أختك ...

ما قتلنا ولا ذبحنا ولا دمر نفسياتنا غير الروتين

..

وروتين المواطن السعودي أسوء روتين في تاريخ البشرية >>> فيه تعبير أكثر

تصدق أنا ودي الدوام يتغير كل أسبوع .. يعني أسبوع الفجر ... أسبوع الساعة 8 أسبوع الظهر ...

وربي كذا تطلع وناسة وفله

...

أما بالنسبة للمهام .. والله ولا شي ...

ع قولتك أجي الظهر ما يمديني أنام .. ولأني ما نمت أصير طول الوقت متنكدة والنفس خايسه

لاجت الساعة 9 واثري متدروخه

...

لا حضرت ولا طلعت لي لبس ولا زينت شي ..

أصحى الصبح و أنا معلنة حالة الطوارئ وأضف كتبي معي, أدخل المدرسة مختبه وأقعد أكمل أشغالي ,, وهكذا دواليك ...

من جد وضع محبط

..

بس بيني وبينك .. روتين المعلم أو المعلمة أشد و أكثر مملاً قياسأً بالوظائف

الأخرى ...يعني لما كنت طالبة في جميع مراحل دراستي ما قد شكيت من الروتين نهائي ..

لو أني ببريطانيا أو دولة أجنبية ما أعتقد أني بحس بممل ..

عموما يعطيك العافيه ع هالموضوع ..

والله يعين الجميع على روتيناتهم>>> أموووت ع الجمع

((ودي أفصل

))

الهنوووف · #7 30/11/2007, 06:02 PM

::

//

وعليكم السلام ورحمه الله وبركاته

عودا حميدااا

بس هالمره طووول شووي

حنا بخير ولله الحمد انت اخباارك ايها العضو القاطع

لاتلوم اخوك
صعب تلخص الاحداث وتنقلهااا فلذلك اسهل شي تقول ماصار جديد

إقتباس


	توصل الباحثون إلى إثبات جديد يؤكد أن السهر يضعف ذكاء الأطفال واستيعابهم فيما يساعد النوم المبكر على زيادة مستوى ذكائهم وقدراتهم الذهنية والادراكية

وانا اقول عيالنا ماشاء الله كلهم اذكياء

اهم شي السهرر والوناسه وش الواحد ماخذ من الدنيا >>

والذكي ذكي لو ماينام الا دقيقتين مثلي الله يحفظني

ماحس مثل هلااحصائياات صحيحه يعني وش دخل النوم بمعدل الذكاء
الذكي يبان عليه من صغره والغبي كذلك يعني عن التسذب ايها العلماااء

بخصوص الدوام بعد الفجررر مايمدينا نراجع اذا عندنا اختبار

ومايمديناا نشرب كوفي

وتبينا نطلع من البيت بالظلام

لانه لازم ناخذ ساعه للمشوار
اقوووول قول لبندر لايطلع حلول

بخصوص نوم الاطفال هذا الزواج خله يتحمل اجل تتحمل هالضعيفه لحالهاا

في كل امر تحصل الايجابي والسلبي وهذا من سلبيات الزواج
يعني تخيل انت جاااي دايخ وتبي تنام الا طفل يبكي

لازم تصحى معاه
عاد بنات هاليومين يعشقن النوووم الله يعينهم

يعني وش موقفهم مع هالحاله هي ياواحد من الاثنين رمي الطفل من اقرب نافذه

او النظرر له بنظرات حقد لين ينام

:::::::::

مارأيك بروتين المواطن السعودي ؟

روتين ممل وهذا الي يكرهني باوقات الدراسه انها تعتمد على الروتين الممل
طبيعتي ماحب الروتين ولذلك اكره نفسي احس اوصل حاله صعبه

الحياه كلها صارت روتين مافيها جديد

كانها يوم بتكرر لمدار العام

طفش نوم دوام نت بس هذي الحياه

* هل تؤيد ان يكون الدوام بعد الفجر ؟
لاااا
وذكرت السبب سابقااااا ارجع ورى ولف يمين بتحصل الجواب

* هل تسطيع انجاز مهامك في يومك ؟
على حسب المزاااج
واحيانا بسبب الطفش والروتين ماتعرف تنجز شي واحد

* هل يحق لماجد مقبل ان يتزوج << وش دخلها

على الطاري احب ابارك لماجد مقبل عقد القران << عقباله

نعم يحق له ذلك وانا ابارك له من هالزاويه الاخرى
ويحق لكم جميعااا
يالله عقبالك

والله ياخووي سالفه الروتين لو بتكلم عنها بتنزل دموعي >>>حالتها صعبه

كل ايام الدراسه والويك اند نفس الشي عندي
اول يمكن يتغير يومي بالويك اند الحين سيم سيم
حتى الويك اند انام بدري واصحصح الفجرر وانام الظهر

يعني ماتغير شي
حتى ايام الاجازه الصيفيه اقوول بسووي وبسوووي محاربه للروتين
بس خلاص الروتين سيطر عليناا مانقدر نسوي شي

