الموضوع لسنعة !
و الموضوع عن القهوة !

أعتقد أن هناك توافق !

أشكرك ..

يعطيك الف عافيه يالسنعه

ماشاء الله عليك


وبالنسبه لعدد كلمة القهوه اربعين مره كتبتيها <<< فاضي يعد

يالله صبو هالقهوه وزيدوها هييييييييييييييييييل ;) << غمزة سميره توفيق

الله يرجك انتي وعنوانك هههههههههه

إقتباس يامحـلا الفنجــالـ وسيحــة البــالــ ..

قلت وش هالخواجه اللي كاتبتن موضوع

عموماً كما سمعنا بأن القهوه بيضاء باليمن وتسوّد حتى تصل للشام
وهذا دليل فأهل الجنوب قهوتهم بيضاء حيث يضاف لها الحليب
واهل نجد شقراء وكل ما اتجهنا شمالاً تسوّد والدليل القهوه التركيه

مره سمعت لقاء مع خالد عبدالرحمن او ( مخاوي الليل ) كما يحلو لعشاقه
يقول كنت في رحله لبلاد الشام وقمت بأعداد القهوه العربيه للمخرج وطاقم العمل
فسألني المخرج عن السكر فقلت لماذا قال لاضيفها للقهوه ( يحسبها مثل قهوتهم )

على كلاً اهم شي ان تطبخ القهوه على نار هادئه لمدة ربع ساعه على الاقل
اذا اردت ان تقنـّـد راسك

يعطيك العاافيه على المعلووماات الحلوووه

بس انا مشكلتي الووحيده ان القهووه عندي مخلصه .. عشاان كذا ناااااااااااااااااااااااااااااايم

هلا وغلا اختي هلاليه سنعه
ربنا يسامحك يا ختي تراي اقرا وانا صايمه
واشتهيت القهوه من كثر ما تكررين قهوه قهوه<<اخذتي ذنبي
يازين القهوه والله انها تعدل المزاج
حنا نحبها بالهيل ونشربها بعد المغرب زمان كنا نشربها بالصبح
بس خلاص هالعاده اكل الدهر عليها وشرب
تصدقين عاد سويتي في خير يومنك حاطه الطريقه
دايم اتفشل لمن يجونا ضيوف وانا لوحدي بالبيت
لاني ما اعرف كيف يسونها ولا مكوناتها ولا اعرف اصب باليمين...
<<وش تعرفين انتي عااااد

مشكور على الموضوع الرائع والمتكامل ..خالص التحيه لك

.. افتخر بالزعيم ..

هلا والله وغلا بأخوي افتخر ..

إقتباس لكن بصراحة ماانيب من الناس المدمنين عليها يعني ان جت جت ماجت بسلامتها

تقريبا انا مثلك مهووب مدمنه بس احبها مع الحلى والشوكلاته ..

إقتباس الامريكان كوفي خصوصا قهوة دانكن دونت >>> ماربحه الا انا واشكالي

زاد اني ذيك اليووم رحت لدانكن ولا لقيت قهووه اثرك مخلّصها بالعافيه خيووو

إقتباس حنا بصراحة نحط معها ( شوي ) حليب علشان يفتح لونها ويصير طعمها احسن بعد

بنجربها وبنشووف ..

إقتباس فيصلي والا فيحاء

فيحاء مع البرتقالي قلبا وقالبا

إقتباس والله ماش اخاف انه من العجز ماتبين كل شوي تصبين

تقدر تقووول تطيح يدينا من الصب ..

إقتباس بعد في بعض المضار واولها انها تعد من اكثر المنبهات تأثير

اكيد ان الشئ لازاد عن حده وكثرت منه بيضر .. لا افراط ولا تفريط ..

إقتباس اتذكر عمتي الله يرحمها كانوا بيسوون لها عملية عجزوا يبنجونها بشكل كامل

الله يغفر لها ويرحمها .. صدقت توخر اثر البنج ..

إقتباس قديمك نديمك

تذكرت علبة الكبريت ههههههههه

إقتباس الله لا يخلينا بس

الله آميــن .. الله يعطيك العافيه اخوي افتخر على الإضافات الرائعه والمتميزه ..

.. سندريلا الهلال ..

هلا والله بالغاليه سندريلا نورتي الموضوع ..
..

إقتباس والله قهوتك تهبل اكييد قهوة أهل سـدير والنعم والله

يابعد قلبي ماعليتس زووود من بعض ماعندكم

إقتباس حسبي الله على ابليسها وهقت العالم صاروا ما يتبنجووون

ههههههههههههه هذي قهوه مو حي الله ..

