مسائكم اسيا مسائكم بطولات مسائكم تفائل (لا تصدقون استهبل متعود اكتب للجمهور )

لا تذكرني بالبطولة ...

صبحكم الله بالخير اخواني اخواتي مرتادي المجلس العام.

تونا مابعد جاء الصبح

تلقيت دعوه طيبه وكريمه من الاخ ابو طلال وما كنت بوافق ابتغلى بس حلف علي طلو وطلال يامر امر.

ابو طلال .صدق وش صار باستقبال لاعبين المنتخب :p قديمة

حقيقة مليت من منتدى اسيا وخلاص خلصت البطوله رحت قلت اشوف خوينا اللاعب باسكال طلع اللاعب مجدد مع ناديه ابوك يالهم قلت اروح للمجلس العام اطلع ما في خاطري شوي.

منتدى آسيا سكروه الحمدلله وافتكينا منه ,أما باسكال ياحليله هو واسمه ..طلعت مرته حامل والقرار بيدها ..يعني طلع سكانة مرته

طبعا موضوعي مو ذاك الموضوع هو نقاش عام اتمنى يفيد الجميع واتمنى اني ما اتيميلح زياده لجل ما انكرش من اول موضوع عندكم .

بالعكس نقاش راائع وياليت دايم نتناقش بقضايانا بنفس أسلوبك الراائع ..

الموضوع طرا على بالي بمناسبة الصيف وبعض اخوانا الخريجين الي يدور وظيفه والي يدور كليه والي يدور جامعه وهذا شيء طيب.

الله يرزقنا بالوظيفة بس مو الحين ..بعد مااستقر بحياتي الجديدة ..وحدة تتشرط ..

بس انا مستغرب شيء ليه الكل يبي وظيفه حكوميه وتحديدا عسكريه ليه الواحد يدور على الربح الوقتي والدخل الشهري.

بالنسبة للشباب ..أنا أجاوبك لأنهم يبون الراحة ..بس الحمدلله في تغير بالشباب الحين ..صحيح مو تغير كبير بس في تحسن...

ما ابي اتفلسف عليكم بس اامانة القطاع الخاص ممتاز يفتح لك مجالات رائعه جدا وانا اتكلم من واقع خبره عمل 6 سنين في القطاع الخاص بين الرياض والشرقيه وجده والكويت حتى .

ماشاءالله أثرك شايب 6 سنين عمل هههههههه أمزح ...:p

صدقوني يا أخواني القطاع الخاص هو المستقبل الحقيقي للفرد وخاصه في هذا الزمن .

وين اللي يسمع .. مشكلة بعض الشباب الكسل .مايبي الشغل اللي من وراه تعب ..مع إني أشوف إن العمل هو تحقيق لذاتك ولشخصيتك ..

جدا مستغرب من امر شبابنا واحس شيبانا اثروا عليهم بالله رتبة عريف في الجيش ولا وظيفه براتب محترم في قطاع خاص ومستقبل مؤمن لك.

مو كل الشباب الصرااحة بعضهم تجبرهم الظروف ولا تنسى الواسطات اللي قاعدة تفسد كل شئ ببلدنا الغالي ..أنا أعرف وحدة متخرجة من كلية اقتصاد وتقديرها مقبول ..بس أبوها يعرف ناس لهم مركز كبير بالإدارة التربوية .فعلى طول حصلت وظيفة لها بأحد المدارس ..تخيلوا وحدة تقديرها مقبول ..تربي الأجيال القادمة ..وش استفدنا من تعليمنا أجل ؟؟

أخواني انا ما اقول لكم الوظائف العسكريه فيها عيب بس الواحد يجلس ينام عند ابوه ويقول اذا فيه وظيفه عسكريه ولا حكوميه ولا بنام .

في شباب كذا ..بس والله أعرف شخص ظروفه ماسمحتله يكمل دراسته ..ودور وظيفة بكل مكان واشتغل محاسب وبمطعم, بس تدري سعودي يطفشونه على طول . .

ياشباب ادري الواحد وده انه يكون ظابط ومن هالكلام بس وربي ما هي قمة الطموح هالنجمه وحنا عارفين اليوم اغلب الظباط واسطه نفسي اجلس مع احد يقول طموحي اكون مدير شركه ولا كبير محاسبين الشركه الفلانيه ولا مسؤول تسويق او مدير علاقات .

حالياً...صعبة إن يكون طموح شبابنا ..مسؤول تسويق ..

ادري يمكن الواحد يقول وش هالفلسفه آخر الليل ولكن وربي موضوع من زمان ودي اقوله لكم ومالقيت احسن من اخواني الزعماء اسدحه عندهم.

