وين كنا و وين صرنا ؟!!؟ - نادي الهلال السعودي - شبكة الزعيم

صدى الامس · #1 06/11/2006, 11:45 PM

بين الامس واليوم وين كنا ووين صرنا ؟؟
وش اللي صار ؟؟ ووش اللي تغير ؟؟
بعد ما كنا حبايب صرنا تسذا ؟؟
افا بس ما هقيتها منك !!

ايه يازمان اول ..
كله ضحك وفرفشه ..
يازينك يا زمان اول نت ..

يازين لحظاتنا عند الغروب ..
ومعنا ترمس الشاهي والفصفص ..
والفرشة المشقوقة ..

يازين شاهينا وهو من دون سكر ..
وش لنا والسكر ..
من تالي ارتفع سعره ..

يازينها هذيك الايام يوم القلوب متصافيه ومتحابه ..
ماعقبها يوم تلزخني بالطفاية وتقول يا صدى قرب الفش فاش لا تخلصه علي !!

تذكر ..
تذكر يوم الخك بالبلكه واقولك عسى ما تعورت !!
تذكرها ؟؟
يوم تقلب وجهك ؟؟
ادري انك تعورت وخنقتك العبرة !!
ما تنلام لانها بلكة ما ادري وشلون انا شلتها اصلا .. !!
تذكر يوم تقول يا صدى الله يرجك انت ومزحك !!

اكيد تذكرها ؟؟
اما لو تقولي نسيتها صدقني بيكون آخر مابيني وبينك ..
انا اخبر ناس تنسى وشلون صفقوا العالم بس انك تنسى وشلون انصفقت كثر منها !!

وينها هذيك الايام يوم كنا ننام بالسطح ..
صح ما تجي الساعة 7 ونص الا حنا صاحين من الشمس وحنا ما نمنا الا 7 و 25 ..

آه ياهذيك الايام .. يوم علك طرزان ..
يوم كنا نشتريه بـ 10 ريال ونبيع على العالم ونكسب 20 ريال ..
تذكر بسطتنا اللي كنا نبيع فيها كت كات وتويكس .. والكاكاو المثلث ..
تذكر يوم كنا نبيع البالونات اللي نشرتيها بعد بـ 10 ريال ..
ونخلي الناس تسحب كل بلونتين بـ ريال ..

تذكر يوم كنا اول ما نشتري البالونات اول رقم نشيله رقم التفيخه الكبيرة !!
عشان كلن يتحمس ويتوقع انه يبي يكسبها !!
تذكر يوم كنا نخلي الناس تدخل دورة المياة
عشان يعبون التفيخات مويه عشان يحلتونها على بعض ..!!

ياليت ايام التفيخات ترجع وعلك طرزان ..

تصدق ياليت اننا ما تعرفنا على بعض كان احسن !!
كان انت الحين في بيتكم مرتاح ومبسوط وانا في بيتنا مرتاح اكثر واكثر..

اصلاً انا الغلطان اللي تعرفت عليك ..
لانك منتب كفو ..

صديقك اللي ما تحسف عليك

صدى الامس

عيال وش السالفة .؟؟

صدق تراني ماادري وش السالفة
كل اللي فوق مهوب انا اللي كاتبة جيت ولقيت مفتوح موضوع جديد !!

بعض الاعضاء كتب لنا ذكرياته ايام الدراسة ..
وشفنا وشلون المدرسين متبهذلين ..
همن اذا قلت لـ اي واحد انك مدرس ..
قال ايه فالها اجازات ودلع !!
انا ودي بس كل واحد يمسك عياله يدرسهم ساعه وحده بس ..
طبعاً الشياب اللي في المنتدى يدرسون احفادهم ..
والا ما يحتاج لاني ادري انهم لحقوا على الكتاتيب ..

على طاري المباريات
ليش ما نقلت الجزيرة مباراة اليوفنتس ؟؟

صح يقولون ان فيه اكتتاب هاليومين ؟؟
صدز هالكلام والا لا ؟؟
تراني اسأل من جد والله وما استهبل ..