إقتباس يشرب نص درزن زمزميات قهوة في اليوم

ماشاء الله عليه ..خلاص نبي نحطه بموسوعة غينيس للارقام

إقتباس وييين حاطتن 13 شرط لصب القهووة

لازم تحفظينهن عن ظهر قلب وتنفذينهن بحذافيرها

إقتباس انا مرة صبيت باليمين جدي قام يقول فيني شعر اني منب سنعه .. طيب مافيها شيء وجهونا مهب تحطمونا ,, اصلاً جدي معه ماجستير تفشيل .. دكتوراه تحطيم

ههههههههههههههههههههههه ياحليله مافيه الكبار ينفخون ويزربوون وياويلتس ان غلطتي
عندهم تصير اقشر الساعات .. عصبيين الله يصلحهم ..

إقتباس قهوتنا مثل قهوتكم ياسنعة

تقلدووون ونعم ماعليها زوود قهوتن طيبه

إقتباس عااد قهووة وحنيني يالله من فضلك

الله جبتيها على الجرح مشتهيتن حنيني بالصيف واهلي يقولوون ووين حنيني بعز القيظ
جا الشتاء الله يحييه ويجي معه الخير ان شاء الله والحنيني معشووقي عاد اعزميني على
حنيني والقهوه علي
يعطيتس الف عافييه ياقلبي سندريلا على الرد الرووعه والحلوو مثلتس ..

.. فيغو 10 ..

هلا اخوي فيغووو
العفووو خيوو ويعطيك العافيه على المرور والرد ..

.. الكــلاسيكي ..

هلا والله وغلا اخوي الكلاسيكي ..

إقتباس حتى في علوم العرب وصب القهوه سنعه ماشاء الله عليك ..

شكرا خيووو على هذا الاطراء ..

إقتباس وان شاء الله تكوني سنعه في ادارة بيتك وعيالك ..

ان شاء الله << استحت

إقتباس لو يمر يوم ماشربها يعورها راسه وماينام ولا يهدا له بال .. وفيه ناس ولا مره ف حياتهم شربوها

صدقت .. وفيه ناس وسط يعني عادي لو يشربونها وعادي لو مايشربونها ..
مو

إقتباس شاربين القهوه الا لما تحطون فيها سكر .. الله يخلف بس

هههههههههههههههه حلوه سكر.. اذا كلو تمر يكفيهم حالي ومع القهوه المره ..
بعذر هالجيل اسنانهم تعبانه من ذا السكر لعب بحسبتهم ..

إقتباس هذي تكون عاده في آخر الليل .. اما الظهر والصباح والمغرب تكون العاده القهوه العربيه

حلوو هذي لها وقت والقهوه لها وقت ..

إقتباس وانا ما احب اصب

ياكثرهم اللي مثلنا بس اشووى هالحين طلعوو القهوجيات وارتحنا من عناء القهوه

إقتباس بانتظار الشاي <<مكسر الحديد ..

عاد هذا الشاهي قصه ثانيه ..<<مدمنة شاهي .. ان شاء الله بيجيه الدور ..
مشكوور اخوي الكلاسيكي على الرد الرائع والمتميز ..

.. عنفوان الابـ 15 ـداع ..

هلا والله وغلا اخوي عنفوان

إقتباس حنا نحط معها ( مسمار(عويدي) - هيل - زعفران - مستكه) وتطلع خياليه خاصة اا كانت من يدين الوالده

الله يحفظ الوالده ويخليها لكم وتشربوون من يدينها احلى قهوه
<<راح بالي لعلك مستكه مستكه اضافه جديده هو الظاهر يشبه اللبان ..

إقتباس يعني لازم ايطيح مني كم فنجال و املي الفنجال لين يفيض والخ الخ الخ

ههههههههههههههههه ياكثر هالمواقف والا اليدين ترتجف وتنافض صارت القهوه ارهاب منوول
شكرا اخوي عنفوان على المروور والرد الجميل ..

.. ...SoMe OnE...

هلا والله وغلا بأخوي المبدع SoMe OnE

إقتباس فـ ( السنع ) بات وشاحا يرتدي هذا الموضوع ,, وتفاصيله تعز الكلمات عن وصف مدى تكامله وتوافقه مع قرب فصل الشتاء وروعة القهوه العربيه في لحظاته ..

شكرا اخوي على الاطراء واللي اكمل روعة المووضوع ردودكم المتميزه .. واضافاتكم الثريه ..

