اعتذر عن التأخر عليكم
..
واشكر لكم لطفكم معي وحماسكم وتفاعلكم
ياعساي ماانحرم من هالوجيه
قولوا آمييييييييييين
طبعاً يحز بخاطري أنه الجزء الأخير معكم
لأني طول الفترة الماضيه
مستانسه بردود افعالكم ... ومعجبني تواصلكم وحماسكم
بس أن شاء الله لنا لقاء بمواضيع ثانيه بالقريب العاجل
خلونا نكمل
وين وصلنا حنا
...
إيه يوم رجعنا من المكان اللي عند البحيرة
ضفينا عفشنا ونمنا مبكرين لأن بكرة ورانا سفر طوووووووووويل
تقريباً هو أطول مسافه قضيناها
طبعا رحلتنا بتكون من نوراليا اللي فوق الجبل
إلى منطقه ساحليه مب بعيده كثير عن كولومبو
قمنا من صباح الله خير وافطرنا ومشينا
طبعا الطريق بدايته كان كله نزول وأنواع المنعطفات
...
وأنواع الدوخان
....
وكان كل طريقنا خضرة على مد النظر
ماأمدانا نمشي شوي إلا بدت الحفريات عندهم
>>> من كبر شوارعهم ومسوين فيها حفريات بعد
بس رهيبين ماسكينهم شركه يابانيه مدري كوريه تزين طرقهم
المهم مسوين حركه غريبه شوي
بما أنهم مسكرين الشارع ومافيه غير مسار واحد بس للرايح والجاي
والطريق اللي يصلحونه طويل نوعا ما وكله لفلفه
يعني مايمدي الواحد يعرف أن فيه سيارة بتواجهه أو لا
موقفين واحد معه زي الاسلكي
ومعه لوحه مكتوب عليها ستوب وقو
<<< تخيلوهن انقلش مالي خلق ابدل اللغه
يوقفنا الين الثاني من الجهه الثانيه يعطيه الضوء الأخضر
وأنه خلاص وقف السيارات اللي عنده
عاد يجي دورنا نمشي
شوفوه كاشخ لنا بلوحته
بس والله ياحنا حقدنا في وحده من الوقفات نطعونا
فيها حول النصف ساعه
كله للي جايين خير
المهم أننا نمشي ونمشي ونمشي وعيا يخلص هالطريق
وقفنا كذا مرة بكوفيات ومقاهي نريح
أغلب اللي بالسيارة ناموا من طول الطريق
بس أنا مايهنالي النوم في طريق أول مرة اشوفه
يمكن تجي لقطه تحتاج تصوير وأفوتها بغفوة مالها داعي
كل شوي ندخل بقرى لهم صغيرة مرة
وحده منهن صادفت طلعة المدارس وأنواع الزحمة
ياحليلهن رحمتهن
حنا جايين نتمشى وهم يدرسون ياعميري
وحنا نمشي شوي إلا تصب علينا ذيك المطرة اللي ترد الروح
كل اللي بالسيارة وكانوا نايمين تناقزوا
ياعميري مايشوفون المطر إلا بالسنه حسنه
الله يسقينا ويغيثنا
لا تلومونهم على نقزتهم
عاد شوفوا وش صار الجو
وهنا لقطات خذتها بعد ماربصت الأرض
<<< كل يوم تربص أرضهم ماشاء الله
كملنا طريقنا بس ماش عجزنا نوصل
وشفنا أن الصلاة خلاص
مابقى شي وينتهي وقتها
وحنا ماصلينا لا ظهر ولا عصر
قلنا لسواقنا لاشفت مسجد وقف فيه
تعدينا يمكن ثنين ولا وقف النذل
يقول أنتم تقولون وقف في مكان مافيه وقوف
ويقول منتوا دافعين لي الغرامه اللي بيحررونها لي
>>> وش رايكم فيه
المهم في الثالث صارخنا عليه
قلنا له نزلنا وامش الين نصلي
ونخلص ونتصل عليك والحمد لله ربي هداه
ونزلنا فيه وتقريبا هو أول مسجد ندخله
جيت مدرعمه مع أبوي وخالي لمدخل الرجال
بصلي معهم داخل
على أنه مافيه أحد لأن الوقت متأخر بالنسبه للي بيصلون
صلاة العصر من أهل الديرة
وممداني أدخل إلا ويصرخ علي واحد
الظاهر أنه الحارس حق المسجد
بسم الله علي
يقول لاتدخلين فيه مصلى للحريم
قلت طيب بشويش
ويقوم يدلني على المدخل ...
