كنت قد عزمت اني اروح لمباراة المنتخب انا وبعض الشباب بس حرصنا نجي مبكرين عشان نتفادى الزحمه ومشكلة المواقف وعشان نحجز مكان حلو والله واجيك اشغل العيال جوالات يله تأخرنا ===> ياشين اللي مامعه سياره مير كأني ماكلمت احد كلن يقول طيب طيب جاايك وهم ساحبين علي ... والله واخيرا مروني على الساعه كذا 5 مساء ونجيك مدرعين للملعب والله ونجيم نوقف في المواقف .. اكيد في المواقف اجل بتوقف في الملعب !! والله ونوقف ونجيك طامرين لشباك التذاكر ونقص تذاكرنا تراها ممتازه وندخل للملعب الين المدرج والله مايشجع ان فيه جمهور دخلنا على المدرج حق الممتازه وهــي فاضيه !!! رغم ان باقي على المباراة تقريبا ساعتين بس !!! والله ونختر مكان حلو وكل واحد ماخذ له كرسين تعرفونا نحب النذاله ونقعد نتكي وسوالف وساعة صدر وتشجيع راح ساعه يعني جت الساعه على كذا حوال 6.30 والله وبدا الجمهور يجي الدرجه الثانيه امتلت وصاروا العالم يروحون لم اللي خلف المرمى والله ويكثر الجمهور والجمهور يلبي نداء الوطن ويريد ان يضع الكره في مرمى اللاعبين

الجمهور يكثر .. والتشجيع يزووود والالعاب الناريه اشكال و انواااع وياشين من جاه شيء فوق راسه !!

المهم والله تجي الساعه 7.00 وجاء لم مدرجنا حولي 10 قطرين جاين دخلوا مع بوابه من الملعب !! يعني من وحده من بوابة اللي يدخلون منها اللاعبين ... جوا وجلسوا لحالهم منعزلين .... صح كنا محترمين وادري ان حقين الدرجه الثانيه يقولون لنا وش ذولي الرخوم رجموهم بس صراحه كنا مؤدبين وماتكلمنا عليهم نهائيا اللهم ان بعض الجماهير جوا وجلسوا وراهم وحطوا اعلام خضراء

ساعة انطلاق المباراة تقترب الجمهور يتفاعل بشكل كبير الدعيع يدخل للملعب وعاصفع كبيره من التصفير و التشجيع وكأننا مأخذين كأس العالم ... ويدخلون زملاءه بعده وتصفيق وتشجيع كبيير وانا اقوول في نفسي عز الله الله راحت اصواتهم ومعدناب سامعين تشجيع الين بدت المباراة

اللاعبين يترقبون لدخول المباراة يدخلون وتشجيع حااار وتصفيق كبير المهم الحكم بدا المباراة والجمهور وده بهدف يريحه اول ربع ساعه كانت حلوه لكن بعدها مااااااش مستوى المنتخب نزل والقطري ماسك المباراة وسجل هدف قطر من خطأ من العله الصقري اللي كان من بداية الدوره وهو سيء في اداءه حتى ان الجمهور تضايق منه كثيرا وانا شاهدت المباراة اليوم واكتشفت ان فيه كثير من الاشياء لم يشاهدها متابعين الشاشه على الصقري وبعض اللاعبين

المهم ينتهي الشووط الاول والمستوى زفت وانا نسولف انا و اخويي ونقول ياخي قهر نجي عارفين قطر دائما نشبه للمنتخب بعدين زحمه وقلق ومشوار وننهزم ياشينها بس لكن قلنا يله خلونا ننتظر وصراحه ماكان عندنا آمل في الفوز بعد الشوط الاول ....

نزلوا اللاعبيه في الشوط الثاني تقريبا نفس الشوط الاول سيطره بدون خطوووره لكن الملاحظ ان اداري قطر السليطي كان هو اللي يوجه اللاعبين بل ان بعض الاحيان يتعدى الخط المسموح !!!