إقتباس ولربما كان الاساس هو ( التمر ) يجعل من مذاقها نكهة هي الاروع بخلاف ما ان قُدمت يتيمه لـ وحدها ..

صدقت التمر ملازم للقهوه ومكمل لها كالتوائم دايم مرافقين لبعض .. واصلا القهوه لحالها ماتستساغ
الحلى او التمر يجعل لها طعم اخر ااذ اختلطت الحلاوه بالمروره .. وحتى الأجنبي عجبته مع التمر ..

إقتباس وصفه اخرى / يُقال ان شفط القهوه العربيه من الفنجال بـ واسطة عصا ( التويكس ) المكسور ومن بعد ذلكـ اكله .. له نكهه رائعه .. عني انا لم اجربها ولكن دائما اسمع هذه العباره من اخوتي بعد الانتهاء من اكل التويكس فـ دونما لا يشعرون .. تُغمض الحين ويبدا لحن ( اممممممم ) جربيها واخبرينا عن مدى حلاوتها ..

ههههههههههههههه شكرا اخوي الشيف SoMe OnE على الوصفه .. <<بديت تنافسنا
عاد تصدق اخواتي مدمنات تشفيط تويكس مع القهووه
عاد انا ماعمري جربتها مع انهم يعرضوون علي احب اكله كذا من دوون غطه بس ولا يهمك ابجربه وابعلمكم
ويقوول المثل التجربه خير برهان ..
اخوي SoMe OnE الف شكر لك ولإضافتك الرائعه والمتميزه والجميله ..

.. الكناري الأزرق ..

حي الله الكناري

إقتباس شخصيا لا احب شربها .. يعني ان حطوهـا فنجال و ان كثرت فنجالين و بس !

يارجال خذ فنجال ثالث

إقتباس اجيك و اكسر الاصبع من فوق و الاصبع اللي تحت اكسره و اغمس شوي منها بالفنجال و اشفط من فوووق قسـم بـالله يا طعم خيالي و لا الكاكاو يصير طعمه رهيب

يقولوونه طعم غير اجل ماشاء الله اعضائنا يحبوون تشفيط التويكس ..

إقتباس التوفي لك ابو نص ريال و هو سايح على بالي سنكرز

هههههههههههههههه توفي لك ذكريات منوول يلعبوون علينا يعطونا اياه على بالهم تويكس

إقتباس الظاهر ان العنوان بووه غلط اذا منب واهم

احوووول جانا سيبويه الزعيم هههههههههههههه الله يذكر الذيب الأزرق بالخير
هوو بالاملاء وانت بالقواعد .. الله يعيين طلابكم بكره ااذا طلعتوو مدرسين عربي
عز الله انواع التدقييق ..

إقتباس ابتكلم اذا كنت قاعدن اصب لشايب .. اتعذب كلمة قليلة بحقي ,,

هههههههههههههههه ياليت دايم يجيكم هذا الشايب مزدي فيك

إقتباس فنجال .. فنجالين .. ثلاثه .. و الرابع و الخامس و السادس و السابع همن اقول للشايب برب اخليهم يسون قهوة ثانية

هذوولي الفناجيل مقبلااات ههههههههههههه

إقتباس يصب الثامن و العاشر و الحدعش بعدين تقضي القهوة و اجيب الدلة الثانية و الرجال فال الحجاج القهوة عندهم صارت ادمان زي الهيروين اذا تركته ..

هم يطبقوون قوول ناصر العبدالكريم يقوول..
سبعة عشر فنجال لحنيف صبيت , , , لو هو قربـــة(دزربه ) قد ملاها
ياحليلهم طيب زينوو زمزميات وارتاحووو من تصليح القهووه كل شوي ..

إقتباس يعني اذا حطيت دلة بالمجلس و جيت بعد خمس دقايق و لقيته فاضية اعرف ان يا ابوك يا امك صار شايب

اجل نعتمد هالقاعده ... منتب سهل يابوو القواعد تسناري بيـه
مشكوور خيوو كناري على الرد الحلو واللطيف وخفيف الظل ..

دمتــم بخيــر .. ولي عووده للبقيه ..,,

عدنــــا ...
.. هلالي وشقاوي ..

هلا والله وغلا خيو شقاوي

إقتباس يخرب بيت عدوك

آميــــن ..

إقتباس انتبهو انتبهو لاتدمنون على القهوه

شكل الأخ متعقد هو الزين الإعتدال ..
شكرا اخوي شقاوي على الرد والمروور ..

.. تغريد ..

