&:. الدحمي وأبو شمس وحفل زواج ( توم كروز ) .:& - صفحة رقم 2 - نادي الهلال السعودي - شبكة الزعيم

أبوشمس · #1 01/12/2006, 04:16 AM

السلام عليكم ورحمة الله

مساكم الله بالخير .. وش أخباركم إن شاء الله (منيحين) .. ووشلون إختباراتكم << والله من الغثا الله يعيننا وياكم بس ..

عموما أحبتي الأفاضل إن مما يجبر الإنسان أن يرتقي بتطلعاته إلى الأنظمة المعلوماتية << أقول لا يكثر بس

المهم يا جماعة أنا صارت لي سالفة ..

في فجأة من الأيام وأنا جالس بالبيت أصورة مع الجدران << كالعادة عاطل باطل

جتني فكرة (جهنمية)

قلت يا ولد ورا ما أروح أشوف البريد وش من رسايل << والله من زين الفكرة كل يوم يشوف البريد هو وخشته

المهم وأنقز على الهوتميل .. هاه ياصندوقي الحبيب وش عندك من رسايل ؟

قال : والله يابو شمس وصلتك بطاقة دعوة لحضور زواج بإيطاليا

وشوووو إيطاليا !! تستهبل أبو هتمل << دلع البريد حقي

لا ما أستهبل شف البطاقة وتعرف ..

اخس يابو شمس يالخطير بطاقة دعوة لحضور حفل زواج (توم كروز) !؟!؟

وقتها ولعت لمبه في مخيلتي << برضو لا يكثر

قلت يا ولد والله فكرة نروح نوسع الصدر ونستانس بدل القعدة بهالبيت ..

طيب يابو شمس يلزم تشوف لك خوي أزين من تروح لحالك تدربي هالدميجه !!

من غيره خويي (الدحمي) .. مثقف ويعرف انجليزي خله يترجم لنا ..

وعلى طول شغل الجاكوار وعلى بيت الدحمي << أشوى إنها ددسن غمارة

وصلنا بيت الدحمي نزلت من الموتر (( عفوا الجرس خربان)) << ما تغير شيء هذا جرس بيت الدحمي من عشر سنين

يعني ما لك الا حصاة وترميها على دريشة الدحمي اللي تطل على الكورنيش << امحق أشوى أنه شارع عشرين

طق الحصاة .. ويفتح الدريشة دحمي : أبو شمس هلا والله وين الناس ..
أبو شمس : أقول لا يكثر انزل بنروح مشوار ..
الدحمي : طيب هذاي جيتك ..

يطلع الدحمي هاه أبو شمس وش عندك ؟
أبو شمس : الدحمي تعرف واحد اسمه توم كروز ؟؟
الدحمي : إيه اللي يلعب مع النصر !!!! << ثقافته ما تتعدى بشير شنان

أبو شمس : والله ما تدري وين الله حاطك المهم أنا بروح لإيطاليا معزوم على حفل زواج (توم) تسان ودك تخاوين ..
الدحمي : قداااام يالسنايدي والله إني ودي أشوف هالتوم ذا ..

المهم ونركب الغمارة وعلى طريق البطحاء العام !؟

الدحمي : خل بدق على أهلي أعلمهم ..
أبو شمس : وش تبي تقولهم ؟؟
الدحمي : بقولهم بروح آخذ عمرة << التصريفة المعتادة للسفر برا

طلع الجوال بيدق .. أبو شمس : هيييه وقف دقيقة الحين نبي نروح إيطاليا بجوالك الكسره هذا !؟!
الدحمي : وش رايك وش أسوي ؟؟
أبو شمس : وش رايك يعني بنروح محل اتصالات نشري لك جوال زي الناس .. إلا وش اسم جوالك هذا ؟؟
الدحمي : العنيد المطور << امحق .. عنيد ومطور بعد

أبو شمس : لا خابر لك جوال جديد يقولون توه نازل نبي نشريه يسمونه (الكتيل)

أقرب محل اتصالات على شارع البطحاء العام ..

سلام عليكم صديق .. وش نزل عندك آخر شيء ؟
العامل : والله فيه عشان برد هذا فروة سوري مية مية وفيه يجي جديد فنايل علاق دفه

الصورة تتكلم !!

طلعنا من المحل بلا جوال بلا خرابيط وعلى طول على مطار البطحاء العام ونقلع لـ(روما) ..

نزلنا من المطار وعلى طول التكسي عند الباب ..

راعي التكسي : وين تبون أوديكم .؟
الدحمي : لو سمحت نبي قصر ألف ليلة وليلة

أبو شمس : اسكت لا تفضحنا هذا مب هنا هذا بديرتنا .. بالله يالأخو ودنا للفندق اللي بالكروكي هذا ..

دخلنا الفندق وهذا توم كروز حاط يده بيد زوجته وجالسين

ويجيك أبو شمس طاير ويغطي عيون توم بايدينه ..

