جنة الأطفال بيوتهم ( بطاقة زفاف ) - نادي الهلال السعودي - شبكة الزعيم

عابر القارات بالريوس · #1 04/11/2006, 10:42 PM

بعد غياب طويل أحب أعلمكم وش سبب الإنقطاع

أنا إنسان دبدوب شوي وزواجي نهايةالشهر الجاي

فلازم الواحد يخفف فمنشغل بيت ترتيب عش الزوجية وتخفيض كرشتي الملتوية

المهم نرجع للموضوع بدون مقدمات كثيرة ..

جتني بنت بنت عمتي وقالي زواجك قرب صح قلت له صح قالت وأنت بتسوي عرس صح ولا لا
قلت إلا قالت وبتعزم ناس صح ولا لا قلت صح قلتله انجزي بلا أسئلة ..
قالت شوي شوي علي قلتله طيب يلا اسمع وش تبين قالت أقولك شي ما تزعل قلتله طيب
قالت وبأطلب منك طلب تسويه قلت ايه افففففففففف طفشتيني بسرعة
قالت خلاص بأقول قالت لا تكتب على بطاقة الزواج نوما هنيئا لأطفالكم ودي أعزم صديقاتي وهي بصف ثاني ابتدائي(طبعا هي ضامنة تدخل لأني أقربلها )
قلت ايه طيب أشوف اشوف قالت انت قايلي أسوي الي أطلبه منك قلتله خلاص اعزميهن

راحت وهي مستانسة المهم بعدين فكرت بجدية بالموضوع لماذا يكتب على بطاقة الزفاف

* ممنوع اصطحاب الأطفال ..
* جنة الأطفال بيتوهم ..
* نوما هنيئا لأطفالكم ..

لماذا هل الأطفال يتسببون بالإزعاج في الزواجات أما عادة جرت وسرت سؤال حيرني وعجزت أن أجد له جوابا

فأعينوني حتى أقرر هل أكتب هذه العبارة أم لا أكتبها ...

تحياتي وشكري
علما أن جميع النساء المقربين لي يرفضون فكرة الأطفال

عابر القارات بيتزوج أبوي مب مصدق وأنا نفسي منب مصدق وضايق صدري بعد

m2006 · #2 04/11/2006, 10:57 PM

مبرووووك
منك المال ومنها العيال
والله يعطيك خيرها ويكفيك شرها<<<<يازيني ساكته

بالنسبه لي اذا عرفت ان الزواج مو بطاقات خاصه
يعني فيها اطفال ما اروح خير شر

عابر القارات بالريوس · #3 04/11/2006, 11:25 PM

جزاك الله خير

بس السؤال ليش وش السبب ؟؟ ما تروحين

الهلال موتي · #4 05/11/2006, 12:37 AM

أولاً الف مبـروكـ .. مُقـدماً ..

ثـانياً .. تُـكتب هذه الكلمات على الدعـوات حتى لا يزعج الأطفـال الضيــوف .. وما شـابه ..

وانا لو كُنت مكـانكـ .. سـأتـرك ( البرستيج ) قليلاً .. وأعمل ما أراه مُبـاسباً لي ..

فـكر .. إستشيــر ..إستـخير ..

والتفـكير بيزول إلى غير رجعه في هذا الموضوع بإذن الله ..

هلاليه سنعه · #5 05/11/2006, 01:21 AM

ماشاء الله .ألف ..ألف ..مبروووووووك اخوي عابر القارات ..
الله يتمم لك على خير ويجمع بينكم بخير ويووفقكم ..

..

انا بصراحه .. لا أؤيد حضور الأطفال الصغار ..
أؤيد فقط حضور البنات المقربات مثل ماقلت ..
والبنات اللي في سن 11 و12 فما فوق ..
بصراحه الأطفال ماتناسبهم هذي الحفلات ..
فهم كثيري الطلبات والاحتياجات ..
وكثيري الحركه ..لازم فيه احد ينتبه لهم ..
ويسببون ضجييج وازعاج قد يفسد الحفل ..
كلامي قد يزعج البعض لكن هذي حقيقه ..
الاطفال الاماكن الي تناسبهم ملاهي ..اسواق ..
مناسبات عائليه ..
اما عن كتابة العباره .. القرار بيدك ويرجع لك ..
وعلى العمووم اخوي عابر طبيعي انك بتحس بضيقة صدر
لأنك مقبل على حياة جديده .. لكن تووكل على الله وبإذن الله
امورك بتتيسّر ..

الكلاسيكي · #6 05/11/2006, 01:39 AM

انا اتوقع انها جرت العاده على كذا ..
حنى لو ماطلبوا من الطابع انها يكتبها راح يكتبها اكيد ..
لان اكثر السعوديين صاروا يكتبونها مع ان المثير من الاوقات لا يُعمل بها ..
يعني بس للتخفيف .. وكل هذا طبعاً لان بعض الزواجات يكون فيها زفه والاطفال
يسببون مشاكل ويزاحمون وقت الزفه .. بس المشكله وش يسوون بابنائهم ..
يحطونهم عند الجيران .. اذا كان كل اقرابهم حاضرين للزواج !!

وازيدك من الشعر بيت ..
الآن في بعض قصور الافراح صاروا يحطون قفص للاطفال وقت الزفه يدخلون الاطفال
فيه وانواع البكبكه .. والصياح .. والام المسكينه قلبها على طفلها ..

خلها على ربك ..

دمت لنا بخير ..
والف مبرو ك مقدما ً ..

