وش الدرباة:p ..؟؟؟

كلــــه بــالاول والاخيـــر توفيــق من اللــــه ...


بكـــــــره صــــم وادع ربـــك يرزقك مثــل سارة اذا افطـــرت ..؟
وادع ربــي يزوجنــي مثــلك بالقصــة بس يودينـــي بــاريس مو يتسذب علــي ؟؟

عاشق مدريد

ياهلا والله ومسهلا بالعاشق المدريدي..

إقتباس في حال منع الشاب عن الزواج قد يرتكب الشاب المعاصي وقد يتجه للزنى لاسمح الله فنحن هنا قد نعالج الخطأ لكن يحل محلة خطأ اعظم وهو امكانية اتجاه الشاب للزنى

صدقت اخوي ولا أشكك في صحة كلامك ،، لكن يابعدي عموما نظرية اني أزوج الشاب وهو صغير في السن لغرض انه ما يدشر باعتقادي انها خطأ خصوصا في زمنا هذا..

كثير من الشباب كان الدافع لزواجهم هو الحاح والديهم عليهم ولم يكن لديهم الوقت الكافي لاتخاذ القرار وكانت النتيجة أما حياة تعيسة أو طلاق في كثير من الاحيان..

ممكن اني أعطي الشاب فرصه ووقت كافي الى أن يكبر وينضج عقله وفي نفس الوقت يجب ان اذكره بوجوب مراقبة الله عز وجل وتذكيره بالمخاطر والامراض التي قد ينقلها له طريق الحرام..

إقتباس فإذا كان الشاب مقتدر فالمانع من الزواج

وهل يكفي ياغالي ان يكون الشاب مقتدراً حتى أزوجه ابنتي أو أختي؟؟

قضايا الطلاق وللاسف الشديد تملئ المحاكم والسبب الاول في نظري الاستعجااال في الزواج والاختيار ، وانا هنا لاأدعو الى الاعراض عن الزواج أو تأخيره لوقت كبير وانما على الاقل حتى نتأكد من أن تصرفات الشاب تدل على أنه رجل

إقتباس ونتذكر قول رسولنا عليه الصلاة والسلام(يامعشر الشباب من استطاع منكم البائة فليتزوج

الله يجزاك خير ياغالي على التذكير
وكلامه عليه الصلاة والسلام أكبر من أن يعلق عليه شخص مثلي..


تسلم يابعدي على مشاركتك الراقيه بمحتواها واسلوبها

_____________________________

هلاليه سنعه

ياهلا بالسنعه اللي ما تبينا نحج أكثر من مره ..

إقتباس تصدق احسبك معرس صدز وتحتسي لنا قصة حياتك

يعني لو انا معرس تبي تلقين خشتي ناطه بالمنتدى كل شوي أشك في صحة ذلك

إقتباس بس اللي اشوووفه حاليا الزواج منتشر بين الشباب اللي اعمارهم 18 و20

وهذا اللي فاقع مرارتي ولو رجع الامر لي كان أي واحد يزوج اللي أعمارهم 18 و19يسجن و يحول للتحقيق الا اذا جاب خمسة يشهدون انه رجل وعشره يشهدون انها حرمه

إقتباس المفروض مايتخطاها الانسان الا بعد تفكير عمييق وغووووويط وبعد عقل ورشد وتكانه ..

واشك ان اللي تحت العشرين يعرفون وش معنى تفكير وعدم استعجال أو حتى يعرفون وش معنى عقل تكانه؟

إقتباس ما اقوول الا الله يرزق كل واحد ووحده باللي يتمنوونه بشريك حياتهم والله يوفقهم ...

