23/08/2001, 04:33 PM
|
| زعيــم جديــد | | تاريخ التسجيل: 19/08/2001
مشاركات: 2
| |
عمري وين وين راح .. عمري وين راح . ياحبيبي والله غيرت أحوالي
سلام عليكم كلللبووكم 
أول شي , احب اسلم على الشباب كلهم و اشكرهم على الجهود المبذولة لإنجاح هذا المنتدى , شبكة الجميع , شبكة الزعيم
ثاني شي , هذا أول موضوع لي في هالمنتدى الحلو , و انشالله اتمنى انه يكون خفيف عليكم (( مهوب مثل المهدي بن سليمان ))
ثالث شي , تبون الحق , مافي راسي شي اكتبه , الشباب ما قصروا , بدءا من صباح , و انتهاء بمكتب العمل و العمال , الشباب يعطيهم العافية
ما خلوا لنا شي نقوله .. لكن هذي شوية خواطر هلالية .. على طريقة رفعات ابو يعقوب و استلموا :
- بعض الناس يفرضون انفسهم اوصياء على غيرهم .. بطريقة عجيبة جدا ..
تشوفهم احيانا يقطّون معك في حلالك , كنهم اصحاب المال و الحلال , و انت حط كذا و انت سو كذا , وانت ليش ما تسوي كذا , ... كله كلام في كلام
و في الأخير , تلقاه متبطح و حاط رجل على رجل , و يرسل تصريحات يمين و يسار , يبي الرزرزة على حساب غيره و كن الحلال حلال ابوه و أهله
اضرب على هذا مثال , يقول لي ابو فهد و هو رجال ثقة ( ابو فهد - واحد من ربعي , مع الاعتذار لأي ابو فهد ثاني ) يقول كان عندنا مزرعة , و اللي يديرها ابوي و عمّاني ..
و كان عندنا عمال واجد, المزرعة كانت كبيرة و مليانة مابين بقر و غنم و نخل و غيره ..
يقول ابو فهد : و كان عندنا لكل شي في المزرعة مجموعة عمال خاصين بهالشي , مثلا عمال للبقر و عمال للنخل و عمّال للخضرة .. و كل مجموعة ترجع لرئيس قسم هو المسؤول عنهم قدام عماني ..
مرة من المرات وانا ادوج بالمزرعة لقيت ذاك العامل اللي مجمع له كم عامل و قاعد يسولف عليهم و موقف الشغل .. و أوقف عنده و اشوف وش سالفته..
تعال يا صديق وش فيك ؟؟
العامل : يا عمي ابو فهد , اصل الشغلانه مش زابطه معايا ..
ابو فهد : ليش وش صاير يا محمدين ؟؟
محمدين : يا عمي ابو فهد , عمك خالد مش عاقبوه شغل حسنين بتاع المعيز , و عمك سليمان مش ناوي يرسيها على بر مع الواد برعي بتاع النخيل , و عمك احمد حيطربئها على دماغكو النهارده , اصلو...
و انا التفت عليه و اناظره بنظرة استحقار (( و الكلام لا يزال لأبو فهد صديقي )) و اقول له : لا يكون انت دافع شي من حلالك مع عماني في المزرعة ؟؟
محمدين : لأ ما تفهمنيش كدا يا بشمهندس .. اصلوو اصلوو ..
ابو فهد : اقول , لا اصل ولا فصل .. انت رجال تبي تشتغل و لا اقضب الباب المزارع واجد ..
و مرت فترة مهيب طويلة , ما دريت الا ونا مار على مزرعة جارنا ابو علي , الا و اشوف محمدين طالع من المزرعة , و اصبر شوي , و ادخل على جارنا و اشوف وش السالفة , لقيت محمدين قايل له الكلام اللي قد سمعته يقوله لي من قبل ..
وانا الحقه بالونيت و اصندقه , و امر اقرب مكتب سفريات و أسفره على اقرب حنطور رايح لديرته و كانت اخر كلمة له , عمي ابو فهد , بالك من النائة الشئرا, انا سبتها لكو ;)
معاد الا هي , البيت بيت ابونا و القوم طرّدونا
- هذي سالفة ثانية , يقولها واحد من ربعي , مهندس كهربائي ..
يقول كنت مع شركة من الشركات على عقد مدته سنتين , قابل للتجديد على حسب الاتفاق ..
مضت سنتين , و كنت ما عندي مانع اجدد لسنة ثالثة .. بس طبعا اشترطت على الشركة زيادة في الراتب , انتو عارفين موظف خبرة مو مثل اي موظف ثاني ..
لقيت صراحة بعض المدراء في الشركة موافقين , و بعضهم كن ما ودهم , قلت المهم بكيفكم , انا معكم لين يخلص الصيف , ما عطيتوني اللي ابي , تراني ابشوف غيركم ..
طبعا لقطت عمري و حجزت على اقرب طيارة لباريس و قضيت الصيف هناك .. و انا في باريس جاني اتصال من رئيس شركة ثانية , مستعد يعطيني اللي ابي من زيادة في الراتب و بدلات و خلافه .. لأنه يثق فيني و في خبرتي و في كفائتي و يعتقد اني راح اكون الموظف المناسب في المكان المناسب ..
يومين الا رئيس الشركة عندي في باريس , اربعة ايام بعدها و حنا موقعين العقد ..
خلص الصيف و رجعت اشتغل مع شركتي الجديدة , طبعا شركتي الأوله كان معهم عقد و انتهى , ما بينا شي غيره ..
لقيت شركتي القديمة مشتكيني ,,
تدرون وش مشتكيني عليه ؟؟
يقولون ..
.
.
.
.
خله يرجع لنا مفاتيح المكتب
طبعا مساكين , ما لقوا علي الا مفاتيح المكتب , من زينه هالمكتب , لوحين و كرسي مدرسة و يقولون مكتب .. لكن وش نقول , دنيا , و ناطح الصياح بالصياح تسلم
انتهت سالفة صديقي المهندس , و انتهت خواطري انا بعد .. ما ودي اثقل عليكم من أول موضوع
اخر شي , اسفين للإطالة , و العذر ان غلطنا على احد , و امنياتنا للمنتخب السعودي بالتوفيق بكرة انشالله قدام ايران
و لهلالنا انهم يلقون لهم لعيبة اجانب قبل لا يبدى الدوري , و يرفعون ايقاف ابو يعقوب ..
و السلام ختام ))))
مسطوولكم |
الوضع الشجري
