السلام عليكم ورحمة الله وبركاته

بشرح لكم الي بخاطري من غير رتوش ومن غير تنسيق لأني احدث ناس واعيه ما يهمها تنسيق الموضوع بقدر يهمها فحواه

انا لي فترة اشوف الكل قايم ع الرئيس وع المدرب وع اللاعبين

نأخذهم واحد ورى الثاني

الرئيس : انا لي ملاحظات كثيرة ع ابو فيصل ولكن كل ما أجي اكتب اتراجع تدرون ليش
لأن هذا الرجل دفع وحط ورافع عن النادي وجدد عقود لاعبين وجلب لاعبين جدد وكل سنه اقل شيء صفقتين يحسمها
وهذا غير عقود الرعاية الي قاعين نتمتع فيها ك جمهور هلالي
ولذلك اتوقف واعطي الرجل فرصه اخرى ، موب اقتناع في العمل ولكن لأن الرجل يستأهل ان يعطى الف فرصه

المدرب : كل عمل يجب ان يتوفر فيه الهدوء والرضا عشان الانتاج يكون افضل
والي قاعد اشوفه ،، شويه مبزره في تويتر وهنا في المنتدى تنتقد لأي سبب لدرجه وصلوا لمرحله تحقيره لشربه المويه والتهديد بقتله في تويتر
وفيه جمهور سامي الي من دخل علينا ريجي وهم يقارنون سامي ب ريجي
طيب سامي نحبه ونعشقه وكنا نتمنى يواصل مدرب ولكن اعطي فرصه سنه ولم يحقق بطوله ، وفي عصر سامي النصر اخذ الدوري والكاس ومن امامك
خلاص سامي راح والان يدرب فريق آخر ، اذا انتم تخربون الهلال عشان سامي : روحوا شجعوه في الامارات واتركوا ريجي لنا بخيره وشره

اللاعبين : الكل يقسو عليهم وكأنهم آلالات ولاترون الايجابيات الي يسوونها

بداية من ناصر الي تعرض لحمله شرسة وفوق هذا انقلب عليه الجمهور الهلالي بأسلوب طفولي ولم ينصفه الا مدير المنتخب المرزوقي

اربع مباريات سابقه اغلبها فوز وبالثلاثة والهدفين
صحيح فيه هبوط بالمستوى ولكن هذا شيء طبيعي ، كل شيء بالدنيا له مؤشر هبوط وارتفاع ، افتراضاً تقفون مع اللاعبين موب تضغطوهم أكثر


ع العموم انا قلت الي بخاطري واتمنى من ادارة المنتدى عدم قبول أي موضوع فيه نقد لا موضوعي للرئيس والادارة واللاعبين والمدرب


احنا نبي نبني موب نهدم

ولو تلاحظون ان الفريق ماشي كويس بس باقي بعض الامور بالإمكان تلافيها

وفيه ناس تشيش الجمهور ع الرئيس والباقي أمعه يتبعهم بس ينتقد ع عماها

الي نبيه في انتقادنا للرئيس والمدرب واللاعبين ان نقوم العمل موب نهدمه وما نتبع الي يثير الفتن بينا

ودمتم