اللهم آآمين ،، والصلاح وحسن الخلق قبل كل شي



الله يعطيك العافيه وعساك دوم سالمه وشكراُ عد ما أمطرت على اطرائك الذي بسبته أصبحت فاغر الخشه

_____________________________


الفيروسه الزرقاء

ياهلا والله ومرحبا،، وشلون النسبا

إقتباس هذا وماجت الأم " الشبط " ام المربعانية

الشبط ذي راعية مهايط ولجه على غير سنع العلم كله عند المربعانيه الله يكفينا شرها

إقتباس وعندها جمر + دفايه الطويله اللي بس تدور وطبعاً الغرفه مغلقه وصايره مكتومه ، اقولها يمه ترى هالجمر مضر ع صدرك والدفايه لاتقربين منها بعدين يجيك مرض الوجيه

ياحبي للشياب والعجز يبالغون بوسائل التدفئه الله لايخلينا منهم

وبعدين أنتي الحين تعطين توجيهات لجدتك!! صدز الدنيا ذي مالها أماااان ، تلقين جدك تقول ما بقى الا ذي عشان تعلمني عن الوجيه

إقتباس مادريت إلا العصا مرفوعه ع وقالت انزلعي فيذاك وخليني

زين ما سوت والله انها كبرت بعيني، الله يعطيها الصحه والعافيه، والسبب ذكرته آنفاُ

إقتباس قلت هذا والشبط ماجات قالت اذا جاء برد اقوى من ذا بطرده واقوله انقلع لاتدخل داري

هذي أم صالح مهيب الشبط اللي تبي تطرد من الدار

إقتباس الحين الجو اصنفه تصنيف موب بارد جداً معتدل

اخس يالاوروبيه!! أجل معتدل

أقول سلمي لي علي الدفايه اللي تدور ولا يكثر والله انه برد عظيـــــــــــم

إقتباس واختك مالها رب ليه ماتبشرها

اختي ، اذا سافرت يضيق صدرها وتنغث وش لو أروح أبشرها اني أبتزوج!!
ما أقول الا الله لا يخلينا

إقتباس هذي وهي بس نظره وصلحت فيك كذا اجل لاعرست وش بتسوي

وانتي وش اللي محرق رزتس أخق ما أخق هذا شي راااجع لي أنا ومرتي ياحبي لها

إقتباس لأ ياشيخ احلف بسسسس ! اجل فـ احد بيتزوج وحده ماعندها عقل ! والا وحده بتاخذ واحد ماعنده عقل

اي والله ياست الكل يعني لازم يصير مهبول لابس سروال سنّه ومعه ميرندا وفش فاش وشطه عشان نقول ما يصلح للعرس

إقتباس عش احلامك والله يعينك ! لانك بـ تنصدم بـ الواقع

الله مير يسد نفس عدوك هذا بدال ماتقولين لي سر الى الامام وتبي تلقى مثل ساره واحسن

لكن تبين الصدق في داخلي مقتنع ان كلامك صح

إقتباس الهاوي حمستني اشتغل شغلة خطابات تجمع راسين بـ الحلال وفيها مكسب خخخخخخخخخخخخخخ تبيني ادور لك ترى ماعندي مانع --->> اها بس عن النصب

يقولون الخطابات زادت اسهمهم وارتفع سوقهم عقب ما كانوا منّول حيلة لمن ليس له حيله

إقتباس تبي الجد ، والله ان امهات الثلاثين اعقل واحسن من امهات العشرين

يعني أمهات العشرين مهابيل!!

إقتباس امهات 30 ماشاء الله خذوا خبره وفكره بـ الحياة صاروا ملامات " مدري صح الاسبلنق لا تدقق " وبيتمسكون برجالهم اكثر وبيقدرونهم

اي والله صدقتي وما فيها شي اذا قلت ياحبي لمرتي بهالعمر

ملمّات ياراعية الملقاط ما أدري وشلون قبلوك بالجامعه؟!!

إقتباس وتلاقاها احيانا شيطانيه

أم العشرين أحياناً شيطانيه وفي أحيان أخرى ابليسيه ولا غدينا ولا غدا الشر هذي وش يبغى بها؟؟!!

