السلام عليكم ورحمة الله وبركاته

أبدا موضوعي بالحمدلله والشكر على التوفيق المحالف لمحبوبنا وزعيمنا نادي الهلال وتأهله للنهائي الحلم واسأل الله إن يكتب لنا هذي البطوله

بعد غياب طويل جداً عن كتابة المواضيع واعترف بأني مقل حتى في ردودي لكن صفحة الزعيم لا تفارق بداية يومي لمتابعة اخباره

شدني لكتابة الموضوع اليوم هو تأهل نادي ويسترن سيدني ليصبح الطرف الثاني ليلاقي الهلال في النهائي ذهاباًَ في سيدني بتاريخ 25 اكتوبر
وإياباً في الرياض بتاريخ 1 نوفمبر


الأعضاء الكرام اشبعوا التحدث عن الهلال وعن مباراة الأمس من جميع النواحي .. والأن ما يقصرون وجالسين يفكون شفرة الفريق الاسترالي الغامض والمغمور لانه تأسس قبل سنتين فقط .. لكن محور موضوعي ماراح يكون عن القدرات الفنيه لفريقي أو فريق سيدني وانا واثق بإذن الله إن فريقي يقدر يجاري الفريق الاسترالي

نقطة اهتمامي يا اعضاء التخطيط السليم المطلوب من ادارة الهلال لترتيب سفرة الفريق ورجعته .. وهذا الإهتمام البديهي نابع من تجربه لاني كنت مبتعث في استراليا قبل 2013 وبالتحديد في مدينة الحدث سيدني .. وأعرف كيف ممكن تكون الرحله متعبه

أقصر مسافه كنت اخذها علشان اوصل لسيدني من الرياض كانت عبر الخطوط الإماراتيه وخطوط الإتحاد ..
مثال الإماراتيه .. عن طريق رحلة ساعه و 45 دقيقه لدبي وترانزيت 3 ساعات و 45 في مطار دبي وبعدين رحلة مباشره من دبي إلى سيدني لمدة 13 ساعه ..

بمجموع 18 ساعه ونصف ( غير فترة التجهيز للرحله والذهاب لمطار الملك خالد بوقت وتخليص اجراءات الوصول والخروج من مطار سيدني ) .. تعادل رحلة من المملكه لأمريكا ..




لكم أن تتخيلوا حجم الإرهاق اللي ممكن يصيب اللاعبين إذا سافروا قبل مباراة الذهاب بفترة قصيره ( ثلاث ايام أو اقل )
وأيضاً نفس مدة الرحله راح تكون عند العوده .. ( الفترة بين المباراتين ستة ايام فقط )

* فريق سيدني راح يستقبل نادي الهلال بالذهاب وهو مرتاح لانها على ارضه لكن راح يعاني مره واحد علشان مباراة الأياب ولا يهمه الرجعه لان الامور بتكون انتهت والبطوله خلصت .. لكن الهلال راح يعاني الأمرين في رحلة الذهاب والعوده قبل مباراة الإياب ..

لذلك اناشد إدارة هذا المنتدى لإيصال صوتي ونقطة اهتمامي هذي لإدارة نادي الهلال للتجهيز السليم للمباراة عن طريق السفر بوقت كافي لمباراة الذهاب واقامة معسكر في سيدني والرجوع بعد المباراه مباشرة أو اليوم إلي بعده علشان ياخذ اللاعبين قسط من الراحه ويضغطون على نفسهم ويستكملون تمارينهم لمباراة الإياب ..

ما أخفيكم إني كنت أتمنى فريق سيول الكوري في النهائي من منطلق حرصي على عدم ارهاق اللاعبين بالرحله .. أكثر من أي نظره فنيه وبالنهايه لازم الهلال يكون جاهز لأي فريق بأي ظرف لكن التخطيط للنهائي خصوصاً أن المباراة راح تكون ذهاب وإياب ورحله متعبه راح يفرق كثيير وان شاء الله يكون سبب بعد توفيق الله بحصول الهلال على لقب هذي البطوله ..

هناك مدخل آخر ممكن يرفعه نادي الهلال للإتحاد السعودي وهو تأجيل مباراة الأياب كم يوم ويشرح سبب التأجيل كامل .. لكن هذا المفروض ما يكون عذر أو مثبط لعزيمة اللاعبين وقتاليتهم على هذي البطوله للحصول عليها مهما كلف الأمر ..

نقاط متفرقه من مشاهدتي للمباراه اليوم ..

** فريق سيدني تأسس قبل سنتين .. فريق محترم وثقيل .. يغلب على لعبه الإنضباط التكتيكي .. الدفاع.. الإلتحامات .. اللعب على المرتدات وتوزيع الكرات .. العرضيات .. الضغط على حامل الكره ( ما عندي ادنى شك إن ريجي راح يقدر يقرا الفريق وهو ادرى بكيفية التعامل معه )

* سيول كان مستحوذ على الكوره اغلب أوقات المباراه لكن فريق سيدني سجل هدفين وكان منضبط وطلع من المباراه واخذ إلي يبيه مع إن السيطره كانت للفريق الكوري ..

* أهم نقطه .. عدد الجماهير الحاضره 20000 لكن طريقة تشجيعهم لفريقهم اوروبيه ومحفزه للاعبينهم وحسستني إن إلي بالملعب خمسين ألف واحد .. .. تخيلوا 60000 من جماهيرنا يشجعون بنفس حماس وطريقة الجماهير الأستراليه الحاضره !!!

أتمنى أكون اثرت نقطه مختلفه وإذا كانت ادارة الهلال ماتفكر فيها ( مع إني استبعد ) عالأقل تكون الآن تنبهت لها ..

ونلقاكم بإذن الله على إنجاز سعودي جديد بحول الله

لرد على موضوعك والتساؤلات الكثيره بخصوص المسافه وساعات السفر لسيدني
غرد رئيس الهلال قبل قليل بهذه التغريده
"
@A_Bin_Mosaad:
لبعد المسافة ستغادرالبعثة بإذن الله 18 أكتوبرمساءً أي بعد مباراة شقيقناالشباب في الدوري بيوم واحد بحيث نصل هناك قبل 5 أيام من المباراة

الأمير عبد الرحمن بن مساعد ذكر أن رحلة الفريق ستكون في 18 أكتوبر أي أن هناك متسع من الوقت ..

شكراً لك اهتمامك ..

الحمدلله إدارة ابو فيصل ما قصرت .. واشكر ردكم السريع .. انا كذا تطمنت .. من جهة الذهاب وخايف على الفريق من التعب في الإياب .. وريجي بإذن الله بيقدر يفك شفرة الفريق الاسترالي .. هو فريق موب سهل وحتى الفريق الكوري

يعطيكم العافيه