بسم الله الرحمن الرحيم

الحمدلله والصلاة والسلام على رسول الله وعلى آله وصحبه أجمعين

السلام عليكم ورحمة الله وبركاته


لم يكن اكثر المتشائمين من الهلاليين واكثر المتفائلين من الانديه الاخرى تحلم بنتائج الهلال الاخيره ولكنها صارت واللهم لا اعتراض

ورغم الهزيمه القاسيه والمستحقه للاهلي وبمساعده بسيطه من حكم اللقاء التي تحفظت على بعض قراراته السيئه المتمثله اولا بضربه الجزاء الاولى وطرد الدعيع اللا صحيح على العموم لا ينفع الندم

ولكن لا بد من اصلاح فوري وقرارات صريحه لا نريد قرارات معهوده باقاله العجلاني والله انه اديموس اصرف على الاقل كان صاك على الداجين اللي بجيبهم بعد شوي

ولكن لابد ان تعرف يا اخي واختي الهلاليه انه 23 مايو سيكون يوم اسود للهلال لن يمحى الا بردها وهذا صعب بل مستحيل في ظل الوقت الراهن

ااااه وينك بس يا ابو يعقوب تشوف اللي اشووفه بالله اسالك قد صارت لك ذي النتيجه اكاد اجزم انه لو كان هناك قائد للهلال في الملعب نصفك يا ابو يعقوب ما صار اللي صار للاسف انتهى زمن الرجال في الملاعب بالنسبه لنادينا ولكن ما الحل الواقعي والخيالي

اجتماع طارئ هلالي الليله طيب وايش بيصير اكيد 3 اشياء
1- ناسف ونتحمل المسؤوليه (الاداره واللاعبين ) طيب وين نصرفها
2- الغاء عقود الاجانب ( متى استمر في اللال لاعب اجنبي زي الناس كلها خساير بخساير وما شاء الله عليك يا نجيب السمسره على ودنه
3-الغاء عقد المدرب (يا رجال ما في مدرب قعد مع الهلال زي الناس بس المشكله كل ما يجي مدرب للهلال يجيب له بطوله ويمددون عقده يدج الهلال زي ماتورانا جاب الدوري ودج الهلال وطلع من المربع في السنه اللي عقبه وجاء ادميوس وكسبنا ولي العهد وراح وجت المصايب )

الصراحه ملينا من الاوروبيين نبي مدربين برازليين جيبو اوسكار جيبو لازاروني هذولي اللي ينفعون مع الهلال وان كانو يبون اوروبي فلن اقبل الا بيوردانيسكو

على العموم كلها امور روتينيه متعودين عليها من للاسف الرؤساء الضعفاء الذين مرو على الهلال

اللله يرحم ايامك ياسمو الامير خالد بن محمد اتمنى عودتك يا اسد الهلال اللي في حضورك محد يقدر يهش ولا ينش والا نريد الرائع خالد بن طلال المتطور الفكري الذي نهض بطائره الهلال ( افضل فريق في نادي الهلال في السنتين الاخيرتين ) الى اعلى مستوى لها

الهلال يوم امس سيء ولم يكن فيهل احد يستاهل الفنيله الزرقاء الا لاعبين الخثران المظلوم والدوسري المتجدد وللاسف هم ليسو من ابناء النادي الذي يقال ان مدرسه الهلال هي افضل مدرسه ( ايه افلقني والحقني ما شفنا من هالمدرسه الا الضعوي لاعبين حدهم اولى او ثانيه بالكثير )فالخثران والدوسري لعبو ضد 20 لاعب امس وانا اعتبرها مؤشر جيد انهزمو بس بس بخممممممسه ( كرهت الرقم )


الصراحه انا ما ابي الهلال يكون مثل فريق الدجه النصر يتعود على ترك البطولات وفي النهايه يتربصون زي الحريم العجز يستنون اي غلطه ويبداوون بالعقار والحش لا انا ما ابي كذه وبدل ما نستنى من الرئيس الهلالي للاسف تبرير الهزيمه للاسف يجي يقول ان الهلال في عهد اديموس لم ينهزم سوى ب4 مباريات بفارق هدف والعجلاني في فتره بسيطه ينهزم بخممممسه مباريات وبنتايج كبيره ( طيب دارين و ايش المفيد في هذا بالله هذا رئيس نادي يتكلم بعد هزيمه كبيره ) يعني انا كهلالي طموحي اني اعد هزايمي تراني يا ابو مساعد هلالي ما تعودت على الهزايم حس واعرف تراه كيان كبير كبير كبير الهلال بس للاسف فيه ناس في النادي مهوم قده ولا قد فنيلته ولا ادارته

