كثير أشوف أعضاء ينادون بعدم فتح المواضيع مثل هذي .. و إن الفريق بحاجة لمساندة ووقوف ..
ياشباب .. تراه منتدى و لا فيه أي لاعب بحياته قد دخل يقرأ وش تقول ووش أقول ..
هي مجرد فضفضة كنك باستراحة والا بجلسة .. من باب مشاركة الناس رأيك و قناعاتك ..
بالنسبة لي .. أشوف الواسطة بكل الأندية .. مهب بس بالهلال ..
كثير من اللاعبين في الفئات السنية يلعبون بواسطة ..
وأنا أتكلم عن واقع خبرة و معاشرة لناس إداريين في أندية و لاعبين سابقين ..
كثير منهم تكلّم عن هالشيء ..
مستحيل تلقى لاعب في الفئات السنية ماجاء عن طريق أحد ..
يا أخوه .. يا ولد عمه .. يا رفيق أخوه .. أو رفيق ولد عمه
أذكر لاعب حواري فلتة بكل ماتحمله الكلمة .. لاعب يحب الكورة حب أقشر .. مركزه وسط ..
واللاعبين اللي مثل هالنوعية نوادر و صعب تلقى مثله .. مهب بس بالكورة .. في أي مجال المبدع نادر ..
المهم كان وقته في أواخر الطعشات .. بعد إصرار منا على إنه يروح لنادي ..
راح هو وثلاثة يجربون حظهم .. واحد من هالثلاثة أخوه يعرف عضو شرف ..
راحوا للنادي المذكور .. وتدربوا يجربونهم ..
فقط واحد منهم اللي قبلوه .. اللي له معرفة بعضو الشرف ..
والله بوقته إنه يجي يلعب معنا بالحواري تكملة عدد .. نصير ناقصين نجيبه .. وفعلاً دخل النادي
خوينا الفلتة .. الحين عمره بأواخر الثلاثينات .. ومازال يلعب بالحواري .. ومازال فنان بكل ماتحمله الكلمة من معنى ..
اللهم كريشة بسيييييطة طلعت له
..
وأنا كل ماشفته أتحسّر كيف مثل هذا مالعب في نادي كبير ! ..
نرجع لموضوعك ثاير
المفرج قدم بعض المباريات الملحمية .. لكنه بالمجمل كان تكملة عدد و يصلح إحتياط ..
تواجده في النادي الآن بعد اعتزاله واسطة قوية .. وإلا فيه ناس أحق منه في هالمركز ..
مثل التيماوي .. أبوثنين .. التمياط .. و كثير من أساطير لهم شخصية و لهم إنجازات تخلي اللاعبين يحترمونهم ..
نفس الواسطة اللي خلّت الفرج يلعب أساسي و هو مبربس بالفريق ..
ونفس الواسطة اللي خلّت اللاعبين يلعبون كن الفريق فريق أبوهم ! .. لا احترام للعقود ولا للجماهير ..