مــــذكـــرات موظف مفصــول + ومعرفتي بمواصل من عام 1413هـ - صفحة رقم 9 - نادي الهلال السعودي - شبكة الزعيم

f*y*d · #1 16/10/2007, 07:24 AM

يللي فوقي كلكم يعني كل للي قبل ردي الى صـ1

بسألكم سؤال
.
.
وش فرقه صالح عن ابوريمان

.
.
ها ردّوا

<<=== ماعندكم لي كتاب ف العبيكان يعلمك كيف تعصب وتهايط

.
.
ابوريمان ساحب عليكم من بداية الصيف الى رمضان

<<== أبد ما كان منهم

يعني ارفقوا على كبرياء ترى وقسم بالله في ناس غيرنا مشغوولة مب مقضية ثلاثة أرباع يومها
ف.المجلس قسم بالله احس اننا كلنا ماعندنا سالفة

.
مواصل عرفت اللمبة الخضراء للي تحت ردّك ..!!
تصدق تردلي روحي

.
تدري ليه

لأني أحس انك فاضي مثلي وان انشغلت انشغلت مرة وحدة

.
.
يللا بانتظار الجزء الرابع بسرعة قبل النوم
<<=== وكلامك للي فوق

.
.
الصراحة حاس اني بنجلد فـخلني أطلع احسن

^ العنود ^ · #2 16/10/2007, 02:49 PM

متابعه ,,

بس خلو الحلقه طويله شوي

abo_bandar · #3 16/10/2007, 07:20 AM

تكفى خلص تراي متحمس

s3odi · #4 16/10/2007, 07:22 AM

ياهوووووووووه عجل علينا قبل النوم ماصارت والله !!!!!!!!!!!!!!!!<<

يمون

والله لو انكم تنتجون بريزون بريك كان قضى

يالله يا مايكل

كبرياء إنسان · #5 16/10/2007, 07:24 AM

الحلقه الرابعه

*
*

بالحلقه هذي تكلم لكم عن معرفتي بأعز الأصدقاء اللي تعرفت عليهم بالمكتب

بعد انتقالنا لمدينة الرياض لاحظني نائب مدير قسم المساعدات الماليه ولفت إنتباهه واسمه ( سلطان ) الله يذكره بالخير ويكثر من امثاله ( الإنسان هذا موظف مجتهد بمعنا الكلمه وكان يحبب الموظفين فيه ويحببنا بالشغل).

كان يشوف طريقة شغلي في قسم الإستفسار وعاجبه شغلي وأشوفها بعيونه

قال لي بصراحه يا ( صالح ) : شغلك طيب وحرام تجلس في قسم الاستفسار ، انا بنقلك إلى قسم ثاني وهو قسم الإسكنر.

( وهذا القسم يقوم بحفظ نسخه في الحاسب الألي من المعاملة كاملة عن طريق جهاز الأسكنر لإي خطاب يعرض على الامير عبدالعزيز بن فهد بدون الرجوع إلى الأرشيف .)

و بعدها نرسلها إلى جهتها المختصه على حسب التوجيه المكتوب في الجهاز.

طبعا قسم الإسكنر تابع لقسم الشؤون الإداريه ( المساعدات الماليه ) وهو مكون من قسمين قسم وارد وقسم ادخال اسكانر وهو ازحف الأقسام في المكتب كلها لزحف الموظفين اللي فيه

المهم بعد مانقلت إلى هذاك القسم قابلت مسؤول قسم الإسكنر وكنا نعايره بالصيني لأن اشباهه سبحان الله صينيه

.

وتعرفت على موظف ثاني اسمه ( فهد )
فهد هذا قسماً بالله بدون مبالغه لو عنده ثروه مثل ثروة الوليد بن طلال كان ثلاث أرباع سكان المملكة مسلفهم

لأنه يحب يساعد الناس وبصراحه مافي احد في نعرفه الا وتسلف منه

ولا كان يقدر يرد احد لأن الخير يمشي في دمه الله يوفقه وين ماراح وهو الحين عاطل

وكنّا نسميه (بمستر فوجي )

(مستر فوجي ) = مصارع ياباني قديم كان حركته يرش ملح على وجه الخصم

لأن اشباهه كأنها يابانيه

( صوره مع التحية لهلالية@ميلانيه )

وصلنا عاد إلى الدلخ الكبير أبا بصير

وهو عبدالله والمعروف عندكم بمواصل من عام 1413هـ أو مواصل من عام الفيل

كنت اناديه بالزول لأن مواصفاته سودانيه بس فل أوبشين ( أبيض )

لأنه عجاز

أول ماشفته كان على بالي سوري أو مصري من قوة البياض اللي هو فيه ما شاء الله

وكان في البداية شكله ما هضمته

أذكره دخل علينا المكتب عام 1422هـ وكان خايف من اللي شافه برا عساكر وتفتيش وحوسه لحد ما للمكتب اللي بيتشغل عليه ( كلنا عانينا من الشئ هذا )

بذكر لكم موقف صار لي معه أول ما تعرفت عليه

كنا بوقتها وعلاقتي فيه لحد الآن مو ميانه في مدينه جده ورايحين لمطعم ( البيك )ولما جينا ندخل المطعم

