الـســلام عليكـم


كلمات عامية ..ومعانيها..


الدلخ :
وهذاا إنسان غبي جداااا.ويرفع الضغط ....وينرفز...
واكثر من يعااني منه المدرسين ....واهله.

المنسم :
ذلك راجع إلى تهريب الهواء من رأسه و السبب
في ذلك هو أن في رأسه فتق لذلك تلقاه دايم يغطس رأسه
في سطل موية عشان يعرف من وين التنسيم .

المهوي :

هو مرحلة متأخرة من التنسيم و المهوي وصل لمرحلة متأخرة جدا
بحيث يفقد أهله الرجاء منه ...
الشخر المخر أو أبو مشخر ! :
من نفس فصيلة المنسم !

السلنتح :

قليل الأدب

جحلط ( بتشديد اللام ) :

وهم مرحلة متقدمة للسلنتح

مزّلب :

يعني بايعها بريال؟؟؟

مسفّح :
يعني طاير في العجّة وهو ما عنده ما عندي جدتي
يعني بالعربي الفصيح من جنب العارضة

الصتيمة :

وهو الشخص اللي ماعنده ماعند جدة جدتي ...!!...
ويصدق أي شيء يقال له

المسبة أو المسبوة :
هو الشخص اللي يكون مروع في صغره لدرجة أنه يصبح شبه فاقد للعقل ...واكيد مروعه اخوه الكبير

الفاهي :

هذا الله يخلف مهما تقول له أو تصارخ عليه تلقاه فاتح فمه و بس
و إذا كلف عمره و تفاعل معك رد عليك و قالك : هه ...( يذكرني بناس واجد)

الحقنة :
هو الشخص الغثيث اللي ما يفكك لين تعطيه اللي يبيه منك
و مهما تسوي له عشان تصرفه عن الموضوع حقه ينشب في حلقك
لين يأخذ منك اللي يبيه , وهذا يفسر قول العرب : أغث من حقنة !!....

العلة :

هذا اللي ما تأخذ أنت منه أي شيء و لا عنده استعداد
انه يسمع منك مهما حاولت وهو كالمرض يعلك لين تنفقع مرارتك منه......

العربجي :
يظن معظم الناس أن العربجي هو الشخص الشديد
حق المشاكل و اللي ما يمشي إلا وهو مشخص ببنت البكار
( أسم لطريقة لبس الشماغ عند العرابجة )
و حاط مفاتيحه في سلسلة و لا بس نعال سجاديه و يسحبها تسحيب
لين جاء يمشي و دايم فاتح صدره و رازه على فوق
و كانك ولد أبوك قله شيء بس .
لكن في الآونه الأخيرة ظهرت إشاعات تقول
بأن العربجي هو اللي يسوق ال....(الله يعزكم)
لكن صرح مصدر موثوق من عائلة العرابجة
بأن هذه إشاعة مغرضة أطلقها عليهم أحد الخكاري...


الكحلي :

يطلق مسمى الكحلي على ذوي البشرة السمراء
و لأن ذوي البشرة البيضاء مساكين ما عندهم لقب احتجوا
عند الأمم المتحدة مطالبين باللون الفضي ....

المرجوج :

هذا ما عمره صلح شيء صح في حياته ما يمديك تفتح فمك
إلا و طار في العجة بدون ما يفهم وش السالفة
و الارتجاج الحاصل له يختلف تماما عن مشكلة المسبة أو المسبوة
حيث يكون الارتجاج هنا نتيجة صدمة و ليس نتيجة روعة .

المطفوق :

من فصيلة المرجوج ...
إلا أن مايميزه هو انه اذا مر من عند كاس أو جيك أو ابريق أو أي شيء
فيه سائل لازم يكبه ( أي يسكبه ) برجله وهو مايدري ،،
ولا تخليه يمر بجنبك وانت معك صينية فيها بيالات لأنه لازم يطقها بيده أو بكتفه ..!!
أيضا لاتخليه يصب قهوة لضيوف لأنه لازم يكب القهوة على ثوب واحد منهم..!!!!!.....