يوم دخلت طبعا كله بلاط مافيه فرشات ولا زوالي
الظاهر انظف كذا
قلت له وشلون القبله ويشر على اتجاه معين
<<< مستعجله ماتبي وضوؤها ينتقض
والحريمه اللي هي أنا بديت اروكع
واهلي راحوا يتوضون
طبعا كشفت وجهي بما أن المصلى تبع الحريم
وأنا في صلاتي مادريت إلا ذا اللي مار من قدامي
انحست بصلاتي ادور غطوتي واجدع طرحتي على وجهي
على الأقل شي يستر ولو شوي
عمى يعمي العدو وش مدخله
هو نفسه اللي جابنا هنا بس دخّل معه حرمتين
شكلهن تبعه ويمكنهن تبع قسم الحريم
يوم شافتني قامت تبربر علي بلهجتهم
اللي فهمته منها أن قبلتي غلط
والله ياأني حقدت على الحارس بقوة
....
أجل مايعرف القبله
طبعا ماصدقتها الين طلعت وشفت المحراب
وطلعت صادقه مسيكينه
صليت وخلصت الحمد لله واطلع استكشف المكان
شفت عند مدخل المصلى حق الرجال شي كنه بركه
فيه مويه وغضاير
<< جمع غضارة
مشبي يروع
طبعا قاريه عنه بالنت أنهم يتوضون منه
مع أنهم حاطين مواضي جمبه
انا أقول عساهم لا جو يتمضمضون مايتفلون داخلها بس
كلش جايز ومب غريبه يسوونها
<<< ماحامت كبدها أبد
طليت على مصلى الرجال عناداً في الحارس
وخذت لي لقطه له
المهم اكتشفنا أنهم حاطين بوسط المسجد قبر اللي بانينه له
ولا خلصوا اي صلاة لازم يلفون حوله ياخذون لهم كذا شوط
طبعاً يسوون هالشي لجهلهم الدين الصحيح
الحمد لله على النعمه اللي حنا فيها
وأنا طالعه أنا وأختي وحده جايه ناصيتنا
تسلم أنا ماعطيتها وجه
ولزقت بأختي تبرك فيها
عشانها من دولة منبع الإسلام على قولتها
وجابت عيالها يسلمون على أختي عشان تطرح فيهم البركه
طبعاً هي مسلمه والأغلب بهالقريه المسلمين
بس اسلام مش حالك
وقصة لها معاناتها تبيها تبرع لها
أنا تركتها ومشيت من أول شي
وأختي نشبت فيها
وظلوا عليها مجموعه كبيرة
انا خفت عليها الصراحه
أشكالهم تروع وهالخبله معطيتهم جوهم
المشكله لاهي تفهم لهم ولا هم يفهمون عليها
ويتكلمون مع بعض بلغة الاشارة
يوم ركبنا سيارتنا
فيه شايب عند دكانه سلم علينا وقعد يتكلم معنا لغه فصحى
وقرى لنا قرآن ودعا لنا
>>> ياحليله ورده
مشينا لنا كم كيلو
وأخيرا شفنا البحر
ابشركم قبل لاتغرب الشمس
ولقطت لكم لقطه خطيرة للغروب
حسيت أني مبدعه ويجي مني
نزلتها بقسم للتصوير الفوتوغرافي بمنتدى ثاني
>>> أبوك يالثقه
شوفوها واحكموا
هاه وش رايكم
ماراح اقولكم أنهم قطعوني بالنقد والمدح