والايام ماصار فيها بركه والله تروووح بسررعه

ماتوقع فيه حل للروتين الا ان الشخص هو بنفسه يغير نظامه وللاسف مافي شي يساعد على التغير

إقتباس


	عادل ثبت لاهنت واسمع كلام اخوك الكبير

ههههههههههههههههههههههههههه
عادل لاتثبت واسمع كلام اختك الصغيره مدري المتوسطه

نشوف من بيسمع كلامه

حسيت انه كوورة مو موووضوع ثبت شووت

اخوي الفارس الحائر
اطلالة سعدنا بهااا
لاتطول الغيباااات

ود يليق بك

الهنوووف

كانت

هنا

ورحلت

ملـــــ الهلال ــــك · #8 30/11/2007, 06:13 PM

*مارأيك بروتين المواطن السعودي ؟

أحس أنه أغبى شي . لأانه أكل ونوم ودوام وبس .

* هل تؤيد ان يكون الدوام بعد الفجر ؟
أ
يد بكثير عشان الخلق تصلي مهوب بالفراش ..

* هل تسطيع انجاز مهامك في يومك ؟

كلها اما اقدر أقدر ع المهم والي مهب مهم نجله شو ..

موضوع مميز يالحاير تشليح .. ^..*

تقبل مروري

ملك الهلال

المنقاوي · #9 30/11/2007, 06:29 PM

طيب انا دوامي الساعه 7صباحا واصلي الفجر ونطلع من المسجد 6 وعليها وينتهي دوامي الساعه 2 ونصف اوصل البيت وهو يأذن العصر اصلي العصر وارجع يادوب اتغدى وشوي شوي الا وانا منهكني التعب والارهاق وارجع انام الساعه11 تقريبا
مع العلم اني متزوج ولدي ابناء لكن العمل اخذني منهم
لا والمصيبه عندي يوم الخميس نص دوام
عشان كذا والله ماني قادر اوفر بين العمل والاهل خصوصا انهم يقعدون بالاسابيع مايطلعون
بس ويش نسوي

الفارس الحائر · #10 01/12/2007, 01:42 AM

mla78_chicken

إقتباس


	اخوك الكبير ولا ترى بيجلدك في البيت هذا اول شي

خلاص مايحتاج واسطات انجلد

.

إقتباس


	قررت ارجع واحط راسي وانا لاننا في مجتمع ما يحب يقوم بدري

هذي المشكله الشعب مو مستوعب النوم المبكر وتحصل الواحد ينام بدري في السنه اسبوع

شاكر لك اخوي وحيــــاك

شـــذى
ياهلا فيك اختي ،،

إقتباس


	الله يعطيك الف عافية ..

الله يعافيك ،، وتواجدك يشرفني ،، والف شكر على ابداء رائك

عالم الهلال

إقتباس


	بالاضافة الى الهوايات كثير منا لا يمارس اي من هواياته فلا يتجدد يومه

أكيد لوكان كل شخص يمارس هوايته لما كان فيه ملل بالروتين اليومي او العمل الذي يهواه ومتخصص فيه لكان العمل متعه لكن (تجري الرياح بما لا تشتهي السفن)

الف شكر لكل من أبداء رائيه وتعليقه وتواجده هنا ولي عوده لكم

رعبوبة الزعيم · #11 01/12/2007, 02:25 AM

وعليكم السلام,,

هلا والله اخوي الفارس ,,
من طول الغيبات جاب الغنايم
بس علشان هالموضوع بنسـامحك على القطعه الاخيره

<<يعني قطوع

الروتين اليومي شي صعب التحكم فيه بصراحه ..
صار لي فتره مو قصيره احاول اسنع نومي ولا رضى يتسنع ..

بس جد احسد جدتي على التنظيم اليومي حقها ..
ماشالله عليها تصحى بعد الفجر على طول وتنام 8 بالليل

وماشالله عليها تحب تنام خفيفه يعني ماتتعشى الا زبادي

الله يطول بعمرها..

بس الشعب السعودي وخاصه الشباب والبنات النوم عندهم رايح فيها .. سهر بالليل ونوم بالنهار
وتستمر المعاناه

والاطفـال النوم الصحي لهم 12 ساعه لأن الليل يساعد على النمو بعكس النهار
ونوم النهار اصلا مافيه بركة تحس انكـ مانمت وتبي تنام مره ثانيه

بس تنظيم النوم صعب مرره والله واسألني

مارأيك بروتين المواطن السعودي ؟
روتين ماعنده سالفه صراحه .. يازين الاجانب بس يقومون الصباح ورياضه بعدين يقضون اشغالهم
بس الدوام بعد الفجر على طول احس صعب

..

