اختصرت علي الرد اخي الحوت الأزرق فقط أود الإشارة إلى لفظ بطولات الكؤوس يشارك بها بعض البدلاء بدلا من لفظ كأس ولي العهد... وشكرا

الارهاق ذريعة الفشل
و شيء نفسي أكثر منه جسدي
لك إنك تتخيل لاعب يلعب مباراة كل أسبوع وباليالله يكمل 90 دقيقة و أغلب لعبه على الواقف ..
مسألة ثقافة فقط .. الإرهاق يجي من المعسّل و الدخان اللي كثير من اللاعبين يستلم ملايين و مخه للحين على زقاير و شيشة ..
لما لاعب يسهر للفجر .. و الله يعلم هالسهرات وش يسوي به .. ويجيك ساعتين عقب العصر يشوّت الكورة ويمشي بيتهم ..
كيف تبيه يقدّم لك لياقياً ؟ .. لا اكل صحي ولا شيء ..

تبي تشوف اللياقة .. رح للحواري .. ناس تلعب على مدار الساعة .. يلعب العصر مباراة و عقب العشاء مباراة عادي ..
وعمره مهب صغير .. تلقاه بآخر العشرينيات .. أما اللي أبو طعش .. هذا يلعب الظهر و العصر و المغرب و العشاء لين الساعة 11
ويروح لبيتهم مافي رجله أصبع صاحي .. و ركبته منشقة .. وسيقانه كدمات ..
وبكرا يدوّر فريق يلعب معه ..

فيه ناس تاخذ الكورة هواية .. فتلقاه مبدع و فنان في الكورة ..
وفيه ناس تاخذ الكورة مال ودعاية .. يدخل النادي بالواسطة بعد الفلترة اللي تصير في الفئات السنية ..
وأول مايلعب مباراتين أساسي .. يحلق شعره نص تحليقه .. ويحط ربطات بإيدينه و رجلينه كنه المحارب ..
ويعلك علك كل المباراة و أي إحتكاك ثلاث دقايق نايم بالأرض مسوي كول ..
وأول مايطلع من المباراة تلقاه ينقز على ظفر رايح للسناب يصوّر نفسه يرقص ولابس لي لبس تقل مغني راب ..

تبي بطولات .. جب لي رجال بالملعب .. مهب بس بالهلال .. بالكورة السعودية بشكل عام هالنماذج ..

شف منتخبات كنا نطقطق عليها مثل أوزباكستان و غيرها كيف تطوّرت .. وحنا مكانك سر ..
شف لاعبينهم واحترافيتهم .. كلهم طقم واحد تقول صبّابات عروس .. الشعر نفس الطول .. الملامح نفس الملامح .. لو تلبسهم فنايل موحدة الأرقام ماعرفت تفرق بينهم .. فدائية و لعب رجولي كل المباراة .. حتى وهم خسرانين