الــدوري طويـل ياشـبــاب ..!!! - نادي الهلال السعودي - شبكة الزعيم

كايدهم · #1 16/01/2004, 12:21 AM

بسم الله

تكفون ياجماعة الخير اللي شفـناه اليوم هو الهلال اللي نشجعه ولا هلال ثاني ..؟

ياجماعة الخير اليوم انهزم الهلال بس انتم وش مسـتـعجلـين علـيه ؟ خلونا نعدل الاخطاء .. ونعيد ترتـيب اوضاع الفريق يعني حتى لو مانتأهل للمربع ونخسروالبطوله العربـيه مو مشكله نعيد نرتب اوراقنا ونجهز نفسنا لكأس ولي العهد .. وش يضمن لكم ان المدرب الجاي انه بـينجح مع الفريق ؟ خلوكم على ادميوس واصبروا .. عادي النصر يهزمك بهدفين وانت مكتمل بنجومك وجمهور مالي الملعب ... عادي .. خلونا نعيد ترتيب الاوراق ولو خسرنا كأس ولي العهد لا سمح الله . ماصار شيء ... نجهز نفسنا للموسم الجاي ..ابدا ماصار شيء كلها الهلال طلع هالموسم من غير ولا بطوله !!!

هذا مدرب النصر جديد رغم ان عنده لاعبين كديش الا حقق توليفه مناسبه على لاعبينه .. لم يبالغ في الدفاع ولا الهجوم سيطر على وسط المباراة .. وادميوس يتفرج على ابداعات الغامدي اللي في الشوط الاولى اتحدى سلم كرتين صحيحه وراء بعض !!!

خلونا نأخذها حبه حبه ... التشـكيله خاطىء ..

الحربي يلعب صانع العاب ؟!!! ياجماعة الخير والله الحربي مركزه الاساسي وسط ايمن .. مايعرف يلعب صانع العاب .. ارحموه لا تـدمرون موهبه هلالييه ... اللي جالس يعمله آدميوس في حق الحربي حرام ... الآن الجمهور بدأ يكره الحربي والسبب ادميوس اللي يلعبه في مركز مايعرف يقدم فيه شيء .. طيب ياادميوس انت ملعب الحربي و نواف .. مما يعني ان نواف اجباريا راح يطلع الشوط الثاني وطبيعي ينزل مكانه سامي .... عندك سعد الدوسري جاهـز ومتحمس ومركزه الاساسي وسط ايسر .. ليه تخليه جمـبك ؟!! يعني لا نواف اللي قدم مستوى ولا نلومه لانه لعب في مركز مهوب مركزه ولا نلوم الحربي اللي مو لاعب في مركزه ..

خسرنا نواف و الحربي و السبب فلسفة ادميوس الغربـيه الاستدلاخيه !!!

تراوري اليوم ماادري وش مركزه ؟ هل هو جوكر ولا رأس حربه ؟!! نشوفه يروح للجناح الايسر ويرجع للوسط ؟!! طيب من يصير رأس الحربه ؟!! كل اللي معه لاعبين وسط ؟!! وين دور المدرب وين التوجـيه ؟!! ولا التـوجيه مايكون الا بعد مايفوت الفوت والهدفين !!

طيب اذا كان سيء طلعه فيه الصويلح فيه سامي فيه العلي والجمعان ؟!!

واذا تحس انه لحاله بالهجوم وعليه محاصره نزل معه مهـاجم ثاني يفك الرقابه عنه ؟!!

ولا تغيره للخثران ؟!! مجنون هالمدرب .. يفتح الجهه الايسرى .. لاعبية النصر مو مصدقين انهم فايزين ولا الجهه الايسرى كانت مفتوحه لهم للتـسجيــل .. بس ربك سـتــر ..

غير كذا وين الخطه وين التـكـتـيك .. ماشفـنا شيء طريقة لاعب الهلال كانت واضحه . لعب كرات وراء المدافعين رغم ان النصر كان يلعب بخمسة مدافعين والهلال بمهاجم واحد !!! هل هذي خطه تمشي عليها طوال 90 دقيقه ؟!! طيب وين التغير وين التسديد وين الاختراقات .. انا شخص متابع لكن المدرب وينه وين دوره بخلق خطه مفاجأه .. وين قراءة اللعب والفريق الآخر ..

مدرب النصر الجديد اكتسب الـفوز رغم انه لم يكمل مع الفريق اكثر من 10 ايـام !!

نقــــاط هامه :

@ سمو الامير عبدالله بن مساعد .. تخطىء بحق الهلال اذا جعلت آدميوس يسـتـمر .. فالنتائج و تذبذب المستويات لا تبـشر بمستقبل جيد .. اتمنى ان ترى الامور بهدوء و وثقه وسترى ان مصلحة الهلال في ابعاد آدميوس .

