السلام عليكم ورحمة الله وبركاته أخواني أخواتي القرّاء ..
برغم إن المنتديات في درب أنها تصير سباحين من الماضي و السبب مطاردة الناس لهادم اللذات تويتر وما شابهه من مواقع تواصل إجتماعية ..
إلا إني من لآخر نقطة دم في جسمي سأبقى أسير المنتدى مستعيذاً من الشيطان الرجيم من أن يغوين لدروب تويتر ومواقع أبو 14 كلمة و أنت مقفّل و مرسل .. ..

ولا أنسى أذكّر أخواني القرّاء إن مافيه ولا لاعب هلالي يقرأ المنتدى ولا عضو شرف ولا حتى سواق الباص ..
فأي كلام هنا ما يعني أي شيء سوى فضفضة وشيء بالخاطر .. و صدقون لو توصل لمدّة اليد ما حد درى عنّا ..

قبل أبدأ ..
أنا لست سامياً .. أكيد طبعاً سامي بأخلاقي و الحمد لله .. و لكن المقصد إني منب أتحيّز لسامي عاطفياً أو أبني رأيي حسب حبي له أو كرهي له .. مع إني أعترف و أنا بكامل قواي العقلية إن سامي الجابر اسمه له فزّة بالقلب لا يعلمها إلا الله .. لذكريات جميلة من ابتدأ إلى أن انتهى ..

طوال فترة إشراف سامي على تدريب الفريق .. كنت أشوف عضويات للحين حافظ أساميهم بالاسم .. طبعاً مهب كلهم للأمانة علشان ما صير تسذوب بعضهم .. يمكن واحد أو اثنين يعني ..
بس أذكر كنه أمس إن فيه عضويات بدت مواضيعها و ادهارها في المنتدى من استلم سامي دفة الفريق ..
بعد إقالة سامي .. اختفت هالعضويات .. و كأنك صكّيت الباب و طفيت اللمبة و فتحت الدريشة علشان النور .. وطلعوا

جميع من حط ثقله في المنتدى .. في تويتر .. في ذيك الفترة ماله وجود حالياً و كأنه حلم .. أو كابوس و انتهى ..
وقتها و عني شخصياً كرهت شيء اسمه منتدى .. مع وجود دعم وواسطة لهم هنا .. أو يمكن الحظ خدمهم في بقاء مواضيعهم ذيك الفترة ..

من ذيك النقطة .. نقطة الانقسام .. نقطة الحملة الإعلامية الشرسة .. من هلاليين و غير هلاليين ضد الهلال ( اللي يدربه سامي ) ..
قد أعذر النصراوي على محاربته الهلال تحت قيادة سامي .. فنجاح سامي يقاس بميزان .. نجاحه يعني سقوط في أسهم ديناصور الكرة السعودية .. صاحب الأرقام الوهمية .. فلا يحتمل الإنسان الأصفر أي نجاح آخر من سامي .. حتى لو اضطره للعمل تحت الطاولات .. حتى لو أقيل رئيس الإتحاد السعودي عضو شرفهم بدون ذكر الأسباب .. حتى لو اضطر حكم المباراة لاخراج الكرة بيده من المرمى واحتساب ضربة تماس لفريق ( 4x4 ) .

ولكن لا أعذر أن يحارب نجاح شخص يعمل للهلال من قبل أشخاص في الهلال نفسه ..

سقوط الهلال نفسياً كله بسبب تداعيات الإقالة .. ولكن من يهمّه رأي الجمهور دامهم يدفعون و يمثلون دخل إعلاني جيّد, خل اللي في المدرج يتفرّج على قولتهم ..

الهلال و أي فريق سعودي لا يحتاج لمدرب تكتيكي بحت .. كثر ما يحتاج مدرّب يعمل على الجانب النفسي ..
لأن اللاعب السعودي أصلاً يلعب الكورة بدون أي فكر كروية .. فلو قيّدته بمهام تكتيكية ضاع ..
مايعرف يسلّم و يستلم زي العالم .. ولا يعرف يسدد زي العالم .. ولا يعرف ينهي هجمة أمام مرمى طوله 7 أمتار ..
يركض وهو مغمّض في غالب الأحيان .. يرفع عرضية وكأنه قلب دفاع يخلص كورة خطيرة ..
يحب يرتكب أخطاء قريبة من خط مرماه .. والدافع مهب تكتيكي .. الدافع إنه زعل ليه اللاعب الخصم سحب فيه ..
بسرعة يتنرفز .. يطلع من طوره .. يقعد يهاوش اللاعبين و الحكّام .. ومرّات عادي يتهاوش مع الجمهور ..!

اللاعب السعودي يحتاج لمدرّب يعمل على الجانب النفسي أكثر .. يخليه يحرث الملعب رايح جاي دون كلل أو ملل ..
اللاعب السعودي يبدع إذا صار رايق .. إذا صار متحمّس .. إما إذا ذبحته بمهام أكبر من قدراته .. راح يضيع فريقك.