قلت له: ادخل أنت قبلي

قالي : لا إنت أدخل تفضل

قلت له : لا إنت اللي بتدخل عشانك اكبر مني في العمر

هو جلس يطالع فيني بعين

وقالي : اقول ريح وأستريح لأفرشك هنا

انا لسه صغير بالعمر طيشاني أنت أكبر مني بثلاث سنوات

بوقتها انصدمت نفسياً وأنقهرت

لأني أول كنت احترمه واخليه يجلس قبلي وأمد له فنجال القهوه قبلي واخليه يدخل قبلي وكل شي كان يسويه قبلي

بس بعدها خلاص حرمت اني احترمه لأني انا كنت من مواليد 1397هـ من جد شي يقهر بس سبحان الله الحين كان ولا يزال من اعز اصدقائي

وكان من الموظفين اللي تعرفت عليهم شخص اسمه ( ماجد ) الله يهديه ويوفقه لأنه بصراحه كان متقلب شهر يصير ملتزم ومطوع وشهر يصير زاحف

ما عرفنا له شهر نكون محترمين معه وشهر زاحفين معه

جلست في هذا القسم تقريباً باقي فترة العمل في المكتب وهي اربع سنوات وشهر ، وبخلال السنوات هذي تعرفت على مجموعه طيبه من الموظفين من أزحف خلق الله

ما أقدر أتكلم عنهم بالتفصيل لأني ما راح اوفيهم حقهم.

لكني عشت معهم فترة عملي في المكتب وصاروا بالنسبه لي مثل الإخوان وأكثر.

لأن الأغلبيه يكون جاي من مدينه بعيده وما يلقى إلا زملائه بالمكتب هم اللي راح يفيدونه لو صارت لك أيه مشكله بعيد عن أهله .

علاقتنا مع بعض كبرت بصوره ما أحد يتخيلها إنها تكون بين زملاء عمل والحمد لله إلى الآن العلاقات متواصله بينا.

وإن شاء الله بالحلقه الجايه راح أذكر المقالب اللي كنا نسويها بأيه موظف جديد

.

فكونوا بالموعد

Hictar · #6 16/10/2007, 07:30 AM

يسميني الزول لأني أنا اللي مسميه الزول

تخيلوا شخص ينتظر أيه احد يمر بالسيب علشان يناديه يجيب له أوراق من الطابعه ، كل هذا علشان ما يقوم من الكرسي

فهو إتبع مقوله ( تغد فيه قبل لا يتعشى فيك )

هلالي مدريدي 10 · #7 16/10/2007, 07:34 AM

ننتظر الحلقة الخامسة

abo_bandar · #8 16/10/2007, 07:46 AM

ننطر الحلقة الخامسة

جون تيري26 · #9 16/10/2007, 07:52 AM

الله يعطيكم العافيه يا صالح و عبدالله ...

وبإنتظاركما ..!!!!

القيصر رهيب · #10 16/10/2007, 07:58 AM

مواصل السوداني

Hictar · #11 16/10/2007, 07:58 AM

للتنويه فقط
فيه رسائل جتني على الخاص معارضه للمذكرات ، ومعارضه لذكر إسمي بالموضوع.
الموضوع مو لي ومالي حق إني أمنع أيه شخص يكتب مذكراته ، ويطرحها بالمنتدى.

أنا اللي سويته إني نسقت الموضوع فقط !!!!!!!!!!!!!!!!!!!!!!!!!!!!!!!!!!

وكاتب الموضوع طلب من الأعضاء هل هم بيوافقون على المذكرات أو لا قبل ما ينزلها ، وهو ما نزلها الأ بعد موافقتهم.

أكرر مالي حق إني أمنع أيه شخص إنه يكتب مذكراته !!!!!!!!

صمت الرمــاد · #12 16/10/2007, 08:25 AM

إقتباس

الرسالة الأصلية كتبت بواسطة مواصل من عام 1413هـ


	للتنويه فقط فيه رسائل جتني على الخاص معارضه للمذكرات ، ومعارضه لذكر إسمي بالموضوع. الموضوع مو لي ومالي حق إني أمنع أيه شخص يكتب مذكراته ، ويطرحها بالمنتدى. أنا اللي سويته إني نسقت الموضوع فقط !!!!!!!!!!!!!!!!!!!!!!!!!!!!!!!!!! وكاتب الموضوع طلب من الأعضاء هل هم بيوافقون على المذكرات أو لا قبل ما ينزلها ، وهو ما نزلها الأ بعد موافقتهم. أكرر مالي حق إني أمنع أيه شخص إنه يكتب مذكراته !!!!!!!!

لا أعتقد أنه يوجد شرط من شروط المشاركة بالمجلس يمنع نشر المذكرات الشخصية مادام أنها لاتسيء لأحد ..
وأكاد أجزم أن فيما طرح من تجربة للأخ فيه عظيم الفائدة ..

شكرا صالح ..
شكرا الزول :

عبدالله ..

أنا معكم ع السمع >> FM