السلام عليكم ورحمة الله وبركاته

تعوّدت أكتب المواضيع أو الردود بشكل بسيط دون تكلّف .. بما إن المنتدى ملتقى العشّاق إذا صح الوصف .. ولا كلافة بين الأخوة ..


من سنة تقريباً أو قبله بكم شهر .. تغيّر وضع المنتديات بشكل عام .. خلونا نقول سنتين عن الشيطان ووسواسه ..

بصراحة من أغرب الأزمان هالزمن .. سنتين تغيّر كل شيء مهب بس بالإنترنت .. بالمجتمع ككل ..

كل شيء صار أسرع .. تبدلات المجتمع .. تغيرات السلوك .. اختلاف الرغبات ..

وعلشان ما أمسك بكم خط ماله دخل بالكلام اللي أبكتبه .. نرجع للمنتديات الهلاليّة بشكل خاص .. والنقلة في المواضيع وأسلوب الكتابة .. وحدّة النقد ..

ناخذ على سبيل المثال لا الحصر -

* انتقاد نتائج قبل أصلا البدء بالعمل ..

بالعامي - أحس الواحد يدخل المنتدى و براسه ألف موّال ..

يبي يطلع حرته بأي شيء .. وين العمل ؟ .. أبي اللاعب هذا .. ! .. ارحل .. لا ترحل .. صرختي تذبل ..

ومن هذا الكلام اللي مامدا الواحد يسمّي إلا وجاه حش لين أذّن ..


الآن على الساحة الهلالية موضوعين ..

الاول سامي كمدرب .. الثاني صفقات الهلال المحلية ..

والجماهير الهلالية تفاعلت مع هالحدثين بشكل مبالغ فيه ..

سامي كمدرب لا يسمح موضوع عفوي بهالشكل إنه يكون فيه نقاش مفصّل عن عمله ..

مع إني أشوف في سامي مستقبل هلالي جميل .. بالأرقام سامي ممتاز ..

خسر الدوري نعم .. بثلاث هزايم ..

كسب النصر الدوري نعم .. مع أكثر من خمس مباريات كان المفترض يخسر فيها .. لكن ( أخطاء ) تحكيمية حالت دون الخسارة ..

أتمنى من أي عضو ينزّل موضوع مفصّل بالأرقام و المباريات ..

بالأخطاء التكتيكية اللي تسبب بها المدرب .. والاخطاء الفردية اللي تسبب به اللاعب نفسه ..

علشان يكون محور النقاش عمل سامي هالموسم محليّاً .. بما انه انتهى الموسم ..


المحور اللي أبتكلم عنه .. هو الصفقات المحليّة ..

يعلم الله إني راضي كل الرضى عن عمل ابن مساعد رغم ان الكثير يختلف معي وأعي هالشيء ..

وإني راضي عن عمل سامي كمدرّب تمام الرضى .. لأرقامه و عمله و حماسه ..

ولأنه خسر الدوري و الكأس لأسباب واضحة لي وضوح الشمس .. وهي رغبة (الأمير) النصراوي بالبطولة بأي ثمن ..

دفع وضاعت عليه الملايين .. وحط النسب .. ولا جاه غير الكروت الحمر .. وحملة شعواء ضده ..


الصفقات المحليّة بالنسبة لي أهم من الصفقات الخارجية ..

وأنا يهمني صفقات في التشكيل الأساسي .. علشان الأساسي عندي يكون احتياط .. بكذا دعّمت الاحتياط و الأساسي

لكن وضع الإدارة مع الصفقات أمر غريب .. عجيب ..

ملايين تضيع بغرض تقويّة دكة الاحتياط .. حرفياً .. والأمثلة كثيرة ..


الصفقتين اللي هالشهر ..

الأولى غامدي النصر .. و الثانية الجبرين ..

والله إني ما أتمنى الغامدي في الهلال نهائياً ..

والجبرين لاعب جيّد .. لكن إلى أي مستوى يفرق عن إمكانيات الفرج في المحور؟ .. أو الغنام ؟ .. أو القرني ..!؟

او حتى كريري ..