إقتباس إلا اقول بلا وجع راس وقلق ابعد عن الزواج خير شر وخل المزلاج طول عمره ع الباب لا تفكه

والله يا أنتِ ما تصلحين لا أم ولا خطّابه

مليّت من الحياة العشوائيه( وش رايك بالعشوائيه ) وابي وحده تمحو غبار الماضي وترتب أدراج الحاضري وأويلاه لو تصير مزيونه

إقتباس الهاوي بارك لي صرت ربةُ منزل

والله انا مضطر أقول لك مبروك

لكن الله يخلف على البيت اللي انتِ صرتي ربته عز الله انه الكبير يبي ينهبل ويموت جوع والصغير يبي يدشر وزين انها وافقت اجازه ولا كان موضوع المدارس منتهي أمره

يامال العافيه يالفيروسه وتشكراات واااجد على تواصلك الظريف الوسيع الصدر وان كان تبين نصيحتي لاتسألين عن عقبين وانتبهي للبزارين رحم الله والديك

_____________________________

ماجد مقبل

ياهلا والله وغلا باخو قلبي

إقتباس وفي رواية الحالم أخوي وائل خخخخخخخخخخ>>> حلوه وائل

ياليته يبتل الحالم

وترى وائل بيني وبينك لا أحد يدري

إقتباس بصراحة البنات أمثال سارة كثير ولكن اين الرجال أمثالك !! >> قمة النصب

سلمت يمينك يا أبا مقبل لكن لماذا خربتها في الاخير

إقتباس جمع سارة بس اذا انت بتنظر سارة لين يصير عمرها 25 اكيد انها بتروح عليك فلذلك يبيك تزوج باسرع وقت

والله شف اذا لقيت وحده من السارات وعمرها عشرين ابسوي عليها حجز عوده مؤكد الين تكبر شوي وما يمنع احط لهم قرشين على الحساب

ماااش يابعدي عيوني ترفض ان يكون عمر ساره أقل من 25


يامال العافيه ياغالي وتسلم على المشاركه والله يعيده علينا وعليك بالصحة والعافيه

_____________________________

مهووسة الزعيم

يا هلا ..

إقتباس كلــــه بــالاول والاخيـــر توفيــق من اللــــه ...

أكيد والله يكتب اللي فيه الخير للجميع

إقتباس بكـــــــره صــــم وادع ربـــك يرزقك مثــل سارة اذا افطـــرت ..؟ وادع ربــي يزوجنــي مثــلك بالقصــة بس يودينـــي بــاريس مو يتسذب علــي ؟؟

أبشرك صمت

لكن راحت علي أدعي ليش ما قلتي لي من بدري شكلي أبصوم بكرا

تشكرااات لمشاركتك والله يرزقني ويرزقك الصالح من عباده

___________________________


تحيتي للجميع

أســـ الزعامة ـــاس

يا هلا ومسهلا..

الله مير يعافيك ويسلمك تشكراات


__________________________________




عزوز الأزرق

إقتباس وش صاير هالأيام .. وين مااطس القى الخلق فاكين سيرة الزواج ؟؟!

البرد شين والواحد اذا تزوج يبدا مايكثر روحات وجيّات;)

إقتباس داخل جووووو مع سارتك ...

اررركد ياعزوز وش اللي داخل جو مع ساره وبعلها يشم الهوا حق الناس مهوب حقك

إقتباس اعرف واحد عمره حول 27 واخذ له وحده 18 ومااقول الا الله يوووووووووووووووووفقه

آآآمين ، لكن الظاهر ان المهر كان قيم بوي وكرتون شبّاصات

إقتباس اما اني اخذ وحده اكبر مني .. هع .. وين صارت ذي ؟؟!

أكيد مايصلح تاخذ وحده أكبر منك ، احسن شي تكون أصغر منك بـ 2 سنه وأطلق شي يصير عمرك 27 وهي 25


يعطيك العافيه وتشكراات لمشاركتك

__________________________________




تغريد

إقتباس اول شي احييك على العنوان الرهيب صراحه عجبني والله

أشوى الحمد لله أحسبك تبي تقولين اشرح لي العنوان

إقتباس اصلا تستاهلون مو لازم تتزوجون

لأ نبي نتزوج غصب عليتس ، الى متى نقعد كذا من دون نصفنا الآخر

إقتباس يجي الواحد يحط فبالو مواصفات هوا ماتجي فيه نصها حتى يعني ممكن هيا ماتكون سيئه لهدرجه لكن لانك انت كنت حاط فبالك شي محدد فـ مارح تعجبك

أي مواصفات وأي بطيخ والله ان أغلب الشباب يقول أبي وأبي واذا جاء الصدق أخذ أقرب وحده بعباتها

وبعدين مواصفات ساره ليست صعبه أو خياليه بالعكس بسيطه جداً والميزه فيه طريقة تعاملها الودوده والا فهي ليست ملكة جمال وشعرها الى خصرها وخدودها حمر

إقتباس مافي وسط طيب

الا فيه ، بس تكون أم 25 سنه بمواصفات 30 سنه

يعطيك العافيه وتشكرااتي لتواصلك

__________________________________


القاضي

ياهلا ومسهلا..

