<><> يوميات الأعضاء في رمضان مع مواصل من عام 1413هـ<><> - صفحة رقم 2 - نادي الهلال السعودي - شبكة الزعيم

f*y*d · #1 17/09/2007, 08:11 PM

هلا وغلا بمواصل

ها شد حيلك اليوم المباراة يا انك بتشوف هالكيوتز يصيحون

<< الله اعلم

عليك يوم نشيط وطبعا لا يخلو من طريق الملك فهد ف الظهر

<< عقدة نفسية

بس خفيف ولطيف احسن من للي قبلك

سلامـ

أبوشلاخ الهلالي · #2 17/09/2007, 09:04 PM

مشكور مواصل ,,..
ما شاء الله عليك يومك كله حلو من اوله الى آخرة
وانا أقول ليه مواصل من عام 1413هـ لان يومك كله فله
مشكور مرة اخرى مواصل وانشاء الله ايامك كلها فله
ودمت عضو نشيط دائماً .

التوقيع : شلاخ كان هنا وحط رجله <<<<<<<<<< ترى مايقلد أحد

كاريزمـا · #3 17/09/2007, 08:48 AM

هلا والله مواصل من عام ..........

كل عام وانت بخير ...

ماشاء الله يوميات ممتعه ندخل بتفاصيلها

إقتباس


	أنا بالعادة أصحى على صحة وإزعاج ، وكل يوم أصحى فيه أتخيل نفسي ، وأقارن نفسي بالأوربيين. الأوربي إذا قام من نومه يصحى على تغريد العصافير ، وإذا فتح الدريشة وفي رواية ( الشباك ) يشاهد الورود والأشجار والخضرة والطبيعة الغناء ، ويكون كل شئ جميل بالنسبة له ، شمس الصباح والمساء والهواء العليل ( الأغنية هذي أذكرها بمسلسل الكارتون مدينة النخيل ) ، أما أنا إذا صحيت وفتحت الشباك أشوف عمال مشهبين وطاقتهم الشمس يحفرون قدام بيتنا وسموم تلفحني لفح.

يؤ مواصل انا أصحى وقدام دريشتي حديقه

صدق

أنها كلها شجرتين ونخله وعمود كهرب وراها مسجد

بس تظل حديقه

رغماً

أنها صفراء من أهمال البلديه

مدينة النخيل

كنت أتابعها ماأدري بالضبط اي مرحله لي وكان عندي

اختبارات.. يازينها (( منار وتالا فستق وراما أصدقاء ...... ودائماً يحلو اللقاء .... في

مدينة النخيل ...كل شيء جميل ..... الشروق والغروب والهواء العليل .....شمس

الصباح والمساء ..) تراني كنت من أشد المتابعين للمغامره لو يعيدونها باليوم

مية مره أهز راسي عندها ....

إقتباس


	أنا صحيت الساعه 9 الصباح وما نمت طبعا إلا الساعة 7 يعني ساعتين بس وكنت منقهر كنت أحلم بأختي الكبيرة ، تقص لي قصتها مع جني <---- عليك أحلام

عليك أحلام

عسى ماقلت لها الحلم

إقتباس


	حاولت أنام وأكمل الجزء الثاني من الحلم ، بس للأسف ما ضبط شبك الإتصال معي وما قدرت أنام.

شكل أتصالك أول نت >> كلاً على همه سرى ..

الله من زين الاتصال

لا القهر اذا حلمت حلم

زين وأنقطع ماندري وش نهايته ودك ترجع عشان تكمله .... تصدق مره نمت وحلمت

وقمت ورجعت نمت وكملت الحلم >>>> وش عليه تضحك انا ماأفقش بس أكذب

إقتباس


	كنت مركد المنبه على الساعه 11 الظهر علشان عندي إختبار على الكمبيوتر على وظيفة ثانيةعلى مرتبة أحسن من الوظيفة اللي إنقبلت فيها لعل وعسى.