على طاري المنتدى
اذا غبت عن المنتدى اسبوع ما اعرف ارجع على طول ارد ..
فيه احد نفس حالتي ؟؟
لاني دايم اعاني من هالمشكلة

!!
اجلس اقرأ المواضيع لمدة اسبوعين همن اخربط كلمتين واضغط اضافة موضوع ..

على طاري الاسنان
وش احسن معجون اسنان ؟؟

الزبدة ..

× ياحظ اللي يعرف يكتب ..
× ياحظ اللي عنده صديق عمره للحين ..
× ياحظ اللي متواصل مع المنتدى طول الوقت ..
× ياحظ اللي عنده اتصال فوق الميغا ..
× يا حظ اللي عنده علك طرزان ..
× ياحظ اللي يعرف ينسق الموضوع ..

نصيحه لحد يلزم انه ينزل موضوع والا بيتوهق

!!

شكل الموضوع ملغم بـ الأخطاء

سهل · #2 07/11/2006, 12:06 AM

رصاصي يمين - بني وسط - ازرق يسار
شكلك مندس

أو خل نجيبها من زاويه اخرى
استشاري يمين

- مجلس اداره وسط - اعلاميين يسار

يا حظ اللي يعرف يكتب رد

وذكرتنا بمزعل الله يهديك

إنســـــــــان هلالي · #3 07/11/2006, 12:14 AM

اقـــول ياحـظك عرفت المنتدى من 2001

فرصه ضايعه · #4 07/11/2006, 12:51 AM

ياحظك تغيب وتكتب موضوع على الأقل:sad:
مب مثلي اغيب مالي خلق ارد ولا اضيف موضوع مدري وش جاني:sad:

لي عودة سريعه بروح اتعشى

,,

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

باااااااااااااك ...

إقتباس


	بين الامس واليوم وين كنا ووين صرنا ؟؟ وش اللي صار ؟؟ ووش اللي تغير ؟؟ بعد ما كنا حبايب صرنا تسذا ؟؟ افا بس ما هقيتها منك !!

من أولها حزن :sad: ....ناقصها دقه حزينه

>>> حرام الموسيقى يابنت

إقتباس


	يازينك يا زمان اول نت ..

إيه والله صادق:sad: ....
أموت وأعرف ذا اللي يمدحون سعودي نت وش لاقين فيها

>>> كني شطحت بعيد

إقتباس


	ماعقبها يوم تلزخني بالطفاية وتقول يا صدى قرب الفش فاش لا تخلصه علي !!

يازينه من فش فاش

ولا يهون خواتم

إقتباس


	تذكر يوم الخك بالبلكه واقولك عسى ما تعورت !! تذكرها ؟؟ يوم تقلب وجهك ؟؟ ادري انك تعورت وخنقتك العبرة !! ما تنلام لانها بلكة ما ادري وشلون انا شلتها اصلا .. !! تذكر يوم تقول يا صدى الله يرجك انت ومزحك !!

بلكه مرتن وحده

يقلع أبو المزح اللي كذا

طيب سؤال ليش مزحكم ثقيل يالشباب

؟؟؟
ودايم مزحكم بأخوياكم في يوم عرسهم :sad: .... مدري حاسدينهم مساكين:sad: ولا وشوله ذا المزح

بقولك قصه واحد متحدينه عيال عمه من زمان

قالوا له تتحدانا نخليك ماتحضر عرسك

...

قال اتحداكم

...ويوم يقولها ماكان يدري أنهم جادين:sad:
ويوم جا عرسه وياخذونه من عند الحلاق وماتشوف إلا غبرتهم وهم يعجعجون به بالبر

ياعيال الحلال وين موديني

مابقى شي على عرسي يالله يمديني اتكشخ;) ....
وهم ماهمهم

...
بالأخير نطلوه في البر وربطوه وانحاشوا عنه

....

ويوم جت صلاة العشاء وأهله يدورونه ولا له ضيحه:sad: ....
قالوا أن شاء الله يلحقنا بنروح للقصر على الأقل نستقبل الضيوف

...

