رمضان من تالي .... ( 2 )
ـــــــــــــــــــــــــــــــــــــــــــــــــــ بسم الله الرحمن الرحيم ـــــــــــــــــــــــــــــــــــــــــــ
السلام عليكم ورحمة الله وبركاته .....
بداية أحب أن أبارك للجميع حلول شهر مضان أبتداء برئيس مجلس اداة الموقع والاخوه الاحبه الاصدقاء مديري ومشرفي هذا الموقع وجميع اعضاء هذا الموقع الخالد في جبين المواقع السعوديه والى كل هلالي في هذه المعموره ...
وهذا الجزء الثاني إلحاق للجزء الاول ( رمضان منذ مبطي ) ....
من لم يقرأ الجزء الاول
فليضغط هنا
*********************************************************************
أول شيء أحب أقولكم أمر مهم أن حبي للتوت والسنبوسه أستمر معي الى هذا اليوم لاوصرت أحب الشوربه بعد لأني وانا صغير كنت أعتقد أن الشوربه يحطونها على السفره ديكور وموضه بس , لكن أكتشفت أن لها فوائد عظيمه ومنها .. اذا رحت لناس وماجازلك اكلهم تأكد أن السنبوسه والتوت مع صحن الشوربه بيشبعونك وهذولي طعمهم مايختلف من بيت لبيت الا اذا كان اللي مصلحهم عزوبي وجيت تزعجه وتفطر عنده
وطبعا مثل ماقلتلكم قبل ان فيه اشياء تتغير في الحياة وانا رمضان اختلف عندي بنسبة 90 % تركنا الحارة القديمه , البزران اللي كانوا يطامرون ورا الكوره في الشارع اغلبهم عندهم هالحين عيال , واشياء كثيره تغيرت ...
وهالحين صرنا نروح نشتري مقاضي رمضان في نص شعبان ومانشتري الا اللي له حاجه ( نصاااااااب )
وفي بداية رمضان واول يوم لايمكن اداوم لو طارو وقعدو مافيه امل اداوم فاضي انا اداوم وانا صايم لاواول يوم بعد ....
بس اللي الاحظه من خبرتي أنه في أول رمضان الواحد يصحى بدري قبل صلاة الظهر ويجيب اذا كان محتاجين مقاضي عقب صلاة العصر لكن في اخر رمضان مافيه امل يصحى الواحد الا قبل اذان المغرب بخمس دقايق او ( والمؤذن ماسك اذنه ) ..
وطبعا قبل رمضان المسجد صفين وفي رمضان اربع صفوف
طيب الصفين الاخيرات من وين طلعوا هذولي
:confuse:
واذا اذن المغرب صرنا نفطر تمره وناكلها وحنا مستحين وفنجال قهوه نشربه غصب وثلاث اربع كاسات توت على الماشي
عكس من اول كلش نلهمه مرة وحده ونمشي ...
و هالحين كل واحد في بيته يفطر مع عياله نفرين او ثلاثه بالكثير على السفره وياكلون وهم يتهاوشون على اي قناة يحطون لكن اللي ينتصر دايم هو طاش ماطاش
أذكر موقف جميل جدا ومؤلم بالنسبه لي اذا تذكرت معاناته لكن تبقى الذكريات حلوه دايم ...
مره من المرات كنت صاحي من النوم قبل اذان المغرب بعشر دقايق ( يعني في اخر رمضان هالكلام ) وجاني الوالد الله يرحمه ويقول رح خذ قدر الشوربه وده للمسجد لان الفطور للصائمين علينا اليوم وانا ابسبقك انتظر راعي المطعم يجيب الاكل ولاتنسى تخليهم يفرغون الشوربه في قدر ثاني لان هالقدر كبير وماراح تقدر تشيله انا من العجله والطفاقه ولاني ماسمعت كلام ابيي شلت القدر على حاله ورحت للمسجد بسرعه لاني ابي ارجع للبيت وافطر وفي نص الطريق انكبت الشوره على رجلي وهي كانت شبه تغلي طبعا هذاك كان اخر يوم في رمضان وماقولكم وشلون كانت حالتي بين المستشفيات وحروق كبيره تروع
وطبعا بعد صلاة التراويح الناس تنتشر وهم اقسام فيه منهم اللي يسنتر قدام التلفزيون ويتقلب بين هالكازينوهات (اقصد القنوات ) والبرامج الرمضانيه ...
وفيه ناس يفضلون يطلعون للمقاهي الين الساعه ثلاث الفجر لعب بلوت ومعسل وقنوات ماتطلع في البيت
وفيه ناس يروحون يدورون كوره قدم وطائره وضحك وسوالف .....
وبعد الفجر تختلف الناس منهم اللي ينام ومنهم اللي يجلس مقابل التلفزيون او يلعب بلوت الين ينام من التعب ( مسكين تعبان ) ....
وطبعا فيه شريك جديد تابع لادوات الترفيه هاليومين وهو حبيب الكل البلاي ستيشن وهذا صار اشد فتكا من البلوت والمجلس اللي فيه بلاي ستيشن ولعيبه عليهم القيمه هذا دايم عامر ..
وفيه قسم نسيناهم هذولي اللي برمضان او بغيره تلقاهم مسنترين في الاسواق وحاطين سماعة الجوال المفصول على اذنهم ويسولفون مع ذاك اللي يقول عدم تسديدك للفاتوره .......
هالقسم هذا الحقيقه يتعبون في رمضان لان الشغل والخير واجد بس ( ودي اعرف متى يستحون على وجيههم )
وفيه شيء مؤلم ومحزن ومخجل شفته برمضان وماكنت اتوقع انه موجود وانا طفل برء حتى شفته بعيوني ....
فيه ناس يفطرون بعز النهار في رمضان وقدام الناس بدون خجل او خوف ويمكن يعتبرونها مرجله بعد وتشوفهم مادين هالسفره وياكلون زبادي وتونه ( ومايحبون التونه الا في رمضان ) ...
واللي وده يشوفهم يتوجه لاقرب بر حول مدينتهم ويشوفهم وبالنسبه لاهل الرياض روحو للثمامه وتشوفون العجب العجاب ....
وطبعا بعد ماكبرت سافرت في رمضان لعدة دول وعواصم عربيه والحقيقه لكل دوله جوها وطابعها في رمضان اللي يتميزون به اهل الديره ومن اجمل الايام اللي صمتها كانت في لبنان ولاتصدقون اللي يطلع بالخيم الرمضانيه لان اغلب اللي جالسين طوني وجورج والرقاصه كلودا اما المسلمين والله ياحليلهم ويازين الصوم عندهم ....
ارجو اني ماطولت عليكم وحاولت اختصر قد ماقدر لكن باقي عندي سؤال مهم ويمغط نفسه من هنا الين الفينوس ...
ليش مانحب التوت الا في رمضان ؟
ختاما .....
تركيزي في هذا الجزء أنصب على الجانب السيء من عادات رمضان وطبعا لايخفى عليكم ان الخير في رمضان كثير وأهله كثير ولكن ربما يساعد ذكر العادات السيئه على المكشوف على تغيير بعضها ....
الوضع العادي