المهم ولاااطول عليكم االوقت يمشي و الدقيقه 10 ماش الوضع مهوب كويس والله ويجيك ابو خالد ويغير الصقري ويطبب المشعل

تجي الدقيقه تقريبا 32 كره يلعبها الدعيع طويله من ضربة مرمى يخلصها الدفااع القطري تجي لسااامي في الوسط يرفع رأسه ويمرر للدوووخي اللي على طول من لمسه لعبها على الجناح الايمن لمااااطر .... يلعبها برجله ويعدددي اللاعب القطررري ويدخل منطقة 18 ويمررها ارضيه للذيب يعدي واعااااااااقه وضرررررربة جزاء سعووووووديه لاغبار عليها ولا نقاش عليها بتاتا
الجمهور سعيد طبعا بضربة الجزاء لكنه متخووووووف من اللي يشوتها ... بيتقدم سامي ؟ ولا اليامي ؟ هو الجمعان بيشوت ؟ ولا ماطر ؟ الجمهور يصفق وانا مغمض منيب اشووووف الين سمعت تصفيق وصيحه للجماهير واناظر الينه هدف وخويي مفهي اقوله هدف ولالا الين قالي ايه هدف واخمه واشيله مع انه دب هههههههههه.

والله ونصير واقفين والجمهور يشجع وكل واحد يوجه لاعب صح انهم مايسمعونا لكن تطلع عفويه والله الجمهور يشجع وكل الجمهور 70 الآف وااقفين يشجعون المنتخب .. بعد الهدف الفريق القطري معد ركز لاحظنا هالشيء وبعد المنتخب مافيه تركيز شتت و عند لاعبين منتخبنا حماااااااااااااس بس
مع التشجيع جاء للهدف الثاني من رفعه من خميس تجي للمحمدي عددددي عدددددي قوووووووووووووووووول سعوووووودي الله الله علليكم والله ابطاااااااال الجمهوووووور في حال هستررررررررريه جدا أي واحد لابس عقال رمااااه أي واحد لابس شماااغ نطلها انوااااااع واشكاااال الفرحه كل واحد رااااح صوته بعد الهدف بس نقول علهيم عليهم .. 10 قطرين طلعوا زعلانين من المباراة بعد الهدف الثاني وبدون مشاكل !!

والله وانا نشجع تجي كره للعنزي خوووووووفتنا من جد سكتنا الله يأخذ عمر العدووو ... يعني كوره في وقت بدل الضايه مهوب بوقته يجي هدف بس ربك ستر وعدت على خيررررررر

الجمهور يستمررر في التشجيع والتصفيق واحمد خليل يشتت كووووره تجي للمشعل ياااااب قووووول ياااارب قوووووول يسدد المشعل قووووووووووووووووووول سعوووووودي ثاااااااالث مو معقوووووووول والله شيء غير طبيعي ابطاااااااال ابطااااااااال وبس و فرررررحه اكثر من الهستريه على الجمهووور السعوووووودي اطمئن الجمهور بعد الهدف الثالث على نتيجة المباراة الين صفر الحكم بنهاية المباراة والبطل سعوووووووووووووووودي للمره الثااااااانيه بقيادة العالمي ناصر الجوهر

وش اقول وش اخلي عند مراسم تسليم الجوائز اللي احسن لاعب وحارس وهذي والله مانسمع شيء يمكن مهوب وضاح في الاوربت لكن من جد ماسنع شيء كل الجمهور يشجع ويغني يعني حتى اعلان اسم البطل والمنتخب مانسمع شيء بتاتاااااا يعني الجمهور تفاااااعل بشكل غير طبيعي يعني الجمهور بــــــــــــــــــــــــــــــــــــــــــــــــــــــــــــأكـــــــمله كان واقف لمده تزيد عن 25 الدقيقه وهو يشجع ويساااااند المنتخب يعني اول مره اشووووف الجمهور بالشكل هذااااا حتى ان سيدي صاحب السمو الملكي سلمان بن عبدالعزيز كان يكلم الحسن اليامي وهو قريب جدا منه دليل على ان الجمهور تفاعل بشكل غير طبيعي

اللي احب اقووووله الف مليوووون مبروووك لجميع اللاعبين والمسوؤلين ولجميع الجمهور الكبير

هههههههههههههههه

والله ليلتك البارح ليله

الف الف مبروووك لك ولنا وللوطن ..