وذا مسيكين ماقدر يسوي شي

ومنقهر وده يقتل عيال عمانه كلهم اللي مسوين فيه كذا

...

ويرحمه ربي ويمر من عنده الظاهر بدوي ويفكه ويوصله للشارع وبعدين سيدا على البيت بياخذ مسدس معه من القهر :sad: ....

ويروح للقصر

وأهله مايدرون وين يودون وجيهم من الفشيله مايدرون وين راح له ولدهم ولا يدرون عنه أي شي :sad: .....

ويوم وصل وهو اللي يشهر سلاحه ويقول وينهم وينهم

ويوم شافوه أهله ولاه مبهذل وحالته حاله:sad: ويجلسون يهدونه يبون يعرفون منه السالفه

في الأخير اكتشفوا أن عيال عمه سووا تحديهم اللي قد تحدوه من زمان

عاد بالله هذا شي ينمزح فيه

....
تخيلوا حاله العروس بذيك اللحظه

وشلون انشل تفكيرها من كثر مافكرت وين راح له عريسها

برب :sad:
بروح اكمل صياحي كل ماقلتها تأثرت

تخيلت لو أنا موقفها

وياكثر المواقف اللي عندي:sad: بس انتم افتحوا موضوع

وابشروا بالقصص اللي تدمع العين

تيت

...

ايه وين وصلنا .......

إقتباس


	وينها هذيك الايام يوم كنا ننام بالسطح ..

الله يالدنيا :sad: ....
ونفرش فراشنا من يذن العشاء عشان لا جينا ننام عليه ولاه بارد

إقتباس


	اصلاً انا الغلطان اللي تعرفت عليك .. لانك منتب كفو ..

يؤ يؤ يؤ يؤ

.....
وش سوا لك ماقلت لنا

إقتباس


	همن اذا قلت لـ اي واحد انك مدرس .. قال ايه فالها اجازات ودلع !!

إيه والله دايم ذا المقوله معهم

....
المشكله خربوا عليكم:sad: وانتم خربتوا على الطلاب إجازتهم

إقتباس


	على طاري الاسنان وش احسن معجون اسنان ؟؟

كلش جربناه

وكل ماقضى واحد جربنا الثاني ولافيه فايده

.....
إذا عرفته لا تنساني

<<<< ابي اطلع زي ذا

إقتباس


	× ياحظ اللي عنده اتصال فوق الميغا ..

هو فيه أحد بالسعوديه عنده ذا السرعه

إقتباس


	نصيحه لحد يلزم انه ينزل موضوع والا بيتوهق !!

هذي دايم افكر فيها

....
اكتب موضوع بالنسبه لي اسهل من الرد عليه

يعطيك العافيه صدو على موضوعك اللي شدني من البدايه للنهايه

عذرا على الإطاله;) بس سالفه مزحكم حمسني اكتب القصه:sad: ....
<<< من زمان ودها تناقش سالفه مزح الشباب بس متعيجزه تكتب موضوع

عاشق الزعيم من اليمن · #5 07/11/2006, 01:11 AM

ما أقووول إلا آآآآآآه وآآآآه لو تدري يا صدى البارح إن حنا فقدنا زمان أول .

ألا ليت الشباب يعود يوماً فأخبره بما فعل بزارين هالأيام،، قصدي شباب هاليومتين .

المهم مدري الظاهر إن سهل حلل الموضوع من زاوية عكسية بس بصراحة يصلح محلل فضائي ، فاهمين فضائي مو كروي يعني يحلل الفضاء وأشعة الشمس والنجوم خخخخخخخ. أو كروي يعني يحلل الكرة الأرضية خخخخخخخ <<<<<< يمديكم على خخخخخخ

إلا على طاري ((الدروج)) : هذي اللي ردت قبلي هي ((هجمة ديسلفا)) وإلا أنا غلطان؟؟

_________________________________________________________________

علي رد زي وجهي بس لا تلوموني لأني منذ مبطي وأنا مبتعد عالنت.