حتى لو هو يتفوق عليهم .. مثلا .. لا يمكن إنه يكون أفضل منهم بشيء واجد ..

فارق الإمكانيات بين اللاعبين السعوديين بسيط ..

اللهم الإسم نفسه يخليك تتوهم إنه لاعب كبير خطير ..

لكن على الأداء داخل الملعب .. لو حطيت خيشة على راسه داخل الملعب .. صدقوني ماراح تعرفون من اللي يلعب .. ولا راح يفرق الأداء ..


فيه لاعبين مميزين .. للأمانة .. لكنهم ينعدون على الأصابع .. ( أصابع يد وحدة )

والهلال بحاجتهم .. وهم بحاجة الهلال ..

لكن اختيارنا لازم يكون حسب الحاجة للمركز .. لأنك راح تدفع ملايين .. وميزانيتك يمكن ما تسمح الا بلاعب أو اثنين بالسنة من خارج النادي ..

إذا هي ترتيب أولويّات ..


هذي مشكلة ..

لو سألت أي هلالي وش أضعف مراكز الهلال ؟ .. بيقولك الحراسة قبل تكمّل سؤالك ..

والحراسة هي فعلاً أهم مركز بالفريق كامل .. وهي المفترض تدفع فيه ضعف ماتدفعه بمهاجم أو وسط ..

لكن النظرة بالعالم تختلف ..

ماحد مستعد يدفع مثلا في حارس ممتاز 30 مليون .. يقولك آخذ فيها مهاجم أحسن .. حتى لو عنده 4 مهاجمين ..

يقول يدفّي الدكة .. نقويها .. ويجي ويجلس على الدكة لين يطيح مستواه ويصير مايسوى ريال ..

وهذي مثل ماقلت نظرة عالمية ..

لو اخذنا الباييرن كمثال .. وسألت أي مشجع لهالفريق ..

لو تتنازل عن لاعب بالفريق وخيّرك بين اثنين .. شفاينشتايقر لاعب الوسط .. و .. نوير الحارس ..

اجزم بأن الكل بيقول لاعب الوسط وهو مغمض .. لان مركزه سهل يتعوض .. عكس الحارس ..

لكن لو نظرت لسعر البيع لنفس اللاعبين .. واحد عادي ياصل 60 مليون .. والثاني مايتعدا 15 مليون ! ..



مقصدي .. الهلال بدل ملاحق الجبرين .. وملاحق الغامدي ..

ليه ماينهي معاناتنا الأبدية مع مركز الحراسة .. ويجيب الكسّار دامه صغير (23 سنة) .. ويمسك هالمركز اللي صار أضعف خطوط الفريق بعد الدعيع ..

أو يجيب أي حارس بالدوري .. حارس العروبة زي ماقال الدعيع إن له مستقبل كبير ..

وادفع فيه زي ماكنت تبي تدفع بالغامدي .. أو الجبرين .. ويجيك زي اللوز ..


ليه المفاوض عندنا كنه داخل بقالة .. مايدري وش يبي .. يتفرّج واللي يعجبه ياخذه .. واللي عليه عرض ياخذه ..

حتى لو هو مايحتاجه ..

وللأمانة هالمشكلة مهب بس عند الهلال .. كل الاندية مستحيل تطلب أحد تحتاجه ..

لازم النادي يعرض لاعبينه ويبسط بهم علشان الأندية تجي تشتري ..


مرة وحدة بس .. أتمنى المسؤولين مايتعاقدون مع أي لاعب لا للدكة ولا لغيره ..

يا تصعّد لاعبين الأولمبي .. يا تجيب لاعب أساسي بفريقه بمركز يحتاجه الهلال و يكون اللاعب فعلاً نجم ..


بالنسبة للجبرين .. لو الإدارة تبي ترد على هالصفقة على رئيس النصر .. لازم تفكر بكنّو .. لو كان الموضوع دق خشوم ..

بالنسبة لي أتمنى جلب الكسّار أولا .. و كنو كخيار ثاني ..


شاكر لكم وقتكم الثمين ...

