السلام عليكم كل ابوكم
وسلخير انكانكم داخلين في المساء وصلخير انكانكم داخلين في الصبح
ابكون صريح معكم بكل وضوح وشفافيه <=-=-=-=-= داخل ابو الشباب يبي يعترف
كنت استحي ادخل عندكم لان من طبعي حياوي لحد يقول ايه هين ترى ابزاعله
اليوم عاد قلت ابخربها بحكم اني عزوبي وابدخل عندهم واقولهم قصتي اذا اعجبتهم واضحكوا ابقعد عندهم واصير صديقهم واذا ماضحكوا ابطلع ويا دار مادخلك شر
حسيت اني طولت حتسي عليكم و(قرق)
قصتي كأي شاب طموح خلصت الثانوي وابسجل في جامعه الملك سعود وكلي امل اني القى مكان في كليه العلوم تراني طموح لاحظوا في كلية العلوم
ومثل ما انتم عارفين دايم اصيف في احد الدير الاوربيه <=-=-=-= حدك شقراء واذا خربتها رحت لم الطائف
جيت من الديره بالحالي وعزوبي وتسجيلي بكرى وادق على واحد من اللي مسجلين في الجامعه عشان يروح معي يعلمني وش اسوي لاني رايح على عماها وادربي دمجتي قال ابشر ابخاويك قلت الله لا يهينك
ويجي اليوم المنتظر وهو تسجيلي في الجامعه ورايح لابس الثوب والشماغ وحالتي حاله تقولون واحد داخل اولى ابتدائي موب الجامعه واشغل موتري واروح قال خويي رح وابقابلك عند الدوار الاول حق الجامعه واااااااه من ذاك الدوار يوم وصلت لم الدوار قال خويي انا في الدوار ادور وقلت انا مثلك في الدوار ادور والله ياجماعه الخير ماحلفتوني قعدت ادور يجي عشر مرات وهو نفس الشي ندور بعض <=-=-=-= الله يرحم حالكم انت وخويك
عاد انا بذكائي قلت ابوقف واكيد يبي يشطفني وادق له بوري ويعرفني لا تقولون ليش ماسويت كذا من قبل لاني كنت مرتبك كني واحد ابروح اخطب <=-=-=-=-= اللي يشوفك يقول تعرف سوالف الخطبه وذا العلوم
وندخل لم الجامعه وابي خويي يعلمني قالي ياخي مدري تغير علي كل شي قلت في نفسي الشرهه على اللي يناديك قلت طيب ابحاول ادبر عمري رحت سالت واحد وجتني الطامه الكبرى يوم قالي كليه العلوم مليانه يعني دورلك كليه ثانيه وانصدم بغيت اقول الله ابوها عيشه خلني اروح اجاهد اصرفلي <=-=-=-= ياقربه ممسوك في الحاير
وجاني (بصيص) امل يوم قالي تقدر تحول تراى مسموح
قلت الله يبشرك بالخير يوم جيت ابسجل ويجي واحد يعرفني ويسلم علي وقال وش اخبارك وش اخبار الديره وانا منيب فاضي له رجليني تتصافق من الخوف ابيه يخلصني وهو بارد ماغير يسولف قلت من (حر ما اوجس) رح شفها ياخي بس فكنا
هو انصدم وقالي طيب طيب وش تبي اسجلك فيك قلت ابي كليه العلوم قال مليانه قلت اجل سجلني في الزراعه وسجلني فيها وصرت ولله الحمد طالب جامعي ونجيب ومجتهد
بعض معاني الكلمات اللي ماظنيت انكم تبي تفهمونها :
قرق : كلام واجد
بصيص : موب بسيط حق افلام كرتون لا يعني شي يقولونه دايم في افلام الكرتون بس مدري وش معناها ويقولنها في الاوقات المحرجه خلاص اللي مافهمها بكيفه عاد
حر ما اوجس : تراها تتكون من ثلاث كلمات (حر) من الحراره (ما) مدري وش دخلها (اوجس) يعني احس
واسف على اني طولت عليكم في الموضوع وتقبلوني كعضو ولا ابقضب الباب ترى عادي وابتفرغ لم دروسي الجامعيه
مبرووك قبولك في الجامعه وعقبالنا السنه الجايه < < ثالث 
الوضع العادي