إقتباس الزواج متعب و يتطلب روحاً تبحث عن استقرار و اهتمام بالآخر.

صدقت ياغالي، واعتقد ان مجرد اهتمام الزوج بزوجته والعكس بشكل يوحي حرص كل واحد منهم على راحة الآخر هو مفتاح للسعادة والتفاهم بينهم

إقتباس و يصبح حملاً ثقيلاً جداً جداً عندما يكبر و يتعاظم فرق السن بين الزوجين.

الى حد كبير نعم ، لكن أعتقد ان المرأه اذا وصلت الـ25 سنه راح تكون مهيأه تماماً لرجل عمره 30 سنه وفي هالحاله ما أشوف انه مافيه اشكاليه لو تعدى الفرق بينهم سنتين ، لكن يجي واحد عمره 24 وياخذ وحده عمرها 19 هنا من وجهة نظري أنه غلط..

الله يسلمك ياغالي سررت بمشاركتك

__________________________________


البارق

هلا والله وغلا..

أجل جازت لك المفضال ، طيب ليش ما تعطين وحده من هالنمومه أفرح بها شوي

إقتباس أنا ما أعترض على الموضوع يا ابو سارة ..

انتبه لوتعترض ينكشف المستور ترى الموضوع كله من مصلحتك

إقتباس لكن أوردت كلمتين وهما ( حشاشة جوفي ) و ( حلوة اللبن ) هذي الله يصلحك خاصة بتعامل الأم وولدها فواحدة خاصة بالأم تجاه الابن والثانية خاصة بالابن تجاه الأم

يا بعدي أنت كبرت كثير وصرت ما تتعمق بهالكلمات الدافئه ، أنت تبي وحده تقول لك "انتسب لك مرقوق يابومحمد"

هي اذا قالت لي " يا حشاشة جوفي" يعني اني قطعة منها وهذه أقصى درجات العشق
وانا اذا قلت " يا حلوة اللبن " يعني اني أتغذى وارتوي منها وهذه أقصى درجات الهيلمان

يعني تعبير مجازي ، ولا أنا خابر أصل استخدامها..

إقتباس خلاصة كلامي إن هالأمور ما تقاس بالعمر الزمني بل بالعمر العقلي .. والله أعلم ..

صدقت، وليت هالعالم يقيسونها بالعقل ، مهوب بالسن والقدرة الماليه..

يامال العافيه يابعدي تسلم على المداخله

__________________________________


أبوقف عند صديقي وحبيبي الكلاسيكي اللي عيا يستر علي وفضحنا عند الله وخلقه بهالشنب ، يبي لنا شغل وااجد

آآآي ول كوم باك للغالين

الكلاسيكي

هلا وغلا باخو قلبي ..

كفايه حرااام ما فيه أحد الا ودرى الشنب والله يالعيال صار هرجتهم شنبي وكل ما أجيهم قبل كل شي يشيّـكون على الشنب هو فيه ولا ما هوب فيه وأهي غلطه ومش حتعود

إقتباس سبحان الله وش لون تجمعت تصدق اني اقول الهاوي يبطي يجمعها .. بس صدق ابوي .. يقول كل شي صعب إلا الزواج يهونه الله ..

و الوالد صدق ، يقول واحد من العيال : يوم جيت أتزوج ما كان عندي الا 40 ألف ريال جمعتها من رواتب 3 سنين ، وكنت غاسل يدي من أنه فيه أحد راح يساعدني وكان كل تفكيري وشلون آخذ أعلى قرض من البنك، لكن يوم قرب الزواج صارت الفلوس والمساعدات تجيني من كل مكان لدرجة اني تحسفت على القرض اللي أخذته، حتى ان لي خاله مدرسه ومن زمان ماشفتها أرسلت لي 5000 آلاف ريال

إقتباس والله عجزت اهضمها .. كان قصدك اذا جيتها تقول تعال بعد ساعه ممكن ..

