العيب إنك تظن إن كل الناس لازم يكونون مثلك بالضبط!
كل دول العالم بدون استثناء عندها مشجعات سافرات يحضرون للمباريات ويشجعون منتخباتهم.
تعرف وش معنى (كل دول العالم)؟ يعني إذا كان عدد السعوديين 20 مليون وعدد سكان العالم 7 مليار
فحنا نتكلم عن 6 مليار و 980 مليون بني آدم ما عندهم اعتراض على حضور مشجعاتهم للملاعب سافرات.
وإذا ودك تستبعد الإيرانيين لأن غطاء الرأس عندهم إلزامي ويتم منعهم أحياناً من حضور المباريات فترى عدد
سكانهم 70 مليون نسمة.يعني 20 + 70 = 90 ومن عندي أعطيك 10 مليون فبالتالي يكون تعداد البشر اللي يمنعون مشجعاتهم السافرات من الحضور للملاعب 100 مليون بينما يبلغ عدد غير الممانعين 6 مليار و 900 مليون نسمة!!
عاد أنت بكيفك!
إذا بتفكر إن كل هالمليارات من البشر ديوثين وملاعين جد وإن أنت بس اللي صح 100% فهذا شيء يرجع لذكاءك.
حبيبي لازم تعترف بأن مو كل السعوديين زي بعض.
وهذا مو عيب على فكرة.بالعكس،كل شعوب الأرض فيها تنوع ديني ومذهبي وفكري.
بالسعودية فيه سنة وشيعة وإسماعيليين وليبراليين وعلمانيين وملحدين.
كونك ما تصدق هالشيء فهذا لا يعني أنه غير موجود.هذا يعني بس إنك تتعامى عنه.
كلامك غير منطقي،تدري ليش؟
لأنك تدري إن بطولة القارات في السعودية شهدت حضور مشجعات سافرات للمنتخبات الأوروبية والأمريكية.
كانوا يحضرون وكانوا يشجعون وهم سافرات وإلى الحين أتذكر صورة مشجعة مكسيكية حضرت لاستاد
الملك فهد وشجعت منتخب المكسيك ونشرت جريدة الشرق الأوسط صورة لها في ملحقها الرياضي.
أنت لو معترض على حضور هالمشجعات الأجنبيات السافرات للملاعب السعودية كان قلنا إن معك حق تزعل
لأن السعودية بلد إسلامي ويمنع الاختلاط.لكن إنك تزعل على حضور هالمشجعات في بلد يسمح بحضور
المشجعات الكاشفات فهذا اللي ما لك حق فيه أبداً ويخلي الواحد يضحك عليك بصراحة.
العلم علم بلدهم السعودية.
وأنت تعرف إن فيه سعوديات يكشفون شعورهم إذا سافروا لمصر أو للخليج أو لأمريكا أو لأوروبا.
وإذا ما كنت مصدق إسأل أي واحد من الشباب اللي يدرسون برا وبيقولك إن فيه طالبات سعوديات
وبنات حمايل ما يتغطون بأمريكا ولا حتى يغطون شعورهم.
الإسلام وأنا أخوك موب على كيفي ولا على كيفك.السفور حرام أنا اتفق معاك بس ترا حلق اللحية
حرام بعد ومطالع قنوات الأغاني حرام برضوه فليش تسويهم؟ الإسلام له أركان معروفة مو من بينها
الحجاب.والإسلام له موبقات أولها الشرك بالله وآخرها قذف المحصنات ومو من بينها السفور.
يا أخي الغيبة اللي يرتكبها الواحد وهو مو منتبه حرام،فكيف بالمحرمات الثانية؟
اللي يقول إن هالمشجعات غير سعوديات أو أنهم طرش بحر ما قد سافر برا عشان يعرف إن الحجاب
ما له علاقة بأصالة الوحده قدر ما له علاقة بتدينها والتزامها بالحجاب الشرعي.
فيه سعوديين عيال حمايل بناتهم يكشفون في الخارج وفيه أميرات بعد يكشفون.عساك بتتبرى منهم بعد؟
اللي يقول أنهم أجنبيات لأنهم شقر أقوله فيه شيء اسمه صبغة شعر وفيه بنات حمايل أكثر بياض من السوريات.
سعودية بيضاء وصبغت شعرها أشقر تبيهم يسحبون منها الجنسية يعني؟
إذا شفتهن يحضرون سافرات بالملاعب السعودية لك حق تزعل.
أما برا السعودية فهم ما خالفوا القوانين ومالك إلا إنك تدعيلهم بالهداية.
إلا إذا كان ودك تروح تفجر فيهم وتذبحهم فهذا شيء ثاني.
قال مو سعوديات قال!
<<<<<
الوضع العادي
