شكلكم جايين بتهاوشون وتقولون الوطنية وما الوطنيه ( صار دجاج )


لا تهاوشون ولا تتحمسون موب هذا موضوعي ولاهوب كلامي ولا نيب مؤيد له

هذا مسج جاني عقب المباراه يقول : مبروك البطولة التاسعه الثلاثين للهلال ولا عزاء للفرق الاخرى

وجاني عقبه مسج يقول :

المدرب نصراوي ونقطة التحول في المباراه من لاعب نصراوي


الظاهر اللي كتبها قصده ابراهيم ماطر... ظلال الغشيان وهدفه قدام السويد


المهم وشرايكم في ناصر الجوهر ؟

خلونا من كل الكلام عن المدرب الوطني وانه افضل من الاجنبي ما اختلفنا


وصحيح ان المنتخب حقق الكلمات اللي تقول :

جاكم الاعصار ماشين يعيقه

وان كنت ريحا فقد لاقيت اعصارا

واول ما انتهت المباراه سويت فيها شاعر وقلت :

هذي عوايد راعي الكاس والفن *** ان جاه قول(ن) يلحق القول قولين

ولكن بالله عليكم هذي خطه مدرب ينشد به الظهر ؟


انا اسميها ((( خطة البطه )))

والبطه طرت علي عقب ماشفت رقصة ناصر الجوهر العالميه بعد الهدف

و عشان محد يقول هذي عقدة الاجنبي تخيلت لحظتها لو ان ناصر الجوهر اصلا مدرب الماني ( افلقني بقوه ) واسمه : ناهر فورر

و مع اني تخيلت انه الماني الا اني بعد ما انتهت المباره قلت للشباب الله يستر لا يصدقون ربعنا اعمارهم ويخلون ناهر فورر يدربنا في كاس العالم !!

ولاتستغربون شي وخاصة اننا عادة الفوز يخلينا ننسى كل الاخطاء ومانشوف العيوب الفاضحة الي اي واحد يشوفها


اجل وش كان ينتظر في التغييرات اول تغيير سواه كان باقي على نهاية المباراه عشرين دقيقه !!

واللي شاف المنتخب بيلقاه كان يلعب كنه هو قطر ... يعني كنه يلعب بفرصتين الفوز او التعادل بينما قطر كانوا يلعبون وكنهم مالهم الا الفوز


ياناس المنتخب داج بقوه مافيه انتشار صح ولا فيه خطه صح وهذا واضح من اللعيبه اللي مايدرون وين يروحون في الملعب وتحس انهم رحلة مدرسه ابتدائية قالوا لهم تجمعوا في الملعب بنطلع بكم للبر وخلوهم مختبصين في الملعب مايدرون وين يروحون

بالاضافة الى ان اللعيبة باردين و وتحس ان مافي كبودهم مرّ ( بكسر الميم ) يعني مافيهم المرّ اللي بكبودنا والحرقه على المنتخب


وين التيماوي اللي كان يحترق في المباراه ويحرث الملعب حرث

وين التمياط

وين الشلهوب

ويييييييين ويييييين وييين الملاييين

انا يوم عددت ذولا ما ابيهم هم بحد ذاتهم لكن ابي الحماس اللي فيهم ليه مانشوفه في اللعيبه الحين ؟؟

اللي حسيت انهم متحمسين المحمدي وسامي وماطر والباقين حتى لو تحمسوا تحس انه بدون نتيجه مثل حماس خط الدفاع اللي متحمسين وهم كل شوي شاقهم لاعب قطري


المنتخب يبيله وقفه قويه

وقفه مع اللعيبه

وقفه مع التدريب


يبيله اعادة نظر واعادة بناء ... بناء نفوس وارواح قبل كل شي

وبعدها بناء اجسام ولياقه

وسلم لي على ناهر فورر

الظاهر انت كنت تناظر المباراة وانت نايم !!!!!!!!!

هذي عقدتك حبيبي

لوكان اسمه ناهر فورر
كان قلت هذا افضل مدربي العالم

لك الله ياناصر
نهائي آسيا
تأهل لكاس العالم
البطولة الخليجيه

ومع ذلك يناب!!!!!!!!!!!!!

