بسم الله الرحمن الرحيم
السلام عليكم ورحمة الله وبركاته 00
أهلا وسهلا بكم معنا في " مواقف شخصية من حياتنا اليومية"
إعداد: مجــــــــــــد , *بنت بلادي *
تقديم وإخراج إلى المنتدى : * بنت بلادي *
(( مسوين فيها مذيعات .. ننفع صح ؟؟ ))
هذي مواقف حقيقية صارت لنا , يمكن ما نقدر نعبر عنها و عن رد فعلنا بالكتابة ويمكن ما تحسون بالمتعة اللي فيها لأنكم ماعشتوها..
المواقف تدل على الذكاء والنبوغ اللي نتميز به ,
وأحكموا بأنفسكم..
* لما كنت في الثانوي وكانت الأبلة تشرح المادة المحببة لي " كيمياء" وكنت طبعا مندمجة معاها وحولنا الدرس لنقاش بيني وبينها (تراني دافوره قولوا ما شاء الله )
سألت سؤال إجابته كانت نعم والفصل كان هادي جدا ( عاد تخيلوا الجو )
وحضرتي من زود الحماس قلت لها آآآآآآآآآآآآي بالسوداني !!!
هدوء الفصل أنقلب ضحك
وما انتهى اليوم إلا الخبر منتشر في المدرسة كاملة
( تراني من مشاهير المدرسة )
* مرة حضرتي كنت رايحة مع أخوي الصغير المكتبة, وحدث ولا حرج نص سكان ها لمدينة فيها
( وطبعا أخوي ما يسلم أحد أو شي من لسانه )
وبعد ما خلصت كان أخوي يحاسب.. بعد ما خلص من محاسبة الكتب أتـفاجأت بحضرة جنابه يطلب من الرجال يحاسب على يده
– والصوت ما شاء الله يوصل لأخر المكتبة- يبغى يعرف كم سعرها ( يستخف دمه ) ماكان من الرجال إلا أنه طالع فيه باستغراب وهز راسه
..
بعدها حرمت أخذه معي لأي مكان عام
..
* فيوم مداومة في الجامعة من الصبح للساعة أربع العصر يعني تعبانه حيييييييييييييل
وأختكم في الله متعودة أول ما تركب السيارة تنزل الجزمة (الله يكرمكم )
طبعا نزلتها وما حسبت أني أوصل للبيت نزلت على طوووووول ونسيت ألبسها وحضرتي أمشي من السيارة للبيت بالشراب بسسسسس ...
انتبهت أول ما دخلت للبيت أني مانيب لابستها وقلت لأخوي يروح يجيبها لي
....
*في الثانوي كان أخوي جايني والحمد لله السيارات معضمها متشابهه وأنا ولله الحمد ورثت عيون زرقاء اليمامة
" أذكروا الله لا تصكوني بعين " وطبعا شي معروف أني ما راح أشوف إلا شي أبيض يتحرك في السيارة
, بس شكيت فواحد من بعيد لأن تقريبا هيئته زي هيئة أخوي لكن الملامح عدم فقلت أقرب يمكن يطلع أخوي وأقرب من السيارة
, فطبعا ما قدرت أميز الملامح لكن من الذكاء والنبوغ لدي ( حولنا عربي )
مافتحت باب السيارة وكان فاتح الزجاج فدخلت راسي وقلت " فلان" –اسم أخوي-
وانتبهت للرجال وهو ألتفت للجهه الثانية وشكله كان ميت من الضحك
(( على الذكاء اللي فيني طبعا ))
...
* أول ما تعلمت الطبخ
كنت طايرة من الفرح وفي يوم أطوعت أطبخ لأهلي الغدا
( طييييييبة صح), ما بقى صحن في المطبخ إلا وطلعته , قمت أغسل ها لصحون وأتابع الطبخة بنفس الوقت ومن العجلة ((يا زين الركادة)) فبدال ما أحط الملح عالأكل حطيت فيري
, اخترعت لهم طبخة جديدة (كبسة بنكهة الفيري .... حقوق الطبخ محفوظة وعندي استعداد أرسلها للي مستغني عن عمره ويبغى يذوقها
)...
* مرة أخواني طلبوا مني أني أسوي لهم شاهي لأن أصحابهم عندهم
, وحضرتي كنت مستعجلة كانت فيه مباراة نهائية على نهاية الشوط الثاني
, وحطيت السكر والماء في الإبريق وبعدين حطيته في ثلاجة الشاهي من دون ما أنتبه أني ماحطيت ورق شاهي
,طبعا أخذه واحد منهم وكان بس ماء حار وسكر تخيلوا موقف أخواني وحطوا أنفسكم مكانهم
صار إذا واحد منهم يبغى ياخذ شاي معاه لأي مكان يقول لي تأكدي إنك حطيتي ورق موزي ذيك المرة
..
هذي بعض المواقف اللي تصير معانا ويمكن مع غيرنا الله يبعدكم عنها
.
.وإذا أسعفتنا الذاكرة بنقدم لكم جزء ثاني من برنامج مواقف شخصية من حياتنا اليومية ..
[/ALIGN]
الوضع العادي