هلاااااااااالية · #7 05/11/2006, 05:10 PM

هلا يا عابر القارات

الف مبروك

منك المال ومنها العيال;)

بصراحة اشين شي عرس يصير فيه بزران

اقسم بالله تحوم كبدي

اللي تصيح عند امها مرتاعة من صوت الطق:sad:

واللي مضيعة امها وقاعدة تصيح بس ع الصامت

وحالة طوارئ

انا عن نفسي ما احب عرس يجي فيه بزران

كله حوسة وبربسة

اصلا" ما يبين الشي اللي محطوط والسناعة من حوسة هالمبزرة

وحرام تتكلفون وتزينون وكلش وفي النهاية محد يشوف الزين;)

نصيحتي لك يا عابر واتمنى انك تسمعها

لا تعزمون بزارين

اصغر وحدة في العرس عمرها 12 او 13

اسال مجرب

في عرس خالي جو بزارين واجدين تصدق الامهات ما جو ومروحين لنا بزارينهم

لكن مرت خالي حجرت لهم في غرفة وبنت امها اللي تطلع منها

والف مبروك مرة ثانية

الكناري الأزرق · #8 05/11/2006, 06:40 PM

مبروك منك المال و منها العيال و بالنسبة للبزارين ما عندي خبرة بهالامور اصلا الزواجـات كل ابـوها ما احـب اروح لها ..

هلاليه سدير · #9 05/11/2006, 06:42 PM

اول شي الف مبروك يارب

ثاني شي ,, عرش فيه بزاارين وااااااااع

واااع ونص

يجونك كلهم سعابيل ,, والا يجي بزر ماكل شوكلاته ويمسك فستان فلانه

والا ذي تصيييييييييح ومتعلقه بأمها ,,

يعني انواع القرف صراحه ,,

كله كوم وعرس وحده من الجيران كوم ,, كان بالعرس بزارين

وقاموا يطاامرون ويراكضون ويلعبون غميمه الظاهر

وفي الأخير طيحوا الكووووشه

يعني وش حادهم على البربسه

خلهم ببيتهم ينامون اصرف واريح

مقدر الهلال · #10 05/11/2006, 06:50 PM

هلا وغلا اخوي بعابر القارات بالريوس
اول شي الف مبرووك منك المال ومنها العيال والله يوفقكم
ويجمع مابينكم بالخير

ثانياً : صراحه مسألة عدم دخول الاطفال يسبب زعل بين الاقارب باختصار الزعلان
اكثر من الراضي واكيد بيجيكم احراجات من الاقارب نبغى ندخل بنتنا وصعبه تردونهم
ياما تدخلون اطفال الاقارب او خلهم يقعدون في جنتهم وتأكد ان مجئ الاطفال سوف يسبب
خراب العرس لأن اطفالنا بسم الله عليهم فيهم حركه غير طبيعيه

نصيحه

والله انا زواجي كان عائلي علشان هالبزارين لو تحطه عائلي صدقني بتريح عمرك من تكاليف العرس
والطقطقه وخل فلوسك اللي بتصرفها للزواج رح انت وزوجتك احلى شهر عسل

واذا تبغى مساعده فاخوك حاضر

تحياتي لك / ابو ليان

juve1897 · #11 06/11/2006, 12:59 AM

ياخي البزران بينامون عليك ويسوون زحمة أحسن شي تخليهم في البيت

اسأل مجرب ولا تسأل بنشري كفرات وفي رواية لبعض أهالي جدة عجلاتي

تغريد · #12 06/11/2006, 03:08 AM

اول شي الف مبروووك ان شاء الله

الله يوفقك ويسعدك ويتمم لك على خير.......

بالنسبه للصغار
انا بصراحه مااحب مشاغبتهم وتنطيطهم في الزواجات خخخخخخخخخ
احس يفشلووون
يعني مثلا مثلا
في الزفه
احلى واهم شريط في حياتك بيتسجل
تلقى فجاه طفل ماشي ومطنش ابو الدنيا لوووول
وباليااالله توخره
ولا صوت طفل يبكي
كل مابتشوف الشريط بتنقهررر خخخخخخ
لامررره بروبلم!!

امممممم المشكله ان بعض الحريم يزعلون!!
يسبب احراج لاهل الزواج

انا اشوف احسن شي
يكتبون جنة الاطفال بيوتهم
والي تجيب بزرانها عاد الشكوه على الله يدخلونها خخخخخخخخخ

لكن المفروض الام يكون عندها ذوووق شويه وتمسك بزرانها

>>>ماتلاحظوني تحمست!

مبروك مره ثانيه

عابر القارات بالريوس · #13 16/11/2006, 03:42 PM

أشكر كل من رد وأدلى بدلوه

واعذروني لا أستطيع الرد عليكم كل واحد باسمه لانشغالي بزواج أم العيال

والله أعلم اني بطلعها من صالة العرس على النفود اطعس فيها علشان أوريها حياتي من أول يوم وبكل صراحة

رفيق الزعيم · #14 16/11/2006, 05:50 PM

كثير من الناس يكتب بعض العبارات يحس تطور و من القبيل

G o L d E s T · #15 16/11/2006, 08:21 PM

اول شي مبرووووووووك

والله يا أنا من زمااااااااااااااان ما حضرت زواج بقصر

غالب الزواجات تصير عائلية

اما البزارين أسألن انا

يوم كنت صغير دخلت بقسم الحريم انا وعصابتي

وما بقينا شي ما خربناه