|
المــــــــــاسة الزرقاء ويوم حــافل بأروع الأحداث..!!
 السلام عليكم ورحمة الله ..
في البداية أبارك للجميع دخول العشر جعلنا الله وإياكم من القوامين الصائمين ,,
طبعاً الكل ينتظر العنا وأدري طلعت لكم فجأة 
لكن هذي أوامر الآنسة سندريلا .. قابلتني مسنجر وقالت لي : إلحقيني العنا شكله نسانا ,,
قلت لها : ابشري أنا لها يا ابنة الإستشاريين بس تراه وقت نومي
يعني لو خبصت عليكم شوي .. اعذرونا ..
من ناحية برنامجي اليومي المعتاد .. تقدرون تقولون مُنوع .. يعني كل يوم شكل .. خاصة وقت الدارسة .. لكن مع الإجازة أحس إنه بدا يصير روتين يومي .. نفس الشي كل يوم إلا اللهم مسألة الأسواق على حسب المزاج ..
والله يعينّا عليها .. اكثر ما كثر الله هالأسواق لكن ما نلقى إلي نبيه بسهولة ,,
تجي علي طنّات ودي أروح لدُبي أقضي للعيد هذي الأيام.. بس ما تجرأت أقول للأهل أخاف يرموني في شهار , ويتبرا مني ابوي , 
نجي ليومي .. صحيت بعد الظهر .. طبعاً صليت وقريت قرآن  ... بعدها قعدت ادور في البيت اشوف الأوضاع من إلي صاحي ومن إلي توه نايم ,,  بعدين طلعت للغرفة إلي برّا .. لقيت فهودي عمره ست سنوات .. يوم شافني إلا يجي ينط علي ويسلم علي لأن لي يومين ما شفته ويوم جيت امس للبيت ما كان احد فيه ونمت قبل لا يجون ,, طبعاً كان الأخ معصب علي لأنه قايل لي بس يوم واحد تنومين عندهم مو يومين ,, قلت له وش اسوي عاد ما خلوني اجي . لكن ما شاء الله عليه يعرف يحجر لي قال لي : طيب كان دقيتي علي اجي اخذك ,, قلت له ما شاء الله عندك سيارة ,, قال : تستهبلين بجي مع السواق وآخذك ,,
بما إنّا نتكلم عن فهيد ,, اذكر العام في رمضان كان جالس ياكل وقلت له واشفيك ما صمت قال إلا صايم قلت له طيب ليه تاكل وانت صايم ,, قال : انتي غبية ما تعرفين شلون الصيام ؟
ولا لما أسئله ولا يعرف يجاوب أو ما يبي ..يصرفها ويقول : ليه اسئلتك كثيرة 
جلست معه في الملحق .. وناديت حسنة " شغالة" تجيب لي اللاب توب من الغرفة , وشغلت النت وقعدت اتصفح المجلس العام , شوي إلا يتسرب كل شوي احد من أفراد الأسرة إلى داخل الغرفة , طبعاً ما اقصد وزارتي الداخلية والخارجية لكن أفراد تلك الوزارات ,, احد قاعد يشوف سبيس تون  واحد قاعد على بي سي الوالدة لأنه في الملحق , واحد يقرا قرآن وسط هالصجة وانا على اللاب توب ما بين الإيميل و شبكة الزعيم و تجهيز فقرات العيد , وإلي رايق قاعد يرسم ويلون , وفجأة بلا سابق إنذار اشتد الصراع بين فوفو وسوسو ,, طبعاً ما ادري من إلي بدا لأن آخر نظرة شفتهم فيها واحد على سبيس تون والثاني يرسم ,, فكيت بينهم وطبعا كل واحد فيهم امتلا وجهه من الدموع واشك إن فهيد هو إلي بدا لأنه ما يحب يشوف سيمو لاهي عنه ,,
بعد ما صليت العصر رجعت على اللاب توب واشتغلت شوي بشغل الجامعة ,:sad: , بعدين شغلت النت ولقيت وحدة اعزها وقعدت اسولف معها , ورديت على كذا موضوع في المجلس العام , , إلا يجيني إلي ما يحب يفارقني .. ويوريني قلمه الجديد .. قلت له : الله حلووو ما شاء الله من وين شريته ,, فقال شريته امس من المكتبه " يقصد ابو ريالين " وانتي ما كنتي فيه ,, بعدين قال :: انتي ودك تاخذينه ؟ ,, هنا احترت مدري وش اجاوبه اخاف اقول لا بيقول ليه ما اعجبك قلمي ,, واخاف اقول إيه وهو يا عمري يبيه ,, كرر سؤاله وقلت : إيه ودي اخذه قال : خلاص خذيه لك ,, قلت لا حبيبي خله لك انت تبيه ,, قال : هذا هدية مني والله تاخذينه ,, يا حبيله أخيي كريم ,, دائماً كذا يجيب لي احيانا ابواكه يعطيني إياها واحيانا النوت الصغيرة , ودايما يشاركني في اغراضي ,, الحين اللاب توب حقي يصير ملكه وحتى جوالي وحتى غرفتي ,, يقول إذا خلاص ما تبين اللاب توب حقك باخذه لي ,, اقوله بشتريلك واحد جديد احسن إذا تخرجت وتوظفت ,, يقول لا انتي اشتري الجديد لك وانا باخذ هذا ,, والحين انواع الإزعاج يبيني اشتري جوال جديد عشان ياخذ جوالي القربوعه ,
المهم اخذت القلم عشان ما احطمه ,
قبل المغرب بنص ساعة كان الغالبية في الصالة قاعدين يقرون قرآن ينتظرون الآذان , واجتمعنا كلنا وافطرنا فطور خفيف نوعين من التمر طبعاً مع القهوة ولقيمات "ما احبها" وفيمتو وعصير برتقال , بعدها كل واحد فينا راح يصلي إلي للمسجد طبعاً وإلي في غرفته ,, بعدين اجتمعنا في الساحة وجلسنا نتجاذب اطراف الحديث ونتناقش عن برنامج العيد , بعدين انقسمنا إلي يبي يتعشى عند التلفزيون في الملحق وإلي يبي يتعشى عند السوني وإلي ما يبي تلفزيون خير شر ,, المهم انا تعشيت في الساحة , بعدين توجهت لغرفتي ودخلت النت وقعدت افرز اسماء الفائزين بالمسابقة الرابعة ,, بعدين رحت انا وخواتي الثنتين وحده في الثانوي والثانية في المتوسط مع حمودي للقطامي , وصلينا معه التراويح .
