كل واحد يحكي قصة عشقه للهلال - نادي الهلال السعودي - شبكة الزعيم

ازرق وابيض · #1 05/07/2001, 06:22 AM

السلام عليكم ورحمة الله وبركاته...

ياليت جميع الجماهير الهلاليه بهذا المنتدى تقول لنا قصة عشقها للكيان الهلالي

وراح ابدأ بنفسي واقولكم كيف شجعت الهلال:

اذكر يومني صغير كان اخوي دايم يسجل مباريات واهداف الهلال ذاك الوقت..يعني يمكن سنة1402 تقريبا.."ياقدمي "
وكنت اقعد اتفرج على اهداف الهلال وبديت اتحمس مع الكوره وبديت اعشقها..
وأذكر اني كنت كل يوم اقعد اشوف مباراة للهلال مع الاتحاد كان الهلال فايز فيها 5/3 على ما أذكر واكثر شي اتذكره اني كنت مره معجب بحارس الهلال يومها"ابراهيم اليوسف" ..

وبديت اهتم واشوف كوره وكنت اتحمس بس على خفيف مع الهلال عشان اخوي وابوي اشوفهم يشجعون الهلال بحماس

وشوي شوي بديت احب الهلال واعشقه واشجعه وكانت انطلاقتي مع تشجيع الهلال بحراره مباراة الكأس سنة 1404 مع الاهلي اللي فاز فيها الهلال 4/صفر

وما زلت اذكر بالضبط تفاصيل المباراة وكيف كنا مجتمعين كلنا انا واهلي نشوف المباراة وأذكر حماس الوالد مع اخوي الكبير وباقي اهلي في تشجيع الهلال والفرحه مع كل هدف يجيبونه نجوم الهلال ذاك الوقت ...
وأذكر اللي جاب الأهداف كان(خالد الغانم-عبدالرحمن اليوسف-منصور بشير-فهد المصيبيح) ان كاني ماني متوهم بس ..
واذكر هدف المصيبيح اللي كان خيالي بقوووووه حتى صوت المعلق ذاك الوقت"زاهد قدسي" مازلت اذكره

عقبها بعد مافاز الهلال عطاني ابوي"عشره ريال" من ذيك الكبيره تذكرونها؟؟
يووووه ياكنت مره مبسوط فيها وقتها

ومن عقب ذيك المباراة بالتحديد بديت اعشق واشجع الهلال بحراره الين هالوقت والى بكره ان شاءالله تعالى..

يعني من 1404 الى الحين 1422 وانا اشجع الهلال"18 سنة" والله عمر يا جماعه

ومن اكره اللحظات اللي عشتها مع تشجيع الهلال ذيك المباراة على نهائي الافراسيويه سنة 1413 بين الهلال والافريقي التونسي يوم يجيبون هدف التعادل بآخر دقيقه من المباراة في الوقت اللي كانوا بيلعبون فيه وقت اضافي

اذكر يوم "بو جسيم" مدد الوقت الضايع اكثر من اللازم بقوووووه للأسف
عقبها والله غصبن عليّ صحت

واكثر بطوله فرحت فيها يوم يفوزون على الشباب سنة 1418 لاني كنت ماني مصدق ان سامي جاب ذاك الهدف الخرافي

عموما افراحي مع الهلال كانت كثيره واحزاني كانت قليله مره وهذي هي عوايد الفرق الكبيره..

واحمد ربي اني صرت من مشجعين الهلال لاني اضن اي واحد ما يشجع الهلال متوهق بعمره"وجهة نظر "

عموما الكلام عن عشق الهلال يطول ويطول ويطول لان الهلال شي كبير بالنسبه لي ولعشاقه ...

اترك لكم المجال عشان كل واحد يقول وشلون بدت قصته مع عشق الازرق والابيض..

