رحلتي إلى الملاهي !! - نادي الهلال السعودي - شبكة الزعيم

فرانشيسكا · #1 30/06/2007, 06:17 AM

السلام عليكم ورحمة الله وبركاته

أخباركم وعلومكم ؟؟

أنا وحدة ماأعرف أكتب مقدمات فبكتب لكم السالفة على طول

الله يسلمكم العام الماضي كانت عطلتي بايخة لأن مارحت ولاجيت بسبة التسجيل
بالجامعة .. وأنا متخرجة من الثانوية ومبسوطة على بالي الجامعة نظام راقي لكن
انصدمت السنة هذي ..

المهم .. بعد ماخلصت تسجيل قلت لأمي : أمي أبي أروح الرياض ؟؟
قالت : وش تسوين بالرياض ؟؟
قلت : بنتك بتدخل الجامعة قريبا .. مافي مريول .. بروح أشتري لي ملابس .
قالت : الخبر أقرب .. قلت : لا .. تونا جايين من الخبر مافي شي عدل .. بعدين
بضاعة الرياض أحلى .. وإذا تقدرين جدة ولادبي بعد أحسن ..

قالت : لايكثر .. ورحنا الرياض .
المهم بعد مادرت الأسواق وشريت ملابس للجامعة ..قلت لأمي : يلا نرجع الحسى .
إلا إختي الصغيرة وأخوي :

لا والله مانرجع .. هي تدور السوق وتشتري
اللي تبي .. نبي نروح الملاهي .. وأنا أقول لا مافي ,,وهم : إلا بنروح .

المهم .. أمي قالت : هم لهم حق بعد .. ونروح الحكير لاند .
أخوي بأول متوسط بس انه طويل ماشاالله .. قال له الحارس اللي عند الباب ماتدخل ..
ولادخل المسكين ..
دخلت أنا وأختي .. ركبت معها لعبة خربوطة ترقى وتنزل ..ونزلت .. ورحت ركبت لعبة
لحالي بدون إختي لأنها ماتناسب عمرها .. اللي جنبي قالت لي : وش اسمك ؟؟
قلت : فاطمة خخخخ وأنا اسمي مو فاطمة أصلا .

قالت: أنتي من الرياض ؟؟ قلت : لا ..من الحسى .. قالت : شيعية ؟؟ قلت : لا ..
قالت وش قبيلتك ؟؟ قلت : ليه تسألين ؟؟ قالت: بس .. قلت : أنا من قبيلة (........)
بس مو حلو هالسؤال ؟؟ (أنا أكره ماعلي اللي يتفاخرون بالقبايل

)
قالت : أنا اسمي (.....) ماأذكر اسمها وقبيلتي(....) كم عمرك؟؟
قلت لها :بعد إسبوع بدخل ال18 .. قالت : أنا عمري 20 .. قلت :طيب
يوم نزلنا من اللعبة .. جيت أبي أتهرب منها .. إلا مسكتني وقالت : بعرفك على أمي
وخواتي وحريم اخواني ..
أنا وجهي كذا

.. عرفتني ع العايلة الكريمة ..وقامت تمشي معي .. تقول : وريني
أمك وخواتك .. سلمت على أمي وإختي الصغيرة بثالث ابتدائي ..
فجأة .. جاء إخوها . قال: إنتي قبيلتك (.....)؟؟
أنا بغيت أعطيه كف ...رجال وش طوله وش عرضه وش مدخله ؟؟
قلت لإخته : وشلون دخلوا إخوك ؟
قالت : خليته يدخل بعباتي..
قال لي : وش اسمك ؟؟ أنا اسمي سلطان ..
أنا قلت : إنت كبير ؟؟ قال : لا أنا بثالث متوسط

قال :وش اسمك ؟؟ قالت إخته : اسمها فاطمة .. إلا إختي الصغيرة تطالعني وتقول:
يالنصابة

قلت لها : انطمي بس .
المهم ..أنا واختي نبي نتخلص منهم مافيه فايدة .. المهم ضيعتهم بالموت ..إلا بعد 5
دقايق شقت أحد من بعيد يصرخ (فااااااااطمة) وألف ظهري .. إلا الأخ سلطان وراي
خخخخخخخ .. يقول : وينك .؟؟؟ خواتي يدورونك ..
قلت : خلاص احنا بنمشي .. >> أكذب
قال: لا .. أصلا خلينا أمك تجلس مع أهلي

أنا ابتلشت .. سويت روحي ماسمعت وأمشي .. إلا الاخ يمسك يدي يقول إلا تجين

وخرت يده وجاو خواته .. ويقولون :فاطمة وينك؟؟
جلست جنبي بالطاولة .. وقالت : أخوي مناحي ماخلانا نروح العرس أمس ؟؟
أنا مارديت عليها .. قالت : أقول لك ماخلانا نروح العرس أمس ؟؟
قلت : ليه ؟؟
قالت : قال ماتطلعون وعيونكم مكحلة بالبرقع .. شيلوا اللي عيونكم ..
بعدين بكينا عند أمي وغطينا عيوننا وودانا العرس ..

أنا : لاتعليق .
وقامت تمدح لي بمناحي ..وأناأقول لها : طيب خلاص .
قالت : كم نسبتك؟؟ قلت : الحمدالله زينة .. قالت : زينة يعني كم ؟؟ قلت الحمدالله

قالت : اي قولي النسبة زفت وماتبين تقولين ؟؟
أنا : لاتعليق .. أختي الصغيرة : ههههههه تراها دفرة ..
قلت : تحب تمزح

بعد جهد جهيد .. قلت لها : لو سمحتي خلاص ماأقدر أجلس معكم بروح لبنات عماتي ..
قالت والله ؟؟ قلت : اي >> أكذب

البنت تراقبني .. شفت بنتين يمشون مع بعض رحت أمشي جنبهم كأني أعرفهم
هم استغربوا .. وهذيك صدقت ..
إلا البنت اللي مشيت جنبها تقول : أنا مشبهة عليك ؟؟ إنتي فلانة الفلاني ؟؟
قلت لها : لا والله .. بس أعرفها هم نسايبنا .. قالت : اها . أجل انتي من الحسى ؟؟
قلت : وش دراك .. قالت : كل نسايبهم بالحسى .. قلت : وانتي من وين ؟ قالت
:حساوية الأصل بس ساكنة بالظهران .. قلت لها : عايلتك الفلاني ؟؟ قالت : وش دراك؟؟
قلت : أشباهكم ماتضيع ..

المهم انسجمت مع البنت هذي وأنقذوني الصراحة .. وقالت لي إن هي بأول جامعة
وقالت لي عن الجامعة ونصحتني .. وغنيت لها بالإيطالي ..

وقالت لي : عساك هلالية ؟؟ قلت : أكيد ..

وهذي السالفة ومافيها .. والله يعينكم لاتطيحون في ناس نشبة مثلي ..
بروح الجامعة ألحين >> ماخذة صيفي

.. إدعوا لي .
أبي أرجع ألقى الردود أد كده

..

تشاااااااااااااو .