وجهه نظر هــــــــــــامه تخص الدعيع - نادي الهلال السعودي - شبكة الزعيم

بدر · #1 27/03/2001, 10:20 PM

ياشباب اسمعو وش ابقول بعدين فكرو بعقل وبدون عصبيه مافيه شك ان الدعيع من افضل خمس حراس في العالم هذي مافيها جدال وحاليا هو الابرز ومافيه احد ينافسه ابدا ابدا , اللي ودي اقوله ان الهلال عنده مشاركه في مونديال الانديه بعد 3 شهور او اربعه ومحتاجين محمد في هالمونديال لكن بعد المونديال انا اقترح بيع عقد محمد الدعيع الى احد الانديه مثل الاتحاد او الاهلى وسوف يشترون عقده باكثر من 6 ملايين طيب ليش ؟ الحين نادي الهلال عندة ثلاث حراس على اعلى مستوى وصغار في السن حسن واحمد ضاري وبندر الماس محمد وماراح احد منهم يبي يمسك المرمى الهلالي دام الدعيع موجود اللي اقصده انه انا خايف ان حسن او الماس ينتقلون الى انديه اخرى لانهم حاسين باليأس باللعب دام محمد موجود وانا اعتقد ان حسن وضاري امكانياتهم كبيره جدا لو اخذو الفرصه وانا ماقول الكلام هذا تقليل في محمد بالعكس زي ماقلت محمد من افضل حراس العالم بس وجوده في الهلال راح يقضي على مواهب الحراسه عند حسن وضاري والماس خاصه ان محمد في الثلاثين وحسن وضاري توهم في الخمس وعشرين
انا احب محمد واحب حسن واحب ضاري بس احب الزعيم اكثر منهم وعلشان يكون فيه تنافس بين حسن وضاري وابندر الماس لان مستواهم متقارب وراح يرتفع مستواهم لان كل واحد حاس انه فيه امل انه يكون اساسي على العكس لما يكون محمد موجود كلهم راح يتمرنو كذا بس تأديه واجب

مجنون الهلال الدولي · #2 27/03/2001, 10:58 PM

حسن العتيب بعض الاحيان يخورها...واحمد ضاري لا باس به...

بوهلالي · #3 27/03/2001, 11:07 PM

أنا اخالفك الراي بشدة ، هذا الحارس العملاق عندك في ناديك وتروح تبيعه أمر غير منطقي ( يعني ما يصير ترفس النعمة )

][wolf][ · #4 27/03/2001, 11:09 PM

ما اوافقك بوجهة نظرك اخوي...
اننا نفرط بموهبه مثل محمد الدعيع علشان نعطي الفرصه لغيره هذي مغامره غير محمودة العواقب...
ومثل ما قال اخوي مجنون الهلال الدولي ان حسن عليه خورات بعض الاحيان ووجود محمد معه بالتمارين راح يحفزه للمنافسه وبذل الجهد اكثر وتصليح عيوبه...

بالنسبه لاحمد ضاري بوجهة نظري الشخصيه انه صفقه فاشله بمعنى الكلمه ولا يجب اننا نغامر بوضعه على دكة الاحتياط كبديل اول في حالة بيع محمد الدعيع....

اما بندر الماس الطريق قدامه طويل ومازال بسن صغير ويحرس مرمى شباب الهلال واحتكاكه بالدعيع من خلال التمارين راح يفيده....

على العموم الاجدر هو الي يستحق حراسة مرمى الزعيم...

romeo · #5 27/03/2001, 11:44 PM

الـــسلام عليكم؛
اخالفك 99.99 %
وجود يبعث الثقه للمدافعين وقبلهم المهاجمين مايشيلون هم لانهم عارفين مين اللى واقف في المرمى واحد من افضل خمس حراس في العالم
اختـــلاف الرأي لايفسد للود قضيه
وكـــلنا نتفق على حب الزعـــــيم

عاشق الثمامه · #6 28/03/2001, 02:32 AM

نبيع مين ياخويا
محمد الدعيع ذهب اصلي ولانفرط فيه حارس القرن وعمبد لاعبي العالم نبيعه وبدامك مقتنع بأمكانيات حسن العتيبي واحمد ضاري وأنهم لازم ياخذون فرصتهم ليش ما تقترح ان نبيعهم وياخذون فرصتهم برى بدال ما يروح الدعيع
يأخي معليش كني عصبت شوي بس الدعيع حقيقه فريق لحاله وهو احسن صفقه في تاريخ الكره السعوديه بالفعل صفقه رابحه الدعيع
الدعيع بعد حيي اذا ما شفته في الباب كان في الهلال او المنتخب والا ما ترتاح