اعترف احسن لك

ارجو ان تكون فهمت

شيروكي /

((( و عشان محد يقول هذي عقدة الاجنبي تخيلت لحظتها لو ان ناصر الجوهر اصلا مدرب الماني ( افلقني بقوه ) واسمه : ناهر فورر

و مع اني تخيلت انه الماني الا اني بعد ما انتهت المباره قلت للشباب الله يستر لا يصدقون ربعنا اعمارهم ويخلون ناهر فورر يدربنا في كاس العالم !! )))

8
8
8
8

هذا كلامي بالنص الله يحييك ركز معي شوي ولا انت تبي تخالف لمجرد الخلاف ؟

انت مثل لو يجيك واحد يقول لك وشلون تصير مشرف المنتدى الاسلامي ومسمي نفسك شيروكي وهي سياره يصنعها الامريكان الكفره

هذا ردي على نقطة عقدة الاجنبي اما كلامك الباقي فما اظنك جاي تناقش نقاش منطقي وانما هو جدال لمجرد الجدال ولا كان رديت عليك وبينت انا وش اقصد


ابا الزعيم /

لا تكفى الله يخليك لاتعلمهم خلاص ماعاد اعودها

وش السالفه ؟

يادباب000اسمعني
الحمد لله الذي اعطانا هذه البطولة هذا اولا
ثانيا التاريخ يسجل كم اخذت السعودية بطولة وما يسجل المستويات
ثالثا ارجع معي الي عهد الامبراطور ( عهد صالح النعيمة ) تجد انه كان لدينا لاعبين مثل ما قلت يحرثون الملعب حرث بل يحرقونه حرق ولكن ما هي النتيجة كنا نكسب المستوى ونخسر النتيجة0
التاريخ سجل 9 بطولات خليجية للكويت ولم يسجل ولا مستوى للسعودية!
كنا نحضر مدربين عالميين مشهوريين فماذا عملوا؟ اصبحوا اغنياء فقط!!!!!
انا اتمنى استمرار الجوهر بل اطالب بتكريمه واطالب به في كأس العالم فلو احضرنا ثلاث ارباع مدربي العالم لما اخذنا كأس العالم والسبب لاننا مثل ما نعمل هناك من يعمل ايضا0
اتمنى ان نكون واقعيين وننظر للامور نظرة تفأل0
ملاحظة\ رغم ان الجوهر نصراوي الا انه نسي ذلك بعد اعتزاله فهو الآن مدرب محترف اليوم مع المنتخب وغدا ربما يكون مع الزعيم والدليل انه اختار معظم لاعبي المنتخب من الهلال فمصلحة المنتخب اهم من ميول المدرب0

ما ابغى ارد عليك يا د ب ا ب ما اظن فيه كلام بعد كلام الاخوان

المليونير الثاني /


يابعدي انت واللي ردوا جميعا لاتفهموني غلط يالربع

انا كلامي واضح

بالنسبة لمقولة الاجنبي والوطني هذي انا نفيتها بكلامي لما قلت انه حتى لو كان اجنبي فهذا مايمنع انه عنده اخطاء ولازم يعدلها ولا المنتخب مايصلح بهالحاله

ولا اقصد عشانه نصراوي انشالله ان تفكيري اكبر من اني افكر بهالتوافه

ولكن المسالة ومافيها انه المفروض اننا ننتقد ومانفرح بالفوز وقلتها في موضوعي وفي ردودي

يجب ان لانعمي اعيننا عن حالة منتخبنا السيئة والواضحة وضوح الشمس

لابد من الانتقدا والبحث عن الاخطاء من اجل اصلاحها وتعديل الامور ولا ناصر الجوهر على عيني وعلى راسي ويكفي التفاهم والموده اللي بينه وبين اللاعبين وبالعكس يا اخوان شي جميل اننا نروح لمحفل عالمي مثل كاس العالم ومدربنا منا وفينا ... بس بشرط .. انه يكون قادر على اكتشاف عيوبه من خلال هالبطولة ومن اجل تلافيها في المرات القادمة وكل هذا بحثا عن الافضل وما اعتقد انكم بتقولون ان منتخبنا الآن في افضل حالاته !


النمر الكاسر /

وانا ما ابغا ارد عليك مزاعلك وما اظن فيه كلام بعد كلام الاخو الدباب

؟

هلا بالدباااااااااااااااب..

نور الزعيم ..

هع << هذي لك

هع هع .. هذي للسليطي

بداية ودي أرحب فيك .. ومهما اختلفنا بوجهات النظر يبقى ناصر الجوهر له من اسمه نصيب.. فمدرب حقق انجاز( تأهل بلاده الى نهائيات كأس العالم) ( حقق كأس الخليج) ( حقق الوصافة بكأس آسيا) .. أعتقد من الظلم أن لانعطيه حقه..