اهم مرحله لجميع الزعماء لابد من التكاتف ياجمهور العز والوفاء
واللي بخاطره ينتقد نهايه الموسم اما الايام القادمه الهلال بحاجتنا

ما نبي لا للجبرين ولا الغامدي نبي الكسار وحسن معاذ ولاغب اجنبي بدل كاستلو

اخي الكريم لاتخلط الحابل بالنابل
السرعة في السنتين الماضية كماتراها استفاد منها الجميع الا الهلال واذا كنا نراها سلبيه فمارأيك بالثلاث سنوات اللي قبل السنتين
القضية ليست الغامدي او الجبرين او حتى كمبواريه وانما القضية هيبة الهلال وضعف التفاوض
لاعب لاتستطيع ان تجلبه ليش تفاوضه اساساً
مامعك فلوس ليش تنزل بعيالك السوق والا عشان تقهرهم
سامي سيستمر لنهاية الموسم على أقل تقدير وهذا مطلب لاستقرار الفريق لكن ليس للانجاز والاعجاز بالحصول على المركز الثاني في بطولتين هي الاضعف في تاريخ الرياضة السعودية في موسم غاب الاتحاد والاهلي والشباب والفتح وهبط الاتفاق واستأسدت الشعلة والرائد والعروبة ونجران فليس غريبااً ان يحققها النصر وليس غريباً ولا اعجازاً ان يكون الهلال وصيف في مثل هذه الاوضاع والا لازم يهبط حتى نقول الهلال غير مقنع

موضوع جميل
الاعضاء الاكيد انه ما يغضبهم هو امر اخر
كيف تتسرب اخبار المفاوضات وكيف يمكنك ان تقع في مطب دفع مبالغ عاليه للاعب قد يكون ميوله للمنافس حتي لو يزاود النصر في المبلغ الافضل ان تسئل اللاعب اولا قبل ان تقدم عرضك لناديه من لا يريد خدمه الشعار لاحاجة للهلال به

رب ضارة نافعة
قد يكون في ضربة الجبرين تصحيح لمسار المفاوض الهلالي في التوجه لحسم امر الحراسة الان قبل اشتعال فتيل الصفقات الصيفية

الكســـــــــــار وربي حاررررس بيشيل الفررررريق
واراهن عليها
ترى مافي شي رخيص ادفع ملايييينن الكسار يستاهل

شعشقون

يا صديقي أنا معك .. ضد الانتقاد الحاد و الحملات اللي تشتت العمل داخل النادي و تضع اللاعبين تحت ضغط ..

وهذي تصير اذا الجمهور راح للتدريبات و طالب و عرض وجهة نظره ..

لكن .. هنا منتدى صدقني ما أحد داري عنك لا لاعبين ولا إدارة .. إنما هي مواضيع للفضفضة و السواليف ..

والموضوع والله كتبته بألطف العبارات .. وحاولت قدر المستطاع إني ابتعد عن الكلمات اللي فيها شبهة ..


GLVAR

الكسار في متناول اليد فيما لو لعبت الإدارة دور ذكي في الموضوع واعطته سعر كبير وهو يستاهله للأمانة ..

والخوف كل الخوف من الكلام اللي يدور الآن حول مفاوضات الإتحاد له ..

أما حسن معاذ فأعتقد صعبة يجي حالياً .. إلا لو قدمت إدارة الهلال عرض يوازي إمكانياته ..

ولو طلبت حسن راح يطلبون منك الفرج و مبلغ مالي مثل ماطلبوا قبل ..


عذب السجايا

أخ عذب .. أنا قصدت بسرعة الزمن .. هي أن الفكر العام في النقد وحريّة التعبير في المملكة بشكل عام تغيّرت جذرياً ..

صارت الناس تغيّر في أراءها بالثانية و الدقيقة .. هذا يعجبني وهذا مايعجبني ..

أما بخصوص هالموسم ..

قلت لك ماهب انجاز المركز الثاني .. لكن انا اعتبره شخصيا المركز الأول .. لأن البطولة مخطط لها قبل لا تبدأ ..

والنصر وصلته مساعدات إلى بكرا وكله علشان مايزعل كحيل العين بعد الكروت الحمراء اللي جته و الملايين اللي صرفها .. لو التحكيم كان بيومه .. صدقني أقل شي يخسر النصر 7 نقاط بالراحة .. ولكان الهلال بالراحة الأول ..