وللتـنويه .. اذا كان سامي و الدوخي و الدعيع .. وهم اعمدة الفريق لا يريدون آدميـوس .. فلماذا نـكابر ونقول الا يجلس آدميوس واللي مو عاجبه يشرب من موية البحر !!

عندما كنت تقول في مقارنتك بين لاعبي كرة السله في الدوري الامريكي .. ومدربهم ... فهـل تقارن بين لاعبي كرة السله الامريكيه (( المحـتـرفين )) وبين لاعبي نادي الهلال ؟!! عندما يطبق الاحتراف بشكله الصحيح ربما نقـبل مقارنـتـنا بنادي لكرة السله الامريكي في الدرجه الثالثه !!! فهناك لاعبين يختلفون عن هــنــا ... واعتقد انك تعرف هذا الشيء .

اذا اللاعبـين لا يريدون المدرب .. و الاعلام كذلك .. وجزء كبـير من الجمهور لا يريده ... فمن يريده اذا ؟!!

اذا اصبح يضع مشاكله الشخصيه داخل الملعب فهو يخون الهـلال .. والا لماذا لا نرى سامي ؟! اين الشيحان من بداية الموسم ؟! ولعله في مقابله صحفيه يقول لا يعجبني الشيحان بسبب تصرفاته ؟؟؟!! هو الشيحان بيخطب بـنتبه ولا بيلعبه كوره ؟!!

@ الجمعان ياسمو الامير اما ان توقعوا معه عقد احترافي ويفيد الهلال ... او بـيعه بمبـلغ يساوي قيمة عبدالله الجمعان و تعويض الهلال بلاعب كبير مثل عبدالله .. فوضعكم هذا فوضوي مع احترامي لشخصك الكريم .

@ حسين الحبـشي مهيأ ان يقود الهلال فتره مؤقته .. حتى يتم الاستعانه بمـدرب كبـير غير هولندي .. مثل يوردانسيكو أو الاستـعانه بالمدرسه البرازيله الهجوميه ..

@ محمد العنزي في احتياط الهلال ؟ ويلعب سيسيه و احمد الحربي و.. هؤلاء الثلاثه جميعهم يلعبون في الوسط الايمن ؟!!!

@ منذ بداية الموسم ورغم الدعم المادي لك ياسمو الامير الا اننا لم نرى مستوى يفتح النفس للهلال باستثناء كذا مباراة تعد على الاصابع ... ولعل الخلل واضح .. باجماع العديد من الهلاليين والخلل في مدرب الفريق .. آدمـيوس .. اتمنى الا نخرج من احد البطولات بعدها نتـحسف على التأخير في اقالة المدرب .. ولعلك سترى في اجتماع اعضاء الشرف يوم الثلاثاء تضايق اعضاء الشرف من مدرب الفريق .

اتمنى الا يكون عذرك النواحي الماديه .. نعم قد يبدو صحيح .. ولكن الجمهور اصبح يتضايق من تصريحات سموك بإن اعضاء الشرف لم يدفعوا و الخزينه خاويه ... فلابد من تحمل المسوؤليه قليلا .. فليس من المعقول رمي المسوؤليه على اعضاء الشرف ..

ارى اول الخطوات الـتصـحيحه للـــــفريق باختصار شديد :

- ابعاد الجهاز الفني
- جلب مدافع قوي سعودي او محترف ..
- ان كان هناك عدم سيوله ماديه فليتم اعارة العلي وشراء بقيمته لاعب مدافع .
- بـيع عقد تراوري وجلب بديلا منه مهـاجم كبـير .
- قبل هذا وذاك .. الاجتماع مع اللاعبين والمصارحه بكل شيء بدون وجود اي اداري .. بين الرئيس واللاعبين يوضحون اسباب هذه المستويات وماهي رغباتهم .. فان كان سمو الامير يستطيع توفـيرها او يـتـنازل عن الرئاسه .

هاردلك للهزيمه و لم اكتب بانفعال او توتر بل بعد وجبة عشاء .. وبهدوء تام ..

تحدوه البشر · #2 16/01/2004, 12:40 AM

يا زين ما كتبت يا كايدهم

الجلوس مع اللاعبين والاخذ برائيهم في المدرب اصبح ضرورياً
والمكابره على حساب الجماهير ورغبتها مؤشر سلبي

نتمنى ان لا يصل الحال الى مدرجات خاليه في مباريات الهلال بسبب الوضع الحالي

تحياتي لك ...