بس كأول مشاركه لي وكنت بالسيارة وهي تمشي بعد
يعتبر انجاز
>>> مافيها كلام
وصلنا وأخيراً بعد رحله شاقه
دامت تقريبا حول العشر ساعات
أو أكثر شوي بعد
بس والله الطريق حلو
فيه شي في هالطريق يصلح للشباب واحسه متعه
بس حنا مايصلح لنا عشان كذا مارحنا له
اللي هو
ركوب القوارب المطاطيه بالنهر الجاري
اللي معنا مب راعين مخاطرات ومغامرات
وبعدين لو ركبوا وين يحطونا فيه
المهم ماعلينا وصلنا فندقنا وحنا خلاص ندور بس الفراش
من أول مادخلناه جاز لنا شكله وخقينا عنده بقوة
أثاثهم كان راقي واطلالته خطيرة
الفندق محد كتب عنه بالنت
عشان كذا ماشفنا فيه
أي أثر للعرب
حنا اللي وصانا فيه راعي الشركه السياحيه
ولاّ حنا مخططين نسكن ببنتوته هي اللي مشهورة
طبعا الحين أكيد تسألون أعماركم وش هي هالديرة ووين سكنوا ذولي
شوفوا
الأول اسم فندقنا الخطير
واللي تحته اسم المدينه اللي فيها الفندق
طبعاً أنا من شفت السرير وأنا منسدحه عليه
خلاص ماعاد فيني حيل
حتى الظاهر أني ماتعشيت ذاك اليوم
قمت الفجر قبل لاتشرق شمسهم وطلعت في البلكونه
وزي العاده لازم أشرب الكوفي حقي
بس هالمرة بطني قارصني من الجوع
<<< ماتعشت
قعدت شوي وعقب نزلت افطر بعد ماقومت أخواني
عجبني البوفيه حقهم حسيته راقي وكشحت لي كم لقطه له
شوفوا حركه السقف رايقه
<<< ماخلت شي ماقزته
خلصنا من فطورنا وأبوي توه يجي
طلعنا برى نتمشى ونشوف البحر
لأننا امس ماامدانا نشوفه
رشرشت علينا السماء مطر خفيف
والجو كان خيال
ومن طلعنا نطوا علينا ناس يبيعون خرابيط
بس الغريب أنهم ماتعدوا حد معين
وأنا قاريه بالنت الأفضل ماتعدى حدود المنتجع حقك أو الفندق
لأن فيه حراميه يشلحونك
ومن شفتهم عرفت أنهم يقصدون هالاشكال
فندقنا حاط له حدود معلمه بأعلام
وبين كل مسافه ومسافه حاطين سكيورتي
يعني ماوالله يقربون حولك الحراميه
بس حنا لو بنروح للبحر لازم نطلع عن الحدود
...
انتظرنا ابوي يطلع معنا يوم جا لصقوا فيه
أنا عاد منبهه أبوي عن هالأشكال ومحرصه عليه ينتبه لجيوبه
هم على بالهم بيبيعونه خرابيطهم
وواحد منهم عرض عليه قارب يستاجره
وواحد مساج
وكلن جايب جهده
بس فيه واحد دلخ بينهم
سأل أبوي سؤال ...
قال ساعتك china
قال أبوي لا
قال وش صناعتها
أبوي ماعطاه
وجه بس هو قزها
قال اووه سويسري نايس
عاد والله ساعة أبوي غاليه حرام يسرقها
أنا من سمعته قلت لأبوي هجينا
...