بالعكس كلام جميل وياليت الشباب يقدرون حجم المسؤولية اللي عليهم ..مسؤولية كل شاب وشابة هي بناء وطن ودولة قوية بشبابها وبناتها واقتصادها ..يعني بعض الشباب اللي انحرفوا وراح يجاهدون ..وباعتقادهم بطريقتهم هذي إنهم يخدمون الإسلام بالعكس هم قاعدين يضرون الإسلام وهم قاعدين يزيدون دولنا ضعف على ضعف .الكل يدري إن مجتمعاتنا الحين هي عايشة تحت رحمة الدول الأجنبية ..سواء اقتصاد أو غيره ..

فالمفروض من الشباب والبنات إنهم يعملون لبناء دولة قوية ..

ياجماعة اغزوا القطاع الخاص فالمستقبل فيه وربي اللهم اني البغت اللهم فاشهد

ابشر ...

فلسفة آخر الليل

*كان عندنا غدا قبل اسبوع المهم زوج عمتي يبارك لواحد سالته وش تبارك له قال ولده توظف قلت وين قال عريف في الجيش قلت كم نسبته قال 94

قلت ليه ماسجل في الطب قال ابوه رفض قلت وش الحجه قال ما يبي يشتغل مع نسوان قلت طيب ليه ما سجل هندسه قال يقول المهندس كنه عامل بنقالي .

مشكلتنا ..بعض الأفكار العقيمة ...

*ابو طلال ياليت هالرجال ابوك لجل يفصلك من المستشفى لا جد متى تختفي هالعقول او تتطور الله يهديهم انشاء الله.

اجل ابو طلال دكتور وش تخصصه ..:p

*اتمنى من كل شاب عاطل مهما كانت النتايج لا يروح مكان الا وهو متاكد انه بيبدع فيه ولا تحرق مواهبك وطموحك عشان فكر رجعي وخل نظرك دائم فوق وصدقني بتوصل للي تبي وصدقني ابوك مهما كان معترض مصيره يوم يرضا لانه با اختصار ابوك.

*متى اسمع ان الواسطه انشالت من الدوائر الحكوميه والجامعات فوالله الي يحصل لاولادنا وبناتنا حرام حرام حرام.

من سابع المستحيلات ..تدري ليش لأننا مجتمع مترابط ...فمثلاً لو خالك يشتغل بقطاع حكومي وانت توك متخرج ...وش بيزين أبوك أول ماتتخرج ..على طول بيكلم خالك ..ويقول تكفى ترى تكفى تهز رجاجيل ..دبر لولدي وظيفة ...وخالك بينحرج وأكيد بيوظفك وإذا ماوظفك فاللع يعين على الكلام والهرج والقطيعة اللي بتجيه ..

*متى يأتي ذلك اليوم الذي اسمع بالمخترع السعودي الفلاني ومصنع السيارات السعودي والكيميائي السعودي (تخيل يبو طلال انك راعي مصنع تيوتا ولا نيسان والله فله كان بتوظف عندك ) ومتى ارى ذلك اليوم الذي يدعم فيه رجال اعمال هذا البلد المعطاء شباب الوطن بدل من ان ندعم المقيمين والاجانب.

ياكثرهم اللي اخترعوا بس ماأحد درى عنهم ...لأن مجتمعنا مايهتم بالأشياء هاذي ..وبالنسبة لرجال الأعمال أتمنى يبسطون يدينهم شوي وينفعون بلدهم بدال ماهم قاعدين ينهبون جيوب المواطنين نهب ..

*قبل الختام اتمنى اكون اطليت عليكم بأول موضوع في هالمجلس العامر يكون فيه الفائده وزي ما قلت هو موضوع للنقاش وشاكر لابو طلال دعوته الكريمه.

الله يعطيك العافية على الموضوع الراائع ...

خــــــاتمه خاصه جدا

سألني بكل غباء تحبها قلت وربي اعشقها

رجع وسألني من جدك تحبها قلت وربي اموت في ترابها

قال طيب وش حببك فيها قلت ياليل ما اطولك وشتبي انت؟؟

قال ابي اعرف وش الي محببك فيها بس ياليت تجاوبني؟؟

قلت وش هالسؤال وربي انت غبي؟؟؟ قال صح غبي بس اشوفك تحبها بجنون مشفت احد يحب زيك؟؟؟

قلت هي الصديقه وهي الاخت وهي الحبيبه وهي مصدر سعادتي هي سبب وجودي وبقائي بهالدنيا بعد الله هي من يخليني اضحك ومافيه غيرها يبكيني لما تضحك تضحك لي الدنيا كلها ولما تزعل اكره اني انولدت بهالدنيا.....

أقولك ليه أحبها باختصار وتريح عمرك وتريحني...

لأنهـــــــا أمـــــــــــــــــــــــــــــــــــــــــي فديتها وفديت التراب الي تمشي عليه .

عرفت ليه احبها ولا اوضح اكثر ....

الله يخلي أمهاتنا لنا ...وش كثر تعبن وشقن حتى يكبرونا ..وحتى آباءنا ,عسى ربي يقدرنا على بر الوالدين ..

وعلى دروب الزعامة والانتصارات ملتقانا.

بإذن الله يامبدع ...