هلا والله وغلا خيتووو تغريد

إقتباس يعني يادووب في السنه مرتين

زين ماتخسرين اهلتس فنجال بالشتاء وفنجال بالصيف ههههههههههه

إقتباس انا افضل الشاهي على القهوه يعني مدمنة شاهي

هلا هلا انتي من جماعتي انا مدمنة شاهي وحطيت الموضووع لأن القهوه عشاقها كثار ..
تسلمين ياقلبي تغريد على الطله الحلووه والرد الجميل ..

.. هلالي الظهران ..

هلا والله وغلا بأخوي هلالي الظهران عاشق البران

إقتباس أوويلااااااااااااااااااااااه يا نفله ..

أوويلاااااااااه يامناحي هههههههههههه تذكرت مسلسل وضحى وابن عجلان

إقتباس وانا اقول وش هالريحه اللي اشمها من منتدى الجمهور وصاقعتن بدميجتي

ايه قهوتنا تشق الخشم من زينهــــا من جودتها دائما متميزه <<قالو من مداحتها

إقتباس قلت الحين بتقول علي الطلاق .. اذبحلكم تيس .. اعطيكم حلاوه .. اما ترا بزعل قويه هذي طيب ازعلي وطقي راسك بالطوفه بعد ..

ووووين تيس اصلا انا منيب اواطنه وشلوون تاكلوونه الحمدلله على النعمه
والحلاوو صراحه الزين غالي ومااشاء الله اعضائنا وحبايبنا كثار عز الله فلست
والقهوووه تبد عليكم وزياده .. افااا بسم الله علي همين يجيني ارتجاج واصير هلاليه رفلا

إقتباس وقال محاكيكم هلال بن ظهران المقفع : لا صرت بالبر والجو خلاوي ××× شب على الدله واضرب فيذا القدوعي

مهووب عاقل المتنبي ههههههههه احلى تقوولون فيذا مثلنا صح لسانك ياشيخ هلال ..

إقتباس خصوصا وان البارحه انكب علينا البرد بصوره مفاجئه في الشرقيه .. مع اني مدمن قهوه وشاهي ولو بعز القايله ..

اي والله وحتى حنا بالرياض جانا فجأه ماتشووف العالم اال لابسين جكيتات واكوات
قلت احوول اجل اذا جت المربعانيه وش بيسوون انتبه الادمان يودي للنسيان <<بتخووفه
ان

إقتباس شاء الله ربي يرزقنا بالمطر وتحلى النعيريه ,,

الله يرزقنا كلنا وتحلى الروضات .. الله يغيثنا ياررب ..
ميغسي خيوو هلالي الظهران على المداخله القميله واللزيزه ..

.. هلاليه سدير ..

هلا والله وغلا بخيتوو هلالية سدير
منوووره يابنت حتتي ..

إقتباس رييييييييحتها واااصلتن بيت جيرااانااا ماا شاء الله عليييتس ,,

ولووو ياعيب الشوووم لازم تصير زينه وريحتها تشق الخشم

إقتباس تسنتس دااريه اني هاليومين طاايحه اقهوي بهالحريم والله قهوتنا ولا كل القهااوي ,, مطيحه سوقهم

مشاء الله حركات يالسنعه ايه اكيد قهوتكم زينه ..

إقتباس يقالك تهز الفنجال D :

واحد يابنت الحلال بالعافيه على قلبتس ..
مشكووره خيتوو على المروور والرد الحلوووو مثلتس ..

.. الفارس الحائر ..

هلا والله وغلا اخوي الفارس

إقتباس القهوه أصبحت مصدر أساسي في كل بيت وعاده مستحيل تترك من الجميع

اي والله صارت من اعمدة البيت وبصراحه عاده جميله الله يحفظها صارت تجمع العائله ..

إقتباس من الجماعه الله يستر عليه لما جاء الدكتور يعطيه المخدر مانفع اعطوه تقريبا 6 ابر مخدره والرجال مافيه امل يخدر

يوووووووه الله يستر حتى القهووه صارت ادمان مشكله والله ااذ كانت تبطل مفعول البنج
شكرا اخوي الكريم على الرد الرائع ..

.. الماسه الزرقاء ..

حي الله مستشارتنا ميسوو
إلا

إقتباس مع "جمعة البنات" في الجامعة حيث يكون لها رونق خاص جداً ,,

صدقتي لها طعم ثاني وفلة حجاج وسعة صدر ودق حنك ..

إقتباس فإذا بي أملأ الفنجال ملياً

ودتس تفتكيين .. حنا برمضان وش سووينا جبنا فناجيل كبار تقل غضاره عشان نفتك من الصب
يشربون واحد والثاني بالكثير اصرف من الفناجيل الصغيره اللي تطيح يدتس وانتي تصبين
لا

إقتباس يدققن في ذلك الموضوع ,

زين اشوووى ..