نخاف يفصخونها من يدينه وهو مادرى عنهم
هنا صورة لبعضهم
شوفوا حدودهم مايقدرون يتعدون العمود اللي واقفين تحته
عندي صور واجد لهم بس ماتصلح للنشر
المهم قلنا للسواق تجهز عشان بنروح رحله بحريه
تدور على 64 جزيرة
كلن راح يجهز عمره
....أهم ماعلي واقي الشمس وحاطته
راح بنا سواقنا لناس يعرفهم بعد عشان ينصبون علينا
ومنها ياخذ منهم نسبه
اتفقنا معهم أننا ننزل بجزيرتين اللي هن أكبر شي من الـ 64 جزيرة
بسم الله توكلنا على ربنا
ونزلنا
قاربنا ذاك أبو أزرق وأبيض
اللي راكب فيه واحد شفتوه
اللي نمشي فيه الظاهر نهر مب بحر لأنه محجر
وبحرهم هايج ... مايصلح ينركب فيه قارب كان يقلب بنا
المهم أنهم قالوا لنا أنها كلها تماسيح
خفنا قلنا لو طاح بنا القارب ياكلونا
قالوا وهم يضحكون علينا ايه
عقب عاد قالوا لاتخافون وش يطيحه
من أول مامشينا ويستقبلنا واحد وهم يقولون لنا crocodile
<< عساي كاتبتها صح
وعلى طول أخذ له لقطه
كل اللي شفناهن صغار مافيه شي كبير
مرينا على واحد معه قرد صغنون ومن شافنا وهو جاي لنا
انا ماخفت أبد
>> ايه هين وخصوصا أني كنت من جهته
وعلى باله بيعطيني إياه يحسبني مااخالف واشيلهن عادي
أنا بس اللي استغربته كيف واقف على ذا القارب وكيف متوازن
نزلونا عند أول الجزر وكان فيها عجوز تبيع
زيوت ودارسين بس أسعارها أغلى من محلنا حق التوابل اللي بالطريق بعد دنبولا
كانكم تذكرونه
صورت بس مافيه شي يستاهل أنزله
ركبنا قاربنا وكملنا مسيرنا
الجزيرة الثانيه اللي كانوا بينزلونا فيها كانت معبد للبوذيين
قلنا مانبي ننزل أجل
المهم أنه خذ له فرة شوي وراح بزاويه فيها ورد اللي يطلع من النهر
وقام يعدنا
حنا قلنا وشوله تعدنا
قال عشان اعطيكم ورده
قلنا له وحنا قايلين لك نبي ورد
>>> عصبوا
قال اصبروا اوريكم
ويسوي لنا من الوردة قلاده تنلبس وننهبل عليها
عليه سرعه في تزيينها غير طبيعيه
صورته بالفيديو
وخذت لكم لقطه وهي جاهزة
يوم شفناهن نطينا بحلقه قلنا نبي كلنا
>>> توكم ماتبون وش قلب روسكم
ماقصر سوا لنا بس مب كلنا لأن الورد خلص
عقبها رجّعنا بنفس الطريق اللي جابنا منه
حنا استغربنا قلنا له خلاص خلصت جزركم
قال ايه
قلنا ماشفنا إلا يمكن 15 جزيرة ليه تنصبون علينا وتقولون 64 جزيرة
قالوا حنا مالنا دخل كلم الإدارة
المشكله نشوف الأوربيين يروحون مناطق بعيده نقوله رح معهم يقول مقدر
أكره شي فيهم تفرقه المعامله بيننا وبين الأوربيين
المهم ماسكتنا قلنا كلم المدير وحنا نكلمه بالجوال
قال مقدر
يستهبل علينا
قلنا طيب أنتم تقولون بندخلكم بوسط نفق من الاشجار
ماشفنا شي
قال لنا القارب كبير اللي انتم راكبينه ولا يقدر يدخل بالأنفاق
قلنا انتم اللي حطيتونا فيه غلطكم وانتم تحملونه
المهم عشان يسكتنا دخل بنا شوي بوسط نفق ولا تعمق واجد
لأنه صح مايقدر يدخله إلا القوارب الصغيرة
وهم معطينا واحد وش كبرة
الله يخسهم
كله خفافيش
...
...
,,
الوضع العادي