اتفق معك في ضعف المفاوض الهلال .. وسوء الاختيار ايضا



هلالي.واشربوا.البحر

اخوي انا معك باللي قلته ..

الاخبار تتسرّب بقصد .. والمصادر يعطون الاعلاميين الهلاليين اخبار تعاقدات ومفاوضات الهلال ..

والفريق المنافس بالاساس كاسب الصفقة ومتفق عليها ..

ولكن بعد ماطلع لهم ريش هالسنة .. حبوا يكملون الفلم .. وحب كحيلان يلعب دور البطولة بحركات صبيانية ..

تتسرب الاخبار بشكل مؤكدة .. ويفصح عنها الاعلاميين الهلاليين بكل سذاجة .. وتنقلب الآية بالأخير لما هو متفق عليه ..



شرقاوي هلالي 20

الكسار كإمكانيات .. هو من أفضل الحراس بالمملكة ولا أبالغ لو قلت بالخليج ..

حارس جاء للملاعب علشان يصير حارس ..

عنده ردة فعل .. وتمركز .. والأهم من هذا كله .. مرونته كحارس وصد كور في زوايا صعبة .. ومتابعته للكورة حتى لو هي تبي تطلع برا الملعب ..

حارس ممتاز ويستاهل ما يندفع فيه ..

بس ماتوقع يفاوضه الهلال .. مع اني اتمنى ...



هلالي فـ القمه لحالي

أشكرك على مداخلتك أخ هلالي .. ملاحظات تستاهل التوقف عليها ..

الهلال في السابق كان من النوادر أساسا يتعاقد مع لاعب من خارج النادي .. لوجود لاعبين طالعين من النادي نفسه ..

في حقبة التسعينات طلع لك كذا لاعب من أول مباراة لهم كانوا نجوم لين اعتزلوا وتركوا الكورة ..

الكل يتذكر اول مباراة لعبها نواف التمياط مثلا .. أو أحمد الدوخي .. أو عبدالله الجمعان .. وغيرهم ..

من أول مباراة تعرف ان هاللاعب بيمسك أساسي .. تحسه لاعب مندمج مع الفريق له أكثر من سنة .. ثقة و فن ..

الآن الوهن في المفاوضات في كل الفرق لطمع وكلاء اللاعبين .. كل لاعب مريّح مخه وتارك وكيله يحل ويربط ..

الآن عصر المادة .. لازم تكون حكيم في اختياراتك و دقيق .. اختار لي لاعبين عليهم العلم واجيبهم للنادي ..

واوفر ملاييني لدعم اكاديمية النادي .. وتصعيد لاعبي الشباب والاولمبي .. والبحث عن الموهبة الحقيقية اللي تذهلك من أول نظرة ..

كلامك سليم بس لازم في كل منطقه يكون فيها اقل تقدير لاعبين
وانت عارف الدوري نفسه طويل وتداخل البطولات مع بعض
وغير هذا كله الاصابات الاجهاد مثل ما حصل مع كاستلو
في وقت صعب جدا

بخصوص الجبرين انا بالنسبه لي كـ رايي شخصيا لو جاء الهلال او صعد احد اللاعبين راح نستفيد من لاعب اجنبي يسد مكان كاستلو لاعب طرف يمين يكون مكان سالم الدوسري
لأن المنطقه هذي الجهه اليمنى بالوسط ما اشوف الا سالم الدوسري لا تقول لي عزوز الدوسري
او نواف العابد هذولا لاعبين وسط يسار تغيره او تحطه يمين ما يكون مستواه مثل الجهه الرسمية له .. اذا تبون تدفعون صح لاعب عندك حسن معاذ لاعب يرغب بالهلال من زمان ولاعب دولي وخبره بغض النظر عن العمر لاعب يصنع لك هجمات تسديدات قوية وخطيرة

ظهير ايمن + وسط يمين يساند سالم الدوسري
بالنسبه للحراسه هذا قرارها عند ابو عبدالله سامي الجابر