الغبن الوردي والجبن البلدي !! - نادي الهلال السعودي - شبكة الزعيم

الـمـشـاغـب · #1 21/08/2007, 11:58 AM

وش جابك هنا؟

ما صدقنا ارتحنا منك يومين

حان الوداع وما أظن لي بكم رجعة

---------------

أثرني تسذوب؟ قلت ما لي بكم رجعة ورجعت..!!

المهم لا يكثر أنت وياه ..!!

أخبارك بعد قلبي ريكي؟ والله فقدتك فقدة واسأل ولد مقبل

وش جبت لي هدية من تشيكيا؟

يا أخي ما لك داعي .. الفلبيني اللي بـ د.كيف يقول : فين هادا نفر اللي خلّص موكا بارد كلووه؟

ريكي .. الحمد لله على السلامة .. سلامة الأسفار ولا تعبت يالغالي ..!!

كنت بأدق عليك أول ما دريت انك وصلت إلى أرض الوطن سالم غانم .. بس عاد اعذرني .. الوالد صار يتشدد معي

ويراقب مكالماتي وأكيد ما أبيه يعرف اني أكلم شايب

<<<<<< بالله انطم.. والله لو أنك بنت عاد أنت وهالوجه

بالنسبة للموضوع :

الله يعين بس من هالوزارات اللي لاعبة بصحتنا .. وزارة الصحة ووزارة التجارة ... يكذبون علينا عيني عينك..!!

أهم ما عندهم سمعتهم .. وسلامة المواطن آخر اهتماماتهم..!!

الغبنة أن الدول الثانية وحتى اللي أقل مننا في الامكانيات .. لمجرد اشتباه في حالة مرضية .. يعلن عنها مباشرة..!!

أما عندنا .. الناس تموت من هالأمراض والبلاوي اللي تجي من الخارج .. "والوضع سليم سِـيـدي"..!!

بالنسبة للقصة الطريفة المتميزة بخليط الفصحى واللهجة المحلية:

فأقول أنك ذكرتني بسالفة أيام الثانوي ..!!

كان عندي واحد مثل حمد بالضبط .. حظي الشين قعدني جنبه بالفصل

المهم كان يبدأ بطراطيع .. ثم تطور وصار يعطي صواريخ .. لحد ما اخترع القنبلة النووية اللي فجرت ظهر البعير

قال أنه مرة كان هو وولد خالته يلعبون بلاي ستيشن درايفر 2 .. وفي هذه الأثناء اتصلوا أهلهم يبونهم يجيبون خبز..

قال أن سيارة ولد خالته كابريس نفس اللي بالشريط .. ونسى نفسه وهو يسوق وحسب نفسه يلعب درايفر .. وقام ينطل

ويقطع الاشارات وشافتهم دورية وقامت تلحقهم .. ومطاردات ..!!

وهو يصيح على ولد خالته يبيه يصحى من أحلام اليقظة

وبالأخير قام صفق ولد خالته كف لين انتبه أنه يسوق صدق

أنا المسكين من كثر ما كنت اكذبه ويحلف .. صرت أسوي نفسي أصدقه عشان ما يقعد يراهنني ويحلف بالله كذب

الشي اللي يضحك أن ولد عمي كان يلومني اني معطيه وجه .. ومو مقتنع بعذري أن الولد يسليني ويقضي الوقت بسوالفه

المهم في ثاني ثانوي .. ربي حط ولد عمي معي بالفصل .. وكان قريب من هالولد اللي يشبه حمد .. وكانوا لما يسولفون .. ولد

عمي يكذبه بقووة في وجهه أول الأيام ..!! لكن بعد فترة صرت أشوف ولد عمي مندمج مع الولد بالسواليف .. ويقول : لا والله من جدك؟

يا حليل الولد ويا حليل ولد عمي

<--- أحس ردي أطول من الموضوع

تكفى يا ريكي لا تضحك على ردي الطويل مثل هذاك اللي أنت خابر

ترى من زمان ما سولفت معك

ا. هــ