بغض النظر عن ما إن كان ( مدرب تكتيكي أم لا) .. فالمهم (((( راحة اللاعبين)))) ..

وهالراحة نتائجها ( إنجازات) ..

صدقني أنا أو انت لو ندرب أي فريق مشت معانا .. بس الأهم من هذا وذاك ( العامل النفسي) بغض النظر عن الكلمات الحماسية( شدوا حيلكم) ( هاجموا).. وغيرها..

وبالنيابة عن نفسي وأصالة عن اعضاء ومشرفين الزعيم أقول المطرح مطرحك

هلا بالدباب

معليش طيب ....

انت ماعجبك الجوهر من يوم مسك المنتخب ((( كاس اسيا * تصفيات كأس العالم * كاس الخليج )))

هل معقوله في جميع البطولتا ماقدم المنتخب مستوى يذكر ؟

بطولة الخليج وضع غير ولاتنسى النقص ...

تقول وين التيماوي وووو

اقولك بعد وين النعيمه ووييين محمد عبدالجواد وييين البيشي ؟؟

كل زمان وله رجال التيماوي لاعب من الصعب تكراره وهو ماكينه ماشاء الله في اداءه لكن اداء المحمدي قريب منه واتمنى التوفيق لمنتخبنا

مخاوي البطولات /

هلا بك حبيب البي وهع لعيونك والسليطي ماله الا القهر

كلامك اكثر من رائع عن ناصر الجوهر وانا متفق معك بشكل كبير وصراحة ناصر الجوهر داخلن قلبي

حتى يوم اسمي خطته خطة البطه عقب رقصته فهذا من زود المعزه ( امحق معزة )

لكن برضو ودنا لناصر الجوهر ومنتخبنا بالافضل دائما وانشالله يعيد اشرطة الفديو ويشوف الاخطاء وين ويتلافاها المرات القادمة


وتسلم على الترحيب وما اعدكم الا اهل واخوان والزعيم والاقلاع وجهان لعملة واحده اسمها : عشق الهلال



الغانم /

اخوي الله يشرف مقدارك وتسلم هذا بس من ذوقك يالغالي

وتصدق ذكرتني بموضوع " من امي واخوي ... الى فيدل كاسترو والهلال "

ودي ارفعه الحين واحس انه حتى الآن بينطبق على واقع الهلال وخاصة بعد خروجه المر امام الطائي

اما سؤالك فهو قوي واحس انك حجرتني في زاويه

لكن انا اعلمك انا عندي مبدا في عشقي للهلال وهو :

((( الهلال في السماء وهذا شي طبيعي ... الغريب انه ينزل ! )))

لذلك ماتقرا لي مواضيع الا اذا كان الوضع متدهور

وصارت معي نفس الحالة الحين مع المنتخب


بس ارجع واقول ان موضوعي وان كان شديد اللهجة فليس مطالبة بابعاد الجوهر او هجوم عليه بقدر ماهو نقد بحثا عن تعديل الاخطاء من اجل نجاحات قادمة انشالله وشكرا لك مرة ثانيه


راؤول الهلالي /

معليش طيب لاتدف

كلامك في محله عن الوضع الحساس لبطولات الخليج وعن ان لكل زمن دولة ورجال

ولكن انا لما قلت وين التيماوي وغيره كنت اقصد وين الحماسيه اللي كنا نشوفها في التيماوي وهذي مشكله يعالجها الجهاز الاداري وعلى راسهم سلطان بن فهد ونواف بن فيصل لازم يتداخلون مع اللعيبه اكثر ويحمسونهم ويبثون فيهم من روحهم

ويبقى جزء كبير على ناصر الجوهر انه يحط تشكيلة مثالية ويغير تغييرات مناسبة ويرسم خطة اهم شي انها تكون واضحة للعيبة بحيث يعرفون مراكزهم وينتشرون صح موب يصيرون ضايعين في الملعب مايدرون وش المهام المطلوبة منهم واظننا شفنا في لقطات كثيره اللعيبه متجمعين في خانة وحده

او واحد اخذ الكره ومشا فيها وفيه ثنين لازقين جمبه ... ليه مايفتحون له ؟ ماتدري وش يبون بالضبط .. وحتى هم مايدرون وش يبون