إعلامي معتزل! · #3 16/01/2004, 01:41 AM

الدوري بينتهي وانت تقول خلونا نعالج الاخطاء كل ما انهزمنا نروح نناقش المدرب الى متى نناقشه شوفوا نادي الاتحاد يفررررررررم الفرق الاخرى بالثلاثه والاربعه وحنا باللعنه ان فزنا فزنا بهدف والا نتعااادل داااايم

البيرق · #4 16/01/2004, 01:47 AM

إقتباس


	إقتباس من مشاركة ابو دقش الدوري بينتهي وانت تقول خلونا نعالج الاخطاء كل ما انهزمنا نروح نناقش المدرب الى متى نناقشه شوفوا نادي الاتحاد يفررررررررم الفرق الاخرى بالثلاثه والاربعه وحنا باللعنه ان فزنا فزنا بهدف والا نتعااادل داااايم

abdullah suliman · #5 16/01/2004, 01:48 AM

أخوي اكايدهم
الله يعيننا على هيك مدرب وهيك مدافعين عنه..
لن ترتاح الإداره الهلاليه حتى ترى بأم عينها أنها خسرت بطولات الموسم جميعها..

الهلال حالياً يتعرض لقتل بطيء على يد هذه الإداره...
المدرب مفلس للغايه ومع ذلك لازالت الإداره ترفض النقاش فيه..

آخر الأخبار تؤكد أن إدارة الفريق تقف عاجزه أمام الشرط الجزائي..

الـــبـــتـــار · #6 16/01/2004, 01:51 AM

لا تكون من المندسين

كـادي · #7 16/01/2004, 01:59 AM

إقتباس


	آخر الأخبار تؤكد أن إدارة الفريق تقف عاجزه أمام الشرط الجزائي..

مايبون سلف عادي أسلفهم

أبوحمـــ15ـــــــــــد · #8 16/01/2004, 02:37 AM

كايدهم.... من يسمع؟؟ من يسمع؟؟؟

الموسم بيخلص وحنا نتعذر ونخلق اعذار وكلش تمام واصبروا والصبر زين والطمع شين وكلش بيضبط!

الله يخلف علينا اذا فكرت الادارة تستمر بذالمدرب....

سراب الدمع · #9 16/01/2004, 02:58 AM

[ALIGN=CENTER]مساء الوررررررررررررررررررررررررررررررررررد

إقتباس


	هو الشيحان بيخطب بـنتبه ولا بيلعبه كوره

جازت لي

عن نفسي أرى أن جريمة آد ديموس التي لاتغتفر اليوم هي وجود الخثران في مركز الظهير الأيسر !!!

خطأ في غاية الفداحة .

صدقوني أن الجري يستطيع أن يلعب هذه المباراة ، ويحدث توازن جيد في خط الدفاع !!

ولكن للمدرب قناعات غريبة !!

أتمنى معالجة الأخطاء بأقل قدر ممكن من الخسائر .

@@ كايدهم تعلم جيداً أني غير مُقتنع بتاتاُ في تراوري

تحياتي .[/ALIGN]

ملتاع · #10 16/01/2004, 03:11 AM

أخي كايدهم

هل ننتظر إلى أن يخرج الزعيم من الموسم بدون أن يحقق شئ يذكر حتى نعيد ترتيب البيت الهلالي ؟؟

لا أظن أن الإدارة ستتخلى عن أديموس ولكن نريد منها أن تحاسبه على ما يقوم به من تخبطات أضرت كثيراََ بالفريق رغم وجوده لفترة طويله فيه 0

أخي أنت طالبت بالإبقاء على أديموس ثم تطالب الأمير عبدالله بإعفاءه من التدريب ولا ندري أي من الإثنين تريد0

تقبل تحياتي

رعبووووووب · #11 16/01/2004, 03:39 AM

مشكور اخوى وكلام فى غايه الروعه

والله كلامك من جد منطقى يجب ان نقف مع الهلال لا ان نهاجم لمجرد الهجوم

سراب الدمع

الجرى موقف لانه ماخذ كرت احمر فى مباراه الاتفاق

كايدهم · #12 16/01/2004, 04:00 AM

تحدوه البشر ..

نعم اخذ رأي اللاعبـين ان كانوا يريدون يستمر او ان رأوا عدم جداوه فليرحل .. فمصلحة الهـلال هي اهم ماعلينا .

ابو دقش ..

قبل الرد ارجو قراءة الموضوع ثم اضافة الرد .. لا تستعجل وانا اخوك .

مجنون سامي999999999 ..

لا مدرب ولا دفـاع .. يـبيلهم تجديد .. اليوم انكشفوا وسينكشفون اكثر في المباريات الحساسه اكثر .

العا15شق ..

الله يستر والله اقولها من كل قلبي اذا استمر ادميوس .. لانه يمشي الحين الهلال بالبركه مره فوز ومره تعادل .. وهزيمه .. يعني مايمشي الفريق بسير معين .. غير طلعاته الغريـبه ..