بعد حيي الدعيع الله يخليه لعين ترجيه ويخليه للكره السعوديه
والله هو اللي ساتر علينا بعد الله

enad · #7 28/03/2001, 03:11 AM

وش رايك نبيع احمد الدوخي على شان النزهان ياخذ فرصته ونبيع نواف على شان منصور الشهراني ياخذ فرصته ونبيع كل مبدع بداعي اعطاء الفرصة لغيره هذا الكلام مو منطقي وانا اخالف فيه
حسن العتيبي بياخذ برصته عند مشاركات المنتخب وكل الاعبين الموجودين اكيد بياخذون فرصتهم والملعب لا يسع الا لاحدعشر لاعب ولو كانو موجودين في فرق ثانيه صدقني بيكونون اساسيين بس حبهم للهلال ووجودهم مع افضل اللاعبين افضل لهم من اي فريق ثاني ولو كانو اساسيين

blue thunder · #8 28/03/2001, 03:52 PM

ما بعناه على غلطه سراي بأكثر من المبلغ اللي قلته تبي نبيعه للأهلي او الاتحاد ؟؟؟
؟؟؟؟؟ ؟؟؟؟؟ ؟؟؟؟؟ ؟؟؟؟؟ ؟؟؟؟؟ ؟؟؟؟؟ ؟؟؟؟؟ ؟؟؟؟؟ ؟؟؟؟؟

ابو مصعب · #9 28/03/2001, 04:26 PM

ياسلام......

حقول نفس الكلام عن موضوع الاخ اعاني ........
. موضوعك جدا رائع ووقته جدا جميل قبل المباراة الغير مهمه في كاس ولي العهد ........ نبيع الدعيع ................. يا سلام

وجهة نظر

المحتار · #10 28/03/2001, 04:41 PM

افـــااااا وش ذا الكلام يا ( بدر )
ماتبي الدعيع وتبي حسن العتيــــبي
واله اللي ماهقيتها منك

ابو هلال · #11 28/03/2001, 05:12 PM

بصراحة انت غلطان في حق حسن
حسن من افضل الحراس في العالم وهويستحق المركز الاول في الحراسه

لا احد يصدق كنت احلم

ALNMR · #12 28/03/2001, 05:38 PM

ابدا ......وابدا....
اخالفك الرأي....نهائيا...
لا اعتقد بأن الهلال....له هذا الرأي....كل الطرفين مرتاح من الثاني..
محمد...لاعب مواضب...مجتهد...مبدع ايضا...
الأدارة ا...الجهاز الفني....الجهاز الإداري...و البقية...
في امان....والكل مطمئن....

اعتقد بأن الإحتياط الهلالي بوجود العتيبي...غير مطمئن....وآخر الأبداعات ..
من العتبيبي مباراة القادسية....

الإمبراطور · #13 28/03/2001, 05:40 PM

الله , الله , لو درى رائد النكت ( مستشار الرئاسة العامة لرعاية الجهود لتدمير الزعيم )
عنك قبل إعلان تشكيل الإتحاد السعودي لكره الهلال , كان لقيت إسمك أول واحد ,,,,,,,,,,,,
مع شلة الأنس الصفر الحلوين .

............ أتيت بما لم تأتي به الأوائل , ولا أزال أظنك مازحا ............

كمبيوتر الهلال · #14 28/03/2001, 06:07 PM

ياأخي مع الاعتذار
الظاهر انك تهـــــــــذي
بما لا تـــــــــــــــــــــــــدري

عبدالله الموكاء · #15 28/03/2001, 06:22 PM

ما صدقنا نشريه تقول نبيعه !!!!!!

يا أخي ما شفنا ثلاث و أربع بطولات في الموسم الواحد إلا لما جاء الدعيع .و إلا معجبك حسن العتيبي الذي ضيع على الهلال في موسم واحد ثلاث بطولات وله في كل مباراة هدية للفريق اللآخر ومستواه ثابت ( أخطاء )

أما ضاري فأنا أجزم أنه أفضل بكثير من العتيبي ولو هو مع فريق غير الهلال كان شفته مع المنتخب ولكن . . . . . . .