الله يوفقك أن شاء الله ويعطيك خيرها ...

معروف وأنا أختك الوظايف تجي مره وحده أو ماتجيك ..

إقتباس


	رجعت لمدرسة أخواتي وإنطقيت لحد ما طلعوا الساعة 1:50 دقيقة ، أحلى شئ بالموضوع إنهم يدرسون بمجمع واحد ( إبتدائي - متوسط - ثانوي ) وعلى البيت وصلت الساعة 2 الظهر. ( تعبان - قرفان- جوعان............الخ ) وكل الكلمات اللي تنتهي بحروف الألف والنون توصف حالتي.

طيب الفنان بشير شنان

إقتباس


	شوي إلا ويدخل علي أخوي اللي أصغر مني عمره ( 26 ) سنه ، الإنسان هذا كل ما شافني بغرفتي يقولي ( هاه تبيني أدعس على وجهك ) تعريف كلمة أدعس على وجهك لغتة : وضع الرجل على الخد. بالإصطلاح اللي بيني وبين أخوي : لعب كورة قدم بالبلي ستيشن ويحاول إنه يهزمني. اللي رافع ضغطي ما في راسه شئ ، وخويكم نشيط بالبلي ستيشن.

يالهوي هاذا أخوك الصغير يقول لأخوه الكبير

عاد بالبلستيشن حدي كرراش السيارات يازينه لا وامشي واصبخ أو أني عاكسه الطريق

إقتباس


	قلت لأخوي شغل ، وكالعادة دعست على وجهه ، وقام يتعذر ( إنطرد مني واحد ، أهدافك فاشله مثلك ، أنت تكسر ......... وخذ لك أعذار ).

عاتي عاتي عاتي انا دايم هاذي أعذاري أذا انهزمت

لكن عذر البليد مسح الصبوره >> مدري يصلح

س\ هل هاذا وكرك اليومي ؟؟؟

والله مكانك تكتوك أنا أحب انلفز بالزوايا >> ((انلفز))>> افلقني اذا فهمتها

والخدديه والتكه أحاول أقز جهازك عجزت ...

.

إقتباس


	وهو إستمرار للوضع اللي أعانيه من سنه ، أكثر وقت أنامه 4 ساعات باليوم إلا ناداً ما أنام 8 ساعات .

يؤيؤ النوم الطبيعي 8 ساعات

إقتباس


	وهذي هي النهاية ليومي .

يوم جداً رائع الله يعطيك العافيه وسعت صدري على ذا الصبح

فاضيه ومروقه وش أزين

برايفت لمواصل ..

(( وصحوني أخواتي الصغار علشان أوديهم للمدرسه ))

الى الآن مااقتنعت بالجمله ياأخوي مو راكبه

وقبل صححتها بس ماسمعت

كلام المدققه اللغويه

))

آسفه للإزعاج.

Hictar · #4 17/09/2007, 09:49 AM

إقتباس

الرسالة الأصلية كتبت بواسطة ريري هكتور


	والله مكانك تكتوك أنا أحب انلفز بالزوايا >> ((انلفز))>> افلقني اذا فهمتها

أما ما أدري وش معناه أنلفز

هي تراني سعودي

أهل نجد يقولونها كلهم

الكلمة اللي ما يعرفونها أهل نجد وخاصه بالقصمان كلمه ( زوميه )

، يعني شيليه

لا تخافين لهجة القصيم كلها عندي

<--- حياته كلها مع القصمان

dal3_uae · #5 17/09/2007, 09:42 AM

ما شاء الله تبارك الله وايد نظيف

امزح ...

مكان الارسال اليومي ... جي طايح في الاستراحه انته ؟؟؟

يوميات حلوة

كاريزمـا · #6 17/09/2007, 10:10 AM

88888888888888888888888888888888888888888888

ماشاء الله عرفتها

أنلفز..