طبعاً ما شاء الله المسجد مليان , واحنا منسجمين مع الشيخ إلا يجي في بالي طاري غريب جداً فجأة , تخيلت إن اختي تطيح علينا وتطلع روحها , المهم حاولت اطنش هذا التفكير ورجعت انتبه للشيخ إلا اشوف اختي تجلس على الأرض واخااااااف .. بس ما اشوفها طاحت ,, المهم يوم سلمنا إلا التفت عليها واقولها واشفيك قالت : مدري حسيت بشي غريب , رجعنا للبيت وسألتها وش صاير لك طبعاً ما قلنا للوالدة عشان ما تخاف , وقالت حسيت بروحي كأنها تطلع ,, حسيت بشي يطلع مني و كل شي قدامي يصغر وكنت بطيح وانا واقفة بس ماابي اخوفكم فقعدت على الأرض ,, انا هنا خفت اكثررر , بس الحمدالله لأن الخيال إلي جاني إن روحها طلعت لكن هذه سليمة ومعنا توها عايشة ونايمة بسريرها ,,
بعد التراويح .. إلي نام وإلي راح للتلفزيون .. وإلي يبي السوق .. انا وامي كنّا نبي السوق .. وقالت امي بناخذ سيمو وفهيد معنا .. لكن سيمو يبي يروح عند ثامر ولد خالي , وحاولنا نقنعه وعيّا , قالت امي بما إن فهودي بيروح معنا خلاص بنحط سيمو في طريقنا عند ثامر , لأن الصغير هو راعي المشاكل  , يوم وصلنا لبيت خالي إلا يعنّد فهيد ويبي ينزل ,, قالت له امي بزعل عليك وانواع الحن والدلع عليها ,, ونزل ,, ونزلت معهم وعطيت بنت خالي كتب مسابقات عشان تجهز اسئلة العيد , وإحنا بالسوق إلا يجيني مسج من وحده من قروب المشروع تقول نبي نجتمع في مركز سلمان عشان شغل الجامعة وحددت يومين الثلاثاء أوالأربعاء
بعد ما رجعنا للبيت ... دردشت شوي مع الخوات ,, بعدين رحنا نصلي , ويوم رجعت دخلت المجلس العام ورديت على موضوع .. وشفت سندريلا اونلاين وارسلت لها تدخل مسنجر ,, وقالت لي إن العنا مختفي ولا ارسل يومياته .. فقلت لها ابشري برجع لك بعد السحور , ورجعت واستهبل علي المسنجر ولا دخلني وارسلت لها وشكلها طلعت من يوزرها , بعدين قعدت اكتب اليوميات وإلا ترد علي .. فقلت لها خلاص اجل بكمل اليوميات وبرسلها لك.. فضغطت على نفسي شوي وقاومت النوم وقعدت اكتب لكم ولا توقعت إنها بتطلع بهذا الكثر ,
والحين برسلها لسندريلا ,, وبروح احط راسي وانام ,
واعذروني إن كان قصير او كان فيه إطالة أو بربسة ,, لأن النوم عامل عمايله
ــــــــــــــــــــــــــــــ الله يعطيك ألف عافية يااسعاف الاستشاريين الماسة الزرقاء جداً روعه يومياتك بروعة طلتك ..
وتتواصل يومياات اعضائنا بتواصلكم معهم وغداً باءذن الله موعدنا وموعدكم مع العضو الرائع هلالي القرعاء
اخر تعديل كان بواسطة » المنتدى الاستشاري في يوم » 20/10/2006 عند الساعة » 05:11 PM |
الوضع الشجري