ينطيك العافية عم صدى ونشوفك على خير

قفلة

نفسي يرجع الزمن للخلف وأشوفك عام 2002 !!!!

...SoMe OnE... · #6 07/11/2006, 01:25 AM

,,,
,,
,

صــدى الامـس ..

ياهلا فيكـ والله ..
في اول الموضوع .. قلت الدعوى فيها تقليب ذكريات .. وغبره تبي تطلع ..
لكن من يوم ماشفت قناة الجزيره ومباراة اليوفي .. قلت مالها دخل ابد

هي بـ طبيعة الحال خواطر وذكريات وفي نفس الوقت معاناة واقدر اقول امنيات .. اروع مافيها جت على طبيعتها ..

إقتباس


	اذا غبت عن المنتدى اسبوع ما اعرف ارجع على طول ارد .. فيه احد نفس حالتي ؟؟ لاني دايم اعاني من هالمشكلة !! اجلس اقرأ المواضيع لمدة اسبوعين همن اخربط كلمتين واضغط اضافة موضوع

صادق والله .. وزين ماسويت ..

اعذب تحيه لكـ يالغالي .. وكل الاماني لكـ بدوام التوفيق ,,

****

كن بخير
...SoMe OnE...

الـــوردة الزرقاء · #7 07/11/2006, 01:35 AM

إقتباس


	تذكر ..

إقتباس


	تذكر يوم الخك بالبلكه واقولك عسى ما تعورت !!

ياصدى اسمها بكله بكلـه

..
...

...

...

واخيرا....>>فرحااانه

لقيت خطأ.

إقتباس


	على طاري المنتدى اذا غبت عن المنتدى اسبوع ما اعرف ارجع على طول ارد .. فيه احد نفس حالتي ؟؟ لاني دايم اعاني من هالمشكلة !!

:sad: انا دايم كذا

.,

ياليت اذا لقيت حل تقوله لنا ..

إقتباس


	يازين شاهينا وهو من دون سكر .. وش لنا والسكر .. من تالي ارتفع سعره ..

اعجبتني..

إقتباس


	الزبدة .. × ياحظ اللي يعرف يكتب .. × ياحظ اللي عنده صديق عمره للحين .. × ياحظ اللي متواصل مع المنتدى طول الوقت .. × ياحظ اللي عنده اتصال فوق الميغا .. × يا حظ اللي عنده علك طرزان .. × ياحظ اللي يعرف ينسق الموضوع ..

× ياحظ اللي ماعنده اختبار بكره..

عندي اختبار كيمياء وقلت خليني امر على مجلسي اشوي ...;)

ادعولي اخذ درجه كامله ما انقص ولا ربع درجه ..
عشان المعدل ماينزل

...

***والله عليك تنسيق والوان

>>احسن مني فاشله جدا بالتنسيق :sad:

إقتباس


	تذكر يوم كنا اول ما نشتري البالونات اول رقم نشيله رقم التفيخه الكبيرة !! عشان كلن يتحمس ويتوقع انه يبي يكسبها !! تذكر يوم كنا نخلي الناس تدخل دورة المياة عشان يعبون التفيخات مويه عشان يحلتونها على بعض ..!!

ذكريات تعور القلب بصراحه ...

تذكر ايام الرشاش المويه ...!!
والوانه احمر وازرق واصفر ...!!

لا تقول ما اذكره...""
تدري وين يبعونه الحين ...؟؟!!
لأني ابي اشتريه ..؛؛

:
الــوردة الزرقاء

الكلاسيكي · #8 07/11/2006, 01:49 AM

هــلا وغــلا بالغــلا صدى الدجه .. ;)
تصدق عاد انيقاعد احش فيك هذاك اليوم .. واحد(ن) الله يهديه غلط
خطأ املائي قلت والله مهوب فيه صدى والا كان سوا موضوع علشان يصحح الخطأ :p
نا قلت هذا الكلام علشان ماتصير غيبه <<اصلا مدح يعني انك مدقق املائي خطير ..