كلمة (( زوميه بالعكس نستعملها واجد ذا الكلمه أذا كانت تقصد شيليه مثل :

## زومي الطفل لأنه نايم ..>>>> شيلي الطفل لأنه نايم

لكن ماشاء الله أستمتعنا بيومك كان ظريف وخفيف ..

الله يعطيك العافيه مواصل ..

Hilali88 · #7 17/09/2007, 10:34 AM

أدعس على وجهك يعني تعال نلعب بلايستيشن

يومياتك حلوة يا مواصل وأسلوب جميل

وترا إللي ما ياخذ فترة نوم كافية يتأثر مخه

يعطيك العافية

بنت عز ماتنهز · #8 17/09/2007, 11:33 AM

هلا والله مواصل

يومك شااااق بالمره الله يعينك

الله يصلحك ويخليلك اموك وابوك وخواتك والحفريات اللي عند بيتكم

الله يوفقك ان شاء الله ويزقك بالوظيفه السنعه

<<<<<<<< احااول ادور عليك خطأ املائي مالقيت

abo_nasser · #9 17/09/2007, 11:47 AM

الذين يشاهدون محتوى الموضوع الآن : 2 ( الأعضاء 2 والزوار 0)
‏abo_nasser, ‏مواصل من عام 1413هـ

صباح الظهر مواصل

...SoMe OnE... · #10 17/09/2007, 12:10 PM

,,,
,,
,

مواصل

يوميات مليئه بـ المشقات ..

استمتعت بـ تواجدي هنا وقرائتي لـ يومياتكـ ..
كل الاماني لكـَ بـ دوام التوفيق ,,

****

كن بخير
...SoMe OnE...

جرح يشكي · #11 17/09/2007, 12:49 PM

عبدالله والله يا عليك يوم

بس على انه شين الا انه افضل من يومي بـ 1000 مره

هذا انا بـ انطلق في سماء الرياض والله يعينني على زحمة مبنى 4 -- 5

لي عوده ،، احس ان عندي كلام كثييييير

leo messi · #12 17/09/2007, 01:10 PM

هلا والله مواصل

يوميات شاقه مع المطبات اللي كلتها

أسألني عنها هالمطبات بغيت اطب بقصر بالعليا بسبة هالمطبات

حشا مرتفعات مهيب مطبات وخصوصا اذا كنت مسرع

وبعدين شكلك الى الحين مسنتر بالاستراحه يالدااج عند البنقالي

ثانكس عبوطي

.

*مجنونة الهلال* · #13 17/09/2007, 01:23 PM

مبارك عليكم الشهر جميع ..

يومياتك فله ترى توسع الصدر تحس انك عايش بالدنيا صدق ان نومك شووي بس اسم انك تطلع و تدخل
أزين شيء مكانك بالاستراحه موقع استراتييجي جدا ً جهازك توشيبا و الا يخيل لي

<<< وش عليك انتي

الله يخليك لـ اهلك ماتقصر معهم بالمشاوير اسم الله عليك ..

و خف على اخوك خليه يدعس على وجهك وش بيضرك

و الله يوفقك و يسهل لك الوظيفه

..

يعطيك ربي العافيه على هاليوميات الممتعه ..

بـ انتظار ضيفكمـ القادم

..

Hictar · #14 17/09/2007, 01:28 PM

كل الفن هلالي
أنت قمة بالفهاوة على سؤالك

أنا أقولك بالموضوع ، وأنا طالع من إختباري الساعة 1 الظهر وراجع للبيت

وأكيد المدرسة جنب البيت

كل الفن هلالي · #15 17/09/2007, 11:24 PM

إقتباس

الرسالة الأصلية كتبت بواسطة مواصل من عام 1413هـ


	كل الفن هلالي أنت قمة بالفهاوة على سؤالك أنا أقولك بالموضوع ، وأنا طالع من إختباري الساعة 1 الظهر وراجع للبيت وأكيد المدرسة جنب البيت

هاه

يعني انت لك وكر شمال الرياض تقطن فيه