اي والله انك صادز أنت عجزت تهضمها وأنا عجزت أكتبها لكن لعل الحلم يصبح حقيقه

إقتباس حسبي الله عليك بتوهقنا .. اجل خلها تجيب توأم سبعه لانها احتمال معاد تجيب

أفا عليك يابعدي ، صدقني اذا أخذت وحده أم 30 سنه تبي تدعي لي وبعدين وش تبي بالعيال الوااجد
10 سنوات كل سنتين يجيك ولد ،وباذن الله لا صارت زوجتك عمرها 40 يصير عندك أربع عيال نعمه

إقتباس لايكثر .. هذي سوالف منتدى .. واسئله ضيف المجلس

طيب ياعادل ، اذا خطبت وتملكت ان شاء الله وبديت تخربط مع المدام تبي تقول الله يذكر الهاوي بالخير

إقتباس بس .. ماطلبت شي .. غالي والطلب رخيص .. ابشر باللي تنومك وتنام بعدك ... وتصحى قبلك تلاقي الفطور جاهز .. بس كم تعطيني .. ولا تدري مهري كله عليك ..

اي والله تكفى وأبشر باللي يتكفل بمصاريف زواجك من أختها وفوقها بانوراما غمارتين بس أنت جب لنا ساره

إقتباس تصدق ان احنا امس في مجلس كنا نتكلم عن الزواج لان ولد عمي ابوه ناشب له يقول تزوج وهو يقول يبه خلني اكمل الدشره اول . في راسي حب(ن) ماطحن .. وابوه مصرّ ..

تعجني الديموقراطيه في مجلسكم، أجل الاب يقول تزوج والولد يقول اصبر أبدشر

واذا تبي الجد المفروض ان الوالدين ما يلزمون على عيالهم ويخلونها تجي من عندهم أحسن

إقتباس بس عمره 19 بس رجال وشنبه يوقف عليه الفيل مثل شنبك ..

رجعنا على طيري اللي ياعمي سبيك منـّه

إقتباس اما الزواج اذا تبغى الصراحه انا مع الزواج المبكر اذا كان الشخص قادر على تحمل المسؤليه مو من النوعيه اللي قلت انت .. بكره ولا بعد بكره راح او رايحه تتشكى لاهلها .. لان الزواج راحه نفسيه واستقرار وانت اخبر ..

اتفق معك، الزواج المبكر زين ، لكن الواقع يقول ان الشباب والبنات من تالي ما عندك أحد الا ماندر ، وحرام نستعجل ونزوجهم اليوم وبكرا يفترقون ، نصبر شوي الى ان تنضج عقولهم وبعده ييسر الله..

إقتباس وياما ويماما رجال اعمارهم فوق الثلاثين وحركاتهم وتصرفاتهم صبيانيه .. اذن .. الزواج مو بالسن .. بالفكر .. بالعقل .. بالنضج الفكري مو السني ..

صحيح لكن هذولا شواذ ، والغالب في زمنا هذا ان الركاده والعقل عند الشباب تبدأ في سن متأخره..

إقتباس زواج هنيئاً لك ايها الهاوي .. ولو اني ادري انك اذا تزوجت معاد حنا شايفين رقعة وجهك .. بس بالتوفيق لك .. هذي سنة الحياة ..

الله يسمع منك، ومن ناحية ماراح تشوفون رقعة وجهي فهذي تعتمد على المدام ، اذا الله وفق وكانت زوجتي تملأ علي الدنيا فالظاهر اني ابدا امر عليكم أسلم وأمشي مشغوووول قوووه


تسلم يابعدي على مشاركتك وتواصلك،،
________________________________


مجنون @ الزعيم

ياهلا وسهلا..