والايام اللي راحت ماترجع <ماجبت جديد ..

لا عن جد يعني الواحد لما يتذكر الاول يقول ياليتها تعود ايام الوناسه والفله والحياة الطبيعيه البسيطه ..
الحمد لله تمتع في حياتك بكره بعد بتقول ياليت هذي اللحضات تعود .. وهذا حال الحياه ..

اما بخصوص التدريس الله يكون في عونكم .. والله اني لما اجي ادرس اخوي (طبعا اوقات الفضوه)
يرتفع ضغطي ويطق عرق جبعتي من دلاخته .. او اني ما اعرف ادرس ولا اصلح مشروع مدرس لاني عصبي

..
وانت يالله حسن الخاتمه .. ماباقي شي .. لحقت على كل شي بسكوت الريكو(ابو لزقه) وابو ولد والميزان .

.
بس تصدق ان حركات البونات هذي اسويها .. وافتح القرطاسه واقز رقم الكبيره

من ناحية الاكتتاب انا جاني منه اكتئاب وخاصه لما جاء اكتتاب بس مدري وشو بالضبط الصرافات ماصارت
تتقبل الواحد انه يكتتب .. وعدت للبيت مطأطأ الرأس ..:sad:

وانا معك بعد اذا الواحد اذا غاب عن المنتدى ولو ثلاث ايام لما يجي مايعرف لا يرد زي الناس
ولا يكتب مواضيع وتصير لياقته في الكتابه مش ولابد .. لان الجو يحس انه تغير .
اومايدري وش يرد وش يخلي..

والله وانا اخوك اللي ماله صديق العمر في هالوقت بيضيع .. اقل شي يلقى واحد يفضفض
له هموم التدريس والعزوبيه <<مايقصد احد ابد ..

في النهايه ..
ياهلا فيك .. وبموضوعك الممتع ...
بس سهل ماشاء الله عليه اكتشافه خطير ..

ودمت بخير اخي العزيز ..

برعاية سيجنال تو <<

لاحظ الاسنان ..

هلالي القرعاء · #9 07/11/2006, 01:52 AM

أي خطأ يا الوردهـ ! :p

بلكـّه يعني بلكـّـه وليس بكله ..

البلكـّـه اللي الصعايدا يلعبون فيها بلوت

ان شاء الله عرفتيها ..

....

دخلت ماداير أرد .. قلت أرجع بعدين .. بس إستوقفتني هالنقطه :p

وبس أبقول الوردة + عاشق الزعيم من اليمن ..

وش هالغبار اللي جاء معكم :p

صدى الدجه (الدقــّـه) بالمصري ..

لي ريوس :p

هلاليه سنعه · #10 07/11/2006, 02:27 AM

اخوي صدى الامس موضووعك فله وش زينه ..

إقتباس


	وش لنا والسكر .. من تالي ارتفع سعره ..

ههههههههه ارتفع سعره ويرفع السكر يجوز العيد بلا حنا ..

إقتباس


	الفش فاش

على طاري الفش فاش يازين بفك الامارات القديم مع الشطه

بس انصحكم لاتكثروون ..

إقتباس


	صح ما تجي الساعة 7 ونص الا حنا صاحين من الشمس وحنا ما نمنا الا 7 و 25 ..

ههههههههههههههههه ماشاء الله نومكم شووي اول خمس دقايق .. ولا عشان الشمس تحمسكم

إقتباس


	والكاكاو المثلث

من زمان عن الكاكاو المثلث الاصلي وينه فيه يلعبون علينا هالحين مقلدينه
لا وحاطين وويفر .. الله يرحم زمان اوول يووم بطاطس الخواتم كنا نحطه خواتم
همين نقرمشه حبه ..حبه ..

إقتباس


	كنا نبيع البالونات اللي نشرتيها بعد بـ 10 ريال ..

ماشاء الله كنت مخ تجاري يووم انك صغير

إقتباس


	عشان يعبون التفيخات مويه عشان يحلتونها على بعض ..!!