سراب الدمع .. هالمدرب كله غلط .. و تراوري يجي منه بس متى ؟! هذي المباريات الكبـيره تحتاج الى لاعب كـبير لكن تراوري مايلعبها بشكل صح ....

ملتاع ..

إقتباس


	أخي أنت طالبت بالإبقاء على أديموس ثم تطالب الأمير عبدالله بإعفاءه من التدريب ولا ندري أي من الإثنين تريد0

كلامك صحيح ..

في بداية الموسم دافعت عن آدميوس ... خصوصا في اول ثلاث مباريات .. لسـبب مــا ..

وهو انه في الموسم الماضي شاهدنا عمله ومستوى الهلال .. كان ممتــاز .. بعد بداية الموسم .. وفي ظل الظروف الصعبه من نقص واصابات وكبداية موسم .. اعتبرته بدايه من الممكن تكون طبيعيه خصوصا ان الرجل شاهدنا عمله مسبقا .. فقلت انتـظروا .. دافعت عنه قليلا بحجة ان الوقت بـدري ..

لكن اكـتـشفـنا ان الوضع زي ماهو عليه .. لا فيه تـطوير ولا تغير قناعات ولا عـمل جدي لتغير المستويات و النتائج ..

وشيء طبيعي بعد ان ارى ان المدرب مستمر في اخفاقاته وتخبطاته ان اغير قناعاتي تجاهه .. فمثله مثل اللاعب المحترف الذي يقدم مستويات جيده اول الموسم ثم يتراجع فننـتـقده ونطالب بتسريحه ..

هذا كل مافي الامر ..

ملتاع · #13 16/01/2004, 04:39 AM

أخي العزيز / كايدهم

لكل شخص رأيه الخاص وصدقني أحترم رأيك ووجهة نظرك والتي أتفق معك فيها ولكن لانريد أن يتم تغيير المدرب في هذا الوقت بالذات فمتى سيتم إحضار مدرب جديد ومتى سيتعرف على الفريق
وإن كان ولا بد من التغيير فنتمنى أن يكون بالحبشي فهو أعلم بالفريق من غيره0

أخي أنا أقصد أنك في نفس الموضوع طالبت في بدايته بالإبقاء عليه
وفي نهايته تسريحه وهذا سبب تساؤلي 0

تقبل تحياتي

كايدهم · #14 16/01/2004, 05:18 PM

اهلا رعبووووووب ..

حتى لو الجري موقف .. والمدرب يعلم ان الخثران لا يريد ان يلعب ظهير ... جب النـزهان طيب .. اشركه ظهير ايسر .. واستفد من الخثران كمحور مع عزيز !!

بس مدرب معاندي الا يبي يفرض كلمته غصب ولو انها خطأ !!!

ملتاع ..

ماهي ايـجابيات آدميوس ؟!!

كاد الفريق يطلع من البطوله العربيه والسبب تخبطات آدميوس !!

الفريق يخسر من الطائي و الوحده و النصر ... ويتعادل ويفوز بشختك بختك .. مدرب لم يعرف الهلال .. مدرب يكابر ويعاند .. مدرب له فلسفه غبيه استدلاخيه لا تصلح للهلال ..

يوردانسيكو جاء في وقت متأخر ونجح معك .. لازراوني جاء على المربع الذهبي وحصل معك على الدوري .. اخرهم آدميوس جاء في منتصف الموسم ونجح معك ..

الآن الدوري في الجوله الثالث العشر .. تبقى فقط .. 7 جولات وينتهي الدوري .. وهي فرصه لجلب مدرب .. سواء كان جديد او مدرب يحظي بقبول الهلاليين وهو يوردانسيكو ..

لا يعني ان المدرب فاشل و نحن في منتصف الموسم يعني خلاص نستمر عليه .. طيب بذمتكم بالمستويات هذي تتوقعون تحصلون على بطوله ؟!!

والله مانشم بطوله بتخبطات آدميوس اللي جالس يسويها .. والله انه يرفع الضغط ..

طيب لو مانفهم كلنا بالكوره هو وين دوره وين عمله وين الشغل اللي جالس يسويه ؟!!

له مع الفريق اكثر من سنه تقريبا وعرف اسرار الفريق والى الآن لم يعرف كيف يتعامل معه !!!!

وش ترجون منه اجل ؟!!

حسبي الله ونعم الوكيل

falcon1515 · #15 16/01/2004, 05:32 PM

مرحبنـ ( بك) اخوي كايدهم ....

إقتباس


	فوضعكم هذا فوضوي

حلوووووة

بس قوية وفي مكانهاااا ....

تحياتي