إقتباس والله لا حنا اللي بنلقى مثل سارة ولا البنات بيلقون مثلك ( بالقصة طبعا )

وش قصدك؟؟ القصة حقت شعري ولا قصة ساره؟؟ لازم تحدد لأن كلهن زينات

إقتباس عموما ما فيه امل تلقى زوجة كاملة

ما نبي زوجة كاملة ، نبي وحده لو ربع تنده أهم شي تكون حرمه متفهمه وعاقله

تشكراات لمشاركتك

________________________________

الهنوووف

إقتباس هلا بالهاووي ابو الهوايل >>مشكت معاي كذا لاتشره ياخوو جورج

ياهلا ومسهلا فيك،، وياحبك للواوات

الله يستر بكرا تمشك معك وتسمينني الواوي

إقتباس طيب ورا ماتوفرون شي من الراتب لتكاليف الزواج كل شي قرووض

وان اخوتس الراتب مابه بركه حتى لو كان كبير يطير بسرعه ، وان حاول الواحد انه يجمع ماراح يوفر الا مبلغ بسيط

مثلاً أبو 5000 ريال بالشهر لو صرف 2000 ووفر 3000 راح يكون بآخر السنه معه 36000 ريال هذا ماتجيب حق القصر والخرفان

إقتباس هنا مشكلة الي يجي ويتفلسف وين تبين وهو مطفر يعني حفاظا للذوق العام وشوله تسالهااا يعني لو قلت مثلا للشرقيه بيقووول بنت فقر

وشوله أسألها !! والله لو ما سألتها كان تروح وترغي عند أمها " شفتي هالنذل راح وقرر اننا نروح للقصيم بدون لايشاور " ثم تجي الام وتقول ما عليتس منه اتصلي عليه وقولي تبي توديني لأسبانيا ولا مالي طلعه معك

ويكبر الموضوع ويصير فيه ذبح ومذابح

إقتباس او يحط خيارات علشان تكون البنت في الصورة ومنعا للاحراج

يعني لو أحط خيارات :
القصيم
الدمام
باريس
وش تبي تختار؟؟

ما فيه داعي للعب على النفس الموضوع واضح والمقصد الدرباة >>>>> عرفتي وشي الدرباة

إقتباس ممكن تلقى ياخووي بس هالصفات ماتعرفها الا بعد الزواج اذا وقع الفاس بالراس

اذا وقع الفأس على الرأس وش الفايده؟؟ لا غدينا ولا غدا الشر

إقتباس يعني عذرا ياخوي كم تبي البنت تتزوج اذا تعدت ال25 هو سن للبنت حلو اما الشاب فاتوقع اقل شي مناسب 25 لـة حتى لو كان قادر قبل بس يتعلم من الحياه شووي

بالنسبة لي نعم لكن مهوب شرط أساسي ، ابي زوجتي يكون عمرها 25 وطالع عشان أكون سويت اللي علي ، لأن من واقع مجتمعنا أغلب البنات اللي أقل من العمر ماراح يكونون ناضجات وصبورات وراعيات بيت الا ما ندر ..

وبالنسبة للشباب ، فلو كان عندي بنت ما أزوجها لواحد عمره أقل من 25 لو هو أحسن الناس ، وهذا رأيي من خلال اللي أشوفه والدنيا تغيرت عن منول

إقتباس ولو فكرنا ان الاعمار ليست مقيااس يعني تجيك بنت عمرها 18 بس عقليتها اعقل من وحده 24 وهذا واقع ونعيشه وكذلك الشاب

لو تكلمنا عن الاغلب فصدقيني أن الأعمار مقياس ومقياس مهم، أكيد فيه رجال وحريم كفو وقد المسؤوليه رغم أن أعمارهم صغيره لكنهم قله..

إقتباس للاسف الحين الرجال مايهتمون بس يبي يزوج البنت ويفتك منها على اي واحد

ولو فكر الاب وتأنى ، كان يقول تقعد عندي وأربيها وأحافظ عليها سنتين زيادة لين تكبر ويكبر عقلها ويكبر عقل وسن المتقدمين لها \، ولا تتزوج بسرعه وترجع لي مطلقه الله لايقوله..

إقتباس الله يرزقك البنت الصالح ويرزقا الشاب الصالح

آآآآمين الله يسمع منك،،


يامال العافيه وتشكرااات على مشاركتك وتواصلك

________________________________

عـز الهلال

ياهلا ومسهلا..