وين وزارة المياه عنكم .. هم يقوولون ترشييد وانتم طايحيين تطشير ههههههههه

اخوي صدى ذكريات حلوووه وتووسع الصدر .. يالله كل شئ اوول حلووووو
<<<اللي يشووفها يقول مخضرمه ههههههههههههه
اخوي صدى راعي التووت <<<على طاري التووت ..ماكنت تشتري توت اللي يبيع بأكياس
اللي على بالهم عسكريم ههههههههههههههه..
اخوي صدى لاتقطع عن المنتدى ومواضيعك روووعه خلك واصل ..
دمت بخيــر..,,

الـــوردة الزرقاء · #11 07/11/2006, 02:32 AM

^^^
>>>> قات الوليه تفرح مالئت لهاش مطرح

انا حاسه انه مو كان قصده البكله ..

هلالي القرعا وشو البلكَه ما اعرفها هاتوا صورتها ...>> والله بريئه

الله لايفشلنا ..

برايفت صدى
هذا والموضوع ملغم بالاخطاء

تيماوي · #12 07/11/2006, 06:00 AM

إقتباس


	على طاري المنتدى اذا غبت عن المنتدى اسبوع ما اعرف ارجع على طول ارد .. فيه احد نفس حالتي ؟؟

@ مي تو ...

@ يمال العافية يا صدى كل الأزمان ...

سندريلا الهلال · #13 07/11/2006, 06:41 AM

الله يعطيك العافية صدى الأمس

إقتباس


	تذكر يوم كنا اول ما نشتري البالونات اول رقم نشيله رقم التفيخه الكبيرة !! عشان كلن يتحمس ويتوقع انه يبي يكسبها !! تذكر يوم كنا نخلي الناس تدخل دورة المياة عشان يعبون التفيخات مويه عشان يحلتونها على بعض ..!!

مامعنى يحلتونها؟ انا من خلال تحليلي لها عن طريق الكلام اتوقع بمعنى يرمونها صح ولالا

اصير بعد مثل الوردة مدري وش السالفه

ترى مهنا شيء اسرع من الطنزه هالحين

اما البالوناات من مايحب يلعبها اصلاً من يكره اللعب في المويه اصلا هذي لعبتي المفضله البالوناات لو العبها لحالي

ـــــــــــــــــــــــــــــــــــــــــــــــــــ

ذكــريات روووعه .. بس الصراحه بعد ان تدريسكم نعمه ونااسه التدريس واكبر نعمه على الواحد فيكم انه مدرس خصوصا اولى ابتدائي عز الطلب يكفي انك تدرس ناااس بريئه

بصراحة كل شيء كــوم ... ورد الوردة الزرقاء كوم ثاني أجــل البـلكّة .. بكله

وش جاب لجاب

اجل ماتعرفين البلكّه ماقد شفتي عماره تنبني

.. اسألي قولي وين البلكّه ويورونك اياها

ويين تبين صورتها الفيصليه على غفله

تراها بلّكه مو عماره

ــــــــــــــــــــــــــــــــ
كل الشكر لك ولاحيائك ذكريات الجميع

alhawey · #14 07/11/2006, 08:28 AM

ياهلا والله وغلا بصدى الامس

وشلونك يابعدي؟

يامال العافيه على هالملخص السريع لأيام كانت ممتعه صدز، تلقى فيها بساطه وأكشن واثاره ووناسه وفلة حجاج

إقتباس


	ياليت ايام التفيخات ترجع وعلك طرزان ..

اي والله انك صادز

الحين البزارين يشترون ويبيعون بالاسهم ويسولفون عن محاكمة صدام واذا خربوها طرحوا موضوع سلاحف الننجا للنقاش

إقتباس


	الزبدة .. × ياحظ اللي يعرف يكتب .. × ياحظ اللي عنده صديق عمره للحين .. × ياحظ اللي متواصل مع المنتدى طول الوقت .. × ياحظ اللي عنده اتصال فوق الميغا .. × يا حظ اللي عنده علك طرزان .. × ياحظ اللي يعرف ينسق الموضوع ..