إقتباس يعني حتى لو لم تكوني تشربيها فإنك بالتأكيد ستقدمينها لضيوفك ,,

صدقتي ..

إقتباس صبوا هالقهوة وقولوا يا حيا الله من جانا ليالي الهنا طلت وقلوبنا فرحانه نجمة هالعيد تلالي وعيوننا سهرانه يالله عساها الفرحة تذكرنا ولا تنسانا

يازينها تذكرني بالعيد ..

إقتباس يطلع لهم بالعرض صور دلال ووجار "كمار" قديمة وجديدة مع عرض لأبيات عن القهوة والدلة ,, وأعجبتهم جداً ,

والله حلوووه حركتكم شكلي ابلطشها وابسوويها ..
تسلمين ياقلبي على هذا الاطراء وشكرا على الاضافه الرائعه والمتميزه ..

.. دلع-20 ..

هلا والله وغلا خيتووو دلع منوووه المجلس الحمدلله على السلامه

إقتباس ادمان قهوه بجميع الانواع وطريقتنا بالقهوه العربيه مثل طريقتكم (بمااننا حولكم يااهل سدير فالطبع واحد )

ونعم فيكم خيتوو دلع اجل طلعتوو جيراننا الله يحييكم

إقتباس لانك ماراح توقف (امممم تطلع من صميم قلبك

اجل مثل برنقلز لما تفك ماحتسك ههههههههههههههه حمستوووني اني اجربه

إقتباس وبالنسبه للحلى مع القهوه شي اساسي ويمكن نشرب قهوه بس علشان الحلى الي معه

اكيييد اهم شئ عاد ماشاءالله انواع واشكال ..

إقتباس وعندي عقده بصب القهوه خاصه لما تكون مفتوحه وتصب كثير ولاتدرين وش تسوين والي قدامك كبيره بالسن يالله يالله فشيله !

لا وفيه بعض الزمزميات تسووي فيتس مقلب ماتصب والا مثل ماقلتي تصب كثير وتملى الفنجال
بس الحريم اهوون من الرجال يتقبلوونها شووي ..
الله يسلمتس يالغاليه يادلووعة المنتدى وميرسي اووي اوووي على الرد الحلووو مثلتس ولاتقطعين فينا ..

دمتــم بخيــر .. ولي رجعه للردوود على الباقيين بإذن الله .. ,,

الله يعطيس العافية

إقتباس همين جيبو الترمس (زمزمية القهوه)

زينة القهوة بالدلة

إقتباس اكره ما عندي اذا شفت القهوة بالترمس (( زمزمية عشان يفهم البعض )) .. نظامي نظام شياب لازم تكون دلة والا منب متقهوي

شرحك سرا ياصدى !!

شكرا لك ياهلالية سنعة على هالموضوع السنع ,,

موضوع متكامل ,, ومفيد ,, تحياتي لك ,,

هلالية سنعة الله يعطيك العافية موضوع رائع وجاء في وقته ..

إقتباس برأيكم هل الدله اصبحت من التاريخ والتراث ورمز للكرم ...؟؟؟

بشرب من الدلة ولو كانها سم & ما اهز فنجالي ولا اقول كافي

إقتباس فوائـــــــــــد القهـــــــوه ..

أغلب ماقلتيه من الفوائد للمرة الاولى اسمع بها , وللمعلومية فقط { الشيء اذا زاد عن حده انقلب ضده }

إقتباس هل تتوقعون ان القهوات الغربيه سحبت البساط من القهوه العربيه عندالجيل الجديد ..؟؟ وهل ستظل القهوه العربيه شامخه وباقيه في الاجيال القادمه..؟؟

مع انني من مناصرين القهوة التركية , الا انني ارى انه من المستحيل ان تسحب القهوات الاخرى البساط من القهوة العربية .
وبإعتقادي ان القهوة العربية ستظل خالدة إلى أن يرث الله الارض ومن عليها .

بصراحة اثرك فنانة بتصليح القهوة

وخبيرة بعد بتقديمها

ما شاء الله عليك الله يخليك لاهلك

مشكوره اختي بس انا عمري ماشربت قهوه عربيه سعوديه اتمنى اشربها بس ما اعرف
اصلحها اتمنى اتعلمها لاني ما اشرب الا قهوه من يدين الوالده قهوه مغربيه بس مو حلوه
وان شاء الله لما اجي السعوديه اشربها