إقتباس لكن الخير كثير والحمدلله بس يبيله وقت , أجل السماء تبيها تمطر ذهب

انا اشهد انك بهذي صدقتك ، الموضوع يبي له وقت كافي والعجله فيه شينه..

إقتباس يعني دورلك من هنـا ولا هناك , وتحصل ان شاء اللـه , أو لبنـانيه تحصلها مثل " سارة " وأحسن بعد تقهويك الصبح , وتصحيك بوجه مبتسم مهوب بـ كشة أعوذ بالله ؛ بس الله يعينك على مصاريفها .

وراك خرّبت أبو الموضوع قبل شوي وأنت وش حليلك

اللبنانيات زينات وكلامهن عسل بس أغلبهن ما بهن صلاح، وانا رجال أدور مره فيها خير تربي عيالي صح مهوب بكرا ألقى ولدي ينابط مع ستار أكاديمي وبنتي تقدم برامج بالمستقبل

إقتباس الله يرزقنـا بالزوجه الصالحه الي نعيش معها احلى عشيه ومـا تطلب أكثر من السفر الى بيشه ولا تقزز من الدريشه ولا تحب الدخان ولا الشيشه .

آآآمين ،، كمل وراك وقفت؟؟ الصراحه وناسه أحلى عيشه ببيشه

يعطيك العافيه وتشكرااتي على مشاركتك الوسيعة الصدر

________________________________

الدريبي الهلالي

هلا ومسهلا..

الله يهيدك بس يالدريبي أنا الحين أدوّر الركاده أبعرس وانت تدعي لي بالرجه !! على كذا تمددت فترة العزوبيه عندي لسنتين قادمتين وانت السبب ياظالم ياقاسي

تشكررااتي لك

________________________________

يعطيك العافيه

الهنوووف

هلا نبوتن ثانيه..

يقولون ضابطه الامور بالكشته

إقتباس وش الدرباة ..؟؟؟

الدرباة = الزحلقه ، وهي أحد انواع الكذبه البيضاء

__________________________________

هــلالي المجمـعه

الله يعافيك ،، وتشكراات لمشاركتك

__________________________________

abu_riman

ياهلا والله ومسهلا ،، الحمد لله على سلامتك ..

إقتباس فعليك ( أمون ) و مع مثلك أحبذ الحديث بلا قيود و بلا مخاوف الظنون ..

حياك الله ياغالي وما يحتاج تحط لي تمهيد انا وانت نعرف بعضنا زين;)

إقتباس لو كانت سارة أختاً لي أو إحدى من لها علي حق النصح لما أسعدني أن تكون معك !! في معرض سردك كانت سارة تعطي و كنت أنت فقط تأخذ ! في معرض سطورك كانت سارة تبذل و اكتفيت بالاستمتاع ..

يابوريمان ياصاحبي، الهاوي ليس جاهلاً أو سافلاً أو لئيماً أو ناكراً أو بخيلاً أو صغيراً قاصراً أو منحطاً أو حتى مغزلجي عشان يصل الامر لدرجة أن ولي أمر العروس يندب حظه على زواج وليّته من هذا الهاوي

تقول ياغالي اني أخذت من ساره ولم أعطها شيئاً ، وهذا غير صحيح ، و لا أعلم كيف اكتشفت هذا ؟! لأني ما سولفت عن الهاوي وزوجته وكيف يتعامل كل منهما مع الآخر !!

كل ما في الأمر أن الهاوي يتخيل فتاة بصفاة وطريقة تعامل رااائعه تضمن له راحته ، وان حصل له ذلك (كما تخيلت) فانه يحبها ويعشقها لدرجة انه صحى من الحلم وقال تكفوووون شوفوا لي أقرب سااااره..

ولو تسأل أي فتاة بالعالم عن أهم شيئ تريده من زوجها ستقول وبدون تردد " أريده محباً عاشقاً " لأنها ان تأكدت من حبه وعشقه ستكون على ثقه بانه سيسعى لكل أمر يجلب لها سعادتها وهذا هو حال الحالم الهاوي

إقتباس فحصل أن سارة تأخذ نصف ما تعرض و تتنازل عن وقتها من أجلك بينما في البداية كنت تكذب !!

