قلبي اللي كـل ماقلـت زال الهـم زال= ماوعيت الا بهمي الـى عـود علـي
اترجى واتصبر لو ان الصبـر طـال= واتشالا تو ربعي وانـا مانـي شلـي
كل مالدو في العيـن نكسـت العقـال=ادري ان الدمع فضاح وعيونـي ملـي
ولا قدرت ارد دمعآ على الخدين سـال= افضحتني دمعة العين ياعيـن اخجلـي
اصبري ياعين مافيـه للدمعـه مجـال= خلي الدمعه ليا صرت في جـوآ خلـي
وش بقا يابيض الايام من سود الليـال= دوري للهم غيـري وتلقيـن ابـدلـي
صرت مثل الذيب لاجاع عدا في الجبال= ولا انا لاضقت عديت ضلعـآ معتلـي
لكن ان الفرق ياذيـب مايبغـي جـدال= مقصدي عين النداوي ومقصودك طلي
ماشكيت من الليالي ولا قهـر الرجـال= العرب لرضاي تسعى ويخشون ازعلي
قالوا ان الموت يشرب من الجم الزلال= يوم كلآ ذل وانحـاش وردت اجملـي
المصيبة بعد الاحباب والوصل المحال= فرقتنا سـود الايـام والمخـرج ملـي
والله ما انسى من جوابآ على قد السوال= يوم وادعته وقفى وقـف ثـم لـد لـي
قلت احبك قال احبك ودنق يـوم قـال= قلت لو تسمح تكرر بعد وش قلت لـي
قال احبك حب ماتتصوره يابن الحلال= حب عنوانه دموعـي ونصـه مايلـي
دار حبك في عروقي مثل دور المحال= وامتلى قلبي بحبك مثـل ملـي الدلـي
ليت ربي ماخلق لي عمـام ولاخـوال= يكفي اني لك بقلبي وروحي وانت لـي
قلت انا في علم يازين ولا فـي خيـال= قـال لاوالله فديتـك ويفدونـك هلـي
وهتفت مشاعري مثل جمهور الهـلال= يوم سامي سدّح الحارثـي والخوجلـي