السربوت :

هذا اللي ما يخلي مكان ما يروح له
و قد كان الأولين يطلقون لقب السربوت على من يشرب الدخان
لكن الحين الله يخلف الناس تدخن بيديها و رجليها و لحد يقول لهم شيء.

الملكع :

أما هذا فيعرف حتى السكني (اي الجن )
و مقطع السمكة و ذيلها و مهما تحاول تلف و تدور معه تراه
فاهم و عارف وش تبي بالضبط فلا تتعب نفسك .

زعّيط :

مسوي نفسه يفهم في كل شيء وهو من جنب العارضة.

المصرقع :
هو كل شخص ما يهمه شيء و اللي يطري على باله بيسويه
لأنه ماخذ الدعوة سعة صدر و هبال ...

المفلت :

هو كل شخص ما تقدر أنك تأمنه على شيء
لأنه مهوب تكانة و يتميز بكل أنواع الإهمال و التطنيش....

اللزقه:

هذا الشخص اللي على طول معك وقدامك ووراك وكل شي
وتطلع مع الباب تلقاه تركب في السياره تلقاه يطق القزازه وهاكذا.

الصديع :

اي كلمه في راسه يطلعها ولا يتنباء بأفعاله سواء كانت صح ام خطء .

الجنط : من فصيلت الدلخ.

المريوح:
هذا اللي نفسه شينه .

الزااااااحف..

إنسان آخذها عرض مبسوط ويبسط من حوله سريع البديهه ولايفوته شئ..(وهناك مثل يطلق)
ازحف تنحف00000

والخرس..

من نوع الكمخه والفاهي يقول إيه وهو مايدري وش السالفه..

الطبله..باااااااااارد من كثرة الغباء..

الأرفل..

من نوع المطفوق يعني لاتقرب له ولاتخليه يقرب لشئ وخصوصا الاعمال الدقيقه لأنه ماينفع فيها..

المسلس..

هذا المسكت واللي ماتدري وش وراه تشوفه تقول أتلى الأجاويد وهو وراه بلاوي..

الرجه..

مصرقع مايجي بمكان الا ويرجه بصوته على غير سنع..

المسكت
..هذا اللي مابعده مسكت بتشديد الكاف..

المهفه..

هذا كلمه توديه وكلمه تجيبه..

اللوح..المقرود..

يعاند على غير سنع..

الكرتون.
.تحسه غبي على السليقه لاتكلمت معه تقول من وين جاي هذا..

الشراره..

هذا مايجي بمكان الا والمصايب وراه يتسبب على من حوله بالقرادات..

كل شئ متسلط ضده يعني مقرود حظ

الداج..
داج وش معناها يعني ؟؟ داج بالمال والتفكير يعني الله يخلف..

القفل..
هذا اللي مافيه امل يفهم لو تقعد تشرح له من هنا للسنه الجايه..

الطرمبة
من فصيلة الدلوخ

الفدغ أو الافدغ ......

من يحاول يستخف دمه ويبيك تضحك غصباً عنك
واذا ما ضحكت من بلاهته يضحك هو الين تحس ان الشي اللي سواه من اجد مضحك


اتمنى تعجبكـــــ/ــم

وابي كــل وااحد يقول هو من

اي نووع ؟..هههههه

تدري يوم قريت الموضوع حرفن حرفن لقيتني خليط من الشخصيات <<< كوكتيل مب شخصيه

التنسيم/ 40%

المهوي/ نفس ماسبق

الفاهي/ احيانا توصل لـ80%

المرجوج/ 99ونص%

الملكع/ يقولون والعهده على اللي يقولون انها 100% وانا احس اني على نياتي << من جنبها

القفل/ احيانا تمسك معي لـ 77%

العربجي/ 0% بس احب شخصية بنت البكار

إقتباس الكحلي : يطلق مسمى الكحلي على ذوي البشرة السمراء

يالبا قلوبهم وربي انا احبهم ليش ماتصدقوني



^
^
تراني بنيه اذا مشكك