أبو شمس : هاه يا توم من تتوقع أنا ..
توم : امممممممم ديفيد بيكهام !!
أبو شمس : لا

توم : نيكول كيدمان !!
أبو شمس : لا
توم : اممممم برتني سبيرز << أروح كنافه

أبو شمس : لا

وأنا أنقز بوجهه هاااااااااااااااي

توم : أبو شمس الله يرجك هذا أنت !!

أبو شمس : إيه هذا أنا المهم هاو آر يو << أقوى شيء

توم : (كلينكس) ثانكيو << ينكت هو ووجهه

أبو شمس : وش رايك بي عاد يومني شرفت الحفل << مصدق عمره

توم : والله يو آر كريزي ؟؟

الدحمي تعال بالله وش يقول هالفرنجي ..
الدحمي : يقول والله ماقصرت تعبت روحك .. << امحق مترجم

أبو شمس : الله يسلمك طيب بهالمناسبة وش رايك ناخذ صورة ؟؟
توم : ما في مشكل << صار هندي

قبل لا نكمل السالفة ناخذ فاصل !؟!

فاصل إعلاني
--------------------------------------------------------------------------------------
يا جماعة وش رايكم بهالوجه المزيون
7
7
7
7
7
7
7
7
7
7
7
7
>>>>>>>>>>>>>>>>>>>>>>>>>>>>

<<<<<<<<<<<<<<<<<<<<<<<<<<<<
8
8
8
8
8
8
8
8
8
8
8
8
والله ياهو رهيب أحس إنه عربجي وزاااااااااااااحف
--------------------------------------------------------------------------------------
عدنا

بعد ما أخذنا صورة جلست جنب الرجال وسواليف حول نص ساعة ولا يحتاج أجيب لكم السواليف أدبل تسبودكم يبي لها موضوع ثاني

المهم وأنا أسولف وهو يلمح يبين أقوم يبي زوجته تقعد معه ما فيه فايدة <<< بجيح بقوه

توم : أقول يالأخو ما تلاحظ إنك طولتها ؟؟؟
أبو شمس : أفا وش دعوى ..

توم : الدعوى عامة ياخي غثيتن !! تراي مسوي حفل عشان (المعزبة) مب عشانك أنت وخشتك

أبو شمس : اخس والله هذي آخرته .. شف يالدحمي وش يقول ذا !! لكن الشرهه مب عليك الشرهه على اللي يحضر عرسك مره ثانية << يحسبه كل يوم يعرس

الدحمي : قايلك يابو شمس لا تمشي مع هالعلوج الأمريكان بس ما طعت شوري << متأثر بالصحّاف

أبو شمس : يالله مشينا والله إنك صاز غلطان يومني مشيت مع هالمرتزق قليل الخاتمة << بعد هو متأثر

ونطلع ونشغل الغمارة وعلى الرياض ...

وفي طريق العودة << متعوب عليها

أبو شمس : وش رايك أبو دحم وش أزين البطحاء ولا إيطاليا << والله من زين المقارنة

الدحمي : والله شف الشوراع أحس إن شوارع إيطاليا أزين لكن المحلات أتحداهم يا شيخ يجيبون محل يبيع ملابس واللوحة اتصالات !! << كلام سليم

الدحمي : أبو شمس ياخي أنت غريب الأطوار !!
أبو شمس : أفا وش دعوى قالوا لك أنا جراده !!

الدحمي : لا بس قصدي إني دايم أشوفك مستانس وموسع الصدر وحتى وأنت توك متهاوش أنت وخويك اللي تو !؟

أبو شمس : إييييييييييه يالدحمي لو تدري ؟؟
الدحمي : وشلون ؟؟

أبو شمس :

أضحك وأسولف مع هذا وهـذاك .:. والناس ترقب ضحكتي وتحسدني
قالوا سعيد وعايش أحلام دنياك .:. وأنا سجـيـن وهمي اللي حبـسـني

الدحمي : صح لسانك يابو شمس
لكن :

حلـي دنـيـاك وتـعـيـش بـحـلا
وخـل غـيـرك فـيـهـا يـضـيـق

وإن شفـتـه يـزود فـيـه الـبـلا
تعال شق لك وسطـه طـريـق

مـن طـاع ربـه وكــتـابـه تـلا
يلقى السعـادة يـغـلـى رفـيـق

ويومه يشـوف الـهـم انـجـلا
وغيره يولع بصـدره حـريـق

هـذي وصـاتـي لـكـل الــمــلا
وأصل الصداقة حب الصديق

أبو شمس : صح لسانك يالدحمي والله لا يحرمنا منك

وضحك الجميع وكانت ليلة سعيدة << هذي خابر هذي بكتاب القراءة يقولونه إذا خلصت القصة

هـــنا وصلنا نهاية القصة اللي (ما فيها فايدة) << كعادة (سباحينه) رحمه الله

وأشوفكم إن شاء الله في مواضيع جاية والجاي أحلى من اللي رايح << صارت مسابقة ملكات جمال

وهاي بوسه لأحلى شباب وصبايا

---------------------------------------------

حقوق الطبع والنشر لهذا الموضوع محفوظة وكذلك الأبيات الموجودة بالداخل .. والويل لمن تسول له نفسه سرقة شيء من ذلك