نحتاج لسنين علشان نخرّج لاعبين مصقولين مهارياً .. قبل كانت ملاعب الحواري هي مصدر المواهب ..
لأن لاعب الحواري يلعب الليل والنهار .. لياقته فل .. حساسيته على الكورة فل .. صح يفتقد للتكتيك .. بس يعوض بأشياء ثانية ..
الحين الفرق كلها واسطات .. أغلب لاعبي الناشئين و الشباب في الأندية عيال عم أعضاء الشرف أو اللاعبين ..
وجاي يلعب حب في الشهرة و الدراهم .. أما المواهب الحقيقية اختفت مع إنها موجودة ولكن تحتاج لكشّافين يعملون بذمة وضمير. .

* علشان كذا .. سامي كان الخيار الأمثل و الأفضل لتحقيق آسيا .. وإقالته كانت خطأ أكبر من خطأ وضعه كمدرّب من الأساس هذا إذا كان تدريبه للهلال خطأ ..

ما أبي أقول إن الكلام في الماضي نقصان بالعقل زي مايقولون .. لأني قاعد أتكلم بالماضي ..
لكن ما يمنع اننا ناخذ الموضوع من جانب السواليف وتفريغ اللي بالخاطر ..

الهلال خذله ناس بدّو مصلحتهم الشخصية على حساب الكيان .. خذله ناس يشوفون الهلال ملك من أملاكهم ..
يزعل لو تنتقده مع إني أجزم بأن واحد من منتسبي هالمنتدى يعشقون النادي أكثر من أعضاء الشرف أنفسهم مجتمعين ..

خذله لاعبين يحسبون أن لهم فضل على النادي وعلى الجماهير .. مايدرون إن رواتبهم العالية بسبب الجماهير أنفسهم .. ولو كان النادي بلا جمهور والله مايستلم ولا 200 ألف مقدّم عقد ..
أي لاعب هلالي لازم يحب إيده وجه وقفى لوجود جماهير مثل جماهير الهلال بهالعدد الكبير جداً ..
وبعد مايحب إيده .. ينزل الملعب يمتره ذهاباً و إياباً .. وإذا خلصت المباراة وفاز .. يحب إيده وجه وقفى مرة ثانية إن فيه جماهير تدعمه مثل جماهير الهلال ..

الهلال بيرجع .. فما أسوأ من هلال اليوم إلا هلال أديموس و العجلاني .. ومع ذلك الهلال رجع وقتها وحقق كل شيء

هلال ريجي الحالي عقيم تهديفياً .. أي فريق ضعيف أو قوي يخطف منك تعادل أو فوز .. بخطة وحدة ..
هلالي ريجي يا جماعة يعتمد على خطة مستحيل تنجح حتى لو لعب فيها الريال ..
خطة تتجاهل خط الوسط في أكثر أوقات المباراة .. الكور تنقل من الدفاع للمهاجم الوحيد دايركت ..

العلاج بسيط .. استئصال من يعبث في النادي .. بدءاً من بعض أعضاء الشرف .. نهاية بالمدرب و بعض اللاعبين ..
مدرّب يملك شخصية قيادية يتعامل مع الجانب النفسي أكثر من الجانب التكتيكي ..
مدرّب يقدر يطلّع اللاعبين من الهم و الغم اللي هم به ..
يجيب مهاجم مثلي على أيام عزّي .... ماصورة كهرب من مسافة بعيدة أخلي الكورة تلعب رايحة جاية بين الماصورة والجدار بكل حرفنة و فن ودقة مسجلاً أجمل الأهداف ..
أما المهاجم اللي المرمى فاضي قدامه ويشوته بوجه الحارس ذا يتم تحويله لممرن حرّاس قبل المباراة ..

كان بودي إني أكتب و أطول بالكلام .. لكن دق علي واحد مواعده نبي نكشت بهالجو الجميل ..
وأدري إن الموضوع يحتاج لكاس شاهي ( لأني رجعت قريته و أثري ماسك بكم خط من نقطة لنقطة ) ..
ولكن اعتبروه تمرين لعضلات المخ ..

شاكر لكم و مقدر وقتكم الثمين بقراءة الدرر الثمينة اللي كتبتها ..
أبوساري

اتفق معك يابو ساري وللامانه موضوعك ممتع شاهدته أكثر من مره تسلم ياملكي

الله يعطيكم العافية وبالتوفيق للزعيم الملكي

طلبنك 11
تسلم يا صديقي على التعقيب الجميل ..

خلف نت
يعافيك ربي يازعيم ..

بالتوفيق للهلال في مباراة الإتحاد وبإذن الله تعدّي على خير .. بطولة ولي العهد هي مفتاح نفسي مهم للاعبين انهم ينطلقون بالدوري..
وأتمنى ريجي يخيّب ظني فيه في مباراة اليوم ويحقق الفوز ..

موضوع ممتع مفيد رائع ووضع النقاط على كثير من الأمور المهمه بأسلوب ممتاز

وفقك الله يازعيم وفالنا الفوز اليوم ان شاء الله

نفس المواضيع التي ظهرت على السطح بالفتره الماضيه مكرره بنفس القالب
خلاص نجح مخططكم في شق الصف
ننتظر الحلقه الاخيره من المسلسل وظهور البطل المنقذ س ج