تقبلوا تحياتي الحاره

reem · #2 05/07/2001, 07:47 AM

أنا بقولك كيف شجعت الهلال
كنت مره اشوف مباراة منتخب السعوديه و الامارات(منتخب بلادي)
فعجبني اللاعب خالد التيماوي و بديت أتابعه و عرفت أنه يلعب في نادي الهلال و استويت هلاليه الحمد الله... و ضد كل اللي ما يحب الهلال
و اتابع الهلال في كل البطولات و انقهر يوم ما ينقلون اي مباراه

و انا أشجع الهلال حتى لو كان يلعب ضد أنديتنا اللي في الامارات....اكيــــــــــــــــــد

ازرق وابيض · #3 05/07/2001, 05:12 PM

اختي الريم

شكرا لكي على المشاركه..

خالد التيماوي علم من اعلام نادي الهلال..ويستاهل كل الحب بصراحه..

وفخورين كونك اماراتيه ةتشجعين الهلال

سلامي وتحياتي لشعب الامارات الشقيق..

J.A.J · #4 06/07/2001, 01:39 AM

خذ هذه القصه واللتي تجمعنا أنا وأخي ألأكبر ووالدي رحمة الله عليه :-

كنا أنا وأخي طلاب بالصفوف ألأبتدائيه وأبلغنا والدنا ( الله يغفر له ) برغبتنا بمشاهدت مباراة للهلال أي مباراة كانت تونا نعرف كرة القدم وعلى طول علق في أذهاننا ( الهلال ) .

قال :- ألبي رغبتكم بشرط ...أذهب معكم للمباراة -على أن تذهبو معي وتشاهدون سباق الخيل .

من فرحتنا وافقنا على طول .

على كل حال المصيبه أنهزم الهلال 1/0 من الشباب ...وزعلنا أنا واخوي كثيرآ ... لاحظ الوالد الله يرحمه شدة زعلنا ... مر بنا على شارع العصارات وطلب لنا عصير ...

جاب النادل العصير وتونا بنبرد على قلوبنا هذه الهزيمه ومابعد شربنا العصير ...

قال الوالد الله يرحمها يارب :- تدرون ليش هذا العصير ؟

قلنا :- ليه ؟

قال :- علشان فاز الشباب على الهلال ؟

الا وكيسان العصير مني ومن أخوي متنثره بعصيرها في الرصيف والكيسان راحت ملح .

ضحك الله يرحمه اللين وصلنا للبيت وهو يقول :- حسبي الله عليكم حتى الكيسان دفعت قيمتها.

ازرق وابيض · #5 07/07/2001, 03:08 AM

J.A.J

اولا الله يرحم ويتغمد روح ابوك بالجنه ان شاءالله ولجميع موتى المسلمين..

وتشرفت بردك يالغالي وبقراءة قصتك الحلوه..

الف شكر..

ازرق وابيض · #6 09/07/2001, 03:04 PM

هلا هلالي · #7 09/07/2001, 03:27 PM

انا بصراحه ولدت ببيت كلهم يهتفون ((يا هلال عزك عزنا )) واحب الالوان عندهم الازرق
واسامي المواليد الجدد يسمونهم على اسامي لاعبين الهلال
وطبيعي ان اكون هلالي لأن دمي ازرق وكل شيئ املكه ازرق في ازرق
وسلامي.....

ازرق وابيض · #8 10/07/2001, 02:15 PM

هلا هلالي

تسلم اخوي على المشاركه ولاهنت..

كاتم العبرات · #9 11/07/2001, 05:27 PM

السلام عليكم.....

كان عمري 4 سنوات وفيه مباراه بين الهلال والأتفاق. انا ما اشجع شي في هالوقت...
كان اخوي تفاقي ويقولي تعال شف هالمباراه. قلتله طيب...

ويمدح لي بالأتفاق (يوم انهم كانو شي) . بعد المباراه قلتله والله يا أخوي ما عندك سالفه الزرق احسن من الحمر.

ومن بعدها وانا دمي ازرق يعني انا شد بلادي هلالي..

السالفه هذي صارت من 21 سنه.

تحياتي

ازرق وابيض · #10 12/07/2001, 10:20 AM

كاتم العبرات

شكرا لك اخوي على المشاركه.

ازرق وابيض · #11 13/10/2001, 05:03 AM

للرفع