* هل تؤيد ان يكون الدوام بعد الفجر ؟
لا ..
انا لو ودي اخلي الدوام الساعه 9

هل تسطيع انجاز مهامك في يومك ؟
احيان ايه واحيان لا ..
وذلك بسبب الكسل والبرود اللي غالبا مايزورني

* هل يحق لماجد مقبل ان يتزوج << وش دخلها

على الطاري احب ابارك لماجد مقبل عقد القران << عقباله

اكيد يحق له

مبرووووكـ ماجد وان شالله تبشرنا بقدوم الاديب مقبل
عقباالكـ يارب يالفارس وجميع العزوبيين

الفارس..
موضوع رائع

الله يعطيكـ العافيه .. ورده

الهلالي النايم · #12 01/12/2007, 03:01 AM

إقتباس


	مارأيك بروتين المواطن السعودي ؟ هل تؤيد ان يكون الدوام بعد الفجر ؟ * هل تسطيع انجاز مهامك في يومك ؟

روتين آشؤؤفهـ عآآدي لولا النووم بالعصر ..

لا .. لان لوو كاان بعد الفجر بتصحاا من متى ؟؟ ومتا يمدي المزاج يظبط شووي

يعني مب كلها .. خوصا اذا نمت ولا صحيت الا ع الاعشاا والمزااج دمآآر ،،

متشكرين ع الموضووع .

ياقاهرهم يالهلال · #13 01/12/2007, 04:55 PM

والله مساكين ياللي نداوم الصبح بالرياض

الجسر زجمه
الملك زحمه
الدائري زحمه

معد تدري وين تروح معه

الصبح تجيني مراره لما اروح الدوام

واذا تقول انا قوي لف على واحد الصبح ولا اضرب له بوري بقوه والله انت تروح غلطه عمرك

نفسي اوقف عند الجسر واشوف الناس الرايحة والجايه وقت الدوام كل واحد نفسه في خشمه وماله خلق لاي شي من الزحمه والقرف

والله قرف مو طبيعي

إقتباس


	*مارأيك بروتين المواطن السعودي ؟

بالنسبه لي زي الزفت ولله الحمد

إقتباس


	* هل تؤيد ان يكون الدوام بعد الفجر ؟

ياليت بعد الفجر نحرك ونصلي الظهر ونمشي ياسلام نتغدى بالبيت زي العالم وننام ونقوم بدري نشوف وش عندنا بالليل

إقتباس


	* هل تسطيع انجاز مهامك في يومك ؟

مااتوقع بيوم وليله اخلص اشغالي خصوصا ان كانت معاملات يبيلك واسطات ويالله تمشي بعد !!!!!

هلالي متيم20 · #14 01/12/2007, 05:22 PM

موضوع رووووعــــــــــــــــــــــــــــــــه

ومن جدك تبي الروتين هذا يتغير .

ماتشووووووووف حياة الأولين .

من شيبانا ــ لاتنسى فياض ــ

وحياتهم الحــــــــاوهـ .

لا ومن زين الطبايع .

والله ــ أن حتى أوقـاتهم منظمــه .

في الصباح .

ســــووووق الــــغـــنم .

وفي الظهريــــــه .

فـــــــالـيـنـــهــا .

وبعد العصــــــــر .

يتعـشـــــوووون ــ تخيل عــــــــاد . . .

ومن بــــــــعـــــتد العشـــــــــاء .

مدري والله وش يسوووووووون .

شوفي شموخي · #15 01/12/2007, 11:18 PM

السبت والاحد والاثنين والثلاثاء والاربعاء : اصحى الساعه 6:30 واروح للدوام وبعدين اطلع الساعه 4:00 وهي نومه الى الساعه 6:30 وبعدها تصلي المغرب وتشرب قهوه مع الاهل وبعدين اروح اصلي ثم ارجع واتابع فلم الساعه 7 على شو موفي 1 الى الساعه 9
طبعا بعد الساعه 9:00 يوم السبت والاحد مباريات ويوم الاثنين تخليص مشاوير ويوم الثلاثاء إذا كان مافيه ابطال اوربا فهو يوم الربع نجتمع بالقهوه طبعا ربع الدوام دايم مسنترين هناك الله يهديم . ونفس الشعور يوم الاربعاء اذا مافيه ابطال اوربا يعني مباريات واذا كان فيه مباريات شفته وبعدين رحت للشباب بالاستراحه اخوياي شبشل طبعا قاط معهم حلل .
اما الخميس فهو مع الاهل بالاستراحه من الظهر الى الليل اخذ كرت الشوتايم والارتي وكنك مسافر استمتع باجواء الاستراحه سباحه وكوره وشوف مباريات دورينا الخنبقه وتفرج على افلام وغيرها .
اما يوم الجمعه فهو يومي الشخصي بعد صلاه الجمعه عندك الحلاق الى الساعه 2:00 الظهر وبعدين خذلك غداء من مارينز او اي مكان اخر وتعال للبيت وجهز زمزمية شاي وقهوه وروح للاستراحه مع الشباب الشبشل لانه يوم مخصصينه نجتمع فيه ابد زي اجتماع مجلس الوزراء بس مجلس الوزراء يوم الاثنين وانا يوم الجمعه الى الساعه 11:00 وبعدين ارجع للبيت وشوي مع الاهل والتلفزيون وخذلك بعدها نومه
طبعا نومي طول ايام الاسبوع من السبت الى الجمعه الساعه 2:30 وانا في سابع نومه .

المقصود من هذا الكلام هو ان الشخص متى مارتب اموره صارت الروتين احلى من الواقع وتحياتي لكم