اذا كنت تقصد بالكذب سالفة نبي نروح لباريس فأنت تبالغ كثيرا يا أباريمان ودخلت في الجو أكثر من اللازم..

الكذاب على سبيل المثال هو من يقول لخطيبته أنا صحتي وبدني سليم ، بينما هو يعاني من مرض ووراثي( عافانا الله واياك)..

أما غيرها من سواليف تالي الليل فهذي اسأل عنها اللي تملكوا وسولفوا مع زوجاتهم حينها ستسمع ما طب ولذ من الاكاذيب الشفافه المكفوشه من أول وهله

إقتباس ذكرت لك في ردي بأن ما بيننا و إن لم يتمثل في تواصل وقتي إلا أنه موجود تظهره الفرصة متى ما حانت .. هنا حانت فرصة ..

عساك تسلم يابوريمان وسعيد بتواصلك ومشاركتك

تقبل تحيتي،،

اهلين اخوي الهاوي

فعلا موضوعك رائع

لكن ودي اعلق على موضوعك

في حال منع الشاب عن الزواج قد يرتكب الشاب المعاصي وقد يتجه للزنى لاسمح الله

فنحن هنا قد نعالج الخطأ لكن يحل محلة خطأ اعظم وهو امكانية اتجاه الشاب للزنى

ولا يخفى عليكم انتشار المعاصي والذنوب في وقتنا الحالي

فإذا كان الشاب مقتدر فالمانع من الزواج

ونتذكر قول رسولنا عليه الصلاة والسلام(يامعشر الشباب من استطاع منكم البائة فليتزوج)

اتمنى اخوي تكون مقصدي واضح لك

لك خالص تحياتي,,,

تصدق احسبك معرس صدز وتحتسي لنا قصة حياتك
اثره احلام اليقظه مدري زهرةالخليج ..
اما العنوان توووحفه صكه يالقفل بعد اليييين يصير رجال بمعنى الكلمه
وتصيير بنت بمعنى الكلمه ...
بس اللي اشوووفه حاليا الزواج منتشر بين الشباب اللي اعمارهم 18 و20
مدري احسها بربسه ولعب بزرااان ... مهب كل من قال زوجوني يزوجووونه
الزواج مهووب لعبه .... الزواج حياة ثانيه .....
المفروض مايتخطاها الانسان الا بعد تفكير عمييق وغووووويط وبعد عقل ورشد وتكانه ..
ومثل ماقلت بعد الزواج انواع المشاكل ويكثر الطلااااق ...
لأن كل واحد ووحده يحلموون بشئ والواقع يصير شئ ثاني .......

ما اقوول الا الله يرزق كل واحد ووحده باللي يتمنوونه بشريك حياتهم والله يوفقهم ...
اخووي الهاووووي .. صاحب الإبداع .. صاحب التألق .. صاحب الطرفه .. صاحب الواقعيه ..
شكــــراً لك ولمووووضوعك الممتع ..’’
دمت بخيــر ..’’

هههههههههههههههههههههههه
مشكووووووووووووووووور على القصه اللي ما اتوقع تصير مع اي احد سعوودي
كل ذاا الحب

كيف نعيش بلا ياسر،،

إقتباس القصه اللي ما اتوقع تصير مع اي احد سعوودي

سعودي ولاّ لبناني الحريم سيم سيم بس لابد ما تلقى وحده من بين ألف وخمس تطلع شقرديه

تشكراات على المشاركة،،

واعتذر عن التأخير فقد كنت كاشتاً

ههههههههههههههههههههههههههههههههههههههههههههههههاي

حلم مامنو هههههههه

أقول طايح سب بالورعات وانت يالورع ماتناظر حالك

وماشاءالله سن الزواج 30 سنه لوووووووووول كخخخخخخ<<<<تصيح عشان صار عمرها 17 وماتزوجت خخخخخخخخخ

عنست ببيت ابوي اجل<<<<<< اللهم الفكه عاجلا غير اجل

مشكور اخوي على الموضوع الحلو يسلمو