شوفو ريال مدريد بعد انهزام فريقه بالدوري اعلنو انهم جابو سامويل الارجنتيني افضل مدافعي العالم بنظري للريال الموسم الجاي ووعد بلاعبين كبار كبار يعني لاعبين درجه فيقو وزيدان وبيكهام ( ما بقى الاهنري وتوتي ) واكيد واحد منهم يعني المقصد ان الرئيس لم يبرر بل على طول سوى حل يفرح جمهوره بدعم دفاع الريال السيء يا ليتك يا عبدالله تشوف وتسوي زيه تعرف وين خلل الهلال وتحله بس وينك وادارتك الداجه

اااه يا ابو يعقوب وين هلال 97 و 98 و99 و2000 يا ابو يعقوب وين الاداري الرائع الاحمد والنعيمه الشديدين مهوب اليوسف البارد والله هذا عين

ليش تعتزل يا ابو يعقوب وما خليت بدالك احد كفو يغطيك انت السبب والله بس ان شاء الله تتعدل ونصبر مع الفريق ونشوف نهايته ايش لو ما جابو العربيه اتوقع للهلال كارثه بتصير فيه وارجو ان تعرف الاداره وتكون قادره على تحملها على العواقب يجب عليهم الان انهم يجيبون العربيه علشان يبردون ربع حرقتنا باللي صاير

الحين بتكلم شوي عن الفريق بصراحه وباعتقادي الشخصي فقط

الحراسه الهلاليه الدعيع مستواه في النازل اقترح انه يروح لاجازه الى نهايه الموسم لمراجعه نفسه اما ان يتطور او خلاص يعتزل عط غيرك فرصه
حسن رجوعك للمستوى طمني ولا تلام على شي فانا ارى انك محارب فكيف وانت في قمه مستواك يرجعونك للاحتياط قمه الاحباط ولا تلام على شي
الماس لا تعليق

بالعربي الحراسه في الهلال يبغالها اسم جديد في الموسم الجاي شوفو لنا حارس له اسمه يكون قوي ولكن انا عارف ان في المملكه ازمه حراس وانهم محتكرين في نوادي معينه


الدفاع بالعربي نصهم ينشاتون اوت واولهم النزهان والمفرج وسليمان والمطيري وسيفو االنكبه مع التحذير للشريده بعد النرفزه وارجاع خليل بالقوه وتدعيم الهلال بلاعبين مدافعين جدد شباب فورا وبلا نقاش ويفضل ايضا لظهير ايسر اجنبي زي الناس او اعطاء الفرصه الكامله للجري حتى تصقل موهبته يعني الموسم القادم يفضل للهلال لاعبين اجنبيين واحد قلب دفاع متمكن والثاني ظهير ايسر خبير

اما الوسط ايييه حكايته حكايه بعد ان كان يضرب وسط الهلال المثل بصلابته ولكن بعد الاصابات المتلاحقه للاعبين الكبار الشلهو والتمياط والحربي الرائع فانا ارى انه لا يستحق فانيله الهلال من لاعبي الوسط الا الدوسري والخثران مع اعطاء الغامدي اجازه يراجع نفسه فيها ويكون جمب الدعيع شوي لاني ارى انهم لازال لديهم شيء ولكن هذه ليست بسنتهم
اما الباقين فيسرحو امثال الشايع وعزيز عطوهم سدوس ببلاش ازين ورفع اللاعبين الشباب الاولمبي فورا وبلا تردد فوق اساسسين مثل البرقان والناصر والشهراني والمطرف

واخيرا الهجوم الهلالي
نبداه بسامي خلاص يا سامي كفيت ووفيت لا تاخذ زمانك وزمن غيرك عادوك سيسه وتراوري باضاعه الفرص السهله يعني اعتزل خلاص وان شاء الله تشيل كاس العرب وتعتزل
اما سيسه وتراوري انا اعرف واحد عنده مكتب يخلص اوراقهم في يوم الا اذا ما عندهم مخالفات مرور
وللمعلوميه الهلال لا يحتاج الى مهاجمين اجانب بس اعطو الفرصه للعلي والشيحان والجمعان والصويلح والعنبر وخلاص انتهى موضوع الهجوم الزبده ماعاد نبي اجانب الا في الدفاع والمنتصف

العالتين المتفلسفتين سيسيه و تراوري يضيعون فرص سهله ويدورون اهداف بالمقص مالت عليكم مناب في دوري بلاي ستيشن يا محترفين بالعربي الهلال يبغاله تغيير 60% من اللاعبين زبسرعه

واسف اني طولت عليكم

ويا كان ودي اني ارجع لكم بفرحه مش بنكسه